D'LENMAWI BUNG 5-NA

D'LENMAWI BUNG 5-NA

Ziaktu-Venpuii 

Chaw kan ei kham kan thut dar dar lai chuan ka phone a rawn ri a,u Rintluanga hnen atangin a ni.

"Aw, u Rintluang,"ka thin a su dup dup a,an zin hmasaka thil thleng ka hre chhuak uar uar bawk.

"Bawihpui,aw hei kan thleng tawh aw,"lehlam atanga a rawn tih chuan ka hahdam sawng sawng thei.

"In tluang a maw?"ka lo ti var a,"Aw,tluang e,chaw in ei tawh em?"a rawn ti leh a,"Aw,ei tawh e,"ka ti a, sawi tur vak ka hre lo.

"Junior-a a awm hnai em?"a rawn tih chuan,"Aw,awm hnai e,i be duh a mi?"ka tih chuan,"A pawi miah lo,"a lo ti a,Kion chu enin,"Bawihte, Papa-in a be duh che,"phone pek pah chuan ka ti a,a lo ban rang ngang mai.

"Papa,"phone a benga a chuktuah rual chuan a ti a,"Boy,i thawh hma khan ka zin daih a ngai a,"lehlam a miin a ti a, Kion-an,"Atê-i a awm alawm,mahse Papa lo haw vat rawh aw,"a ti a,lehlama miin,"Tehreng mai,hna kan zawh veleh ka lo haw nghal ang,"a ti a, Kion chu a nui nghak ver ver mai.

Eng eng emaw an inchah a,an inchah hnem khawp mai,"Atê, Papa'n a be duh che,"phone ka hmai zawna rawn ken kan pahin Kion chuan a rawn ti a,ka lo bansak ve vat.

"Aw u Rintluang,"ka benga phone chuktuah ran chung chuan ka ti a,thawm a rik sat sat hnuah,"Bawihpui,"a rawn ti a,a aw chu pa tak a ni,het!eng vanga hetiang ngaihtuahna nei nge maw ka nih teh hrep ni.

"Lo che vak vak duh suh,Kion kha i lo buaipui chawt mai dawn nia,"a ti dap dap a,"Aw le,"ka ti a, a rawn thawk ham ham hnuah,"Anih leh le,"a ti a,a off nghal bawk.

"Atê mu mai mai ang,"a awm dan siam rem chunga a rawn tih chuan,"Khawiah?"ka lo ti let thuai a,"Tah hian,"tih leh sofa chu ben a rual a,a mu pah.

A sirah chuan ka mu a,ka kawngah a kuah ve ran a,mut a duh bawk a,a mit a chhing leh nghal daih a,a chalah ka fawh sak zeuh.

In tih fai ka ngaih loh vangin nilengin kan mu a, keipawh ka muhil tui khawp mai.

Ka phone ri vang chuan chiang lo ruaiin ka harh a,ka en nak chuan Kimi a ni,ka mit chhing chung chuan ka chhang a,"Immm,"thatchhe zeta ka tih chuan,"I mu a mi?"a rawn ti hlut a,"Aw,"ka ti a,ka aw chu zawi tha tak a ni.

"Dinhlua-te fapa kha damdawi inah an kalpui a,"a ti a,"Engtin nge an lo tih?"a thusawi vang chuan ka thu chhuak zawk a,harh chiang tak ka ni.

"A thisen a lo cancer reng alawm,"a ti a,chu thu chuan min deng na ngang mai, sawi tur ka hre lo va,ka hamhaih lutuk vang chuan tawng nachang pawh ka hre lo.

"I la awm em?"a rawn tih chuan,"Imm,"ka ti a,thil dang ka sawi thei lo ka thinah hian min hnawh tup tup mai.

Naupang têin a cancer chu a ni vei tak sia aw...."An admit em?"ka awn chu a khur lek lek.

"Aw,admit e,ka khawngaih reuh lutuk,"a ti leh a,engmah sawi tur ka hre tawh lo,"Lalmuanpui,"a rawn tih leh takah chuan ka harh zawk.

"A val lainatawm reuh ve,"ka ti a,a bak sawi tur reng ka hre lo,hria pawh ni ila ka sawi thei kherin ka ring lo,ka thinah hian min hnawh tup tup a,sawi chhuak lo mah ila ka chhungril erawh na tak a ni.

"I mak e...min chhang ta che,"a rawn tih leh chuan,"Tihpalh ka ngaihtuahna ka lo kawm nasa lutuk a,"ka ti a,"A pa hian a hre tawh ang em le..."a rawn ti a,"Ka hre lo hre tawh ang,"ka aw chu a ri che che chauh a ni.

"Engtin nge i hriat reng reng a?"kan ngawih vang vang hnu chuan ka ti chhuak hap a.

"Ka nu'n a sawi a,'Rei a daih pawh ka ring tawh lo'a tia"

Chu thu chuan thu dang zawng zawng ai khan min deng na, naupang khawngaih thlak tak zawng a ni, vanduai tur renga khuanun a siam,nge ni a ti emaw thatna tura a tuar a ngai, chu zawhna chu vawi tam tak ka in zawt a,ka chhân theih a ni hauh lo thung.

"Muani"

"Immm"

"Engtin nge i awm a?"

"Ka hre lo,ka khawngaih e...."ka ti a,a bak ka sawi thei ta chuang lo.

"Dinhlua kha a kal tawh a mi?"a rawn tih leh chuan un thing harhin,"Tukin zing khan a chhuakin ka hria,"ka ti a,a rawn chek tlat tlat a,"A hriat te chuan a lo let leh tho ang,"ka ti a,a hria anih phawt chuan a lo let leh ka ring.

"Nia...."a ti a,sawi tur kan hre lo nge kan nei lo zawk kan ngawi dun rauh rauh a, Kion-a muhil chu ka thlir reng ringawt.

"I la awm em?"a rawn tih leh rual chuan ka lo aw vat a,"Sawi tur i hria em?"a rawn ti heu mai,"Nei tawh bik nang,ka sawi tur neih ang chhun chhun chu ka sawi zo vek tawh,"ka ti a,"E....taka,"a rawn tih chuan ka phu zawk thei.

