D'LENMAWI BUNG 8-NA

D'LENMAWI BUNG 8-NA

Ziaktu-Venpuii 

Ka nghah rei tawh nen ka phone lah chu a ngawi hmiah a,ka hum leh rauh rauh thin a, ka call hmasa duh bawk si lo,ka be chak bawk si chutiang inkarah chuan ka awm a, hreawm duh tak a ni.

Dar 8 bawrah actress-in thingpui lum turin min rawn ko a, ka va lum leh rih,ka room-a luh leh mai ka tum chu,"I u pang a kham a,min va hneh chhawk lawk teh,"a rawn ti leh a,î hê loin Bz-i room-ah bawk chuan ka lut leh a,a lo meng a, min hmuh rual chuan zawi te hian,"Ka hnung hi a kham lutuk,"a lo ti sep a,a awm dan siam remin ka hmet a,ka phone ka hre ru rauh rauh a,a lo call tawhin ka ring.

Ka hmet zo chu ka chhuak nghal nal nal a,kan inleng te pawn tin an lo tum mek a,inchhung dunga ka tlan kual chu mak min tih hmel hlawm khawp a,mahse ka care hman lo,ka room-ah chuan ka tlan lut rawk a,ka phone ka en chuan a missed call a lo awm ngei e,vawi khat mai pawh ni lo,vawi thum lai a awm,sana kan en nak chuan dar 9 a la ri lo deuh a,an la mutthilh ka ring lo.

Ka call back a, rei pawh a ring lo a rawn la a,ka zak leh hnu hnawh,tawng mai nachang pawh hre loin ka ngawi reng a,ka lei chu ka seh leh ringawt thin.

"Hello,"mipa aw ka hriat than em em mai hian a rawn ti a,kan khik pui leh vur vur rih a,tleirawl ngaihzawng nei hlim ang mai alawm maw ka nih le, hahthlak hian.

"Bawihpui"

"Aw"

"Ka lo call che a"

"Ka hmu alawm"

"Tinge i lak loh a?"

"Bz-i pang a kham a,ka hmet lawk a"

"Aw haw...ka ti buai che em?"

"Buai lo ve,ka hmet zo tawh alawm,"a dah mai ka hlauh vang chu nge ka chhang rang ang reng khawp mai.

"Anih chu,I mu tawh em?"a rawn ti dam dap a,"Imm mu chiah,nangni zawk?Kion a muhil tawh a mi?"ka ti zung zung a,"A zanlai tawh,"a nui ri suk a,a va han pa chiang tak.

"Nang I la mu dawn lo em ni?"

"Hna khawih lawk tur ka nei a,ka meng rei deuh ang,"zawi deuh hian a ti zui a, chhan dan tur ka hre leh tawh lo nge ka kha a chih pawh ka hre lo.

"Bawihpui"

"Aw"

"Muhil tawh rawh le,"teh daih thin a,tih ngaihna dang awm tawh hek lo,tui zan lo chungin,"Muttui,"ka ti ve thei hram a,"Nangpawh muttui le,"a dah zui a,eng he hu ni lo mahse a zia viau tho e.

Phone chu lukham hnuaiah rawlh lutin kau zui a,ka mutna ka san vang nge ka muhil har khawp mai,ka mutthilh ve meuh chuan khua a var ti tih tawh,ka muhil thei mai thin lo hi a ni ka buaina chu.

Midang angin hna ka thawh nasat deuh hian midang angin muttui phah nan ka hmang ve thei thin lo va,ka taksa chau leh nain min thing zawk thin.

Hun rei tak hnuah mumang ka nei a,chu ka mumangah chuan tleirawl paruk hi ka hmu a,mipa pathum leh hmeichhe pathum an ni, school form in ang hi an ha a,an inkuah deuh nawk nawk hlawm a,mipa pakhat tawng chu an ngaithla thap a,eng nge maw a sawi tehreng ni,hmeichhe pathum chu au chulin an zuang auh auh a,an zinga hmeichhia pakhat chu an kuah a,an hlim hmel khawp a,ka nuihpui leh thin.

Ka harh zawk a, khua chu a lo vat tawh a,chawh rualin darkar hnih vel chiah ka muhil a,chutih rual erawhin ka zang bawk lawi a,ka mut tlema ka neih thin lu na leh luak chhuak hlui ang kha ka nei lo teh mial a,a lawmawm ang reng.

Phone ka ban a, Whatsapp-ah ka lut a,u Rintluanga message a lo awm ve ran a,ka open chuan,"Good morning,"tih zawng hi a ni a,chu te pawh chuan min van ti hlim mai mai tak.

Nilengin ka mood a tha dawn anih hmel e, message ka type lai mekin phone call ka dawng a,a hnen atangin a ni,nui vur vur chungin ka la a.

"Hello"

"Good morning Bawihpui"ehh! a hma ai zawngin mood a tha leh zual dawn anih hmel.

