D'LENMAWI BUNG 9-NA

D'LENMAWI BUNG 9-NA

Ziaktu-Venpuii 

Hmun ka phiah zawh chuan Johan-a chu ka ko a,a rawn hawi rualin,"Khaw nge chhuat nawhna?"ka lo ti a, bathroom lam a kawh zeuh vang chuan bathroom-ah chuan ka lut a, chhuat nawhna chu a lo inkhai ran mai.

Ban vatin chhuat chu ka nawt a, chhuat ka nawh lai mekin,"Marhchhing,i nu antam ka rap tlum ania,engtin nge kan tih dawn?"mipa aw hian a ti a, hmeichhe pakhatin,"Awii!eng nge ka thu i awih loh,i lu mum ang ang khan i mum anih kha,kal lo turin ka ti mawlh mawlh che a, sawi lo pawh ka ni bawk lo, ka nu'n a liak hlup tawh che ang nga a nimai,"a ti lang lang a,ka lo nui hak.

"Thenawmte thianho an nih chu,an nuihzatthlak thei ania,"Johan chuan a lo ti a,ka lo nui sak.

Hmeichhe aw pakhatin,"Aw haw le!nu Sang rangka dartui luani'n Lumuma a liak dawn e,"a ti a,a nui uar uar mai.

"Nui nui lo khan tih dan min lo ngaihtuah pui teh u,khaw nge Thangtintuti leh Tukkhumseia pawh hi an awm, Chhipruak,ka hnek palh ang che,lo nui lo nui lo teh mahni lo maha hlauhthawn tehreng nen,"mipa hian a ti bawrh bawrh a,thian inpawh tlang tak chu an nih ka ring.

"Naktuk chu Chhipruak, in loah kan lo kal dawn ania,"hmeichhia hian a ti lang lang a,"Ka peih teuh lo mai, chhungten min chhawr tawh pawh tih mah naka laia,kan lo kawng a chhuk chho ropui si,kal lamah tawlh thlak a ngai a,chhoh lamah lah khup dih hlauhawm khawpin kan awm leh a,ka peih teuh lo,in duh chuan ka nu te nen in in chhawm thla dawn nia,"tih riin a zui zat.

"Taka in tuak tan ang u,pa Rina-te khan brick thiar tur an mamawh asin,"hmeichhia chuan a ti leh a,an tawng chu ka ngaithla a,ka nui leh thin.

"Ngatan nge kan in tuak dawn?"

"E le...Û Â MA te a hnai ve tawh a"

"Kan tum dawn nia"

"Thil dang sawi kual sawi kual lo khan tih dan chu min ngaihtuah pui ta che u,nu Sang rangka dartui luani a hrang nasa dawn ania,"mipa khan a ti leh rih a,an thawn laih laih mai.

Tih tur mai ka hre lo a, rawngbawl nan a la hma uchuak bawk nen chair chu pawt chhuakin ka thu a,phone ka en pah.

Actress-i missed call a lo awm ve teh khiah a,mak ti deuhin ka call back a,"Muani, hei Rintluanga a rawn kal a,"a rawn ti ta mai a,ka phu zawk thei.

"U Rintluanga maw?Eng nge a lo tih a?"

"I call a lak theih loh thu a sawi a"

"Engtin nge i lo chhan?"

"Kan inhauh thu leh i tlan chhuah thu dawtin ka hrilh,"a rawn ti a, thlamuang huai tur ka nih laiin ka thin a tawt up up a,thinrima ka tlan chhuak tih a hria anih chuan min zawng ngeiin ka ring."Anih chu,kan dah phawt aw,"ka hmet tawp zui a, ka phone chu a rawn ri leh zat,Tlankimi a ni ve thung.

"Aw,Kim"

"Muani,ka dawrah i u Rintluanga a rawn kal,"a va buaithlak tak,"Chuan,"ka mit ka chhing sawk a,a chhanna chu ka hriat chak rual rualin ka ngaithla hreh tlat thung si a,ka awm dan chu nuam lo tak a ni.

"A rawn zawng che a,"ka thaw chhuak thei lo,ka thin a tawt urh a,ka na takzet,a mang ka van ti ang dawn tehlul em,a tua mahin thudik an hrilh lo chu ka lawm viau laiin a mang ka ti ang hle dawn chu a ni si a,ka in haw hle bawk.

"Muani,"bathroom-ah ka lut rawk rawk a,"Aw,"ka aw chu a tham tuak a, ka insum thei lo,"Lo let leh mai rawh, mahni hma sial kha a pawi lo,i nat dan tur kha an ngaihtuah pui bik lo che,an fanu tawrhna ringawt an hmu lian a,keichu ka ngaih dan a ni miah lo, lo let la,siam that ngai hi siam tha teh u,"a ti charh charh a,a sawiah chuan dik lo lai a awm lo.Mahse,u Hriati mizia ka hria mahni in tih nat a hreh dawn lo tih lah a thil tih tawh te atangin ka chiang hle bawk.

"Ka hrilh tawh che kha,bakah a sar hu lai ania,u Rintluanga pawn dik tak chuan a fa nu chu a thlang zawk ang,"ka ti a, ka hmui ka pet leh ran tawh.

"Engtin nge awl sam deuh khan i sawi theih le?..."a ti ta ngawih ngawih a,ka tah a ti chhuak zual vek,ka tan hian a awlsam bik lo,mahse ti lo thei ka ni lo,mahni hma ka sial anih ngat chuan tu emaw nunnain a tuar dawn tih hre reng chung chuan ka thei lo,ka hlim ngai lo bawk ang.