"Eng nge?Min ti phu lawm,"ka ti a,a rawn nui nasa huah huah khawp mai,a nuih za zual a reh hnu chuan,"Dawr kha ka hmu tawh a,"a rawn ti a,kan sawi zui leh ta miah lo kha a nia.

"Khawiah nge i hmuh a?"ka kuttin sih neuh neuh paha ka tih chuan,"Bazar-ah ania ka nauin min lo hmuhsak a,remchang hmasa berah min va enpui la,"a ti leh a,ka hman chuan enpui pawh a pawi lo ang.

"A pawi hleinem I en dawnah min hrilh la,"ka thutna siam rem sauh sauh pahin ka ti a,kan sawi nasa khawp mai.

"Eng product nge zawrh i rilruk deuh a?"ka tih chuan,"Lakme, Maybelline,Nykaa,Sugar,Colorbar,"tih ang reng a sawi duah a,a sawi hnem lutuk a ka hre seng tawh lo.

"A tawk,ka hre seng chuang lo,"nui tet tet chung chuan ka ti a, make-up ka hmang vak ngai lo a, company i lo hi ka hre em em lo, ngaihsak loh zawng anih vang pawh a ni maithei.

"Nia....i ngaihsak vak lo a,"a lo ti chiah reng a, hmeichhe nâwlpuiin an lawm ang hi ka lawm zawng ani ve lo,a hmingah foundation leh lip gloss ka neih hi chuan ka duh tawk viau a ni.

"I lo thawk duh tak tak angem?"nui kar kar chungin a ti a,ka lo rilruk leh tawh lo reng reng.

"Kim, ka hre lo,hreh chu ka hreh miah lo va,mahse Kion hi...u Rintluanga'n tul a tih tawh loh hunah te chuan ka sawi thei lo va,tih loah chuan kalsan hi ka hreh a,"ka ti sep sep a,a lo hrethiam khawp mai.

"Nia,Kion khan a ngaina ropui che sia,dik tak chuan a nu ang mai alawm i nih,"a ti a,em em hian a(h).

"Em em a che,"ka ti khar khar a,"Bawihpuii kha i ni miau a,"a rawn ti leh a,he mihring kaw chhungah hian eng nge lut ni.

"I zak lo ve chiang e... Laltlankim,hnek i duh em?"ka ti a,nui nasa huah huah tak a ni, rapthlak hian a(h).

"Bawihpui,oii innei daih mai ta che u,"te atia ka biang a sa hut hut leh nghal a,ka dawm vung vung ringawt.

"Laltlankim, pangngai rawh aw,"ka ti chiam a, Kion-a muhil pawh a phu zawk mai.

"Ngawi teh hei ka nu'n min tir leh tawh,dah phawt ang,"a ti a,a off nghal bawk.

Phone kan dah hnu chuan ka thu ar ar a,ka phone ka lek kân rual chuan a rawn ri veleh chiah a, phone screen-a hming rawn lang ka hmuh chuan ka thin a phu dup dup mai.

Ka aw ka thian kharh kharh a, ka biang chu dawm vang vangin ka pick a,"Bawihpui,"a rawn tih leh phei chuan ka thin hi a phu tawh pawn ka hre lo.

"Awh,aw"ka au ti tihin a ni ber,"Junior-a a awm em?"a rawn tih chuan,"Imm hei a muhil a,"ka thu khawnge auh a,ka thin lah chu a sawt emaw tih mai tur a ni tawh.

"A va rapthlak thin ve,"a awah chu a nui lek lekin ka hria.

"Nia"

"Hei hnathawka chhuah kan tum mek a, zaninah pawh kan lo let hman maithei,"a ti a,"Immm,"tih chiah sawi tur ka hria.

"A thawh awm velah ka lo phone leh mai ang che,"tih leh dah a rual a,ka thaw ve ta chauhin ka hria hepa pui hian a ni telin ka ngaihtuahna a luah nia.

Ngaihtuah chhunzawm duh tawh loin Kion chu ka mut that tir a,a mut chhung tiin hmun ka phiat a,chhuat ka nawh lai mekin a rawn harh a,a muhil rei khawp mai.

Ka chhuat nawhna bulah chuan a lo ding ve zel a,a mit chu a khap vei fuk fuk a,a la phak tha hle anih hmel.

"Bawihte,eng nge i ei ang?"a lu a chuksak paha ka tih chuan,"Cake siam ila,"a ti a,sana ka en chuan dar 12 a lo pel awrh a, chokaah luhpuiin kitchen island-ah ka thuttir a,kan mamawh tur ang ang chu ka la khawm zung zung a,a ni'n ka che vel chu min lo en dauh dauh thung.

Hmanrua te chu dawhkanah ka dah zel a,ka mamawh ka lak kim zawh chuan cake chu kan siam tan a,u Rintluanga'n a lo phone leh ka rin vangin ka phone ri ka ngai chang rân bawk.

Oven atanga cake ka lak chhuah lai mekin ka phone a rawn ri a,ka buai tih a hriat vangin Kion chuan a va la a,a rawn let leh rang ngang mai.

Ka phone chu min rawn pe a,caller id ka en chuan number hlang a ni a ka la ve mai.

"Hello,"pawh ka tih hma hma chuan,"Hmeli,ka fapa chunga hian thil tha lo a thleng anih chuan mawh i phur ang tih hre rawh,"a rawn ti tuar tuar a,kx rin dan hi a dik anih chuan Hlimi aniang.

Rin ang ngeiin,"Hlimi duhtawk rawh,ani kan bur bunna chhan tur a awm lo,"an ti a,pakhat-i a ngawi duh hauh lo,"Nangmah vangin kan pa nen kan inthen a,ka fapa tun ang dinhmuna a ding chung pawn titi dun chu sawi loh a en pawh min en duh lo, nangmah vang vek anih hi,"a ti chiam chiam a,ka dawh reng thei ta bik hauh lo.

"A bul tum tu chu nangmah ngei I ni,kei ni loin in nupa inkar ti chhe tu pawh nangmah tho,midang mawhpuh reng reng suh,"ka aw chu kei ang lo takin a chang tha khawp mai.

