D'LENMAWI BUNG 2-NA

D'LENMAWI BUNG 2-NA

Ziaktu-Venpuii 

Dar 6 velah ka harh a,Inrinni a ni a,Kion school kal a ngai lo va, u Rintluanga chiah anih hmel.

Tho vatin inhnuaiah ka chhuk a,chaw chhum siamin alu chu kan turin ka siam a,kan mai ka tum chu chi burah chi a lo awm miah lo.

Cabinet chu ka hawng a,a sang laiah chuan chi chu a lo la awm a,thei leh thei lo chuan ka ban taih taih a, lak ka tumna lamah ka nawr lut zawk a,an cabinet sang lutuk hi chu aw...

Chair chu la ta nge ngein ka dawh a,chi chu la ve thei hramin rawng ka bawl zawm a,u Rintluanga chu chokaah a rawn lut a,"Kan junior-a chu a la tho na nge?"a ti a,"Ala mutui khawp mai,"ka ti a,"Vawiin chu lo va bazar pui la,Inrinni te a ni sia,"a ti a,"Imm,"ka ti a.

Inchung lamah a chho leh nghal a,an lo chhuk leh chuan Kion a rawn pawm thla a,min hmuh chuan,"Âte,bazar ang,"a lo ti var a,nui chunga lu buk khum nghatin,"I mutui em?"ka ti a,"Tui lutuk,"a lo ti ve mai.

"Thingpui I duh em?"u Rintluanga en chuan ka ti a,a lu thingin,"In rih lo vang,"a ti tha ve mai.

Chaw kan ei a,kan ei kham chuan u Rintluanga pawh a chhuak a,Kion nen chuan kan insiam a,kan nui thler nasa khawp a,he naupang bula awm a nawmzia hi chu aw...

Kan insiam zawh chuan taxi-in bazar lam kan pan a,Kion chuan ka kut chu a hum ve ran a,min rawn enin mawi deuh hian a nui a,a samah chuan ka lo chul sak heuh heuh.

Bazar kan thleng a,chawhmeh en hmasak thaa ka rin vangin chawhmeh ka enpui hmasa a,Kion chuan ka kut a hum ran a,dawr nghaktu te lah chuan an han lawm khawp a,an biak chuan felfai takin a chhang mai zel.

A toys tur kan lei laiin ka phone a rawn ri a,ka en chuan u Rintluanga a lo ni,ka pick vat a,"Hello,"ka tih rualin,"Aw,Muanpui,"a rawn ti a,"Aw,"ka lo ti ve var bawk.

"In haw tawh em?"a rawn ti a,"La haw lo deuh hei a toys tur kan en kual a,"ka lo ti a,"Aw anih chu hei ka thianpa te nupain chaw ei an lo tum a,rawng lo bawl kep la,"a lo ti a,"E..aw aw le hei kan haw thei chiah e,"Kion chu kaiin call kan ti tawp a,"Papa a mi?"ka bula mi chuan a rawn ti a,"Aw ni e,"ka lo ti vat.

Kan haw a,Kion chu a ngai tein ka rawngbawlnaah chuan a lo awm leh rek rek reuh a,a toys a milem ho chu a hming kan phuah dun a,a zai paha a tui khawp mai.

Dar 4 velah u Rintluanga a lo haw a,mipa pakhat leh hmeichhia hian an rawn zui lut a,chaw lo ei turte chu an nih ka ring.

Min rawn au vat a, hmeichhia chu ka en a,a nui sang a,a la upa vakin ka ring lo,"Hei ka thiante nupa an nih hi,"u Rintluanga chuan a lo ti var a,sawi zawmin,"Chuan hei hi ka thianpa Remsanga anih hi police officer,chuan hei a nupui,"a tih lai mekin mipa chuan,"Tar ki ringi,"a lo ti zeuh a,a hmeichhia chuan a sik hlawk hlawk bawk.

Ka lo nui hak a,u Rintluanga pawh chuti tho,"Remsang,Nunsang,hei hi ka nau Muanpuii anih hi,"a ti a,ka nau min ti nia.

"Imm,I dam maw?"tar ki ringi chuan a rawn ti a,"Aw dam ani mai e,nang,"ka lo ti thuai a,"Dam ve tawk tawk e,"a lo ti a,a nui sang bawk.

Sitting room-a an thut lai chuan thingpui ka va pe a,ka pek zawh chuan ka let leh a,rawng ka bawl zawm lai chu dawhkana bawk chungin Kion junior pawh chuan min lo en reng bawk.

Bai ka chawh rawk rawk lai chuan tar ki ringi chu no nen a lo let a,"In in zawh ka la ring lo va,khawi ka lo ti ang,"ka ti a,no chu chhuh rawk rawkin ka sil a,ka sil lai chuan,"Eng nge tih ngai khawi ka lo pui ang che,"a lo ti ve a,"Engmah tih a ngai lo,lo va thu rawh ka ti tak nain kal ta lo chuan a awm ve reng.

Kan titi ve luam a,"U Rintluanga nen in inkawm thin em ni?"tia ka zawh chuan,"Kawm lo ve,val senior-a nen zawk hian an inkawm thin,"a lo ti khauh a,ka bangbo êm vang chuan,"Tu maw?"ka lo ti a.

"Remsanga hi maw le,kan inngaihzawn lai chuan val senior tih hlirin ka ko a,ka ko thang lutuk a,"a ti a,a nui heu mai.

A hmelchhe mawlh lo, tawi lam mah ni se tawi chu a inhmeh viau a,fiamthu a duhin a bula awm a nuam hle bawk.

Kan titi tui zel a,an pa nena an intawn dan a sawi chiah chu nuih loh theih a ni lo,ka nui ve hak hak a,an bawn viau mai.

A kum zat a sawi chuan rin ang ngeiin a lo naupang,kum 23 chauh a lo la ni a,fanu pawh an nei tawh anih hmel.