"Muani,enteh,ka nawr che anih chuan min hrethiam lul teh,i inchhir a,khua i tlai hi ka hlau em a ni,"a rawn ti leh ta zawk a,"Kha lai chu a nuam em?"a ti zui leh zat.

"Nuam a ni mai ang chu,"sawi tur ka van riau a,kan inbiakna kan tih tawp hnu pawh chuan rei ngial bathroom-ah ka awm a, ka chhungril hi a natin a na ngut ngut a ni ber,thawk lak lah chu harsa ka tiin ngaihtuahna a chiri nuai mai, helaia awm kha chu a tir kha chuan tha zawkin ka ring a,mahse eng nge a rah chhuah hi ni ta,tu emaw ka tana mi pawimawh tak chu tunah hian ka ti mangang hle dawn si a,mahni inhuatnain ka khat ti ila ka sawi sual hauh lo ang,ka in haw ngawih ngawih,ka dawihzep luatah ka chan ngei dawn a ni.

"Muani,lo chhuak vat ta che,"bathroom kawngkhar an rawn ben tak chawrh chawrah chuan harh zawkin ka mittui ka hru sawk sawk a,thaw hawkin kawngkhar ka hawng a,nu Thiangi chu a lo meng rang khawp a,ka ding zum zat ringawt.

Ka ke bulah chuan dekchi a rawn vawm a,ka lo phu zawk thei,"Pawnah sawn mei chhemna a awm,mei va nun la, antam hi va tlak rawh,"a ti khar khar a,ka ti lo ngam lo hrim hrim.

Dekchi chu chhar vatin tui ka dah a,pawna thuk lam chu ka pan rawk rawk,mei chu nunin dekchi chu ka chhuang a,ka chungah hian eng nge thleng zel ang,nu Thiangi lah khatiang kha ania,awm dan thiam a har dawn khawp mai.

Tui ka chhuan lai chuan antam chu ka sil leh a,nu Thiangi a ang hluk hluk reng a, Johan-a erawh pawnah a chhuak a,a lo la lut leh lo,"Kan chhuak lawk anih te chuan a tul ang ang lo tih mai tur ania,tangkai lo lutuk,ka u hian engtin nge maw a hrawn reng peih zawk che ni,"a ti buan buan a,ka hawi kual ruk ruk ringawt.

Tihpalh thil thuin ka dekchi ken chu ka thlauh a,nu Thiangi a ang nasa zual sauh,"I thinrim ve khang lang em maw ni,sawn chhia mai mai leh nghal,"min ti zêk a,ka thinrim lutuk a,engmah ka sawi thei lo reng reng.

"Va tlak vat rawh, Hruaia a a rawn haw hunah a ril a rawn tam dawn teh ania, thla khat hi liam se,midang zawng leh nghal ila a tha ang,i lak tlak loh lutuk,"a ti a,ka ngaithla zui Ngam tawh lo, tapa thutthleng hniamah chuan ka thu a, ka mittui a baw hawk a,ka thin a thip vawng vawng.

"Thlak vat ta che"

Ka hnungah a rawn chum tawk a,a ni em emin ka hre tawh bik lo,"A la so hleinem,"ka ti vin ve that a,chu chuan a thinrim a ti zual kai chiang ngang bawk.

"Min vin ve ngam a maw?Nang dawn chhia,nang leh i nu vanga kan chhungkua kan buai zia te hi i hria em?"a ti a,ka samah chuan timna nei lek loin a kek ta buan buan a,ka kut ka vei chiam a,ka hnung lam atanga min kek anih miau avangin ka vei fuh thei lo.

"A tawk,eng nge i tih a?"tih ri ka hriat rualin ka sam chu a thlah hlawk a,ka thu chawrh chawrh,"I tha em?"ka zawna rawn thut thlak pahin Johan-an a ti a,ka mittui ka hru nawk nawk.

"Eng thil atthlak nge i lo tih kha nu?"Lucas chuan a nu chu a lo din chilh a, tho chhuakin antam chu ka thlak a,a ni khat niah pawh tuang hi kan nih chuan ka beidawng hul hual.

"I tha em?Na i nei em?"

"Ka tha"

"Nga ti nge a?"

"Engmah a ni lo,"ka tho a,inchhungah chuan lutin thlai rah bai tur chu ka sil a,ka zei lai mekin an pathum chuan an rawn in zui lut a,nu Thiangi chuan engmah a sawi tawh lo.Dik tak chuan kal tura ka thutlukna siam kha ka inchhir tawh takzet.

Ka bulah Johan-a a rawn thu a,ka thlai rah zei lai min zaipui a tum chu,"Amah khan tih tir rawh u, ngaihsak reng reng suh u,"a rawn ti leh a, Johan-a che pawh a tawp zui ruai ruai, ka tawng lo va,ka thil tih ngai chu ngawi rengin ka tih zawm a, ngaihtuahna mumal put a har a ni.

'Ka nu chunga an chet theih tawh loh vang em ni ti hian min tih?' tih ringawt chuan ngaihtuahna a luah zui a,u Rintluanga ka ngai takzet.Tunah te hian min ngaihtuah vangin min la zawng ang em?A bulah khan engkim kha lo sawi ila ni tur tih te chenin ka ngaihtuah a,ka na thar vawng vawng,tunah a sawt tawh si lo,ka awm dan hi a hria anih chuan min haw maiin ka ring.

