D'LENMAWI BUNG 1-NA

D'LENMAWI BUNG 1-NA

Ziaktu-Venpuii 

Favang in ṭan tur boruak chuan thinlung mu hnu a kai tho chiang khawp mai,a indawtin sulhnu an rawn kir zut zut bawk.

Kum li liam taa thil thleng ngaihtuah chuan ka la dam ve reng hi Pathian malsawmna a ni ka ti lo thei lo,vawi tam tak ka hawisan a,mahse min lo hawisan ve ngai reng reng lo,ka mamawh chang leh ka mangan chang apiangin ani chuan min lo pawm ṭhin.Zir chhuah tam tak ka nei bawk.Ka zir chhuah chu eng nge min zawt ta se ti hian ka chhang ngei ang.

"Chatuan nunna kawng kha tlan bosan ka lo tum ṭhin a,khawvel thilah tlanin nun ka chen a,mahse a tawpa ka thlan chu chatuan nunna kawng bawk a ni.Kan sualna leh kan dik lohna te siam ṭha tur hian kan la tlai lo va, hmangaihna tawp nei lo Pathian chuan nitin a hnung kan zui theih nan min ko thin.Kei ngei pawn ka tlan chhiatsan a,mahse ka tlan chhung a rei poh leh min hmangaihzia ka hre thar zel thung,"tiin.

Lalmuanpuii ka ni a,kum 25 niin ka pa leh ka nu hi an innei lo va, ka nu'n min hrilh dan chuan ka pa leh ka nuhrawn hi an innei a,fa an pai bawk,mahse an nupa khan neuh neuh an ngah ve a, ka nuhrawn pawh rei loah an in lamah a let leh a,ka pa pathlawi lai chuan ka nu nen hian an intawng ta a,innei chuang si loin in khatah an cheng dun a,ka pa chhungte khan ka nu kha an pawm lo va, ka nuhrawn pawh sum ṭhahnem tak pein an let tir leh bawk.

Dan mumal taka inṭhen an nih loh vangin ka nu pawh mi pasal chuhtua puh a ni a,ka pa chuan ka nuhrawn hi ṭhen a tum nasa mahse,ka nu khan ṭha a ti lo va,mi nupa pawt ṭhentu nih a hlauh avang khan min ṭulpui ta ṭhak a ni.

Ka nu nen kan khawsa ve naw naw a,kum 20 ka nihin ngaihzawng ka nei ve a,Dinhlua a ni,phai lamah lehkha zirin a chhuk a,a lo let leh huna inneih kan intiam kha a ni a mahse a awm aṭangin thla li pawh a la liam lo tihah sawn a thlâk thu ka dawng leh a,kha thu ka hriat ni a ka natzia kha aw.

Ruihhloah ka ṭuan a,ka nu pawh a rilru a nain a in nghahna neih chhun khatia ka awm khan a hriselna thlengin a nghawng nghe nghe bawk.

Ka nu a bawrhsawm chinah erawh inthiamlohnain ka khat a, ka thil sual tih tawh vang khan kohhran leh khaw tlangah ka in kil tawih a, ka nu erawhin ka lam a ṭang a, Pathian venhimn leh a hruaina zarah ruihhlo pawh ka hneh a,nun pangngai tak hman kan inbeisei laiin ka nu'n min kalsan leh bawk.Khang laia ka nun beidawnzia kha aw...

Ka nu khan natna chu a nei na meuh mai,mahse a thih chhan bulpui ber erawh kan in a kan vang a ni a,a hmel pawh hriat theih loh khawpin a ni a kan ni.

Keimaha inenkawl kha ka pa'n min ngaihtuah avangin an in lamah min hruai haw bawk.

Ka ngaihtuahna ka kawm mawlh mawlh lai chuan,"Kha hei i u thawmhnaw va su rawh,i thatchhe leh lutuk hi chu aw...chawm hlawm mai mai leh nghal,engtin nge maw zah pawh hi i zah loh ni,"ka nuhrawn chuan thawmhnaw suk tura min rawn vawm pahin a ti a,run theih pa tawp hian min melh bawk.

Thawmhnaw tla chu chharin machine-ah ka dah lut a,ka herh chiah tihin ka nuhrawn chu a rawn lut a, a rawn ang bawrh bawrh.

"Zawngi,nang sawn chhia,vawi engzat nge thawmhnaw ṭha hi machine-a nuai tir tawh lo tura ka tih che,"a ti a,"Ka kut surf-in a ei a,ka nuai thei lo va,"ka ti a, min en ren rawn a,ka chhip samah chuan arawn ṭham ta mai a, ka inrin loh lutuk vang chuan min kek kun char char.

A ṭham na bawk si a, ka hmui ka pet a,ka insehruh fan fan,a thlah ve mai dawn emaw ka tih hnu pawh chuan a thlah mai lo va,a kek na sauh sauh chu ngai thei tawh bik lovin a dul chu ka nghawk ta pawp.

Min kehna pawh chu a thlah hlawk a,ka hmaiah a rawn beng sawk a,a thip nghal vawng vawng thei.

"Nang sawnchhia,"tih leh min sawisak a rual a,a chunglama ṭang anih miau avang leh tha a ngah êm avangin ka khawih let ve thei mang meuh lo.

A duh tawka min nghaisak meuh chuan ka chau hle tawh a,ka kawr te chu a pawt thler pheng phung mai bawk.

