D'LENMAWI BUNG HNUHNUNG BER

D'LENMAWI BUNG HNUHNUNG BER

Ziaktu-Venpuii 

Phone call a dawn leh rual chuan ka en zawk a,nui suk hian min en a,"A hnai zel e,"a ti a, ka lo en ran tawh ka thin chu a phut dan a dik tawh mawlh lo.

"Kan inah lo hruai rawh u,chhuah kan lo dil ang,"u Rintluanga'n a tih chuan ka thla a muang suai suai a,ka phur thak ti ila a dik ber ang.

"An hmu em?"phone a hman zawh rual rual a ka lo tih chuan,"Hmu e,a tha,keipawh hi ka tha tawh reng a,chhuah kan dil ang nge,tunah Dinhlua'n kan in lam a pan pui mek a, Remsanga-ten midang an lo thur chhuak ang,"a ti zung zung a,"Chhuah kher a ngai lo,"ka lo tih ve na pawh chu a ngaihsak zui tawh lo reng reng,a che vut vut a,luih ve tawp loh chu tih vak tur pawh ka hre lo.

"Khawnge ka phone?"

A phone chu ka lo pe sawk sawk a,tu emaw a bia a,"Ka tha tawh ka tha tawh,ka chhuak duh tawh,nupui neih te ka ngai a, chhungkaw din tur te ka la nei, damdawiinah ka awm hman tawh lo,"a tia tu nge maw a biak ni ka tih rilruk lai mekin doctor kha cabin-ah a rawn lut a,"I ti tak tak a mi?"zawhna ngah fe mai hian a rawn ti a,u Rintluanga'n,"Ti tak tak e...."a tia kan thawmhnaw leh kan bungrua te chu bag-ah a khung mawlh mawlh a,tih ngaihna vak ka hre lo.

"Kan kal thei,"a rawn tih rual chuan a lam ka hawi vat a,khai leh!a inkhung fel hman vek nia,"La awm rih mai la,a thianpa'n a tih pawh chuan,"Lo ngawi mai mai teh,"a ti duh lek a,kan hawi kan hawi ringawt.

"A tha vek mai zel e,anih khawi kal ang u,ka haw pahin ka thlah ang cheu,"doctor chuan a ti hluk hluk a,a hnial lo aniang chu min kaiin doctor chhuahna lamah chuan min kalpui leh hlawk hlawk a,dam lo ani tih a hriat loh reng reng,hepa em em hi.

Doctor chuan min phur haw a,u Rintluanga chu a phur khawp aniang chu,"I va han tlan muang tak,"a ti leh thin a,an in vin hluk hluk a, kei erawh hnung lamah ka lo phi ve ruai a,ka nu ka hmu chak tawh lutuk tlat.

In kan thleng a,gate bula Dinhlua car ding ka hmuh leh lek phei chuan ka insum thei tawh thlawt lo,car a ding a,engmah pawh ngaihsak zui loin inchhung lamah ka tlan lut hlawk hlawk a,chuta common room-a hmeichhe lo thu chuan ka mit a la nghal zar a,min la hmu mai lo,Kion nen chuan an inbia a,a hmel a tarin a cher hle a,eng thil rapthlak nge maw a chungah hian an lo tih mai le.

"Atê,"Bawihtea'n a lo tih rual chuan ka hmaa mi chu a rawn dak chhuak a,min hmuh chuan a rawn ding chhuak hluai a,a mitmengah chuan thil tam tak ka hmu a,a dawl dang lutuk chuan min ti na vawng vawng thei.

"Nu,"ka aw a khur ti tiha kal hnaiin ka kuah vawng vawng a,"Nu,ka hmu tawh ngai dawn lo che emaw ka tia,I tha em?"ka ti mawlh mawlh a,"Ka fanu,ka duatte, ka naute duat,"min kuahin a mittui a tla zawih zawih a,ka ngai thar vawng vawng a,ka rilru a na takzet bawk.