Tlankimi thil sawi te kha ka ngaihtuah a,a sawi dik ka ti ta hle bawk.An fanu natan an hmu lian hlur a,lehlamah ka la awm a,na ve thei tho ka ni tih reng an ngaihtuah bik lo,an ngaih thah hmiah thei hi mak ka ti a, keipawh ka in dem hle bawk.

Ka dawihzep lutuk te,mahni inngaihtuah hmasa lo va midang leh mi min ngaih dan tur ringawt ka lo ngaihtuah thin vang khan ka na a ni,an hlimna tur anih chuan min ngaihtuahna chhe te mah an nei ve si lo.

"Kha kha bai la, fridge-ah khan arsa ka dah kang rawh,"tih leh nu Thiangi chuan chhuah nghal a rual a,a chhuak chiah tihah Johan-an,"Ka lo pui ang che,khawi,"tih leh min rawn puih a rual a, ka dang peih tawh rih lo.

Fridge-a arsa chu la chhuakin ka sil fai a,"Engtin nge ka kan dawn?"Johan-a bula ka tih chuan an kan thin dan a lo sawi zung zung a, chair-a a thu chu ngaih ven zui tawh loin ka che zui mawlh mawlh a,ka lu lei lah chu a thip ang them thum a,chu chuan ka hnuk ni a kai chhuak leh tlat pek a,ka in hru ka in hru ringawt.

"I phone kha a ri a mi?"Johan-an a rawn ti a,ka phu zawk thei, ka phone ka en chuan rin loh lutukin Dinhlua a lo nia,min ti ham haih lek lek.Bai chawh rawk rawk pahin ka chhang a,"Hello,"ka nichin boruak vang kha nge ni ka tawng chu a tham chhal bawk.

" Hello, Muani"

"Aw,eng nge ni ta?"

"Nutei te nupain i bulah sawi an nei em ni?"a rawn ti a,"Tu nutei te maw?"a rawn sawi teh tawng bawk si a,min ti hrilh hai zawk.

"U Hriati nu leh pa'n i lakah thil sawi an nei em ni?"

"Nei hran lo ve,"ka nui lui a,a za thlawt lo,"Zep duh suh, nutei khan min hrilh a,a zia lo ka ti khawp mai,kan nupa vangin kha chen i buai a,tunah u Hriati vangin Rintluanga nen,"a thu sawi lai chu ka lo pawt chat a,"A ho lutuk,"ka ti a,ka hawi kual chuan Johan-a a lo awm tawh lo hlauh.

"A ho ringawt lo,I duh chuan ka pui ang che,ka u mah ni se i duh phawt chuan ka pui ang che,I ngawi reng zel a,thil dik a ni lo,he tianga i ngawih reng chuan an zuam ang che,bakah Rintluanga tan pawn a fare lo emai..."a ti dap dap a,ka chhang lo,ka inchhirna a rawn belh chhah a,khawi lai emaw hmun reh deuha ka rilru natnate hi au chhuah pui ka chak.

"Ka sawi kha I hre thei tiraw?"

"Aw,hre thei e"

"Tunah in inah em ni i awm a?"

"Ni lo ve,hei thingtlang lamah ka nu laizawnnu te inah ka awm pui a,"ka aw chu a kir ti tih a,ka tan a hnai hle tawh tih chu chiang tak ka ni.

"A van buaithlak ve, Rintluanga'n engmah a la hre lo hrim hrim em ni?"

"Aw,a hriat ka la ring lo,bakah hre lo se a tha zawk,kan buai thui mai mai dawn a,ti hian keimah hi in thian fai ila an nun a nawm bakah a nih dan tur ang thlapin an awm thei bawk ang."

"Rintluanga-te chuan ka u hi a duh tawh hleinem I kiang emaw kiang lo emaw an tha tawh lo ang,"a ti nghet charh a,a cousin ai pawha min tan ta zawk chu hriatthiam a har lek lek.

"Duh ang,fate tih fahrah ai chuan...bakah u Hriati pawn a nun sim a tum a ni lawm ni?"ka ti a, a ngawih vang vang hnuah,"I awmna chu a nuam em?"a ti ta daih a,"Aw,"tiin dawt hlang hlak ka sawi a,nichin maia thil thleng mitthlaah a lang nawn uar uar mai.

"A hreawm loh tak tak a maw?"

"Hreawm lo ve,a nuam lutuk"

"Anih chu,aw hei hna ka nei lawk a, nakinah kan inbe leh dawn nia,"a ti a, phone a dah zui bawk.Keipawn ka phone chu ka kekawr ipte-ah ka hnawh lut a,bai ka vil laiin lehlamah chuan thirbel ka chhuang a, rawngbawl ka peih fel thleng pawn nu Thiangi chu a lo la let leh lo.

Johan-a leh Lucas chu sitting room lamah an awm a,a tlai tak tak hmaa inbual ka rilruk a,ka room-ah lutin ka towel leh ka thawmhnaw thlakna tur ka la a,room atanga chhuak lehin ka inbual a,tui vawta inbual ka ni bawk nen vawt tha tîk têk tak a ni,ka inbual zo bathroom atanga ka chhuak te chu ka khur bauh bauh reng a,ka lu ka su ta te chu ka inchhir rum rum.

In kawta scooty ri ka hriat chuan ka phu zawk a,"Khawnge i nu?"pa aw thum lamin a tih ri ka hre leh zat,nu Thiangi pasal chu anih mai hmel e.

"A chhuak a,a lo la haw lo,"ti tu chu Johan-a niin ka hria,"Muani chu a lo thleng lo em ni?"a tih chuan ngun thluk zawkin tawng chu ka ngaithla a,"Room-ah,"tih zawng ka hria.