"In innei hma a ni maw?"nui hak hak chunga ka tih chuan,"Kan inzui rei lo,ka titau a,min rawn thlem a,kan inru daih, college pawh ka zo hman lo,"a ti hem mai a, ka lo nui hak.

"Chu in va awlsam ve,"ka tih chuan a nui uar uar a,"A ex kha kan karah khan a hrang nasa ve thin alawm,"a ti a,a nui huk huk a,a bula awm zawng pum na urhin kan nui reng mai.

"Atê,"Kion-an a rawn tih chuan,"Papa bulah ka phei dawn aw,"a ti a,"Imm,"nui chungin ka lo ti a, chair atang chuan chhuk tharhin a pa lam chu a pan bawk.

Tar ki ringi nen chuan kan titi zel a,an inru an zing tho an awm dan a sawi leh lek phei chuan za tak a ni,"I pu chuan mi hriatthiamna a va ngah ve,"ka ti a,a nui uar uar mai.

"A pu leh ka pu hi an inkawm ngaih lutuk a,a car ka sut tuk chuan zanah an rawn leng a,a thingpui turah chi ka telh a,a in leh reuh si lo va,keiman ka in vek,"a tih leh lek phei chuan pum dawn meuhin ka nui a,ka thaw leh hlawi hlawi thin, ka nui hah ni berin ka hria.

Chaw ei kan peih hnu chuan sitting room-ah kan phei a,ka thu fel chiah tihah Kion chuan ka mal chung a rawn chuh chawt a,a ka lo kuah nghet em em ringawt.

"Avan ngai che,"Tar ki ringi chuan a rawn ti a,ka nui liam mai a,han chhan vak ngaihna ka hre lo.

Dar 7 ruk hma deuhin chaw kan ei a,tar ki ringi nen chuan kan kil rei khawp mai,eina ka seng fel leh lai pawh chuan min lo pui a,ka thleng sil lai lahin ka sirah a awm chawt a ni ber.

"Thil ka hrilh ang che aw,"a rawn ti a,"Aw,"ka lo ti vat,"Ka hmuh che hian Rintei hmu angin ka inngai,"a ti a,amah ka en chuan lungleng hmel a puin ka hria.

"Tu nge chu chu?"ka lo ti a,"Ka thiannu ania a thi tawh a,"a ti zuai raih a,han tih vak ngaihna ka hre hauh lo."I tha em?"ka sawi tur hre lo lutuk chu aw...

"Tha e,"nui chungin a ti a,tawi tein ka nuih,ka khawngaih ang reng viau bawk.

"Number in pe ila,"a rawn ti a, thleng ka sil zawh chuan no.te chu kan inpe a,thutkhawmna pindan lama Remsanga leh u Rintluanga thu chu ka pawh ve bawk.

"Khawiah nge Kion?"a hmel ka hmuh loh vang chuan ka ti a, inchungah a mut a chhuak aniang,"a ti a,"Ka han en lawk aw,"tih leh inchungah ka chho a,an pafa room ka en chuan a lo awm lo va,ka room-ah a awm zawk anih ka ring.

Ka room lam chu ka pan leh a,ka va luh chuan khumah a lo mu bâm a,a muhilin ka hria.Ka ko a min chhang lo reng reng.

Ka kal hnai a,a muhil hmel chu ka en a,a duhawm takzet,puan chu sin that tirin inhnuaiah chuan ka chhuk leh a, sitting room-a ka phei chuan u Rintluanga chauh a lo awm tawh.

"Khawnge a?"ka ti a,"An fanu an ngaihtuah deuh a,an kal ta anih kha,"a lo ti a,ka thlah hman lo chu pawi ka ti ang reng khawp mai.

"A muhil tawh em ni?"a rawn ti a,"Aw a mutui khawp mai,"ka lo ti leh ve var a,"Kar thar lam chu ka zinsan cheu a ngaih hmel riau a,i lo awmpui thei ang em?"a ti a,"Theih lohna a awm hleinem,khaw nge i zin dawn?"ka ti ve a,"Lunglei lamah,"a ti a, ka chhang tawh lo.

"Ka han mu tawh ang nge,"tih leh inchung lamah chhoh ka rual a,mut pahin phone ka hmet kual a,ka rilrua ka pa a lo lan vang chuan call ka tum deuh ûk ûk a,ka hreh leh thin.

Ka phone ka en ngar lai chuan amah zawkin a rawn phone a,ka phurthkak zawk theiin ka hria.

Ka nghah vang vang hunah ka pick a,"Hello,"ka tih chuan,"Aw,Bawihi,I dam maw?"a rawn ti a,"Imm..dam e,nangni eng nge in an?"ka ti a,"Kan tha e,I awmna chu a hreawm em?"a rawn ti dût dût a,"An fel lutuk,"ka lo ti sep.

"Lo haw leh mai la,"a rawn ti a,ka beisei loh tawp thil a rawn sawi vang chuan chhan ngaihna reng reng ka hre lo,"Bawihi,"a rawn tih leh takah chuan ka harh chhuak zawk a,"Haw lo ve,"ka ti a,ka duh aiin ka chhang bung.

"I awm lo a,a reh khawp mai,"a rawn ti a,chhan ngaihna ka hre lo,kan inkar boruak chu a ipik zual zel nimaiin ka hre tawh.

"I lo haw duh anih chuan I lo haw thei reng ania aw,"a rawn ti leh a,"Aw le,"tiin ka chhang a,ka lung a ti leng ve ruih mai.

"Anih mu tawh rawh,"a ti a,ka chhan hma chuan a dah daih a,ka hawi hai ang reng khawp mai.

Ka nu ka ngaihtuah chhuak lo thei lo,ka ngai ka ngai takzet,lo let leh se ka ti,ka beidawn changa min hnem turin ka la mamawh,ka ke pen min venpui turin ka la mamawh a,mahse chelh theih a ni tawh lo.