"Good morning,Bawihtea a tho tawh em?"

"A la mu vum nasa thêr thûr khawp mai,"a nui ri suk a,a thawm zui sat sat a,"Eng nge i tih a?I va ri nasa set sut ve,"thu that paha ka tih chuan,"Ka tho chhuak thawm kha aniang,hei rawng ka bawl dawn mek,"a rawn ti a,rawng a bawl rak rak awm si a,ka khawngaih lutuk.

"I buai viau em?"ka aw chu a zawi tha khawp mai,ka inthlahrung miau a ni,"Buai hran lo ve,chhunah ka thawhpui te an rawn kal dawn a,"a ti leh a,Cindy a tel leh hrim hrim.

"Cindy a tel ve dawn em?"ka aw chu a hma ang khan hriat a nuam tawh lo reng reng, thikna vang a ni tih hai theih a ni lo ang,a hre vekin ka ring.

"Tel ang,tinge i thik a mi?"a rawn nui ri suk a,kha maw ka tih reng kha huiha! lo in control ve deuh thin tur hi ania,ka zak ngawih ngawih, rapthlak lutuk mai.

"Thik teh nang le,"ka ti ve ngial a,a awih lo hle aniang chu a nui a nui ringawt mai a,ka sawi zui peih tawh vel lo e a,a thleng tur ang ang chu ka dak liam vek tawh.

Thawm ka hriat takah chuan,"U Rintluang,duh tawk phawt ang aw, nakinah ka inbe leh dawn nia,"ka ti a,min lo hrethiam khawp mai.Ka khum ka siam sawk sawk a,ka room atangin ka chhuak zui bawk.

Chokaah ka lut tlang a,ka pa a lo awm a, tui a lo in anih hmel,a running suit nen a ni rup a,a chhuah lai pawh ka lo hre lo hrim hrim.

"I va chhuak hma awm ve,"chaw chhum siam paha ka tih chuan,"Hma lutuk lo ve,I nu hi a la tho lo em ni?"a tih chuan Aw tih nan ka buk khum a,a thaw chhuak hak a, kan actress-i thawh hun a la ni reng reng lo.

"A va tho har thin ve,"ti supin choka atangin a chhuak a,rei ngial hnuah alu ka vel lai mekin actress-i chu sam thur bumin a rawn tho chhuak a,keia lo thu chu rum fe hian min en a,ka pa'n a kaitho anih ka ring.

Ka hmaah chuan a rawn thu thla dawt a,"Thingpui lo lum teh,"a ti khar khar a,a lu chu a dawm run a,mut a kham chiah lo anih hmel,"A thlumin nge a hangin?"

"A hang,"bung deuha a tih rual chuan ka thingpui chhuan sa flask-a ka dah chu ka thlit sak a,thingpui ka va pek lai chuan a lo muthlu nasa mai a,kaih thawh pawh ka peih chiah lo,a bak leh hlur dawn a,ti hian muthlu mai mai rih teh se,a mutthluk loh pawn min pui duh dawn chuang lo a,kil khata a lo an reng ai chuan ti hian lo muthlu se a hahdam thlak zawk ang.

Rawng ka bawl zawm a, actress-i chu hnar ring sawt tak a ni,vawi nga vel ring deuh deuhin a hnar a,a thaw kawka,a hnar leh a, chutiang reng chu, bengchheng tih piah lam ram a ni.

Chawhmeh siam hma tiin Bz-i room-ah ka va lut a,ani pawh a lo la harh lo,puan chu ka sin that tir a,ka chhuah leh lai chuan ka pa pawh an room atangin a rawn chhuak a,"Khaw nge i nu?"ka ner nawk.

"Chokaah a kha,"ka ti tha ve mai a,choka lam a pan nghal chu ka en zui ringawt,chhunah chuan in leng neuh neuh an awm a, actress-in shooting a nei nasa bawk a,keichu awl dar dar tak ka ni.

Zan dar 7 a pel awr tihah door bell a rawn ri a, kawngka hawng turin ka tho a,chuta ka thil hmuh vang chuan ka ding khawng reng,u Hriati pa leh nu,la valai tak an lo ding a,u Hriati pa'n min hmuh chuan a ner deuhin ka hria.

"I chhungte an awm em?"

"Aw,aw awm e,"ka sawi tur neih ang chu ka sawi zo vek tawh, inchhungah an rawn inzui lut a,ka pa te nen an in hria em maw ni ka tih rilruk lai mekin,"Kha,khawi lam atangin nge?"ka pa'n a ti leh lawi a,an bulah chuan ka va thu thla a, actress-i hmelhriat ti dawn ila ani ber pawh engmah sawi loin a thu ve luau bawk si a,han tih vak ngaihna pawh ka hre lo.

"Eng lo ania,han sawi tlang nghal tawp mai ila,a sawitu nih pawh a nuam chiah lo na chu nu leh pa dinhmun atang chuan in hriatthiam tho ka ring,"u Hriati pa chuan a ti a,eng nge maw sawi a tum ni.