Tho hluaiin ka room-ah chuan ka lut phei a,ka thawmhnaw chu thlakin in aṭang chuan ka chhuak a,kawngka bulah ka pa ka tawk a,a zawhna pawh mumalin ka chhang lo.

Hmun reh lai deuh ka thleng a, ṭhutna lo awmah chuan ka ṭhu thla nghal hnawk a,ka mit ka chhing vang vang.

Rilruin ka ṭawngṭai a,"Lalpa ka chunga i ruat te hi pawm thiam harin chauhpui ṭhin mah ila, kan tana ṭha tur chauhin ro i rel ṭhin tih hi khawngaih takin min hriat nawn tir la,harsa deuh ṭhin mahse pawm thiam thei turin chakna min pe la,i kutah ka rawn in hlan e,Amen"ka mit ka men hma chuan ka kawr tlangah hian tu emaw hian a rawn pawt a,ka men chuan mipa naupang hmelṭha zet mai hian min lo en kiau mai.

A mitmeng chu a fiah kak a,a ngoin a vun pawh a nung hle bawk,a hmui a sen deuh hlar a,a sam a buang thâng a,kum li kum nga vel anih ka ring.

A mitmeng fiah kaka min en pah hian,"Papa i lo hmu em?"a ti fiah fak a,"Hmu miah lo,i bo em ni?"ka tih chuan,a men deuh pur a,ka ban rual chuan min lo ban ve vat a,"Tu nge i hming ni a?"ka tih chuan,"Kion junior,"a ti a,"Maw?"ka ti hû mai.

"Papa chuan Kion junior min tia,"a ti a,nui chungin,"Avan nalh ve aw,"ka ti a,a nui ve sen sen mai.

"Âte,nang tunge i hming?"a rawn ti reuh a,ka nui hak,"Lalmuanpuii ka nia,"ka ti a,a ngaihtuah vang vang hnuah,"Avan sei ve,"a ti a,chhan ngaihna pawh min ti hre lo.

"Miin Lalmuanpui an ti tawp zel che a mi?"a tih chuan,"Imm...a chang changin,"ka ti a,a lo bu ve nghauh nghauh a.

"Papa chu aw..."a rawn tih leh takah chuan,"Tunge i papa chu a hming?"ka ti a,a ngawih vang vang hnuah,"Lalrintluanga,"a ti fel leh fak.

"Khawiah nge,"ka tih lai mekin,"Kion,"tih ri ka hria a,ka nau pawm lai pawh chu a tal thla nghal phat mai.

"Papa,"tih pahin a pan a,mipa pawh chuan a lo pawm ve mai,"Kion,min lo nghak rawh ka tih che kha,ngati nge i lo kalsan a?"a pa chuan a ti a,Kion chuan,"Ka zawng che a,"a ti a,"Imm...a ṭha e,tuna chinah chuan lo kalsan tawh loh tur aw,"tih paha kaihsan mai a tum chu,"Lawk, papa,"Kion chuan a ti leh rih.

"Âte,"Kion chuan a rawn ti lauh a,a pa chu kaiin ka lamah a rawn kai a,ka bula an rawn din rualin,"Papa hei Âte-i anih hi,"a mitmeng fiah zeta a pa melh pah chuan a ti a,a pa chuan min rawn en a,a bang bo viau mai.

"Kion,"a pa'n a tih rualin,"Âte hei papa chu,"a ti a,tih ngaihna vak ka hre lo reng reng.

"Imm...anih chuan papa rual hian haw la,lo kalsan daih tawh loh tur aw,"nui chunga en pahin Kion hnenah chuan ka ti a,"Aw le,"nui sen sen chungin a ti a,a hmelṭha lutuk.

"Kion,kal tawh ang le,"a ti a,a fapa chu pawmin an pafa chuan an kal zui a, keipawh chu rei awm tawh lovin in lam ka pan hna hna a,inchhung ka luh rual rualin,"Chaw ei dawn tawhah hian chhuak dên dên zel mai,chaw ei va siam rawh,"ka nuhrawn chuan a lo ti hluk hluk.

Choka lamah pheiin chaw ei ka siam a,ka ei peih loh vangin an pathum eina tur chu ka siam a, chaw ei tura chokaa an lo luh lai chuan tui deuna bulah ka lo ding thung.

"Hmmh,titau ve khanglang em naw ni, chawmhlawm ve mai mai,"a ti deuh kher a,a ngawih liam mai ka rin laiin ka pa'n,"Teh duah kher zel a che,nang oawh chawm i ni ve tho,"a ti a,ka nuhrawn a lo ter nasa at at khawp mai.

"I zak em?Kei hi,kei hi chawmhlawm min ti a maw?Chu pawh i sâwn vang sawn,"a ti a, sâwn a tuh hian ka lo na ṭhin,mahse ka nihna a ni miau a.

Sâwn chu eng nge min hmuhsit êm êm, mihring kan ni ve tho a, Pathianin duh taka a siam kan ni ve tho.

Thleng te chu ka nuhrawn chuan a paih darh sawk sawk a,kan ri nuai nuai a ni ber,ka nuhrawn lah chu a au tawn tawn a, ka pa chu hmusitna ṭawngkam tinrengin a ṭawng khum a,ka unaunu hrawn Bz-i erawhin a kut kuangkuahin a nu keh ka pa inhau chu ngen hmel zetin a thlêk vut vut ringawt.

A duhtawk ta ni hmiang,ka nuhrawn chu an room lamah a phei hmak a, ka pa erawhin pawn lam a pan thung.