"Ka thiam loh maw, eng nge ka thiam loh a nihna,"a auin a au a ni ber tawh,"I thiam lo hul hual chu chu pawm mai rawh,dawt hmangin thu kha la kawi lo la chuan tiang hi kan thleng lo ang,"ka ti ve leh a,ka aw ki pawh chu a ring sawt khawp mai.

Kion hmela hlauhthawnna ka hmuh rual chuan ka inthiam leh chiah lo,ka inthlah dul riai riai a,leh lam tawng ka ngaichang ran bawk.

"Ani va tihbuai a ngai lo ka tih kha engkimah eng vanga ani bur bun zel tum nge i nih?"ti tu chu mipa aw a ni a, Laldinhlua ngei a ni.

"Ka zawng ang,ka zawng zel dawn,hlim taka a awm bikna chhan tur hi a awm lo reng reng,"a ti tawn tawn a, rapthlak ti zetin ka ngaithla ta reng.

"Hello,Muani tihpalh lutuk,"a rawn ti a,"A pawi lo,"ti mah ila ka chhungril erawh na tak a ni.

"A pawi alawm,"a ti a, sawi zawm duh tawh loin,"Eng nge naute chu a an?"ka ti ta zawk a,sawi zui zel chuan ka tawt zual mai mai dawnin ka hria.

"Hei,vawiin atangin treatment a ka ang,"a aw chu ngaihthlak hreawm tak a ni,"I kal hman em?"cake buaipui mawlh mawlh chung chuan ka ti a,"Ka tum ram ka thleng hman tep,"a ti a,Hlimi a la au tawn tawn vang chuan biak zawm zel pawh chiin ka hre lo.

"Imm hei ka buai lawk a,dah phawt mai ang aw,"ka ti a,min chhanna pawh ngaichang tawh loin ka off a,"Atê,"Kion chuan a mitmeng fiah kâka min en kal chung chuan a ti a,a hlauthawng anih ka ring.

"Ka hmel hriat mawl deuh ka bia a,a mawl lutuk a,"nuih luiin ka ti a,hahdam huai huai hmel a pu a,a bianga piai sak zeuhin cake chu cream ka telhpui a,rei vak loah chuan a theihnghilh ve mai bawk.

Cake kan peih hnu chuan kan ei a,u Rintluanga'n min la rawn be leh miah lo,an la buai viau anih ka ring.

Ngaihtuah lai mekin dawhkana ka phone dah chu a rawn ri a, caller id chuan ka thinphu a sawi danglam chiang ngang mai.

Ka chil ka lem khawlh a,Kion erawhin a cake ei lai a ei zawm mial mial thung.

Call a tawp dawn awm velah chuan ka la a,"Hello,"ka aw te chu a kir velin ka hria.

"E, Bawihpui, Junior-a chu a la mu a mi?"a rawn ti var a,"Mu lo ve,hei cake a ei a,"tih leh loud speaker on ka rual a,"Papa a mi?"Kion chuan a cake ei lai thial tuam tuam pah chuan a ti a,lehlama mi chuan a rawn au lauh a,a nui nghal var var.

"Papa.... Atê-i nen cake kan siam a,"a cake ken lai ei leh zeuh pah chuan a ti a,"A tui em?"u Rintluanga a ni.

"Tui lutuk,lo haw tawh la..."a ti a,a cake ken lai ngawt chu a buaipui a,a dit leh zeuh zeuh thin.

"Ka lo haw thei tep e,hna kan zo a,zaninah kan lo let leh nghal ang,"a ti a,"Yes....Papa cake ka ei duh, Atê-i hi be mai rawh,"tih leh kalsan a rual a,ka be hreh tlat te chu thil pangngai a ni pawn ka hre lo.

"A va hahthlak e...."u Rintluanga'n a ti nuah nuah ri pawh chu ka hre thei,"Bawihpui,"a rawn tih takah chuan chhan loh theih a ni ta lo.

"Immm"

"Zaninah kan lo haw thei dawn aw"

"Hna in zo tawh a mi?"

"Aw kan zo chiah e,kan rawn zan chhuah ang,"chhan dan tur ka hre tawh miah lo.

"Ka lo thlen hunah thil pawimawh deuh hrilh tur che ka nei a,"a tih chuan ka chil ka lem khalh a,awmpui a ngai tawh dawn lo anih ka ring.

"Eng lam pang?"

"Ka lo thlen hunah le"

"Anih in lo chhuah dawnahin lo hrilh leh la,"ka ti a ka zak nghal chem chem huiha!

"Aw le..ka lo hrilh dawn che nia,"tha tak chuan a ti ve mai a,keichu ka zak rauh rauh,lairil fan chiin ka zak.

Ka off a, dawhkana thu chungin Kion chuan min lo en kar a,min nuih var var bawk.

"Ei teuh rawh aw,"a lu a chul sak hauh hauh pah chuan ka ti a,a lo bu ve lawp lawp mai.

Kawngkhar an rawn kik a,"Tun ang chhunah tunge maw lo kal dawn ni,"ti nuah nuah chungin kawngkhar lam chu ka pan a,ka hawn ruala tar ki ringi hmel ka hmuh chuan ka nui nghal var var.

Hmeichhe naupang hi a pawm a,a hmeltha lutuk ringawt a nu leh a la a chhun fuh hle bawk.

"Lo len in phal em?"nui vun vun chungin a ti a,"Phal loh ten,lo lut ru,"an luhna tur ken pahin ka ti a,nidang ang bawkin a nui leh sang tawh.

"Val senior-an hna a kal daih a,"rawn luh pahin a ti a,"Khawnge midang?"a ti zui zat.

"U Rintluanga chu a zin a,Kion nen chiah kan awm,"ka tih chuan a lo chek tlat tlat a,"A va in dim lo ve,"a ti leh zat."Nia...."tih zawngin ka chhang.

"Lo thu ru aw,"tih leh chokaa luh san ka rual a, Kion chuan cake a lo la ei a, ka nui hak,"Inleng kan nei a,thei tui hi ka thli ang a, cake hi lo va chhawp la,"ka cake zei bang zei mawlh mawlh pahin ka ti a,ka bulah dingin ka zei zawh hun chu min nghak a,ka pek hnu chuan sitting room lamah a phei a,thei tui chu thli sawk sawkin ka phei ve thuai bawk.