Engmah hriat belh tur a awm tak si loah chuan room atangin ka chhuak a,pa pakhat hi room pakhatah a lut ve chiah a,nu Thiangi pawh chu khawiah nge maw a kal daih ni.

Sitting room lam ka hawi chuan Johan-an min lo hui a, din reng ai chuan tiin ka kal hnai a, phone kan bih ngar hlawm.

Kimi nen kan in text-a,tlai lama thil thleng chu engmah ka sawi duh hran lo,ka sawi anih chuan a rawn ri leh tut tut ang nga,tum loh deuhin u Rintluanga'n a hriat te pawh a hlauhawm.

"E... Muani,"tih ri ka hriat rual chuan ka phone khawih lai dahin ka hawi chhuak a,nu Thiangi pasal chu pa lian lam a ni a,a hang tih piah lam a ni,a dul a kiar deuh luah a,a ha a sen sung a,ka tap zawng tak a ni.

Han chhan dan vak ka hriat loh vang chuan ka nuih ringawt a,min be zui lo a, Johan-an nen an inbia a,"Pa Hruai,"a ti a,a hming zawhna chang pawh ka lo hre lo hrim hrim tih ka hrechhuak.

"E he!...Cas-a I pa a lo haw tawh a ni maw?"inchhunga rawn luh pahin nui sangin nu Thiangi'n a rawn ti a,ka hmel a hmuh rual erawhin a nui lai chu tawpin a tum hmak a,a zia hi ka tei thei bik chiah tawh lo,a ni khat ni atanga hetiang anih tawh chuan thla khat pawh a sak talh ngei ang le.

"I lo chhuak daih a,"pa Hruaia'n a ti a,a bula thut thlak pahin,"Nia, Dingi dawrah kuhva ka lei e ka tia kan titi tui ta phian a,"a ti a, midang a melh no tehlul nen ka lam a rawn hawi chang chuan rum theih tawp hian min en ta thin a,a nuam lo khawp mai.

"Anih chu,zanin kha block committee neih an rawn rawt thut a,hetah kan neih mai loh chuan,"pa Hruaia'n a ti leh a, politics lamah a in hmang ve hle anih ka ring.

"Dar engzat nge tan in tih a?"nu Thiangi a ni ve thung."Dar 7,"tih riin a zawm a,"In va ti hma ve,hetah in tih dawn chuan chaw ei mai ang u,"a ti a,a tawng no tha thin khawp mai.

"A pawi miah lo,han siam ula,"pa Hruaia'n a ti a, keipawh ka tho vat a, midang an la thut laiin Johan-an min pui a, nu Thiangi lah chuan,"Tih pui a ngaih loh kha...lo thu rawh,"a rawn ti a, Johan-a erawhin min puih a thulh phah lo thung.

Nu Thiangi chuan eng eng emaw hi an pa bulah chuan a sawi a,"Engtin nge ka u hian a lo hrawn reng peih zawk ni,a zawi si,engmah tih na chang a hre lo,ka u hi ka khawngaih an nufa vangin ti khawp khan an buai a,tunah an fanuin a chum buai leh chu ania,"a ti a,a tawng chu a zawi lem lo,pa Hruaia'n a lo khap a,a la ngawi duh lo cheu.

Johan-a pawh chuan min rawn en leh zuk zuk thin a,a nuam duh lo khawp mai,haw leh daih mai te ka chak.

"Kan siam zo aw,"Johan-an a ti lauh a,thutna tur chu min kawh hmuh zung zung a, sitting room lam a mi te pawh an rawn tho sap sap a,zanriah kil lai thlengin nu Thiangi chuan actress-i chungchang chu a sawi a,hrawn hreawm anih loh zia chu a sawi hnem ber a ni,ka nu a dem zia te chu a sawi cham chi a,min hmai zahna eih a nei lo a,ka lo dawn sawn dan tur engmah a ngaihtuah lo,a sawi bawng bawng a,a na ka ti,a duh chuan ka awm loh hunah pawh a sawi thei ve reng mahse a ni lo, chaw ei tui loh sa nen ka ipik tun tawh.

Pa Hruaia'n a khap ve takah chuan a ngawi ta hram a,a tawng loh chinah chuan a mitmei hmang bawkin a che leh a,hreawm ka ti lutuk chhu ka ding hluai a,"I puar hman a mi?"Johan-an a ti a,nui luiin,"Puar lutuk,"ka ti a,ka puar leh puar loh pawh ka hre lo,ka tawt lutuk a,mu leh mal pawh ka nei thei meuh lo.

Ka chaw ei chuan ka thinah min hnawh a,tui ka in teuh a,awmzia a nei ve deuh chuan ka hria.Chaw an la ei bawl nen sitting room-ah ka phei a, ka mittui a rawn baw zawih a,ka in chhir takzet tawh,u Rintluanga bula ka let leh lo anih pawn hetah hi chuan lo kal miah lo tur kha ka nia,mahse engjn nge maw min mawlh a,heta kal ka lo rem tih tehreng ni,ka rilru nat laia thu tlukna siam chuan na takin min vaw let mek ti ila ka sawi sual hran lo ang.

An kham rik tak sap sapah chuan tho nawlhin chaw eina chu ka ti fel a,a ngai tein Johan-an min tih felpui a,Lucas erawh a room-ah a lut a,dar kar khat hnu velah chuan a rawn chhuak leh a,a chhuak dawn anih hmel.