Ka phone rawn ri ral ral chu ka en a, phone screen a hming lo lang ka hmuh chuan ka ham haih deuh a,ka mittui rawn luang chu hru sawk sawkin ka pick a.

"Hello,"ka ti sep a,"Hello Lalmuanpui,min la theihnghilh em lo maw,"lehlam atangin Laltlankimi'n a rawn ti a, kum hnih hunah pawn a thawven ngaiin a la thawveng reng anih hmel e.

"Theihnghilh em bik lo ve,i dam a maw?"ka ti ve luam a,"Dam rapthlak,nang I dam zawk em?"a rawn ti leh a,"Dam a ni mai e, engtikah nge I lo haw dawn?"ka ti a,"Ka lo haw tawh alawm, naktukah lo len ka tum deuh a,"a rawn ti a,,"Immm anih chu,kei tak phei chu inah pawh ka awm lo,"ka tih chuan a rawn phûl hlut a,"Khaw nge I awm?"a rawn ti a,ka dinhmun min hriatpuia vek thintu a ni a,keipawh engmah ka zep bik lo.

Thil awmzia leh a chhan ka sawi lai chuan a lo chek tlat tlat a,ka sawi zawh rualin,"Ka va han ngei,mahse a tha zawk turah ngai ang,ka lo haw tawh a,Thawhtan lamah inhmuh tum ang,khu lamah kan buai lutuk a,engmah lah hi i rawn sawi duh ngai si lo,"a ti hluk hluk a,ka lo nui ringawt.

Kan inbe rei fû a,kan dah chuan dar 11 a lo hnai thuak tawh.Tlankimi nen hian kum 14 vel kan nih atangin kan inkawm a,ka pa te in atang pawn an in hi a hla lo, Singapore lama hna thawk turin kum hnih liam ta khan a chhuk a,engkim ka hrilh ber thin a ni bawk.

Eng ngati tehreng nge ni,ka lung a leng ve ruih a,kum li liam taa thil thleng ka ngaihtuah chhuah vang chuan ka hnîm ruih a,ka duhsakna hlan tawh mah ila ka la na thar reng chu anih hi,hlim taka a awm tih ka hriat chuan hlimpui ve thin mah ila,a rei ngai lo, keimaha awm khawi lai emaw ber hi a na ngut ngut thin miau a ni.

Ka meng rei khawp mai,zing lam dar 2 velah chuan ka muhil ve thei hram a,ka muhil chu ka harh leh a,dar 4 a lo ri tawh,ka sa deuh huam a,Kion ka khawih chuan a pang a lo sa nasa mai a, tho vatin damdawi ka zawng a,ka hmu eih lo.

U Rintluanga room-ah ka tlan phei a, kawngkhar chu ka beng dawt dawt a, a rawn hawng har lo.Min hmu chu a phawk viau bawk.

"I Rintluang,na chhawkna a awm em?Kion saw a khua a sik nasa lutuk a,"ka ti a,"Maw...?"tih leh ka room lama tlan phei ka rual a,ka um ve vat.

Ka room-a a luh rual chuan Kion chu a va pawn vat a,ka khumah chuan a thu a,a fapa chu duat zet hian a pawm hlu hlu a,"Bawihpui,kan room side table-ah khan damdawi a awm a,va la lawk mai ta che,"a ti a,ehe...Bawihpui min tiin ka hria.

An room lamah chuan ka tlan phei a,side table chu hawng rawk rawkin damdawi chu ka la chhuak a,ka room lam bawk chu ka pan leh a,ka va luh leh chuan Kion chuan min lo zawng anih hmel.

"Atê,"a lo tuau a,a pa pawh a hrilh hai hmel viau mai,"Bawihte,"ti a lo banin,a kut chu rawn phar diaiin ka pawm vat a,ka darah a hmai a phum rawk rawk bawk.

"Bawihte, damdawi ei lawk rawh aw,"ka tih chuan,"Aw,"a lo ti a,a pang sa lutuk chu ka mangang lek lek a ni.

A ei hnu chuan pawm lehin ka awmah a bei a,"Ka lo pawm ang chu,"u Rintluanga'n a tih chuan,"Atê-i bulah,"a lo ti reuh a,na a neih lai pawha a hringtu a pa pawm pawh duh loa kei min thlang chuan ka hnuk a ti ulh lek lek a,he naupang hi chu ka ngaina lo thei ngai dawn lo anih hi.

A hnungah chuan veng thek thekin ka chul a,u Rintluanga ka va en chuan a fapa nena kan inpawm chu hmuhnawm thlir hian min lo thlir a,Kion a rawn dah chhuah vang chuan ka hawisan leh vat.

"Eng nge i duh Bawihte,"ka tih chuan,"Papa va mu tawh rawh, Atê-i bulah ka mu dawn,"a lo ti a,"Ka bulah lo mu zawk la, Atê-i kha i tibuai dawn emai,"a pa'n a tih chuan,"Atê i bula mut i la phal em?"a ti leh a,"Ngah nge ka phal loh ang,"a sama chul pahin ka ti a.

"Chu Papa a phal,"a ti leh zat a,u Rintluanga chuan,"In mu thei lo ang a,"min en chungin a ti a,"Mu thei ang,va mu tawh rawh,ka buaipui thei alawm,"ka ti a,hreh hmel a pu deuh.

"Anih chuan min lo au mai rawh aw,"tiin a fapa biangah a fawp zeuh a,a chhuak zui a,Kion pawh chu a mu sawt sawt a,a sirah chuan ka mu thla a,vawt a tih ka hlauh vangin nghet deuhin ka kuah a,a khur bauh bauh leh nghal a, ka awm a nuam zân lo chu a ni.