"Kha in ang,"a bula thut pahin ka ti a,"A ngai lo asin,"a ti a,"Ngai e,"tih leh a hmaa chhawp ka rual a,a fanu chu a bulah a thut tir leh rih.

A fanu lah chu a hmeltha khawp a,a vun a nung sarh a,a mitmeng chu a buang lek lek a,a sam a uk tle siau bawk.

"Midang an zin vek sia, Bawihtei nen chauha awm ka peih si lo va,"a thei tui ken lem zeuh pahin a ti a,"Lo leng ziah rawh, kan pahnih chauhin kan awm thin a,a khaw har thlak..."Kion-a lo kal ban pah chuan ka ti a,Kion chu ka pawm nghal thak.

"Ka chhuak thei thin lo a,val senior-a a awm loh hi chuan ka nu te bula awm tam hi ka duh ve bawk sia,"a ti nuah nuah a,an pa hi 'val senior-a' tih ngawtin a au a,an inngaihzawn lai hi ka hre chak.

"Tu nge i fanu hi a hming?"tar ki ringi en paha ka tih chuan,"Ramdinmawii,"a fanu sama chul sak heuh heuh pah chuan a ti a,a fanu chu a bu lawp a,a muthlu anih hmel.

"Ka duat,oiii i muthlu a law?"nui tut tut chungin a fanu chu a pawm a,a awmah a bei tir bawk.

"Ni zanah dar kar thum chiah a mu a,"a ti a,"Ngati nge?"ka lo tih chuan a nui kur kur a,"A pa nen chhunah an in awm a,dar 12 vela an mu kha dar 5 velah an tho chauh a,zanah an meng rei lutuk,"a ti a a nui kur kur mai.

Kan titi tui tan dawn chauh tihah kawngkhar chu a rawn in hawng rawk a,sam sen-i chu a rawn pen zân zân a,analh thlawt mahse a mizia hi a huatthlalaawm ka ti.

"Bawp hi chu a nei sei tha maw le,a khâpin a rawn khâp lut a ni ber alawm,"ka bula mi chuan a rawn ti a,ka inring hman lo reng reng ka nui phuh thawh mai.

Sam sen-i chu a hawi kual vut vut a,min rawn hmuh chuan a ner vei sak hmm hmm lo ner vel mai mai teh se.

"I hria em ni?"tar ki ringi en paha ka tih chuan,"Hre tehreng e...val senior-a leh Rintluanga te nen hian college an kal ho thin,"a ti a,"Tunge a hming?"a lama inher chunga ka tih chuan,"Cindy anih saw,Wendy nen an la inhre tha em em zui a,a rawn inti thu thei ngawt lo maw Rintluanga te nen an thawk ho sia,"a ti hmarh hmarh a, ka lo nui tawi tak.

"Tunge Wendy chu?"zawhna mitmenga en chung chuan ka ti a,inchung lama pen chho thawm ka hre zui zat.

"Val senior-a bialnu hlui maw le..."

"In kara hrang nasa deuh kha maw?"

"Ni chiang e maw le....ih e hmu ve la chuan i ngei ve tho ang,"a ti leh hmarh hmarh a,a hmel atang chuan a ngei tih hai rual a ni lo,ani meuhin a ngei chu a ngeiawm ve thaw khatin ka hria.

"A hrang nasa viau em ni?"nui heu chunga ka tih chuan,"Hrang e maw le, rapthlak lutuk,kan inruk chhan pawh Wendy kha ania,val senior-a thiante ina kan len tumin a rawn kal ve a, ngeiawm deuh deuh khan min tawngkhum a,ka thinrim kha val senior-a hi haw puiah ka sawm a,kan ruala haw te kha a tum a,ka thinrim lutuk ka haw tau a,zanah min rawn thlem a,kan inru daih,"a ti a,min ti nui nasa ngang mai.

"I chhungte an thinrim awm?"khur chawr chawr chunga ka tih chuan,"Thinrim vak lo,val senior-a pu leh ka pu hi thian an nia,an phur lutuk zawk,"a ti a, amah chu a nuihza za ah a tang a,a nui nasa lutuk ringawt.

Inchung kailawna rawn pen thla ri kan hriat chuan kan inen nghal zawk a,"In va bengchheng ve,em em cheu hian,"Cindy chuan a rawn ti that a,tar ki ringi a ner sawk.

"Thu lo ve e..."a tih rual chuan step ami chu a rawn ter tha ang reng khawp mai,"Min lo hrethiam lawk,eng maw I sawi a?"keimah zawk min en pah chuan a ti a,kei ka lo ner sak.

"He lamah,keimah zawk aw,"ka bula mi chuan a ti a,sam sen-i a meng rum tha al al khawp mai.

A inher sawk a,a sam then pawh lawn chung chuan a kal a,inchung lamah bawk a chho leh tain ka hria.

"Engtikah nge Rintluanga a rawn haw dawn?"tar ki ringi'n a tih chuan,"Zaninah aniang,"ka lo ti var a,Kion ka en chuan a lo muthlu leh thân tawh.

"A lo haw hma chu khipui khian a lo nghak ang a...."a ti nuah nuah a.

"Ngati maw?"

"E le... Rintluanga hi a kherh alawm,"a lo ti thên a,"A kherh a?"ka zawhna vang chuan a nui a,"Kherh tih piah lam,thei phei se chuan a pum hian a dawlh daih tawh ang,"a ti leh a,a nui kur kur mai.

Kei erawh awm dan ka thiam lo,ka awm dan chu ka hriatthiam piah lam a ni,"Eng nge i ngaihtuah a?"a kut ka hmai zawna rawn vai pahin a ti a,ka lo nui tawi tak ringawt.

"Engmah ngaihtuah lo ve,"ka ti tak nain ka ngaihtuah a ni,u Rintluanga hian a duh ve ang em tih mawlh chuan min mawlh a,ka awm a nuam miah lo,kei hian u Rintluanga hi ka duh chiang alawm thil tih chi erawh a ni hauh lo.

Dar 3 velah an haw a,Kion pawh a lo harh leh tawh a,t.v. a en a,sam sen-i erawh a rawn chhuk thla leh tawh lo a,keiin ei rawngbawl ka tan thung.