Thleng tla vel ka buaipui lai mekin,"I vanga kan buaina hi,"nuih ro hak pahin Bz-i chuan a ti a,ka rin ai daihin a insum rei thei.

"Inthlahrunna te hi i nei ve miah lo em maw ni?"a ti leh a,ka ngawi liam mai,ka chhang ve leh zel anih chuan buaina ka belh chhah mai mai.

Ka ngawih reng vang chuan inherin a phei nghal nal nal a,kan misualnu thil tih hnawk ka tihfel laiin ka pa a rawn lut a,a hmela inthlahrunna lo lang chuan min vilh ngut ngut a,ka tawt up up bawk."Bawihi,"a ti a,a thaw hak bawk.

"Aw pa,"ka tih chuan,"A pawi a ni tiraw?"a ti a,"Ka thiam loh a ni, min ngaidam hram rawh aw ka fanu,"a ti leh a,lehlam hawiin ka hmui ka pet ngar ngar.

"Pa, inthiamlo duh suh, i hriat kha Pathian chuan kan ṭhatna turin ro a rel ṭhin alawm,"ka ti ve ngial a,ka mittui ka hru ru zeuh thung.

An lakah thinrim viau ṭhin mah ila hringtu nu leh pate'n ngaihdam min dil hi thil nuam a ni hauh lo.

An room-a a luh hnu chuan keipawh ka room-ah ka phei a, ka ṭawngṭai bawk,ni e,jan ṭhatna turin Pathianin ro a rel ṭhin chu chu ka innghahna awm chhun a ni bawk.

Ka mu mang lo va, ka tho chhuak chu ka rit lûk thung,rawng ka bawl a,dar 6 velah ka pa a rawn tho chhuak a, thingpui lo lumin kawtah a ṭhu a,kei erawhin ei rawngbawl pahin inchhung hnawk lai ka ti fel ve thung.

Dar 7 pelh hnuah Bz-i a rawn tho chhuak a, private school-ah zirtirtu hna a chelh a,amah hi a inchawm deuh tawp bawk.

Chaw ei ka siam laiin kan misuali chu a rawn tho buk chhup a,a sam chuan eng direction pawh a kawk fer fur mai.

Chaw chu kan kil ho a,chaw ei a tui duh viau lo,ka pa hna kal tur chu kawngka bul thleng ka thlah a, insu turin bathroom-ah ka lut chiah tihin kan misuali chuan min rawn au a,a bula ka thlen chuan,"Bawihi khan a file a theihnghilh a, traffic a jam nasa thei si a lo let leh chuan a tlai ang,vva pe rawh,"tv hmaa ṭhut pahin a ti a.

Bz-i room-ah chuan ka lut a,dawhkana file senno lo awm chu anih ka ring,ka la ve hmiah a,ka room-ah lut leh tê têin ka thawmhnaw ka thlak a,taxi lain Bz-i school thawhna lam ka pan bawk.

Driver bula fare ka pek lai mekin Bz-i phone call ka dawng a,ka pick rualin,"Khawi lai nge i lo thlen tawh?"a rawn ti a,"Ka lo thleng,"ka tih rualin a hang up hmak a,pe lo chuan ka haw leh zawk dawn em naw ni ka ti rum rum hial a ni.

Gate bula ka din lai chuan,"Âte,"tih ri hria a,ka hawi chhuah rualin Kion chu ka lamah a rawn tlan phei terh terh a,ka lo nuih sen sen.

"Kion junior, hetah hian i lut em ni?"ka ti a, nui chungin a lu a bu nghauh nghauh a,a hnungah a pa'n a rawn zui bawk.

Kion bula ka ding min hmuh chuan,"Nimin a mi kha i ni tiraw?"a rawn ti a,nui chungin,"Aw ni e,"ka ti ṭha ve mai.

"Lalrintluanga ka nia Kion-a pa,nimin khan ka hmanhmawh lutuk a,Kion i lo awmpui vanga lawmthu hrilh na chang che pawh ka lo hre lo va,"a ti a,"A ho lutuk,Kion-te chu a fel a,"ka ti a,"Kion in lo thleng tawh a ni maw?"Bz-i aw ka hriat rual chuan ka hawi chhuak vat a, Kion-a te pafa nena kan lo ding min hmu chu mak ti hmel a pu deuh.

File chu ka lo pe vat a,"Lo kal rawh,"tih pahin Kion chu Bz-i chuan a kai a,kal mai ka tum laiin,"Âte,"Kion chuan a rawn ti leh.

Ka inher ruala Bz-i mak ti hmel chu ka hmuh hmaih lo nasa,"Eng nge ni a Kion?"a hmai zâwna ṭhut pahin ka ti a,"Goodbye kiss min pe dawn lo a mi?"a lo ti nuah nuah a,"Kion,"a pa'n a lo ti a,nui hakin,"Pe dawn e,"tih pahin Kion-a biangah chuan ka fawh sak a,nui ver ver chungin min vai liam lauh lauh bawk.

Inhera kal leh mai ka tum laiin,"Kan inbe kawk thei ang em?"Rintluanga'n a rawn ti a,"Keimah nen maw?"inkawh vâ pahin ka ti a,"Aw, rei lo tê aniang,"a ti a, eng chungchang nge maw sawi dun tur kan neih le.

"Sawi la,"ka tih chuan,"Kan awmpuiah i ṭang duh ang em?"a rawn ti teh daih a,"Maw?"ka ti vak.