Kan harh leh atang chuan ka muhil tawh lo va,Kion chu ka veng a ni ber,a khua a sik nasa si a,ka rilru a nuam thei lo,a lo harh huna lo chhawn nghak tura awm loh kha ka hlau a ni ber.

A lo harh leh ta miah lo va,dar 6 velah chuan inhnuaiah chhukin rawng ka zuk bawl rawk rawk a, ka lu chu a na deuh ngut ngut a,chaw chu chhuangin chair-a thu chungin dawhkanah chuan ka bawk a, ka lo muhil daihbleh nghal.

Chaw si riah chuan phu zawkin ka harh a,a lo ut hman em bik lo ve.

"I va tho hma awm ve,"ka hnung atanga u Rintluanga'n a rawn tih chuan ka phu zawk leh nghal a,"Eh, sorry,"a ti a,in thiam lo hmel ka hmu nghal zat.

"I mut a va chhuah hmel ve,i muhil leh lo em ni?"a rawn ti a,ka lu ka buk khum chuan,"Han mu leh rawh,kan inkhawm theih hmel chuang lo,ka lo ti ang,"tih leh ka bai chawhna chu min chhuh a rual a,"A ngai lo,"ka tih pawn,"Han mu rawh,a hreawm dawn lutuk,"a ti a,"A hreawm loh,"ka ti ve tang tang bawk.

"Han mu rawh,"a tih leh takah chuan ka hnial tawh bik lo,"Anih chuan rei lo te ka han mutpui lawk aw,"tih leh inchung lamah chhoh ka rual a, ka lu a na fuk fuk mai.

Ka room ka thlen chuan Kion bulah chuan ka mu a,ka muhil har lo khawp mai,"Atê,"tih ri ah ka harh a,Kion chuan min lo en kiau mai.

"Na i nei a mi Bawihte?"ka tih chuan,"Nei lo,"a ti a, ka mut chu a la chhuak ngang mai.

"Ka mut a chhuak,"ka tih chuan,"Ti khan muhil la,ka lo veng ang che,"a rawn ti reuh a,nui hakin a biangah ka fawp zeuh a.

"Muhil tawh lo ve,na i la nei em?"ka ti a,a lu a thing nar nar a,"Chhuk ang hmiang papa'n min lo nghak tawh ang,"ka ti a,phur deuh chuan kan inzui thla leh hnak hnak.

Sitting room lama phone hmang ri kan hriat chuan Kion nen chuan kan phei ve vat a,u Rintluanga chuan phone hian tu emaw a lo bia a,a rilru a hah hmel lutuk.

Call a hang up hnu chuan min rawn enin,"Bawiha a dam sam si lo va,ka zin tur kha cancel tir ka tum a,an thei tlat lo,"a rawn ti a,"Ngaihtuah duh suh,ka bulah alawm a awm dawn,"ka ti a, min rawn en zawk.

Inkhawm loin inah kan awm a,vawi hnih lai Kion-a khua a sik leh vei nen u Rintluanga chuan kal a hreh tawh hle a,kal turin ka ti thung,a fapa ania,a ngaihtuah dawn lutuk tho na chu kei ka awm ve reng a,Kion lahin min ngaina em em a,Nilai maiah an lo haw dawn bawk nen harsatna em em awmin ka hre lo.

Nilengin titi pahin Kion nen chuan kan mu a,u Rintluanga erawh naktuk a zin dawn vangin a insiam dawn anih hmel.

Kion nena kan mu chu ka lo muhil leh hman hram pek a,ka harh leh chuan tlai rawngbawl a lo hun leh thet thet tawh.

Kion chu a la mu a, inhnuaiah chhukin rawng te chu ka bawl a, chawhmeh thing rin tur a tam vangin engmah pawh ka siam belh lo.

Choka atanga ka chhuah chuan inchung step chhohna atanga u Rintluanga te pafa rawn inpawm thla chu ka hmu zui zat a,Kion chu a meng phelh phang bawk.

"A khua a sik leh tawh em ni?"ka lo ti a,a mitmeng a dik tlat lo,"A pang a sa leh deuh a, damdawi ka pe leh,"a ti a,Kion chu ka lo en vat a,a mit a nuai chat chat a,a ham bai bai bawk.

"Bawihte,na i nei em?"ka tih chuan,"Aih,nei lo,ka chau,"a ti a,chu chu a mitmeng atang pawn hai theih a ni lo,"Engtin nge niang?"u Rintluanga en paha ka tih chuan,"Naktukah in lo va in entir mai dawn em ni?"a rawn ti a,"Nia,a pawi miah lo,chin hriat hrim hrim a tha,"ka lo ti ve bawk.

Zanah chuan u Rintluanga'n a mutpui ve thung a,kan lo mu dun thang tawh bawk nen a awm lo chu a reh ruih mai.

Chhunah ka mu hnem bawk a,mut chu chhuak lo duh tak a ni, phone ka en chuan Tlankimi message a lo awm a,"Naktukah inhmu ang,"tih a lo ni.

"Naktuk chu Kion entir ka ngai a,"tih ka thawn a,a seen rang viau mai,"A va zia lo ve,anih ni dangah tum mai ang,"a rawn ti leh a,"Imm...nia nidangah rei deuh kan inkawm dawn nia,"tiin ka chhang a,kan inbe rei viau mai.

Dar 1 velah chuan ka muhil ve ta chauh a,rei ka muhil lo inhnuai lama thawn ri bur bur ka hria chuan ka harh kawk a,ka ngaihbel emaw ti a nhaihthah mai ka tum chu a rawn rik leh tak vang chuan ka thu chhuak zawk.

Dim tea tho chhuakin room kawngka chu ka hawng tham tham a,room lehlam atanga u Rintluanga lo chhuak ka hmu zui zat.