"Tlan kual vak vak tawh su aw,"a pa'n a tih chuan chhang loin a chhuak a,dar 7 a rik hma atang chuan paho an rawn kal a,kum upa leh tlema la valai deuh pawh an kat ve nawk a,thutna an in chan loh hlauin Johan-a nen chokaah kan awm a,eng eng emaw a sawi a,a thusawi chu ngawi rengin ka lo ngaithla ve reng.

"I leng chhuak ve dawn lo a mi?"

"Dawn nang,lenna tur ka hre teuh lo,"a ti a,amah chiah hi he ina ka nel awm chhun a ni.

"Kum engzat nge i nih tawh?"a rawn tih zawm zat a,"Kum 25,"ka ti chu a awih lo khawp mai,"Kum 25 maw i nih?I hmel en aiin i upa,"a tih chuan tawi tein ka nui a,"Anih nang kum engzat nge i nih a?"ka tih chuan,"Kum 23,"a ti a, ka rin aiin a naupang.

"Hetah eng nge i tih a?"amah en paha ka tih chuan,"Engmah ka ti hran lo,kum lai hawl lam khan patea te hian in hi an khawih tha a,pui tura ka kal kha tun thlengin ka la haw lo,"a ti a, engtin nge maw a awm reng peih ni.

"Engtin nge hetah i awm reng peih zawk a?"ka ti ta nge nge a,min en zawkin,"A khaw thleng hi a nuam ang reng a,bakah nutei te chu a sual hleinem,"a tia awii ka va han awih lo mai mai tak.

Ka awm dan a hmuh vang chuan tawi tein a nui a,"Midang lakah chuan rilru kha a pu lo,mahse vawiina i chunga thleng kha chu(h)...ka hrethiam chiah lo,"a ti leh a,ka fiah ta kuarh ka laka tianga a awm bik chhan chu thil dang ni theiin ka hre lo,ka nu an huat vang anih ka ring nghet hmiah tawh.

"Thingpui lo lum rawh u,chhang ka va lei lawk,"tih leh nu Thiangi chuan tlan chhuah a rual a,keipawh ka tho vat a,ka tho ve hluai tak nain a khawi ber hi nge thingpui lumna pawh ka hre lo.

Johan-a chu ka ko vat a,ka lam a rawn hawi rual chuan,"Khawi hi nge thingpui lum bel?"ka lo ti a,rawn tho vatin thingpui lum bel chu a rawn la a,lo ban vatin tap-a tui chu ka herh haw a,"An tam emai a khat kha a ngaih ka ring,"Johan-an a lo ti a,keipawh chu chu ka lo ngaih ve dan chiah a ni.

A khat chuan ka chhuang a,nu Thiangi a rawn let leh thleng pawh chuan a la so hleithei meuh lo,"I chhuang har aniang chu,"tih ringawt pawh minute khat chhungin vawi 10 lai a sawi tawhin ka hria.

A alh a alh ve ta na na na chu a rawn so ve thei ta hram a,nopui chu lain ka thli chhuk a,nopui a ka thlit kher chhan pawh a thlum rual mai bakah rusl khai taka a pawt vang a ni.

No a thingpui ka thlit chhuah leh hnu chuan nu Thiangi'n a zuk sem zung zung a,tihpui a ngai lo reng reng,a mahin a ti zung zung mai.

Nu Thiangi'n a sem tawh vangin an in zawh chuan keiin ka zuk seng ve thung.Johan-a bula ka thut thlak leh lai chuan ka phone a rawn ri a,u Rintluanga a nih vang chuan la loin ka ring ral tir a,zep loah chuan a aw hriat ka chak a,hnuah kuah te pawh ka chak lutuk.

"I chhang dawn lo a mi?"

"Imm,ka phone a thu dawn hnai aniang ih company lam hian tunlai chu min rawn phone reng mai,"ka ti a,caller id a hmuh loh vanga dawt sawi thei pawh ka ni.

Min chhang tawh loin a phone chu a en a, keipawn be zui loin ka phone chu ka bih ve ngar a,Kimi nen bawk a ni kan inbiak leh tak ni.Let leh tur chuan min rawn rawn leh a,ka hnial fi thla thei tawh meuh lo,ni e ka pa hi hrilh a let leh mai ka duh tawh.

"Ehe!Mate u Rintluanga a lo kal,"tih hi a rawn thawn a,ka phu zawk thei, zawhna ka va zawt chiam a,min chhang thei tawh der lo,eng nge Kimi-te inah chuan u Rintluanga'n a va tih ang tih ngawt chuan ngaihtuahna a luah ta.

Dar 10 pelh hnuah min rawn call a,midang an mu tawh a,room hranah ka awm bawk nen thawm dim taka chhan ka rilruk a,hre lo chuan ka muhil thei dawn lo,tunah pawh ka za zek zek tawh.

"Aw, hello,a lo kal tak tak a mi?"ka va ti zung zung,"Aw,lo kal tak tak e,i awmna kha a lo hria a,engtin nge a hriat ka hre lo, engkim a hre vek,"a ti ta mai a,khawi atangin nge a hriat tak ang.

"A rawn kal a,a hre nghal tawp nge?"ka aw chu zawi tha tak a ni,"Aw,'Thil sawi dun lawk ang' a tia chuan amah khan,'Hriati hi chu neih leh ka tum tawh lo bur'a tia,i awmna khua tih loh kha chu a lo hre vek a,"a ti a, ka bing chuk chuk thei.

"Chuan khaw hming chu i sawi tihna a mi?"