"I thi tawh emaw ka tia,min kalsan tawh emaw ka tia,"ka tap chhuak rawih rawih a, ani erawh chuan ka samah chulin ka biangah te chuan s fawp kual a,a kut lain ka hum ran a,ka mittui chu ka dang thei thlawt lo.

"Bawihpui,"inchhunga rawn luh pahin u Rintluanga'n a rawn ti lut a,kan lo awm dan a hmuh chuan a ding chawt a,hahdam hmel zeta a thaw chhuak te chuan ka hnuk an ti ulh vek ni berin ka hria.

"Ka duattê I lo dam em?Engtin nge i lo awm ve?I nu hi ka lak tlak loh em a ni tiraw?I rilru ka lo van ti hah dawn tak em...khang hun chhung zawng khan nu telloin i lo awm chu a ni tak sia aw...."a ti vawng vawng a,sawi tur mai ka hriat loh vangin ka kuah nghet tulh tulh a.

"Thu phawt ang le,hrilh tur che ka ngah tawh lutuk,"tih leh nam thut ka rual a,min pawt thu vein min kuah a,a awmah beiin rei ngial chu chutiang chuan kan awm a,"Papa,Mama saw a nu sawn a hruai tawh dawn a mi?"Bawihtea'n a tih rual chuan ka in siam tha vat a,mahse tunah khan engtin maw min koh?

"Mama maw?"ka nu chuan min rawn en zawk a,"I fa a mi?"a ti a,ka lu ka bu a hmuh rual chuan a tah nuih hak a,Kion chu a en vawng vawng a,"Bawihte,lo kal teh,"ka hui zeuh a,rang deuhin ka bulah a rawn tlan phei a,"Tupa ka nei reng a maw?"ka nu chu ka en zawk a,a hlim hmel chuan hah a ti dam sawng sawng thei.

"Dinhlua nen in innei nge pasal dang i nei?"a tih leh chuan ka lu thingin,"Pasal ka la nei hleinem,"ka ti a,a bang bo hmel ka hmuh chuan,"Ka nei tep,ni 10 khi kan inneih hun atana kan ruat ania,"u Rintluanga chu ka en zawk a,a lo nui sak.

"Khawi zawk hi nge?"ka nu'n a tih leh rual chuan u Rintluanga chu a rawn kal hnai ve vat a,"I rai lawk em ni?"ka nu chuan mak a ti tawlh tawlh.

Chhan tuma ka ka ka an zuau laiin u Rintluanga zawk chuan,"Tu emawin a pasal fanau aiin ruihhlo a thlang a,a kalsan hnuah I fanu hian chu hmeichhiain a thlauh thlak tak a pasal fanau chu a chhungkua atan a thlang a,anih ka pi nang hian i chhungkua atan min iai em lo ang chu maw?"a rawn ti a,ka rin loh lam daih a sawi.

"Ka fanuin duh taka a thlan tawh chu an sual thei dawn a mi?Keia thu a awm hleinem,a innei tur in in hmangaih phawt chuan engmah hnialna ka nei lo,"a ti ve a,u Rintluanga ka en chuan thawveng huai huai hmel hi a pu reuh a, hepa hi ka nu'n a pawm loh a lo ring deuh a ni maw....

U Rintluanga hnung chu a rawn ri dawp a,"Hmelchhe pa,mawl hmuar,chhahlian sawi tha ve mai mai ta chezi hriatna i hlauh tak tak emaw tia lo hlauhthawn ve naka laia,"Feli'n a rawn ti hlak hlak a,ka lo nui hak.

"Thingpui ka rawn la ang,"Feli chuan ti lehin choka lamah a lut a, u Rintluanga chuan a fiam zawrh zawrh a,a rawnelh tum tha khawp mai.