"Thawm kha I hre ve em ni?"a rawn ti a,"Aw,tinge niang le?"ka ti a,"Ka hre lo le,ka zuk chhuk chhin ang nge,"ti a kal mai a tum chu,"Kei mahin ka awm duh lo,"tih leh a hnunga zui ka rual a,a rawn inher vut mai.

"I hlau em ni?"nui chungin a ti a, ka lu ka bu nghat a hmuh rual chuan,"Lo kal rawh,"a ti a,a hnungah chuan ka zui ve det det.

Light chu ka on a,engmah kan hmu lo reng reng,let leh mai kan tum laia kawngka an rawn chum tak vakah chuan ka phu zawk a,ka en kar a,u Rintluanga a kal takah chuan a hnungah ka zui leh vat.

Kawngka chu a hawng a,chuta ka mi hmuh vang chuan ka phu zawk thei,u Hriati leh Laldinhlua chu kawi sawi zetin an lo ding a,an inkuah a,an nui sang a,an mitmeng chu a phelh tha pheng phung khawp mai.

"Khaw nge Bawihtea?"nui chungin u Hriati chuan a ti a,an zu rim mai mai chuh,tak tih piah lam a ni.

"Lalmuanpui,"Laldinhlua chuan a rawn ti a,ka chhang peih lo ve,"Eng thil atthlak nge ka inchhungah hian in rawn tih?"u Rintluanga chuan thinrim seh chilh nawkin a ti a,an inen a,an nui huk huk anih chu eng nge maw an hriat ni.

"Muanpuii leh Kion hi kan lo hruai dawn,"u Hriati chuan a ti a,"Haw rawh u,"u Rintluanga chuan a ti bung leh nghat.

"Imm...haw dawn e,"tiin Laldinhlua chuan min rawn ban a,a kutah ka lo beng sawk a,u Rintluanga hnungah ka tawlh lut a,"Lo kal ta che Lalmuanpui,"tih leh Laldinhlua chu rawn kal hnaih a rual a,u Rintluanga chuan a kawng awmah a tham tawk a,"Eng thil nge ni a i inhriat?"a ti chang bawl mai.

"Muanpuii hi ka rawn hruai dawn,"a ti a,he mihring hi a va han zak thei lo em em ve,"Hruai theihna dan i nei lo,Lalhriatsang,haw nghal rawh u,"a ti a, Laldinhlua chu nam chhuak rawkin kawngkhar chu a kalh hnak.

Kan kalh hnan tawh chung pawn an rawn la bengchheng cheu,an rui dun si,an au ring si,ka thawk an ti pik.

"In inhria em ni?"a rawn ti a,"Kan inngaihzawng ve thin a,"ka ti a,min rawn en zawkin,"Teh daih a,"a ti a,ka lo nui liam ringawt.

"Ti rawh chhoh san ang,"tih leh step lam pan a rual a,pawn lam a mi te chu an la bengchheng khawp mai."Lalmuanpui,ka nei let leh tho ang che tih hre rawh,vawi tam tak ngaihdam ka dil che a,"a ti a, u Rintluanga chuan a hre ve reng awmsia ka zak lutuk.

Ka room-a ka luh rual chuan kawngkhar kalhin ka mu a, Laldinhlua chuan ka thin a ti rim tun mai leh nghal a,ka sa pup pup thei,a thusawi khan min ti thinrim takzet.

A kam nama sawi mai mah ni se kan pahnih tawp chhanah khan thiam lohna ka nei lo,nghak tura min tih vangin rinawn takin a lo kir leh hun kha ka nghak a,mahse a chhana erawh chu a kha hle anih kha.

A tana ka rinawmna te khan engmah atan awmzia a nei lo,ka beiseina te leh amah nena ka suangtuahna lo neih ve zawng zawng pawh an tham ral ta a ni.

A hmel ka hmuh hian ka thin a rim a,ka haw em em bawk, kumkhuaa theihnghilh theih daih te hi ni se, theihnghilh ka thlang ngeiin ka ring,ka chungah thil a ti sual a ka ngaidam chu ka ti lo mahse tha takin ka thlah a,tunah hetiang teh hrep hian min chhuah leh a,ka awih thei lo zawk.

Ka inngaihtuah ngut ngut a,hriatrengnain thar a rawn thawh a, tap chhuak thei hauh si loin ka rilru erawh a na hle thung.

Ka thu mu a,ka mit ka chhing tak nain ka muhil thei lo,mutthilh a hnekin ka harh tulh tulh ni berin ka hria.

Ar a rawn khuan tak âl âlah chuan ka harh zawk a,ka phone sana ka en chuan zinglam dar 5 chiah chiah a lo ni, ka hmai chu phih sawk sawkin inhnuaiah chuan ka chhuk a, ka ham bai bai.

"Bawihpui,"tih ri ka hriat chuan ka hawi chhuak vat a,u Rintluanga chu choka luhnaah chuan a lo ding vang mai.

"I va tho hma ve,"a tih chuan,"Ka tho deuh chiah,thingpui i duh em?"ka lo ti vat a,"Imm a pawi miah lo,"a lo ti a, thingpui chu ka chhuang nghal vat.

"Dar 9:00 a.m. a chhuah ka ngai dawn a, vawiin chu chawl mai se,lo va entir i hreh em?Zin lo turin ka dil nasa a,mahse a theih ngang loh,"a ti a,"Lo ngaihtuah duh suh,"thingpui siam mawlh mawlh pahin ka lo ti ve bawk.

"Ka ring tawk che alawm,"a ti a,hriat nuam tak zawng a ni,miin kan chunga rinna an nghah a,rin ngam a min ngaih hi chuan a nuam tih chu in hriat ve theuh ka ring.

Mahse rinna hlawh chhuak tur chuan beih fe a ngai a,a tichhe tur erawh chuan hun rei a ngai lo, second rei lo te chhung pawhin a chhe vek thei miau a ni.