"Aw,zawh tak te khan min zawt a,ka hrilh ta tawp,lo hruai che a tum hmel lutuk,"a ti a,kha kha ania ka hlauh em em.

"A van buaithlak,ka let leh anih chuan u Hriati nunnain a tuar tur thu te I sawi em?"

"Aw,sawi vek e,'A ngam tak tak chuang lo ang,kan pafain kan mamawh,kan bulah a awm ang,Kion pawh a fahrah dawn lo,amah Bawihpuii'n a duh anih phawt chuan neih ngei pawh ka tum,'a tia,"a ti a,a rilru nghet lutuk chuan min tih hlim rual rualin u Hriati bawk a ni ka ngaihtuah chhuah leh ni.

Eng eng emaw a sawi leh hnu chuan kan inbiakna kan ti tawp a,ka inngaihtuah chiang a,ka rilru a buai telh telh, tawngtai ka tum lai mekin ka phone a rawn ri leh a,number hlang a ni nghe nghe.

Kan tum boruak nen a pawimawh tak hlauhin tiin call chu ka chhang a,engmah pawh ka sawi hmain,"Hmeli, Rintluanga bulah eng teh hrep nge i lo sawi a,damdawi inah a rawn kal a,a rawn thinrim teh ania,Hriati pawh hei tunah damdawi a lo bar leh tawh hi,a thi anih chuan mawh i phur chiang khawp ang tih lo hre rawh,kiang mai ta che,"a thusawi tawp chu a tah aw lek lek.

"U Hriati chu engtin nge a awm?"

"Tunah chuan a muhil,a lo harh leh chuan thlah fal ngam pawh a ni lo ang,in tih nat a tum reng a,a thih palh hlauh chuan engtin nge ka awm ang,"a rawn ti a,a rawn au tawn tawn a,ka biangah mittui a rawn lum thla pap.

"Ka ka tihpalh khawngaihin min ngaidam ru,u Rintluanga bulah khan engmah ka sawi lo,k ati tak tak amah khan a lo hre vek a,ka thiannu bulah a lo zawt a,ka let lo ang u Hriati nunnain a tawrh phah ka duh lo,ka let lo ang,in laka buaina ka siam vangin min ngaidam dawn nia,"ka ti a,ni e,mahni inngaihtuah ka tumna chu ka thulh ta hmiah bawk.

"Ni e, khawngaihin min hrethiam mai teh,innei lo pawh ni se an pafa chauha an awm tih Bawihi'n a hriat chuan a lawm lutuk tho ang, khawngaihin i khawngaihna ka rawn dil a ni,min hrethiam hram rawh,"a ti a ka ngaihthlak zawm thei tawh lo reng reng,ka phone chu ka nghat riai riai a,ka tap zawih zawih.

Ni e,keichu anchhia ang mai hi niin ka inhria, tu te tan pawh harsatna ka thlen thin a,midang harsatna thlentu ka ni tho si a, ngati nge maw siamtu pawh hian ka nunna hi a chhah mai loh le.

Chhuatah chuan ka thingthi a,ka kut chu ka suih a,ka tawngtai bawk,"Lalpa i remruat te pawm thiam thei turin chakna ka dil thin che a,mahse Lalpa he thil hi pawm thiam har ka ti takzet,mihring ngaihtuahna atang chuan let leh ka duh a,mahse Lalpa keimah chiah ka inngaihtuah thei bik lo, khawngaihna he i remruat hi pawn thiam thei turin min pui rawh,"ka chham zui thei lo,ka khumah chuan ka bawk a,ka mittui a hul thei meuh lo.

Ka tlaivar thak a,ka mit a bui luk a,dar 5 velah chuan tho chhuakin pawnah mei ka chhem a,tui lum chhuangin a so hnu chuan chaw chhum nan ka hmang a, Johan-a lo thaw chhuak bulah chuan chawhmeh siam tur ka lo zawt a,"Dal kan kha nizan khan a tlem deuh tawh a,patea hian Dal telloin chaw a ei thei lo a,dal siam belh mai rawh,a bak chu a thing a rin naw naw theih ang,"a ti a,dal awmna te chu zawtin thukah kan kang a, Johan-an a vil chungin inchung ka lo ti fel fai a,midang an lo thawh meuh chuan chaw a ei theih der tawh.

Pa Hruaia chu bank-a hnathawk lai a ni a,Johan-leh Lucas chu huan thlo fai turin an ti a,kei erawh ka insu thung ang.

Midang chuan an tih tur ang ang an ti tan a, kei pawh ka insu a,nu Thiangi erawhin Johan-a te chhun eitur a siam thung a,ka insu zo bathroom atanga ka chhuah lai mekin kawngka lamah chuan,"Pi Thiangi-te in a ni em?"ka aw hriat than em em mai anih vang chuan ka hawi zawk a, amah ngei a ni,ni e tu dang mah ni loin amah u Rintluanga ngei a ni.

"I lo kal a law?"ka lo tih chuan,nu Thiangi'n,"Muani tu nge ni a?"a lo ti a,"U Rintluanga,"tih zawngin ka chhang a,"Lo thu rawh,"nu Thiangi'n a lo ti ve sawk sawk.

"Eng nge i lo tih dawn a?"ding reng chunga ka tih chuan,"Ka lo tlawh che,"tih zawng a sawi a,ngun thluk fahran hian min en zui a,ka ngai a,kuah vawng vawng mai ka chak.

"Muani thu rawh,kha ti khan lo hmu tur chein a lo kal kha,lo inkawm ru Bawiha-te ka zuk au ang nge,"a ti a,a chhuak zui bawk.A chhuah rual rualin ka bulah u Rintluanga a rawn tawlh hnai a,chutah ka mita en reng chungin,"Ti nge emah sawi lo a I kal?"nghal pang mai a.