"Bawihte,engtin nge ka awmna kha in hriat a?Chuan eng nge thil thleng hi awmzia han sawi teh le,"ka nu chuan tiin chhanna beisei tih hriat tak hian min en a,sawi tuma ka ka ka an zuau laiin,"Kal tha mai mai rawh Pathau,ka lum luh nghal loh che,ka pawr e te chu i la ti ve khang lang em maw ni?Ka lir lut pep pep mai ang che,"tih hlak hlak ri kan hria a, kawngkharah chuan val senior-a leh u Hriati pa an rawn inzui lut a,an hnungah actress-i,u Hriati leh a nu an rawn inzui lut hnak hnak a,an kutah handcuff an bun ran bawk.

"Rintluang,kha i hmu duh a ni lawm ni?"val senior-a chuan a rawn ti lut bul bul a,u Rintluanga'n a pan hnai vat.

Actress-in ka nu a hmu chu a phawk tha khawp a,"Eng nge hetah i tih?"a ti chhuak sep,ka nu chuan nghet deuhin ka kutah a vuan a,kan hmaa mite chu a melh ngar bawk.

"Han in puang tan nghal ula,"u Rintluanga'n a ti a,an bo hmel lutuk,"In puan ka ngaiin ka va hre lo ve ka makpa,"actress-i chuan zam map lo hian a ti a,mai mai chuan.

"Ka pi in ruk bona atanga in thanga min awh tir in tum dan thleng khan han sawi la maw le,"u Rintluanga chuan a ti fiah fak a, hmeichhe ho chu an in en hrek hrek a,u Hriati pa erawh Dinhlua'n a tulh hnem deuh nge ni a tawng bula bual a,val senior-a chuan a chhipah chuan a chum leh awk thin a,chu chuan ka nuih a ti za tlat pek.

"Tu berin nge sawi dawn cheu,tha te tea in sawi loh chuan kan in vaw zuang ang,"Dinhlua'n a ti a, hmeichhe ho chu an in en kual dan dan a,engmah an sawi duh chuang lo reng reng.

"Imm,a nuam ting,"tih leh val senior-a chuan hmeichhe police chu signal a rual a, hmeichhe hoin pan an tum chuan,"Ka sawi ang,"an ti rual dual a,"Imm ti tur kha,"u Rintluanga'n tiin an tawng chhuah hun chu kan nghak a.

"Kan pa nen hian innei leh tawh mah ila,ka lakah a rilru a pe miah lo a,Zaii ringawt a buaipui tak si vangin dah bo dan ka ngaihtuah ta a ni,ka hmelhriat doctor pakhat hnen atangin ruang pakhat kan la a,Hruaii nen hian thian tha tak kan ni a,an nupa hian min pui bawk,chuan keiin Zaii hi an in luah atangin ka bum chhuak a,ti chuan Faka farm house lam hi ka panpui ta a, Hruaii-te nupa erawhin Muani awm loh chhung hian an in luah chu an lo hal a,a chhungah tiang chu kan dah a,hetia ka tih chhan pawh a la dam reng anih chuan ka pasalin min kalsan ka hlauh vang a ni.

Chuta chin chu Hruaii-te nen pawh hian kan in be pawp ta meuh lo,engkim a kal tluang dawn emaw tih laiin Rintluanga leh Muani hi an lo in tawng leh a,inneih te hial an tum tak vang khan Muani nu hi vo nan kan hmang ta a ni,"a ti a, hetiang anih vang anih dawn hi min lo biak that em em,"Anih eng vanga thingtlang lama ka kal dawna ka hma khua ngai ber ang hrima min chelh nge i nih?"min rawn en zawk.

"Nang chu i rilru a thianghlim tih ka hria alawm,chelh che kan tum poh leh hreawm I ti sauh sauh dawn a,"a ti zui leh,an thil tih dan chuan ka thin a ti rim ngawih ngawih,"In va han ni khua lo mai mai tak,hrem chu in phu hrim hrim mi ruk bo case ang te,mi blackmail ang te,"val senior-a chuan a ti a,inzui chhuah mai an tum laiin ka pa leh Bz-i an rawn lut ve hlawl.