"Bawihpui,"ka hmai zawna a kut a rawn vai takah chuan ka harh zawk a,"Eng nge ni ta?"ka lo ti a,"Ka bia che a,"a lo ti a,ka inthlahrung ang reng khawp mai.

"Tihpalh lutuk,ka lo hre miah lo,"ka tih chuan,"Hriati khan Bawiha hi hruai a rawn tum leh anih chuan lo hruai tir miah suh aw,"a ti dap dap a, mitmeng dam ruih hian min en bawk.

"Aw le,"ka ti a,thingpui chu ka pe bawk,dar 7:00 a.m. velah Kion chu chokaah a rawn lut a,chair-a chuan a thu zawi nguai reuh a,a dam lo chuan a sawi chau ve hle anih ka ring.

"Junior vawiinah ka zin a ngai tawh dawn a,ka zin hlanin Atê-i thu lo awih rawh aw,"a ti dap dap a,"I lo haw har ang em?"a pa mita en kiau pah chuan a ti a,"Har dawn lo ve...ka lo haw vat ang,"a ti a,a lo bu vei nghauh nghauh mai.

U Rintluanga a insiam laiin Kion nen chuan kan lo inpawm a,nidang ang lo takin sawi tur a hre meuh lo chu a ni,ka awmah chuan a bei reng ringawt.

U Rintluanga chu chaw eikham veleh a chhuak a,Kion ka va entir chuan tlang hri leng anih thu leh a hlauthawnawm loh thuin min hrilh a,damdawi eng eng emaw min lo chawh a,kan haw hnu chuan a muhil a,tih fel ngai ang ang ka ti fel thung.

Sofa ka hruk lai chuan ka phone a rawn ri ral ral a, ka en nak chuan u Rintluanga a lo ni, kan chanchin engmah ka la hrilh lo tak a lawm a van zia lo e aw...

"Hello,"ka lak rual chuan a rawn ti a,"Imm, hello,"ka tih chuan,"Vawiin in inentir chu engtin nge an lo tih che u?"a ti a,"Aw,tlang hri leng an tia damdawi min lo chawh a,ka rawn hrilh theihnghilh daih che a,"ka ti a,"I buai em a lawm inthiam lo duh suh,tunah eng nge a tih?"a rawn ti leh a,hepa fel leh lutuk hi chu aw...

"Tunah chuan a muhil a,"ka ti a,"Anih chu, hei keini pawh kan tlan chhuak leh dawn e,"a rawn ti a, call kan ti tawp zui bawk.

Sofa chu ka hru leh a,ka mutchhuak chu ka ham leh bai bai thin,ka mit ka meng hleithei der lo leh nghal a(h).

Kawngka chu kalhin sana ka en a,dar 12 chiah a la rik vangin sofa-ah chuan ka mu a,ka muhil har lo,ka muhil ka harh leh chuan eng emaw hian min mawlh rauh rauh a,ka tho chhuak a,ka awm lah chu a nuam thei hauh lo.

Kion-a lo chhuk thla chuan,"Atê,Papa ka be duh e..."a rawn ti a, ka mal chung a rawn chuh nghal chat bawk.

"Imm..."tih leh phone lak chu ka rual a, u Rintluanga number chu ka hmet chhuak a,ka call nghal bawk.

"Hello,"a rawn tih rual chuan,"Papa,"Kion chuan a lo ti vat a,"Aw, Bawihte I lo harh tawh e law?"a rawn ti nghal vat a,"Imm... Atê-i nen kan ngai che a,"a tia,khai leh min sawi lut ringawt alawm maw le.

"Maw?"u Rintluanga chuan a rawn ti chiah reng a,"Kan ngai che a,"Kion chuan a ti a,ka lo zak chem chemin ka hria,"Bawihte,keipawn ka ngai lutuk che u,"a rawn ti a,ka lu ka dawm ringawt tawh.

"Khawi lai nge in thlen tawh?"Kion-an a tih tih chuan,"Tih fel loh kan lo la ngah lutuk a,dar 10 vel khan kan chhuak chauh a,tunah Chamring kan pel awrh,"a rawn ti a,ka rin ai daihin an la thleng tawi.

"Bawihte,thu lo awih la chuan lo dam vat vat rawh aw,"u Rintluanga chuan a rawn ti leh a,"Aw le,"Kion-an a tih rual chuan eng emaw hi a ri bur a,"Eng nge thleng?"u Rintluanga'n a tih ri leh rual chuan a ti leh bur a,thawm chu a reh ta vang vang.

Kion chuan hriatthiam loh hmel zetin min rawn en a,a phone ken ringawt chu ka en thung,eng nge thleng eng thawn nge kha kha,an che sual tihna em ni.

Line a in cut a,Kion mitmenga zawhna lo lang chu ka hmu reng tak nain ka chhang thei lo,eng nge thil awmzia hi.

U Rintluanga chu ka call leh a,a la thei tawh lo,vawi engzata tam nge ka call tawh ka hre lo,chhanna erawh a awm hauh lo thung.

Darkar 1 a liam awrh tihah u Rintluanga call ka dawng a,ka la rang ngang mai,u Rintluanga aw ri hriat ka lo inbeisei laiin ti emaw hian a lo chhang a,"Phone neitu hi i hria em ni?"tih chu a rawn sawi hmasak ber a ni.

"Aw,hria,hria e,"ka ti bah nawk nawk a,"E...hei an chuanna motor hi vai âwtah a lum a,kan buaipui mek,"a rawn ti ta mai a,ka thawk a pik nghal tup tup mai.

"Ka pu,eman tha em?"ka ti a,ka hlauthawng takzet bawk.

"Aw, hei an lum thui lo hlauh a,Pakhat hi chu a na lem lo va,a dang pahnih hi chu Pakhat ai hian an na deuh a,Aizawl lam an panpui dawn,"a ti a.