Chaw ka sil lai mekin u Rintluanga call ka dawng a, ka thin chu a su leh dup dup tawh.

A ngai tein ka nghak leh tê tê a,ka lak rual chuan,"Bawihpui,"a tih ri ka hre zui leh zat.

"Aw"

"Hei tunah kan lo chhuak dawn aw,"a rawn ti a,sam sen-i a awm tih chu ka hrilh duh ang em aw(h)....ka tih rauh rauh laiin,"Cindy a lo kal tawh em?"a rawn ti a,a lo hre lawk anih hmel.

"Aw, inchungah a awm,"ka ti sep a,"Hna khawih tur kan nei a,rawng lo bawl kep mai ta che,"a ti a,ka va han phur lo mai mai tak.

"Aw le,"ka ti ve thei hram a,ka phur mawlh lo a ni,"Junior-a a awm em?"a rawn tih leh vang chuan off ka tum chu ka thulh leh riai riai.

"Aw,t.v. a en a,"ka ti a,"Imm anih chu...dah phawt mai ang aw,"a ti a,chhang tawh loin ka off ta hmiah.Rawng chu ka bawl a, ka mood a uih vekin ka hria.

Ka awm dan hi ka hrethiam lo,a hreawm tiang hian ka la awm ngai miah lo bawk,tuna taka hetia ka awm hi ka hrethiam lo a ni.

U Rintluanga chu dar 6 pelh hretah a lo thleng a,sam sen-i pawh a rawn lawr thla rang khawp mai,Kion lah chuan nuam an ti khawp a,apa thil hawn te chu min hmuh a,a nui var var bawk.

Chaw kan ei a,chaw ei chhung zawng chuan Cindy-in u Rintluanga a be char char a, Kion-an min biak leh u Rintluanga'n thil min zawt tih bak chu ka tawng lo.

Chaw ei kham chuan inchungah an pahnihin an chho a,ka ngaihtuahnaah thil dang a leng tawh miah lo 'Inchungah chuan eng tak han ti ang maw...'ka tih rilruk laiin ka phone a rawn ri a,ka en chuan Kimi a ni.

Sawi tur a rawn ngah leh ang chu aw....phone chu ka pick a,a thu rawn sawi vang chuan ka thin a sa pup pup a,a na vawng vawng.

"Muani, Dinhlua-te fa chu a kal chiah,"a rawn ti ta mai a,ka na vawng mai,eng nge awmzia... naktuk atangin treatment an la dawn a,mahse tunah lem ani chu a kal leh ta mai si.

"Dinhlua hi i rawn tawi awm ve dawn em?"a zawhna chu ka chhang lo,ka kalna chi niin ka hre chiah lo,hmani lawkah keimah avangin an nupa an buai a,chuti chunga lo va kan chu a mawi ka ti lo a ni.

"A mawi dawn lo emai tawi awm lo mai ang,duh leh nakinah ka la ral ve mai ang,"ka ti a,a lo hrethiam khawp mai.

Ani erawh in thenawm lawk an ni a,thalai a la ni vei nen thinpui lum te a ngaih dawn vangin a kal dawn thung.

Kan dah hnu chuan Dinhlua chu tawrhpuina thu ka thawn a,phur loh sa nen min ti phur lo zual khawp a, ka phone chu ka hum leh ringawt thin a,awmzia avan nei thui lo ber mai tak aw....

Inchung atanga rawn pen thla thawm ka hriat chuan ka hawi chhoh chuan u Rintluanga hmel ka hmu zat a,a hnungah Cindy-in a zui bawk.

"Bawihpui,lo la mu suh aw,Cindy hi ka va thlah lawk ang,"a ti a,an pahnih chuan an inzui chhuak a,an kal liam chu ka en reng a,ka thaw chhuak hak.

"Papa kha khaw nge a kal dawn?"Kion chuan a rawn ti a,"Sam sen-i kha a thlah dawn,"ka ti a,min enin,"Anu Cindy kha maw?"a lo ti a,ka lu ka lo buk khum a,engmah a sawi zui lo.

Ka message tone a rawn rik chuan ka en vat a,Dinhlua message a ni.Ka open vat a,ka kal ve dawn leh dawn loh min lo zawt a ni.

"Ka lo kal lo mai ang,u Rintluanga zin a lo haw ve chauh bawk sia,"tih chu ka thawn a, ka phone chu ka dah zui bawk.

Dar 10 a pelh tawh hnuah pawh u Rintluanga chu a rawn la let lo va,Kion a mut a chhuah tawh vangin ka mutpui a,la mu lo tur te khan min ti vel a,sam sen-i bula a awm nghak tur ka ni lo chiang ve emai.

Ka phone a rawn eng zak zak a,ka en chuan amah a ni,kawngka kha ka kalh a,a lo haw tawh ang a a lo lut thei lo anih ka ring.

"Hello,"ka aw kiah chuan lungawi lo aw ki a lang a,thup ka tum lo,"Bawihpui,ka lo thleng tawh a, kawngkhar hi a in kalh a,"a rawn ti a, thaw halhin,"Ka lo hawng ang,"ka ti a, tho chhuakin inhnuaiah ka chhuk a, kawngkhar ka pan ding nghal bawk.

Ka hawn rual chuan u Rintluanga hmel ka hmu zat a,a luhna turin kawng chu ka kian a,a rawn luh rual chuan kawngka chu ka khar a,ka kalh bawk.

"I lo la meng em ni?"a tih chuan chhang lovin ka lu ka bu a,a in thiam loh hmel ta khawp mai.

"Tihpalh lutuk,"a ti sep a,ka inthiam ta bik chiah lo,an awmpui ka ni a,a laka ka thik thu vang mai mai a hmel hlim lo hmuh tur ka ni lo, inngaizawng pawh kan ni êm lo va,insiam that ka ngai a ni.

"Thil sawi dun lawk ang,"a ti a,eng thil pawimawh nge ka bulah hian sawi duh a neih ang le...."Imm,eng chungchang?"a mita en paha ka tih chuan chiang zetin min en a,a ka a ang hman zuau a,a phone a rawn rik vang chuan a tawp leh rih.

"Hello,"a aw chu a dam dap mai, lehlama mi chuan eng nge a rawn sawi ka hre lo min rawn en zawk a,call an tih tawp hun chu ka lo chang ran bawk.