Chuta ka pa'n ka nu hmel a hmu chiah chu a pen lai a chawl dat a,"Zaii,"tih zawng a sawi a,a ngawi zui daih,"Remsang,hruai phawt hrim hrim ula,an chungthu hi chu court lamin rel rawh se,u Rintluanga'n a ti a,an inzui chhuak leh dam dam.

Bz-i chu ka bulah a rawn kal a,"Eng nge thil thleng hi a awmzia?Ka nu leh Hriati nu te kha khaw nge an kal dawn?"a rawn ti a, Dinhlua'n thil awmzia chu ka pa leh Bz-i bulah a lo sawi zung zung,ka pa erawh chuan ka nu chu a rawn en leh zuk zuk thin a,a lung a len ka ring deuh tlat.

"Engtin nge kan awm zel ang?"ka pa'n a tih chuan kan en thap a,"Engah maw?"u Rintluanga a ni ve thung.

"Inneih chu in tum tlang dawn nge in thulh?"

"Thulh teh nang,kan innei ang, inbuatsaih vak a ngai tawh chuang a mi?"u Rintluanga'n a lo ti sawk sawk a,"Anih Bawihi I nu hi?"ka pa bawk a ni.

Ka lo ngaihtuah miah lo a,kan inneih hma chu ka pa te in lamah kan awm a ngaih ka ring,"Ka nu te chu kan bulah a awm ang chu,"Bz-in a ti a,'Ka nu' a tih vang chuan kan en thap a,"A ni lo mi?"ka nu en zawkin a ti a,a ni pangngai a sawina turah ka lo ngai a,ka nu a sawina lek chu lo niin.

"Thil tih chi a ni ber lo,"ka nu chuan a lo ti a,ni e,ka nu tan leh ka pa a tu ve ve tan pawh chuan thil nuam tak a ni dawn lo.

"Anih te chuan ti hian kan inneih hma chu saw Bawihpuii hi awm se,ka pi te chu hetah awm se a nimai lawm,inneih hnuah pawh kan bulah a awm ang nga,hetah min uap se,"u Rintluanga'n a lo ti ve thung a,ka nu ka en chuan ngaih dan a nei lo.

U Rintluanga rawtna pawh chu tha viau mahse ka nu bula awm reng chu ka duh dan a ni a,kum tam tak kan misual ho vangin kan awm hrang a,tunah chuan second khat lek pawh hi a tello a hman ka duh tawh lo a ni.

"Duh leh inneih hma te chu saw lamah in awm ang nga,inneih zawhah helama i awm duh anih leh i awm ang nga,kan bula i awm duh anih leh kan bulah I awm ang nga,"ka pa'n a ti a,chu chu tun atan rih chuan a tha berin ka hria.

"Chu chu a tha lo maw,"ka lo ti ve thuai a,kan pawm tlang aniang engmah sawi nawi a awm zui lo,"Anih in in rel fel chuan ka va haw ang nge,"Dinhlua'n a ti a,u Rintluanga nen chuan lawmthu kan hrilh liam hnuah pawn thleng kan thlah a,a kal liam hnu chuan ka kawngah a rawn kuah thak a, van lam chu a thlir chho vang vang a, van lam chu ka thlir chhoh ve a,thla a lo dê a,inbe chuang lo chuan chutiang chuan kan awm reng a,ka hah a dam sawng sawng a ni ber.

"Muani,"ka pa'n a rawn tih takah chuan u Rintluanga nen chuan kan in zui lut vat a,haw an duh tawh anih hmel.

Motor-a kan chuan lai chuan Bz-i a titi siam siam a,a niin ka nu laka a thil tih vang chuan ngaihdam a dil awl lo va,ka nu pawn a ngaihnat hmel sawt khawpin ka hria.

'Nu' a ti ve bawrh bawrh a,ka pa nen erawh engmah sawi loin ka nu leh Bz-i titi chu kan ngaihthla a,an titi tui ang reng khawp mai,ka pasal neih hun tur te chu an sawi dun a,an phur dun em em leh nghal.