"Ka pu,motor-a chuang chu a biak theih em?"ka ti a,"A theih rih chiah lo anih hmel,"a ti a, thawm chu a ri nawk nawk a,a tawp daih.

"Atê,"Kion-an a rawn tih leh chuan ka kuah ta ringawt a,ka awm dan vanga a hrilh hai hmel te chuan ka hnuk a ti ulh tun ringawt.

Ka phone rawn ri leh ka hriat rual chuan ka en rang viau mai,u Rintluanga hming ka hmuh rual chuan ka la vat a,"Aw,"ka ti tawl mai.

"Muanpuii,"a rawn ti a,a aw chu ka la hre ngai hauh lo,"Tu nge?U Rintluanga chu a tha em?"ka ti a,"A assistant ka nia,Aizawl kan rawn panpui dawn,"a ti a,ka mit ka chhing sawk,ka duh ang chhanna ka la hre lo.

"A tha em?"ka ti leh a,"A la sawi theih loh,"tih zawngin min chhang a, ka thaw hak,ka khabe hnuai atanga Kion-an min rawn en chuan tih ngaihna hre lo.

"Lo ngaihtuah duh,hei Aizawl lam kan rawn panpui mek ania,"a rawn ti leh a,"Khawi damdawi inah nge?"ka ti thei tawk a,"Aizawl hospital,"a ti a,tawng ri a inpawlh leh nuai nuai tawh.

Call chu a tawp leh daih a,Falkawnah pawh damdawi in a awm reng a,Aizawl rawn pan leh tur chuan an tlai mawlh ka lo hlau.Rawn tlaiin tawng thu chhe loah a nunna hial pawh a chan phah thei.

A tha ber ka ngaihtuah rualin a chhe ber ka dawn lo thei lo a ni,"Atê, Papa chu an accident a mi?"mittui tling pur hian min en a,ka khawngaih takzet bawk.

"Papa ka nei tawh dawn lo a mi?"a ti leh a,ka insum thei ta lo ka mittui ka biangah alum nghal pap a,hnem thei ka awm lo,he naupang lainatawm tak hian nu hmangaihna mumal takin a dawng lo va,a pa tal a la mamawh a ni.

"Nei dawn e, doctor-te khan damdawi inah damdawi an pe lawk dawn a,"ka ti a,a mittui chu a hru ve fap fap reuh a,ka lainat ang reng khawp mai.

"Tawngtai ang aw,"ka ti a,min chhan hma chuan ka kut ka suih a,a mit a lo chhing ve ran bawk.

Kan tawngtai a,mu leh mal pawn thil ka chham thei meuh lo,ka sawi ngai te chu ka sawi nawn nasa mai.

Dar kar hnih hunah chuan phone call ka dawng leh a u Rintluanga number bawk a ni,"Aw,hei damdawi in kan lo thleng chiah I.C.U-ah an luhpui,"a rawn ti a,kal ka duh takzet.

Ka rilru hria ni awm takin,"Ti hian chanchin ka rawn hrilh ang che, Rintluanga hian nu leh pa a nei tawh si lo va,Kion kha lo awmpui la,naktukah in lo kal dawn nia,lo ngaihtuah suh,"a ti a,thla a muang ve huai mai.

Kan boruak tawn vang chuan chaw pawh ka ei peih meuh lo,Kion pawh chu chuti tho,eitur ka pek pawn a ei lo va,"Papa lo haw hunah,"a ti zel a,a tih luih theih hauh loh.

Zan khua chuan awm nuamin kan awm lo a ni ber,Kion lah chu a nguai lup a,ka khawngaih takzet,dar 10 velah phone call kan dawng leh a,thawk a veng ve ta chauh.

A ban ruh a tilak a,a nak ruh pakhat nen ngaihtuah awm a ni tawh lo va,zanin chhung chuan a harh dawn lo anih hmel.Kion ka hrilh chuan a han lawm khawp a,a tap ve pur mai.

Mut dawn pawh chuan kan tawngtai leh thlap a, kan muhil har hle thung kan ngawi reng a,engmah sawi lo mah ila kan ngaihtuah chu a thu hmun rengin ka ring.

Ni e,ani kha ka ngaihtuah a ni,ka chungah a that em vanga ngaihtuah ka ni,a that tawh thu sawi mahse hmuh a ka mit ngeia chian ka duh.

"Atê,"ka hawi vat a,"Naktukah chuan Papa chu a harh tawh tak tak ang tiraw?"a ti a,"Harh dawn e,kan tawngtai tawh kha,"ka tih chuan,"Mama hi ka duh ve e..."a ti a,a lung hnur hmel viau mai.

"I nei reng alawm,"tih hnual hlau tak chuan ka ti a,"Mama chu kan bulah pawh a awm lo va,a rui thin a,"a rawn ti a,ka tum loh lutuk ka hria chuan min deng na hle ringawt mai a ni.

Chhan ngaihna ka hre der lo,"Ka thiante chuan Mama an nei vek a,"a ti leh a,chhan ngaihna ka hre chiang lo,he naupang tê hian sawi chhuak lo mahse nu ngai rual a ni a,a ngai dawn tih chu chiang sa a ni a,mahse hetiang ngaihdan a nei erawh ka lainat a,pawi ka ti bawk.

A bul hnai chetah chuan ka mu a,a hma ai zawnga nghetin ka kuah bawk.

"Bawihte,"ka tih chuan,"Aw,"a lo ti lauh a,sawi tur ka hriaa zeng pawh a ni lo,"Papa chu ka hmu chak tawh e..."a ti a,"Kan hmu thei tep,muhil tawh la,"ka tih chuan a rawn tawlh hnai set set a,a mit a chhing nghal thak bawk.

A muhil hmel chu ka en a,he naupang vang hian nu mawhphurhna san zia leh fate tana nu hlut zia ka hre nawn uar uar a,ka nu ka ngaihzual phah hle bawk.