Ka chhan loh vang nge,"Engkim ka hre vek tawh,lo let rawh,"a ti a,"U Rintluang,ka thei ngawt lo,"ka ti a,nizan lama u Hriati min rawn biakna kha ka bengah a ti nawn tluk tluk.

"Hlauhthawn a ngai lo,ka bulah alawm i awm dawn,engmah buaina a awm lo ang,tu man buaina an thlen tawh dawn hleinem che,ka rualin lo haw rawh,Kion pawn a ngai tawh che a,keipawn,"a ti a,ka ngaih zia thu hrilh ve chu chak tak ka ni.

"U Rintluang,haw phawt zawk rawh,kan tluang chuang lo vang bakah tu emaw nunnain a tuar phah thei tih hre chung chuan ka hlim thei chuang lo vang,u Hriati chu i hriat kha thil tha lo a ti a ig phei chuan Kion lakah pawh ka inthiam thei chuang lo ang,"ka ti a,ani erawh a ngawi vang vang.

"U Rintluang,"a ding vut a,min rawn enin,"Ka nei tawh chuang lo ang,kei chuan ka lo nghak ang che,nghah chhuah theih I ni dawn emaw ni dawn lo emaw ka lo nghak ang che, zaninah let leh nghal ka tum a,i rilru i thlak a,min zui I duh anih chuan min lo bia la,ka lo hruai ang che"a ti a,engmah pawh ka sawi hman tawh lo,a chhuak zui daih.

Thlah tura zui chhuah nachang tak ngial pawh ka hre lo,nu Thiangi-te an lo chhoh chuan ka harh chhuak ve ta chauh a,"Khawnge i thianpa kha?"nu Thiangi'n a tih chuan,"A haw tawh,"tih zawnga chhangin Johan-a te eitur chu ka siam sak a, ka tah lah chu chhuah tak te hian a chhuak a,ka rilru hi a sawhchiar nuai tawh.

Johan-a te pawn an hna an zawh tawh vangin an intifai a,rawng ka bawl a, nu Thani erawh a leng leh daih tawh.

Rawngbawl lai te chuan ngaihtuahna a buai nuai a, ngaihtuah loh ka tum pawn ka lo ngaihtuah zel a,eng hi nge maw ka tana Pathianin a ruat hi ni ta ang le....

Chaw ei kham rualin Lucas chu a tlan chhuak a,inbual ka tum vangin ka room-ah thawmhnaw la turin ka lut a,tlaiah ka inbual hman lo a,ka hman ve meuh chuan pa Hruaia lo haw a ril a tam tawh si a,kan ei zui ta mai kha ania,tui lum tlem a awm bawk nen nimin ang em em kha chu a ni tawh lo turah ngai ang.

Ka thawmhnaw ka hai lai mekin ka room kawngkhar chu a rawn in theh hawng rawk a,nu Thani hmel dur lutuk ka hmachhawn zui ta siah.

"Zawngi,khawnge ka pawisa i dah?"a rawn ti tawl,ka bangbo hle ringawt,"Eng pawisa maw?"ka lo tih chuan min rawn pan a,a hnungah pa Hruaia leh Johan-an an zui bawk.

"Thu chiang pawh i hriat loh kha aw,"pa Hruaia'n a ti a, nu Thiangi erawhin ka samah a rawn kek bu lawp a,"Khawnge pawisa chu i dah?Ruk ka ru e te i tia law?"a ti a,"Ka ru lo,"tap chungin ka ti a,nen san ka tum a a sak talh mai.

"Thiangi,duh tawk rawh,thu chiang pawh engmah I hre lo a ni lawm ni?Khawiah emaw i dah pawh a ni thei,"tih pahin pa Hruaia leh Johan-an an pawt san a,ka dak chhuak chu ka hmaiah a rawn beng leh sawk a,"Ka ru lo,"ka ti vin tuar a, ka mittui ka khap per sak sak.

"Dawt te chu a la sawi zuah zuah ka ti,chhunah pawh nangmah nen bak inah hian kan awm lo,huana ka zuk kal chhung khan i la tihna a ni mai,sawn nih tawh hnu pawha kut kem ka nei e ka tih,zahpui awm lutuk,i nu ang chiah I ni,"a ti leh that that a,ka dawhthei tawh bik lo.

"Ka ru lo,nanga pawisa kha ka mamawh bawk lo,ka thawk chhuak ve thei reng,"ka ti a, rapthlak min tih hmel deuh hian min en a,ka insum tawh dawn bik lo,dawta min puh hnuah pawh kut min la thlak cheu chu a nia.

"Thu chiang kan hre lo Thiangi,"pa Hruaia chuan dam diai hian a ti a,nu Thiangi'n,"Amah bakin a la lo ang,"a ti leh a,"Ka la lo,i pawisa tello pawh khan ka awm thei,"ka ti ve leh a,a thin ka ti rim zual sauh emaw tih tur a ni,a an a chhe zual sauh.

"Tinge in va bengchheng ve a?"ka room-a rawn luh pahin Lucas chuan a ti a,"Henu hian ka purse-a ka pawisa dah kha a la alawm,"nu Thiangi'n a ti leh a,"Eng zat?"Lucas bawk a ni.

"Sangnga"

"A va mak e...ka bike siam that tir a ngai ka tia la turin min ti a ni lawm ni,"Lucas chuan a ti a,ka lo thawn chhuak hak,ka thin erawh rim namai lo tak a ni.