"Ka sawi awmzia chu nau awmtu hi ka mamawh lutuk a,Kion lah hian midang kuta dah a duh si lo va,a vawi khat hmuhnaa a nel nghal awm chhun i nia,ka buai bawk si a,langa i lo kal anih pawn hma taka lo kal kher pawh a ngai lo,awm chilh theih phei chu ka duhthusam ania mahse a buaithlak ve a,i duh phawt chuan hlawh pawh a chhe lovang,"a ti a.

"Oii... ngawi teh chutiang ringawt chu ka nu leh pate pawh hian an phal kher lovang,"ka tih chuan,"Lo in ngaihtuah la,ka nawr lui lo che,i duhthlanna a ni,duh i thlan fel hunah tah hian min lo be mai dawn nia,"tiin business card pakhat hi min pe a,a kal zui nghal bawk.

En mang lovin ka bag-ah chuan ka dah a,fare atan pawisa ka ui deuh vangin kein ka haw a,in ka thlen chuan ka nuhrawn chuan,"I va rei ve,i insuk lai te kha zo fel ve mai ta che,thil hi ka tih turah kher hian i dah a,"a ti a,ka chhang oeih mai mai lo ve a.

Nilengin ka insu a,kuta insuk a ngaih bakah Bz-i lah hian thawmhnaw lian pui pui hi a ha a,uluk a ngai si a,a thawmhnaw suk a ninawm lutuk ringawt.

A duh anga a fai loh phei chuan min suk nawn tir tluk tluk chang lah a tam.

Ka insuk inchung sanga ka zar keh tê tê hnu chuan dar 11 a lo pel duai tawh,ka mawng ka hung a,rei pawh ka hung hman lo,"Muanpui, dawrah va kal teh kan misuali'n a rawn ti leh a, lo va kal ve mai ṭhin awm.

"Khawi pawisa,"ka ti a,pawisa rawn lek chhuah pahin lei tur chu a sawi vei zuah zuah a,a chhip aṭang hian ka chum thawih chak.

Dawr ka thlen chuan min chah ang ang chu lei sawk sawkin ka chhuak leh mai ka tum a,dawr chhunga lo lut te ka hmuh rual chuan ka ding khawng nghal awt.

Ni e,kum li hnuah,tunah ka hmaah ngei hian Dinhlua leh a nupui an ding a,chuan naupang pakhat hi a nupui chuan a pawn bawk.

Dinhlua rawn hawi chhuakin min hmuh chuan min en vang vang a,en rei duh loin ka chhuak nal nal.

Thui ka kal hman lo,ka hnunglam aṭanga min rawn koh chuan ka ding chawt a,zep loah chuan hawi let ka hreh...

Ka inher ta tho a, polythene pakhat rawn lek kan pah hian,"I thil lei i theihnghilh a,"a ti a, ka lo ban vat.

"Ka lawm e,"tih paha kal leh mai ka tum chu a thu rawn sawi vang chuan ka ding chawt.

"Ka thiam loh vek a ni,hma lam hun kha beiseina nen kan thlir a,ka pen khat dai sual kha a lo pawi êm a ni,tuna tum loh ang deuhin ka awm phah a,"a rawn ti leh a ka thaw hak.

Inher lehin,"Hun kal tawh chu theihnghilh tawh ang, hmalam pan la,hawi kir tawh suh, keipawh ka hawi kir tawh ngai,a ho lutuk,"ka ti a, inherin ka kal nghal nal nal.

In ka thlen chuan kan misuali chu couch-ah a lo ṭhu vei ar ar a,a thil min leitir pe a ka room-a luh mai ka tum chu a thil rawn sawi vang chuan ka ding chawt.

"In suan chhuak vat la a ṭha ang,kan hau tan si a,thawh tur te hi i hre lo em maw ni,nula a pum pa hetia awm dawr dawr zel mai,bakah i awm ve zel chuan chhungkua pawn hmasawnna kawng kan hlat,"a ti ta kher a,ka thinrim ngang mai.

"Thawh tur te chu hmu e le,ka chhuak vat ang lo lungngai duh suh,in nufa bula awm reng hi ka tum lo tih lo hre rawh,"ka ti a,ka chhan dan vang chu nge a meng tak tap mai,ni e a awm lutuk,ka chhang let ngai lo hrim hrim.

Rum deuha melhin room-ah ka lut a, ka thinrim a kal tluang bawk a,ka bag chu phawrh sawk sawkin business card chu ka la chhuak a,in ngaihtuah nawn miah lovin ka call ve hmiah.

"Hello,"mipa aw thum lamin a rawn tih chuan,"Aw, hello,u Rintluanga a ni em?"ka ti a,"Aw ni e,tunge awh?"a rawn ti a,"Ih,"ka tih lai mekin,"E,aw Bawihpuii kha maw?"a ti a,"Muanpuii zawk,"ka lo ti sep.

"E,aw ni dawn tak, tihpalh lutuk,"a rawn ti zung zung a,"A pawi lo,ih hna kha,"ka tih chuan,"Aw,kha kha eng nge i thu tlukna ni ta,"a rawn tih chuan,"Nia ka thawk leh duh thut a,"ka tih chuan,"Aw,i duh chuan a pawi lo va,naktuk hi thla thar ania i lo thawk nghal thei ang em?"a ti a,"Aw thei ang,"ka ti leh.