An dah hnu chuan min rawn enin,"Dinhlua-te fa kha a thi a mi?"a rawn ti a,ka lu ka buk rual chuan kal mai a tum a,"Sawi tur chu,"ka lo ti a,"A ngai tawh lo,"ti nghatin a chho nal nal a,ka ham haih hle ringawt.

Chumi zan atang chuan ka biak loh chuan min be ta mang meuh lo va, engmah ka hrethiam tawh lo, Kion erawhin min nel ngaiin min nel reng a,zan khat danah ka bulah a mu a,ka bula a mut loh chang chuan a khawhar thlak duh thin khawp mai.

"Vawiin chu ka hruai hman dawn lo va,i lo va hruai mai dawn nia,tlaiah Cindy a lo kal ang,"a ti a,a car dahna lam a pan a,Kion nen kan inkai chhuak bawk.

"Bye bye aw,"kan zawna u Rintluanga a rawn din rual chuan a ti a, Kion chu car-ah ka hlang a,a kut chu a rawn vai ve lawp lawp a,u Rintluanga ka va en chuan tak run hian a hmalam chu a en ding ngur a,min be peih lo na na na ka biak reng bikna chhan tur ka hre lo.

An kal liam ka thlir hnu chuan inchhungah ka lut a,in ka tifai a,tlaiah Cindy a rawn kal dawn tih ka hriat vang nge ka che te chu nidang ka ang lo ka inti.

Kion hruai tura ka va kal chuan ka thin thawng dawt thei thu ka hria a,mak ka va han ti tak.Kion chu naupang pakhat nen an lo insual a, principal office-ah min lo nghak a ni.

"A chhungte a mi i nih?A pa kan lo phone a,"an zirtirtu ni awm takin a rawn ti a, Bz-i hmel ka hmu miah lo.

"A pa i phone,"ka sawi lai mekin ka phone a rawn ri a,caller id ka en chuan u Rintluanga a ni,ka chhang vat a,"Kion I lam tawh em?"a rawn ti a,"Office lam kan pan mek,amah tak chu office chhungah a awm,"ka ti a, ka kal pah zel bawk.

"Hei ka rawn kal mek,"tih leh dah a rual a, phone chu rum zetin ka melh ta ringawt....tih theih dang nei mawlh hek lo le.

Office-ah chuan kan lut a, principal ni awm tak hmaah chuan mipa leh hmeichhia hi an lo thu a,a hmeichhia zawk chuan mipa naupang hi a pawm a,chhungkua an nih ka ring.

Kil khatah Kion chu a lo ding a,a kun vei chhal a,ka na vawng vawng theiin ka hria,a hmela inthlahrung hmel chu ka hmuh hmaih hauh lo.

Ka va lut chu min lo en thap a,ngai pawimawh duh loin Kion lam chu ka pan a,a hmaah chuan ka kun hniam a,a rawn dak chhuak leh mitmeng kher chu hmuh a va han hreawm tak.

A mittui a tling par a,a kutin a tie chu a khawih neuh neuh a, ka awmah chuan ka kuah thak.

Ka kuah rual chuan chhuak em em mai hian a tap a, ka thinrim lutuk chu ka sa pup pup thei.

"In nau kha in zilh ve ngai lo a mi?"a hmeichhia zawk chuan ngeiawm zetin a rawn ti a,ka chhang lo.

"Ti nge in insual a Bawihte?"dam dapa ka tih chuan,"Atê,'Nu pawh i nei ve lo' min tia,"ka awm zawn atang chuan a rawn phun sap sap a, ka in hum ruh teuh.

A tah leh tak hluam hluam ah chuan pawm kangin ka dinpui a, hmeichhia zawk chu enin,"In fapa zawk hi a bul tum tu ava nih hmel ve,"ka ti a, ka insehruh tun mai.

"Huh! min lo hrethiam lawk i sawi nawn leh thei em?"min tham lohna chu a ti lang chiang viau a ni.

"In fapa kha tawngkam mawi lo zirtir la chuan tiang hi a thleng miah lo vang, buai lohna turah kan buai phah hrep leh nghal a,"ka ti ve ta sak a,a ngawih liam mai ka rin laiin,"Nu nei lo tih mai mai,dawt a ni em ni?Thudik a sawi alawm ka fapa hian,"a ti a,a zak lo ka ti.

"Nu maw?Nei e,nei tehreng mai,"ka ti chiam a, rapthlak min ti eng ang mahse ka pawi sa lo,"A nei lo tih te chu kan hre chiang lutuk,"a ti leh a,"In hre tawk lo anih chu,"ka ti leh hmak.

"Anih,nu a nei anih chuan min han hmuh la,tunge a nu chu?"a ti leh a,"Keimah, keimah hi a ni chu ka ni,"chu thu chu eng vanga ka ka atanga chhuak ve hlawl nge anih ka hre lo.

"Dawt kha chu rawn sawi lo mai rawh,a nu i ni lo,"a ti leh vei hmak a,"I hre thelh ve chiang hle mai maw,kei hi a nu ka ni,"muangchang leh fiah tak chuan ka ti a, ka sawi lai mekin u Rintluanga a rawn lut a, ka thla a muang ve nghal huai huai.

Kan lamah chuan a rawn phei a, ka bulah a rawn ding bawk."Eng nge thleng?"min rawn en zawkin a ti a,"I fapa hian ka fapa hi a lo nghaisa maw le,"a va han zak thei lo chiang kuang e aw....

"Thil awihawm loh tak anih chu,"u Rintluanga aw chu chang tha tak a ni,"Pu Rintluang,lo thu lawk ula,"principal chuan a ti a,u Rintluanga chuan min kaiin thutna lo awmah chuan min nawr thu a, ka sirah a rawn thu thla ve nghal zat.

Kion chu ka pawm tha a,a pa hmel a hmuh chuan a men deuh a, ka awmah ka kuah leh vat.