In kan thlen chuan ka in dah fel sawk sawk a,ka nu nen ka room-ah kan mu a,u Rintluanga chu a fak ve luam a,"Amah kha a dam dup a,a mizia a thain a nelawm bawl sia,a hmangaih hmel bawk che sia,i thlang sual dawn lo ve,"a ti ve luam a,ngaih a tha hliah hliah mai a ni.

Kan mutthilh hma chuan kan pahnihin tawngtaina hun kan nei a, lawmthu sawi tawngtaina a ni ang chu.

Heti zat mi a nei a,chung zingah chuan kan that bik vang leh kan fel bik vang pawh ni lo a kawng engkima kan chunga zah a ngai te,a malsawmna hlu taka min vur te,kan chak loh chang leh kan mangan chang pawha min hawisan lo va min awmpuia min veng reng thin te,ken nunna min la zuah sak te,ei leh in silhfen tha min pe te, hmangaihtu tam tak min pe te hi ka lawm takzet a ni.

"Awii!kei chu ka hreh e...thulh leh mai te ka duh,"khuma tal tawp tawp paha ka tih chuan,"I mawl a mi?Naktuk lawkah in innei tawh dawn a,thulh chi anih loh hi, lungngai suh i che chhe bik lo ang,"Kimi'n a ti hlak hlak a,ka hreh telh telh.

Ni e,a sawi ang hian naktuk maiah khiang ka awi ve tawh dawn a,ka phur rual rualin ka huphurh a,ka za chhuak vek ni berin ka hria, hmeichhe dang te hi ka awm ang hian pasal an neih hma zanah tiang hian an awm ve tho ang em aw(h)?....

A...an awm ve tho ang,an awm awm emai,kei chauh lo pawh hi an awm dawn chiang lutuk,"Aw,hei rawn vaw teh,a huphurh lutuk a, thulh te a sawi a,"nui kur kur chungin Kimi'n a ti a,ka phone-ah hian tu emaw a bia a,u Rintluanga anih ka ring ve ngawt.

Rin ang ngeiin,"Kha in pa,"phone min pek pahin Kimi'n a ti a,phone chu ka lo ban vat.

"Bawihpui,i tha meuh maw?"a rawn ti a,"Ka hre lo,u Rintluang,ka zam ka huphurh ka hreh emai mai..."ka va ti chiam a,a rawn nui ri hawk hawk.

"Lungngai duh reng reng suh,i rilru ti hah lo la,i nervous ang em em kha a ni dawn lo, hahdam la,"a ti a,ka thei meuh lo zawng a ni.

Zan pawh ka muhil thei meuh lo,darkar hnih vel chu ka muhil a tih theih ang,a bak zawng chu nghate rep an sawi ang maiin ka meng kar reng a,zing pawh ka tho hma zak zak khawp mai.

Chaw ei kham atangin Kimi nen chuan min chei tan a,an make-up artist rawn hruai chu a fel reuh khawp a, make-up tak deuh ka ngainat loh vangin a simple thei ang berin min chei a,Kimi pawh a inhmeh khawp mai, make-up artist Pakhat zawk nen chuan an in hre sa ni hmiang an in vin khur khur reng a, pakhat zawkin,"Chhe deuh te khan min chhuak ang nge aw Zodinthar,"a tih laiin pakhatin,"Mithmul lehlam nen chauh chuan ka kal tir zawk dawn che em maw ni,lo ngawi mai mai rawh,i senior tawh lutuk a,i vun a chuar anoh hi,pawh mar a har em em leh nghal,"a ti nuah nuah a,ka lo nui khur char char tawh.

Biakin chhungah ka pa'n min kai lut a,kohhran dan thianghlimin kohhran mipui hmaah ka mipa hmangaih kut chu 'a nuam leh a hreawmah pawh' tiin ka vuan ta a,kan duhthusam puitlin tur leh chhungkaw tha tak din turin nupaah kan insiam ta a ni.

                       A TAWP TA