"Awm chilh angin nge langin i theih ang?"a rawn tih leh chuan,"Awm chilhin i pawi ti em?"tim deuh tak chuan ka ti a,"Ti hran lo ve,mahse i hriat tura duh tlem ka nei a,"a tih chuan,"Aw,sawi la,"ka lo ti sep a,a aw a thian kharh.

"Ka nupui nen hian kan inṭhen tawh a,Kion hnenah hian a nu chungchang sawipui lo turin ka duh che a,amah hian a sawi leh ṭhin a,a thusawi chu zawm loh hram lo tum la,zing dar 8 leh a chanveah kan pafain kan chhuah a ngai a, school hi dar 12-ah a bang ṭhin a,i lo va lam ṭhin ang a,kei hi office lamah thawh tur a tam te anih loh chuan dar 4 hi ka haw hun a ni ṭhin aw,"a ti dap dap a, ka aw ve mial mial.

"Chuan hlawh hi singkhat tlem i ti em?"a ti a,"A tam lutuk,"ka lo ti vat,"Tam lo ve, WhatsApp-ah address ka lo thawn ang che, naktuk zingah kan lo beisei dawn che nia,"a ti a, call kan tih tawp hnu chuan ka thaw ngam ve chauh.

Ka pa rawn miah lo va thu tlukna ka siam chu tlemin ka tim deuh a, mahse min pawmpui em turah ka ngai.

Ka thawmhnaw neih ang chhun leh ka bungrua te chu ka siam fel mawlh mawlh a,dar 3 velah room aṭangin ka chhuak ve ta chauh.

"I va rawn chhuak har ve, rawngbawl a ngaih khi,i u a lo haw ṭep tawh ang, a ril a rawn ṭam dawn, va bawl val rawh,"a lo ti leh a,ka ngawi liam peih tawh bik lo,"Lo bawl ve mai ta che,engmah i ti bik chuang hleinem,"ka ti ve kha kha a,"Khanglang che chuan,"tih paha min rawn ben a tum chu a kutah ka lo ban bet a,ka paih lawp.

Ka chet dan vanga a mak ti hmel chu hmuhnawm tak hi a ni ringawt,chek tlat tlat chungin an room lamah a lut leh nghal daih.

Rawng chu ka bawl ta tho a,ka bawl lai takin Bz-i a lo haw a,"Engtin nge Kion kha i hriat?"a rawn ti a,"Ka hria,"ka tih chuan,"Engtin ka tia lawm,"a ti leh hluk.

"Ka hriatna vangin ka hria,"ka tih chuan,"Hmeli,"a ti ṭhat a,a room-ah a va lut nal nal a, hmuhnawm zawk tak a ni.

Rawngbawl ka peih hnu chuan ka intifai a, ka pa a lo haw tawh vangin chaw ei ka siam a,"Naktuk aṭangin ka insuan chhuak ang,"a thu phungin chaw ei lai chuan ka ti a,"Khawiah?"ka pa'n a lo ti vat.

"Pafa an nia,a fapain ka buaipui loh a duh lo va,"ka ti a,"Rintluanga te maw?"Bz-i a ni,"Ni,"ka tih chuan kan misuali'n,"A va tihzia ve,sum dek chhuak la,nangmaha in tun nun tum rawh,"a rawn ti a ka chhang lo.

Ka pa ve thung chuan a phal chiah lo va,min dan luih erawh a hreh hle thung.

Chaw ei kham chuan tifel sawk sawkin ka room-ah bawk ka lut leh a,ka bungrua ka buaipui leh rak rak a, ka ngah lem lo bawk a,ka inpeih chu a ni der mai.

Dar 11 velah ka mu a,taksa a chau ve bawk nen ka muhil har lo khawp mai,ka harh leh chuan dar 5 a lo pel hret a,tho ṭham ṭhamin ka inphihfai a, ka bungrua chu lain pawn ka pan a, tum loh lutukin ka pa a lo awm kur mai.

"Lo kal rawh ka va thlah ang che,"a lo ti a,"A ngai lo vang,"ka tih chuan,"Lo kal rawh,"a lo ti leh a,ka hnial duh tawh bik lo.

Ka bungrua chu motor-ah dahin a hmaah ka ṭhu a, address min zawh bak kawng tluanin kan inbe leh tawh lo.

House no.B 12 chu in var nalh deuh mai hi a ni a, chhawng hnih niin a lian lutuk lo va,a te lutuk chuang lo.

"Kan thleng e,"ka ti a,ka pa pawh dingin a chhuk vat a, keipawh chu chhukin ka bungrua chu ka pa'n min hlan thlak sak a,engmah sawi lo va kal mai ka tum chu min auin.

"Kha hei hi la rawh, mamawh i neih chuan lo sawi hreh suh aw,"a ti a, envelope var hi ka kutah a hmeh bel a,"Eng nge a?"ka ti a,"Pawisa,a tam hran lo,"a ti a,"A ngai lo,"ti a pek let ka tum ngial pawn a duh lo va,ka laksak ta ringawt.

"Anih aw,"tiin a kal liam chu ka en a, lung a chhe ve lek lek mai.

Inherin ka bungrua chu ka la a,kawngka chu ka kik karh karh,rei loah u Rintluanga chuan a rawn hawng a,min hmuh chuan,"E,lo kal rawh,"a lo ti a, ka luhna tur min kian bawk.

"Papa tunge a?"Kion-a chuan inchung aṭang chuan a rawn ti lang lang a,"Lo chhuk la,"a pa chuan a lo ti a, Kion-a rawn chhuk thla chhat chhatin min hmuh chuan,"Ehe,wow... Âte,"a ti a,min kuah chawt mai.