"Kan lo koh chhan cheu chu in hria ang a,in fapa hian engmah a sawi ve duh si lo va,"principal chuan a ti dap dap a,Kion chu enin,"Bawihte,lo dak chhuak lawk teh le,"ka ti a,thuawih tak chuan a rawn hawi chhuak a,"Junior,ngati nge in insual le?"a fapa mita en ran chungin a ti a,Kion chuan ka bula a sawi ang chiahin a pa bulah chuan a hrilh a, principal chuan uluk fe mai hian a lo ngaithla a,u Rintluanga erawh a thinrim hmel hle,a beka thisen zam te chu an pawng tawlh tawlh.

"In fapa thiam loh hi a va nih ta hmel ve,"principal chuan a ti a, naupang nu chuan a lo pawm lo nasa mai.

"Dawt a sawi lo,"tih tanin a tang a,ka dawhthei leh ta chiah lo,"Ka sawi tawh kha,a nu chu keimah hi ka ni,"ka ti a,rum zetin ka en a,a ngawi dâk tawh.

"Anih chuan....pi Din ngaihdam in dil mai a ngai ang,pu Rintluang,nangni pawn lo hrethiam hram mai ru,"an principal chuan a ti leh zat zat.

"Ngaihdam kan dilna chhan tur a awm lo,an fapa hian ti khawp hian kan fapa hi a lo nghaisa a, ngaihdam kan dil bikna chhan tur a awm lo,"a ti leh par par a,a la zam miah lo leh zahna a nei miah lo chu mak ka ti.

"Ngaihdam in dil lo anih chuan school atanga hnawhchhuah in ni ang,"principal a ni.

"Eng emaw sawi ta che,"a bula a pasal ni awm tak thu chu a darah a va khawih sak a,keini erawh kan ngawi reng.

"Ni e, ngaihdam chu kan dil tur alawm,"a rawn ti a,a hmeichhia zawk chu a lungawi lo kher mai,"Eng maw I sawi a?"a ti tuar a,an pa zawk chu a ngawi hmiah thung.

Chutah mipa chu kan lam a rawn hawi a,keini pathum chu min rawn enin,"Kan thiam loh a ni,min ngaidam hram rawh u,"a rawn ti a,a nupui erawh a lawm lo zual ngang mai.

"Dawihzep pa,"a pasal chu a vin khar khar a,a nasa ka ti.

"Heta buaina siam hi khap a ni, ngaihdam in dil duh lo anih chuan....in fapa hi school danga in admit mai a ngaih ka ring,"principal chuan a ti nghet charh a,a hnial ngam ta bik lo nge ni,"Kan tihpalh,"kan lam hawi chuan a rawn ti a,u Rintluanga chu ding vutin min kai a,min chhuahpui nghal hlawk hlawk.

A pen hlawk hlawk a,Kion ka pawm bawk si a,ka pen chak thei lo,a hmuhin min hnuk a ni ber.

"U,u Rintluang,"ka ti a,a rawn inher vut a,min rawn en zawkin ka awm dan chu a hrethiam nge ni muangchang chuan a kal a,ka kut a vawnna erawh a thlah lo va,ka hmui ka pet a,ka thin erawh a phu nasa el tiang.

A car bul kan thleng a,car chhunga hmeichhe lo awm ka hmuh vang chuan ka kut ka thing thla nawk a,ka hmaa mi chu a rawn leh hawi tih ka hria,ka en duh lo lui ve tlat.

Kion chu pawmin back seat-ah ka thut pui a,Vanlalcindy chu a rawn leh hawi zawk a,u Rintluanga pawh a rawn lut a,a tia a tua mah chu kan inbe lo.

Kion chu a ngawi reng a,a rilru na hmel chu hmuh nuam a ni lo,ka pawm nghet sauh sauh a,a rawn hawi chhuah chang chuan nel awm thei ang berin ka lo nuih a,min kuah nghet khawp mai.

"Engtin nge an lo tih a?"rei ngial kan ngawih hnuin Cindy chuan a rawn ti a,u Rintluanga chhan turah ka dah deuh hmiah.

"An lo chhaih aniang,"u Rintluanga chuan a ti a,Cindy'n,"Engtin?"a lo ti leh a,ka ning a tawng hi ka rui dawnin ka hria.

"A nu chungchangah,"u Rintluanga tawng chu a bul tha ang reng khawp mai,a ngawih liam mai ka rin tawh laiin u Rintluanga kut chu a vuan a,"Kion hian nu a mamawh,"a ti no vei duai a,awmze nei zetin u Rintluanga chu a en bawk,huh!thui thui thui thui thui,tenawm hlek hluak mang nge

U Rintluanga chuan a kut chu a la san hmak a,Cindy chu a thu tha ve mai bawk,mi pangngai anih chuan a zak ve kher ang le.

In kan thleng a,Kion chu ka pawm thla sawk sawk a, kawngkhar chu hawngin inchungah ka chhohpui a,nizan ka mut that vak loh vangin ka mut chu chhuak tak a ni.

"Inthlak lawk ang aw,"ka room-a kan luh rual chuan ka ti a,"Aw le,"tih zawngin min chhang a,a ngui bur bawk si a,kan han in kuah leh rih.

Ka kuahna thlah a a hmel en ka tum chu a rawn tap chhuak hak a,"Ti nge Bawihte?"ka zawhna chhanna erawh ka hriain ka hria,ka naua hi a rilru a na chiang alawm,ni e,nat lohna chi pawh niin ka hre lo.

"Atê,"a ti leh thin a,a insut hlawp hlawp bawk si a,a sama chul sak tih loh chu tih ngaihna ka hre lo,ka lung a ti chhe lek lek mai.

Rawn dak chhuakin,"Mama chuan kei aiin zu a duh a, Atê nang chuan zu i duh lo zawk tiraw?"a rawn ti a,ka lainat lutuk.

"Thil dang zawng zawng aiin ka duh zawk che Bawihte,"a bianga chulin a chalah ka fawh sak a,ka bianga ka mittui rawn luang chu ka hre reng tak nain ka ngaihtuah lui a, he naupang hian eng vanga hetiang taka hreawm hi hmachhawn bik nge maw anih le.

"In inthlak,"u Rintluanga'n chuan a rawn ti dut a,kan lo awm dan vang chuan a tawng zui lo.

Ka mittui chu a hmuh loh lamah ka hru zeuh a,ka hawi chhuah leh chuan ka bulah a lo thu reng tawh.