Keipawh chu rei lo teah mut chhuakin min rawn zem a,ka muhil har lo,"Atê, Papa bulah kal tawh ang,"tih riah chuan ka harh zawk a,ka sirah Kion chu a la mu a,min lo nuih var var bawk.

"I va harh hma awm ve,"nui chungin ka ti a,"Ka harh chiah a,ka kai tho nghal che,"a lo ti a,a biangah fawh sak zeuhin,"Chaw ei ila kan kal dawn nia,"ka ti a,a phur khawp mai.

Khum atang chuan a chhuk thla tharh a, ka tho chhuak chu min lo nghak ve ngei a,a phur lutuk chuan min ti hlim ve takzet.

Chaw kan ei a,Kion chu a phur bawk a,a ei tha hman meuh lo chu a ni,a che vel chu enin ka nui ta ringawt.

Chaw eina ka seng fel laiin call ka dawng a,u Rintluanga hnen atangin a ni,ka la vat a,a assistant ngei maiin,"E...rawn inring sa rawh aw,Kion kha a ni te bulah a awm tih dawn a,u Rintluanga hi awmpui tur dang an awm si lo va,i awmpui mai a ngai ang,"a rawn ti a,ka chhan leh hma chuan a dah daih.

Ka seng fel zawh chuan kan inphih fai a, Kion chu siamin a thawmhnaw thenkhat chu bag-ah ka khung a,ka thawmhnaw leh ka mamawh tur ang ang chu ka inkhung ve bawk.

Kan inpeih hnu chuan kan inkai chhuak a,taxi lain Civil Hospital lam chu kan pan a,Kion lah chu a phur khawp a,a nui reng chu enin ka nuihpui leh hak thin.

Taxi chu a ding a,fare ka pek hnu chuan Kion chu kaiin damdawi in gate lam chu kan pan a,an awmna ka hre lo tih ka hrechhuak zawk a,ka phone chu phawrh sawk sawkin u Rintluanga number chu ka hmet chhuak a,ka call vat bawk.

"Hello,"leh lam atanga an rawn tih rual chuan,"Aw,khawiah nge in awm?Hei gate kan lo thleng chho tawh,"ka ti a,"Lo awm rawh u,ka lo hruai ang che u,"a ti a,a daheh nghal daih, engmah pawh hi mumalin a sawi hman loh reng reng.

Gate chhak deuhah chuan kan lo nghak a,kan nghak rei hran lo,kan bul a rawn thlen rual rualin,"Kal ang u,"tih pahin ka bag ken chu a la rawk rawk a,a kal nghal nal nal,nun hmanhmawhna thlarau hian a chen chilh reng anih ka ring.

A kal chak si a,Kion chu pawmin ka um hlawk hlawk a,a va han hahthlak mai mai tak.

Kan hmaa kal a din rual chuan kan ding ve a,"Tukin khan I.C.U atangin an chhuah a,"a ti a,ka rin aiin an suan chhuak hma.

Ward-a awm lovin cabin-ah a awm a, kan hmaa mi chuan cabin chu a hawng nghal zat bawk.Hmeichhe pakhat hi a lo awm a,kei ai chuan a upa vel hretin ka ring.

Min lo hmuh rual chuan min lo be nghal sawk sawk a,"Nangmah hi a mi Muanpuii?"a lo ti thuai a,"Aw ni e,"ka lo ti ve zat bawk.

"Feli ka nia, Rintluanga nau,"a ti a,a nui sang a,a hmeltha reuh khawp mai,"Lo thu rawh u,"a lo ti sawk sawk a, thu ta lo chuan u Rintluanga lo mutna lam chu kan pan a,hahdam hmel zeta a mu chu Kion chuan a en dauh dauh a,sawi chhuak lo mahse a hlim a ni tih a mitmeng chuan a puang chhuak chiang khawp mai.

"Pasal fanau nei tawh ka ni sia,awmpui chu ka tan a buaithlak lutuk a,i awmpui hreh êm lo ang tiraw?Kion hi kan bulah lo awm rih bawk se,"Feli'n a ti a,a rem berin ka hria.

Sofa-ah chuan Kion chu ka thut thlak pui a, chocolate a ei mial mial a,Feli chu a titi siam siam a,a fel reuh khawp mai.

Inkan hun a zawh hnu chuan min let san a,u Rintluanga a la harh bawk si lo va,tih tur a vang ang reng khawp mai.Sofa-ah chuan ka thu a, ka phone ka en laia Laldinhlua'n min rawn call ka phawk viau mai.

Lak tumna ka nei lo va,ka en mawl tawp ringawt,vawi khat pawh chu duh tawk ta mai lo chuan vawi thum lai a rawn ti leh a,a pawimawh ka rin tak vangin ka la a,"Hello,"leh lam atanga a rawn tih rual chuan,"Eng nge"ka ti pawr hlur a,"Damdawi inah in awm em ni?"a rawn ti a,"Awm,"tih zawngin ka chhang.

"Rintluanga chu eng nge a chanchin?"a rawn ti a,"A tha,"ka ti leh nghat a,a rawn thaw hak.

"Sawi tur pawimawh i neih loh chuan,"ka tih lai mekin,"Kan nu hi then turin min duh em?"a rawn ti a,"Huh!!"ka ti chhuak phawng mai.

"Ka then ang a,ka hnenah lo let leh la,"te chu a la ti tak deuh deuh a,ka sa ve phat mai.

A naute lem ka ni lo a duh duh huna a paih a a duh duh huna a chhar leh tur ka ni hek lo,"Thil tul loah min rawn be tawh suh,"tih leh off ka rual a,a number chu ka block hmiah bawk.Ka inher leh chuan u Rintluanga lo meng diar diar chu ka hmu a,ka pan nghal vat.