"Boy,ka office kal chhungin anu Bawihpuii hian a lo awm ṭhin tawh dawn che a,"a ti a, Bawihpuii tih bawk chu.

"Tak tak a mi,a van nuam dawn,"a ti a,a nui sen sen reuh a,a va han hmelṭha chiang tak.

"Min lo zui la,i room tur ka hmuh ang che,"u Rintluanga chuan a ti a,a hnungah Kion nen kan zui ve dat dat.

Inchunga room lo awm hmasa ber dawttuah chuan a lut a,Kion nen chuan kan zui lut nghal,"Hei hi i room tur aw,"a lo ti a,ina ka room ai pawhin a lian zawk.

"Ti khan lo awm ru,"a ti a,a chhuak leh daih,ka bungrua pawh chu rem loa dahin Kion chu ka pawm a,"Rawngbawl ang aw,"ka tih chuan,"Aw,"phur deuh hian a ti a, inhnuaiah chuan kan inpawm thla leh.

Chaw ka chhuang kai chiah tihin u Rintluanga chu chokaah a rawn lut a,"E,i lo ti a ni maw?"a ti a,"Imm,"tih zawmga chhangin chawhmeh ka buaipui a,ka rawngbawl lai chuan an pafain T.V. an lo en dun mial mial.

Chaw ei ka peih a,Kion chu tifai thuak thuakin ka siam a,a titi ve suam suam a,a titi ngaihthlak a nuam reuh lutuk ringawt.

An pafa insiam zawh chuan chaw kan ei a,ei kham veleh an pahnih chuan an chhuak a, an kal tur chu kawngka bul thleng ka thlah ve bawk.

An kal liam rual chuan in ka tifai ṭan a, tukverh darthlalangte chu ka nawt a, ka bungrua te rem felin ka buai nileng a ni ber.

Sana ka en chuan Kion-a ban a lo hun tawh a, insiam sawk sawkin taxi ka laa Kion te school lam ka pan ve vat.

Ka va thlen chuan an lo chhuak ṭan tawh a, mic-ah naupang ho hming chu an lam a, hmuh theih turin naupang nu leh pa te chu an lo ding lang ve bawk.

"Kion Lalremruata,"an tih chuan ka lo ding ve vat a,tlemin ka confi lo kan Kion Junior-a hi ni tak ang maw ka tih rauh rauh laiin amah ngei mai chu a rawn chhuak a,min hmuh chuan a rawn nui phei nasa mai.

Ka bul a lo thlen rual chuan ka lo pawm nawlh a,"School chu a nuam em?"ka lo ti var a,"Aw nuam e,mahse ka ngai lutuk che a,"a ti a, naupang kam ṭha mai mah ni se ngaihthlak a nuam lutuk.

He nau hian a hriat loh lamah min ti hlim takzet a ni.

"Ice-cream ka ei chak,"a tih vangin ice-cream ka leipui a,a liak ve hlep hlep reuh a,a va han hmelṭha chiang tak êm aw.

In kan thlen chuan ka bual fai a,ka thlak fel hnu chuan T.V.a en a, rawngbawl ka ṭan thung.

Ka rawngbawl lai chuan ka bulah a rawn ding a,"Âte i bulah hian ka lo ṭhu ka bengchheng miah lo vang,"a rawn ti leh reuh a, nui chungin,"Lo kal rawh,"ka ti a, chair-ah chuan a rawn lawn a,a titi ka ngaithla a,kan nui leh hak ṭhin.

Ka phone a rawn ri a,ka en chuan u Rintluanga a ni,"Aw, hello,"ka tih chuan,"Aw, Bawihpui,hei ka rawn haw dawn chiah e,"a rawn ti a,loud speaker ka on vangin Kion chuan a duh zâwng a lo chah char char a,nui chungin a thil sawi chu ka ngaithla a,an pafa chuan an inbe mual mual.

Dar 5 a pel awrh tihah u Rintluanga a rawn haw a,chaw ei ka siam chhungin a lo inthlak a,chaw ei lai chuan kan Kion junior chuan a pa thil lo hawn chu a keng bawr ṭai a,a duhawm reuh lutuk.

Chaw ei kham chuan T.V. enin kan ṭhu a,u Rintluanga erawhin hna thawh tur a lo hawn vangin an room-ah a awm thung.

Kion nen chuan kan ṭhu reng a,"Kan mut a chhuak,"a rawn tih chuan sana ka en a, dar 9 a lo pel tawh, kawngka ka kalh a, light te chu off-in inchungah ka chhohpui a.

An room-a luhpui mai ka tum chu,"I bulah ka mu duh,"a ti teh tlat a,u Rintluanga dil tur chuan an room lamah bawk chuan kan inpawm a.

Room kawngkhar chu ka kik karh karh a,lut tura sawmna kan dawn hnu chuan kan bih dek dek a,u Rintluanga chu a rawn hawi vat.

"Papa, Âte-i bulah ka lo riak,"a ti a,"A chi nang,i tibuai lutuk ang,"a ti a,"Ti buai lo ang,"ka lo ti ve vat.

Thawk hak pahin,"I bulah a mut loh chuan Papa kha a mutthilh theih ngai loh kha,"a ti a,"Papa please..."a ti a, ngen tak têa a ngen vang chuan a phalsak ta nge nge.