"Ka tih ka tih kha,thu chiang hre hmasa lo hian ri buan buan thin suh,"pa Hruaia'n a ti a,keichu min rawn enin,"Muani,kha in dah fel rawh,"a ti a,an inzui chhuak a, Johan-an,"A buaithlak thin lutuk,"a ti a,ka dawh peih tawh lo.

Ka phone chu ban lawkin u Rintluanga ka phone a,ni e,a rualin ka haw thla dawn,he laiah hian ka awm reng thei tawh lo."Tu nge i biak dawn?"Johan-an a tih chu ka chhang lo.

U Rintluanga'n a rawn lak rualin,"U Rintluang,min lo hruai rawh,"ka ti tap tuau a,"Min lo nghak rawh,"a ti a,kan dah zui bawk.

"Haw I tum em ni?"ring deuh taka Johan-an a tih chuan chhang loin ka bag-ah ka bungrua chu ka khung a,"Muani,"pa Hruaia'n a rawn ti pawh chu chhang loin ka insiam zawm hmawk hmawk.

"Chhuah a tum khang lang em ni?Rilru lian leh lutuk,"nu Thiangi chuan a ti leh a,pa Hruaia'n a lo khap leh vat.

Ka bag laa chhuah mai ka tum chu ka samah chuan nu Thiangi'n a rawn kek leh sawk a,ka thin a ti rim tawh takzet,leh hawiin a hmaiah tak chuan ka beng a,ka zah zo meuh tawh lo.

"A hman hman kutthlak tur ka ni lo,"ka ti a,ka inher rualin u Rintluanga hmel ka hmu zui zat,"Eng thil nge thleng?"tih leh kan lam rawn pan a rual a,pa Hruaia'n,"Rintluang,eng nge hetah i rawn tih a?"a ti a u Rintluanga pawh chu a meng buai deuh.

"Eng nge i lo tih dawn a?"pa Hruaia'n a ti leh a,"Bawihpuii hi ka rawn hruai dawn,"ka kuta rawn vuanin a ti a,tap pur chunga ka en chuan a hrilh a hai hmel khawp mai.

"In in hria em ni?"nu Thiangi'n pa Hruaia en chhunga a tih chuan,"Hre tehreng e,Mawi fapa kha,"a lo ti a,nu Thiangi'n u Rintluanga chu lut turin a lo sawm nghal sawk sawk.

U Rintluanga chuan beng khawn loin ka mittui chu a hru a,"Ti nge i tah?"a ti a,ka chhan hma hmain nu Thiangi'n,"Ka hai ve hlek a,a ngai haw nghal hlur a,"a ti a,"Ka zawt lo che,"u Rintluanga'n a lo ti bung nghut.

"Rukruah min puh a,kut te min thlak a,ka ru lo tih a hriat hnu pawn ka samah te a kek a,"a bak ka sawi thei tawh lo,eng vanga pang chang em em nge ka nih lah ka hre lo.

"Eng thil teh hrep nge a chungah hian in lo tih a?"u Rintluanga chu a auin a au a ni ber,"Hriat sual palh ania, Thiangi hi a lo insum hman lo a,kut a thlak palh alawm maw le,"pa Hruaia'n a lo ti nghal zung zung.

Chutah u Rintluanga chuan nu Thiangi mita en kal chungin ka kutah a vuan a,"Kum upa zawk i nih vang chauhin ka zah ang che,pa Hruai,i awm lai rengin hetiang hi a thleng ania,ka dem khawp mai che,"a ti ta sak sak a,kei erawh ka hawi chhuak tawh lo.

"Kan thiam loh a ni,min ngaidam ru,Muani,kal kher pawh a ngai lo,a vawi khatna ania,bakah kha chu hriat sual ania,"a lo ti a,"Tun hi a vawi khat kutthlakna che a ni em?"dam dapin a ti a,ka lu ka thing a hmuh chuan a beka thisen zam pawng tawlh tawlh chu ka hmuh hmaih lo.

"Engtikin nge kut a thlak che?"

"Niminah,"ka aw chu a hnawk tuak a,"Tenawm leh lutuk,pa Hruai,in ti mah mah deuh chu a ni,awm tura chelh beh pawh kha i zak lo em maw ni?"a ti fiah fak a,an ngawi ran thung.

"Bawihpui,kal ang,"ka kut a chelhna chu a ti nghet salh a,a car lo dinna lam chu min pan pui a,ka hawi let leh tawh lo.

A car hnungah chuan ka bag chu a dah a,min kai lehin a chhungah min thuttir a,a rawn luh hnu chuan min en vang vangin ka biang min benna avanga sa hum hum chu a kut phah chuan a chul a,ka chalah fawp leh zeuhin,"Haw ang le,kan fapain min nghak ania,"a ti a,'Kan fapa' a tih ri chuan ka thla a ti muang ni maiin ka hria.

"Eng nge thil awmzia?A vaiin sawi vek rawh le,"a kut lehlamin stearing a hum a, lehlamin ka kut a hum a,thaw hakin engkim u Hriati nu lo kal atanga nichin lawka thil thleng thlengin engmah zep nei loin ka hrilh fai ta vek.

Ka sawi zawh chuan ka chalah rawn fawpin,"Ka bulah lo khawiah mah i kal leh tawh ngai lo ang,kan chhungkuain kan awm tawh ang,"a ti a.

Tawi tein ka nuih a,ka phone a rawn rik chuan ka en vat a,ka pa phone call a ni.