"Junior,i tap a mi?"a fapa bianga rawn dawm chung chuan a ti a,Kion chuan a chhang lo.

"I tap ve em ni?"min rawn en zawkin a ti a,ka lo pha mawlh mawlh a,a awih chiah lo a ih hmel.

"Boy,tah tawh loh tur aw,"a fapa chu a rawn ban a,Kion chu a kal duh miah lo,min kuahna chu a tinghet leh salh thin a,u Rintluanga a thaw hak.

"Boy,tap tawh suh le,"a samah a rawn chul sak leh a, Kion-a taksa khur dat dat ka feel rual chuan a la tap tih ka hre thei.

"Bawihte,tap tawh suh le,tap tawh lo la, kan leng dawn nia,"ka ti a,u Rintluanga'n min rawn en zawk a,a hawi san leh vat thung.

"Bawihte,"ka kuai a,a rawn hawi chhuah chuan a mit a sen ram a,"Leng ang aw,"nuih luiin ka ti a,intih harh a mamawhin ka hria.

A lu a rawn buk chuan thaw hakin,"Form hi phelh lawk ang aw,"ka ti a,a tah leh hma chu chuhin ka thlak sawk sawk a,u Rintluanga chuan min lo en mawl tawp ringawt.

Ka thlak a,"Rei lo te ka va chhuah harh pui lawk ang aw,"ka tih chuan a lo bu nghut a,a fapa chu a en reng a,a rilru a nat hmel riauin ka hria.

Kion nen chuan room atangin kan chhuak a, inhnuaia kan chhuk chuan choka atangin Cindy a rawn chhuak a,kal pelh ka tum laiin,"Hey,nang kha coffee min va siam teh,"a rawn ti a, ka va han siam awm lo tak.

"Ka hman lo,"tih leh Kion chu kaiin ka chhuahpui a,"Khawiah nge kan kal ang?"Kion-an a rawn tih chuan,"Khawiah nge i kal duh?"tiin ka zawt let a,a inngaihtuah vang vang hnuah,"Ka hre lo,"a rawn ti a, ka nui hak.

Kalna tur em em pawh nei lo chuan kan tei kual a,a mood pawh a inthlak tanin ka hria.

"Haw tawh mai ila,"pawm kan pah chuan ka ti a,"Aw le,"a tih takah chuan a biangah fawp zeuhin ka kalpui a,thui ka kal hman lo,tu emaw hi ka su chawrh a,"Ka tihpalh lutuk,"ti a ka hawi chhuah chuan hmeichhe pakhat hian min lo nuih var var a,"Ka tihpalh,ka kalna ka lo en lo a,"a ti a,ka sut zawk a ni reng sia.

"I na em?"a tih lai mekin a hnung atangin,"Rinzual,Zothana thlana dah tur pangpar kha i theihnghilh a,"hmeichhe pakhat chuan rawn tiin pangpar hi a rawn pe a,"E...oiii ka lo hre tawh miah lo a,ka lawm lutuk aw,"a ti a,a nelawm thlawt.

Kei chu min rawn en lehin,"Khawiah nge in kal dawn a?"a rawn ti leh a,"Kan chhuak lawm a,hei kan haw dawn chiah,"nuih letin ka ti a.

"Khawiah nge in haw dawn?"a lo ti leh a kan hawna tur ka hrilh chuan,"Ka kalna tur ve tho alawm, taxi la ila,"a ti a,lak ka tum ve lai tak ania ka pawi ti lem lo.

Taxi rawn tlan chu a lo phar a, back seat-ah chuan kan lut a,kan titi ve bawrh bawrh a,a fel reuh khawp mai.

"I fapa a mi?"Kion bianga rawn piai pahin a ti a,ka chhanna chu Kion chuan a lo ngaichang ve ran a,"Ni lo ve,an awmpui ka nia,"ka lo ti thuai a,a lo bu nghat nghat a,"A ngaina hle che anih hmel,"a ti a,"Chutia mi?"tawi tea nuih paha ka tih chuan,"Tehreng,nufa in ni lo tih a hriat miah loh,"a ti a,ka nui ringawt.

"A hmeltha reuh lutuk,"a rawn ti a,"Tu nge i hming?"min rawn enin a rawn tih zawm zat,"Lalmuanpuii,nang zawk,"ka lo ti ve thuai a,min nuih sen senin,"Lalrinzuali,"a ti a,Kion chu en ve lehin,"Nang tu nge i hming?"a ti a,Kion chuan,"Kion Lalremruata,"a lo ti a,a biangah a piai sak zeuh.

"Khawi hi nge in in?"a rawn tih leh takah chuan ka hawi chhuak vat a,u Rintluanga-te in chu in hnih chiahin kan lo la thleng lo.

Driver chu in kawtah chuan a ding a,ka chhuk dawn chuan Rinzuali nen chuan number te in pe leh tê têin inbe ziah turin kan inthlah a,an tlan liam kan thlir hnu chuan inchhungah kan inzui lut a.

Kan luh chuan inchhung chu a lo reh duak a,inchung lamah an awm em maw ni ka tih rauh rauh laiin Cindy chu inchung atangin a rawn chhuk a,a chhuak nal nal a, kawngka chu a rawn khar sawk a,u Rintluanga nen an inhau anih ka ring.

Kion nen chuan kan inthlak a,"Ka mut a chhuak,"a tih vangin khumah ka muttir a,kei erawh rawngbawl turin inhnuaiah ka chhuk san thung.Kan haw hnuin u Rintluanga hmel ka la hmu leh lo.

Chokaah lutin chaw ka chhuang a, fridge-a bawngsa chu la chhuakin kan turin ka chan a,ka chan zawh chuan thirbel chu lain kan turin ka siam a, cabinet hawnga chi bur lak mai ka tum chu ka ban pha leh ta tlat lo,ka hman chang hi chuan a hniamah ka dah mai zel a,u Rintluanga'n a hmang anih ka ring.

Ka ban fuh dawn chiah tihin ka hnunglam atang hian min rawn ban khalh a,ka inher chuan u Rintluanga ka hmu zat a,ka thin phu chu a mumal leh thei ta meuh lo.

Chi bur chu a rawn la chhuak a,ka sirah chuan dahin a inher a,a kal leh nal nal.