Phur deuh ka room-ah kan lut a,"Thawnthu min hrilh rawh,"a tih tlat vangin ka thawnthu hriat ang ang chu mut pahin ka sawi a,ka lo sawi tui deuh nge ni Kion-a mutthlih lai pawh ka lo hre lo.

A chalah ka fawh sak zeuh a,kuah ṭha sauh sauhin ka muhil ve nghal siai siai.

Dar 5 velah chuan ka harh a,tho sawk sawkin rawngbawl turin inhnuai lamah ka chhuk a.

Rawng ka bawl miah miah lai chuan ṭap ri ka hria a,ka lu ka thing a,ka beng chhe ei emaw ti a ka lu ka thin pawh chuan thawm chu a la awm reng.

Ka ngaithla chiang a,ka room aṭanga lo chhuak niin ka hria,ka tlan chho vat a, room ka luh chuan u Rintluanga hian Kion chu a lo pawm a,"Papa,khawnge Âte-i?"a lo ti a,ka kal hnai vat.

"Kion i lo tho tawh elaw?"a bul chiaha din pah chuan ka ti a,min lo ban rang ngang mai a,he nau hi chu aw...a ngainat loh theih loh reng reng.

"I lo tho daih a mi?"a ri leh a,"Aw, rawngbawl a ngai a,"ṭha deuh chuan ka ti a, min kuah nghet sauh sauh mai.

"Ti khan lo inawm lawk ru, chhuah lawkna tur ka nei,"a phone en mual mual pahin u Rintluanga chuan a ti a,a chhuak zui nghal.

"Rawng zuk bawl ang aw,"Kion en pah chuan ka ti a,a lo bu ve nghauh nghauh a, inhnuaiah bawk chuan kan in pawm thla leh a.

Chair-a ṭhu chung chuan ka che vel chu min lo en kiau a,ka bai siam ka vil hmin a,ka va en leh chuan a lo muthlu nasa mai a, ka pawm vat.

Sitting room lamah pawm pheiin couch-ah ka mut a,a thaw sek sek mai.A bulah chuan ka ṭhu thla a,a awmah chuan ka kut ka nghat a, angel naupang hi a ni ringawt.

Dar 7 velah u Rintluanga chhuak a lo haw a,chaw ei siam hmasa tura min tih vangin an insiam hmain chaw ka ei a,"Vawiin chu ka bang hma dawn a,Kion chu ka rawn lam kawi nghal mai ang,"a ti a,a kham zui daih.

Chaw eina ka tihfel leh hnu chuan Kion chu ka siam a,nizana ka thawnthu hrilh chu a sawi zawm mial mial a,a tie ka siam ṭhatsak hnu chuan a pa'n a rawn au a, inhnuaiah kan chhuk vat.

A kal dawn chuan a biangah ka fawhsak leh a,a pa nen chuan an inzui dun hnek hnek a,an hmelṭha dun bawk a,pafa ni awm hliah hliah an ni.

An kal liam hnu chuan dan ngaitein in ka tifai a,nimin lama ka la khawih loh ka khawih a,chhuat ka nawh lai mekin kawngka chu an rawn kik a,an kik pawh a ni satliah lo,a sawiin an sawi a ni ber.

Ka va hawn chuan hmeichhe pakhat ngo vir ver,sam uk kharh, mitmeng thip lam mah hi a lo ding a,min hmu chu a phawk hmel viau mai.

"Eng nge ni ta?"ka tih chuan,"Khawnge ka fapa?"inchhûnga rawn luh pah chuan a ti a,"Kion maw?"ka lo ti vat a,a lu a bu zeuh.

"School a kal a,"ka ti ṭha leh mai,"Engtik aṭangin nge hetah hian i awm?"a ti leh a,"Nimin aṭangin,"ka ti leh a,a hmui a peh zeuh hnuah,"Bawihate chu an la bang dawn lo em ni?"a ti leh a,zawhna a van ngah em em.

"Bang tawh ang,u Rintluanga'n a lo lam nghal dawn a,"ka ti a,a lu a lo bu nghauh nghauh a,rei pawh a ṭhut hmain,"Âte,"tih ri ka hria a, kawngka lam ka hawi phei nak chuan Kion a rawn lut a,a nu'n,"Bawiha,lo kal teh,"a tih chuan a lu thingin ka lam a rawn pan min rawn ban bawk.

Ka mit sir chuan ka ep chiaha hmeichhe ṭhu chu ka en a,a hmel chu ka chhiar thiam lo,a nui ro hak bawk.

"Âte..."ka nau pawmin a rawn tih chuan,"Aw,"ka lo ti thuai a,"Ka ril a ṭam,"a tih lai mekin u Rintluanga a rawn lut a,kan lam a rawn hawi rual chuan a nui hmel chu a bo hmak.

"Eng nge i rawn tih?"a ti nghal chiah reng a,Kion chu enin,"Kion, cake siam ila,"ka ti a,nui chuangin,"Imm..."a lo ti a,choka lamah chuan ka pawm phei nghal daih.

Kitchen island-ah chuan ka ṭhuttir a,cake siamnana kan mamawh ang ang chu ka la khawm a, kitchen island-a ṭhut pah chuan school-a an thil zir vel a sawi niah niah a, dawhkana grape awm chu a ei hliam hliam reuh a,a va han duhawm chiang tak.

"Âte"

"Imm"

"Zanah i bulah ka lo mu leh,"teh daih chuan,"Papa'n a phal chuan i lo mu leh dawn nia,"ka ti a,a ke thenin chocolate a ei a,a thil ei ka nuih ka nuih lai chuan sitting room lam aṭangin inhau thawm ka hria a,Kion pawh chu a rawn hawi phawk ang reng khawp mai.

U Rintluanga'n,"Kei chu sawi loh i rila rah i fa ngei pawh thlauh thla duh i nih kha i hre lo em ni?"a ti a,ka ngaihthlak ve chi ni pawh niin ka hre lo,Kion chu ka en a,a mitmeng fiah deuh chuan a meng kal a thaw hakin,"Cream va lei lawk ila,"ka ti a,min rawn enin min ban vat a,pawm nawlhin ka chhuahpui daih.

Darkar chanve vel ka thangpui hnu chuan in lam kan pan a,kan luh leh chuan u Rintluanga chiah a lo awm tawh a,a haw tawh anih ka ring.

"Papa,"Kion chuan a ti a,u Rintluanga chu a rawn hawi chhuak a,a mit a sen rum mai a,Kion chu enin,"Bawihte han inthlak lawk ang aw,"ka ti a,a lu a lo bu zeuh.

Inchungah chuan chhoin ka thlak sawk sawk a, cake ka siam lai chuan an pafain an ṭhu dun a,u Rintluanga hmel hmuh chu a nuam zân lo.

A fapa chu chhuhsak hlau ni awm hrim hian a kuah nghet a,a mit a chhing vang vang bawk.

Zanah chuan chaw eina ka tihfel laiin door bell a rawn ri a,u Rintluanga a chek hluk bawk.

Kawngka chu a va hawng ta tho a,ka chhuah ruala ka mi hmuh vang chuan ka ding chawt.

U Rintluanga nupui hlui leh pavalai tak pahnih chuan Dinhlua... min rawn hmuh chuan,"Lalmuanpui,"a ti a,min en ṭhap a,ka bangbo viau mai.

"Eng nge in la rawn tih?"chang khel khawla u Rintluanga'n a tih chuan pa pakhat zawk chuan,"Bawiha hi kan rawn hruai dawn,"a ti a,u Rintluanga a nui ro hak.

"Eng vang chuan maw?"u Rintluanga'n a ti a, pa nichina ṭawng zawk tho khan,"Hriati fa anih vangin,"a ti a,u Rintluanga'n,"Mahni pasal leh fapa aia ruihhlo thlangtu khan tunah nu nih a duh a maw?"a ti a,Kion chuan min rawn ban vat.

"Inchungah awm ang aw,"ka tih chuan,"Aw,"a ti a,ka kalpui dawn chuan,"Papa,hetah ka awm duh,Mama bulah ka awm duh lo, Âte-i leh nangma bilah chiah ka awm duh,"a ti a,a pa'n,"Khawiah mah i kal dawn lo, Âte-i nen khan thawnthu lo han chhiar lawk ru,"a ti a,min rawn enin,"Lo mutpui leh lawk mai la,"a ti a,ka lu ka bu nghat a.

Inchungah chuan ka chhohpui leh thuai a, thawnthu chu ka chhiar sak leh a,a muhil ta maw tihah chuan ka tho chhuak leh nghal a,kawngka chu tha takin a lo inkalh a, choka light chu a la êng thung.

Chokaa ka luh chuan u Rintluanga chu ka thawm hriain a lo hawi vat a,"A muhil tawh em ni?"a ti a,"Aw a mu fel deuh chiah,"ka ti a,tui chu thliin ka lem khalh a,kal mai ka tum chu a ipik hmel em vang chuan,"Sawipui I duh em?"ka ti a,a ngawih reng vang chuan kal mai ka tum a,"Eng hi nge maw ka tihsual le,"a rawn ti a,ka inher vat.

"Engah chuan maw?"ka ti a,a bulah chuan ka thu thla bawk.

"Eng hi nge maw ka tihsual a,tiang teh hrepa ka awm chhan hi,"a ti a,ka ngawi vang vang,hei ai hian sawi chiang se chu ka hrethiamin ka ring.

Ka rilru hria ni awm takin,"Nupui ka nei a,kei leh a fapa aiin ruihhlo a thlang a,"a nui ro hak bawk.

"Tunah ka fapa a hnawl hnu ngei chu min chhuh luih a tum leh a,"a ti a,a hmai a tusi puat puat bawk.

"Hringnun hi chu a mak lutuk,'Buan tham fe a ni'an lo tih hi dik tak a ni,kan buan hneh lo fo a,vanduai bik ang te pawn kan inhre thin a,mahse maw kan vanduai viau emaw kan tih pawh hian keini aia chhan chhe zawk hi an lo awm veleh zel a,Pathianin I tan kawng tha zawk a ruatsak cheah ngai hmiah rawh,"amah nuih chung chuan ka ti a, min en vung vung hunah,"Ka fapa hian a ngaina viau che pawh hi a awm lo hran lo ve,"a ti sup a,"Han mu tawh rawh I duh chuan,"a tih zawm a, ka lu buk khumin ka tho uai a,"Muanpui,"a rawn tih chuan ka inher vat a,"Ka lawm e aw,"a ti a,nuihin,"A ho lutuk,"ka ti a.

Ka room chhung ka thlen chuan Kion hnar ri ka hre zat a,ka nui hak bawk.A bulah chuan thingthiin ka tawngtai a,ka men leh chuan ka inthawlh ve nghal sawt sawt.