"In fanu hi kan tan a hnawksak riau a,"a ti tawl a,"Keimah maw?"ka in kawk vâ a,eng thil nge sawi a tum hi,"Kan makpa inah hna thawkin a awm a,an lo inngaizawng a ni awm a hei,mi nupa in karah a tla zep ngawt mai a, hauh pawh kan hau nasa,amah hian thu hi a zawm duh miah lo mai a,in lo zilh sim theih takin tiin ka lo kal a ni,"a ti a,ka awih thei lo.

"An nupa in karah ka tla zep reng reng lo aw,in fanuin a pasal fanau aiin ruihhlo a thlang a,an in then fel tawh bawk,"ka ti chiam a, rapthlak min ti pawh ni se pawi ka ti lo,ni e ka rapthlak alawm,dawt hmanga in puh ka duh hek lo.

"Eng nge maw awmzia chiah le? Kan fanu berin tiang hian a ti bawk si a,"ka pa chuan a ti a,u Hriati pa tawng tum chu hmeichhia zawk chuan a lo khap vat.

"Eng lo,min hrethiam ula,in khawngaihna ngen tura lo kal kan ni,Muani, khawngaih takin Rintluanga lak atang hian i in thiar fihlim thei ang em? Hriati hi tih ngaihna kan hre tawh lo, ruihhlo a khawih nasa zual a,a nunna hian a tuar phah mai kan hlau a ni,"a ti dap dap a,sawi tur ka hre lo,u Rintluanga kalsan maw?

"Hriati hian bul tan that a duh a,mahse tunah Rintluanga nen tiang hi in thleng tawh si a, khawngaih takin min kian san hram thei ang em?"a ti leh a,sawi tur ka hre lo,ka pa ka en chuan u Hriati pa te lam ngawt chu a lo en a,ka inthlahrung takzet.

"Engtin nge u Hriati chu a awm a?"ka aw chu a zawi tha khawp mai,"Damdawi a khawih leh tawh a,chuan a room atang hian tul teah lo chuan a lo chhuak ngai lo a, engmah a ei duh si lo a, Hriati hi i ngaihtuah lo anih pawhin Kion tal hi ngaihtuah tel hram teh,karah fa te an awm tawh si a,"a ti leh a,sawi tur ka hre lo.

"I thei mai ang em?In in zuina pawh a la rei lo va,I la naupang a,i hmel pawh a tha a,"a ti leh a,"Ka hre lo,"chu zawng chu tun dinhmuna ka sawi theih a ni rih.

"Ka no. hi la la chanchin min lo hrilh leh ang nga,"a ti a,ka la ve tak nain Biak leh kher pawh ka tum hran tawh lo,"Kan tin phawt ang,chuan Muani chanchin lawmawm kan lo beisei dawn nia,"tih leh inzui chhuah an rual a,kei erawh ka thut ngaiin ka thu reng ringawt.

Ka pa te chuan engmah an sawi zui lo a,chu erawh awm ti nuam lo zual tu mai chauh a ni,thu tlukna siam dan tur ka van takzet, engtin nge ni ta ang,eng thutlukna nge ka siam tak ang le... pakhat chu ka hlimna a ni dawn a,pakhat zawk ka thlang anih erawh chuan ka dam chhung pawn ka inchhir maithei a ni,beisei loh dan hlir hian ti nge maw thil hi a thlen thin le...Ka room-ah ka lut a, ka ipik em em ringawt.

Lalpa eng hi nge maw ka tana tha tura i ruat hi le...min pui hram teh,mahni hma sial taka awm ka thlang anih chuan keimah vangin tu emaw thi lek lek a awm ang a,tu emaw nu leh pa leh a thenrual tha te rilru ka ti na bawk ang,chu mai piah lamah ka chhungkaw zahna thlentu ka nih phah thei a,tin u Rintluanga ngei pawh u Hriati tha taka a awm anih chuan a hlim zawk ang a,chutiang chiahin Kion pawh.

Mahni hringtunu ngei bula awm nawm zia hre tawh tu ka ni a,chu thil hre reng chung chuan mahni hma ka sial ang maw?Ni lo,ni lul lo e,mahni hma sial thei ka ni lo,midang tih nat ai chuan mahni hi na zawk ta mai ila,lung pawh a dam zawk ang.

Ka phone a rawn rik chuan ka en vat a,u Rintluanga,lak loh ka tum zet nain ka la leh ta zawk a,ka lak hnu pawh chuan tawng mai ngaihna ka hre lo.

"Hello, Bawihpui"

"Aw,he,hello"

"Chaw te in ei tawh em?*

"Aw"ka chhanna vang nge keimaha danglam awm a hre zawk pawh ka hre lo,"I tha em?Dik lo a awm a mi?"a rawn ti dam ruih a,engmah hi a dik tawh lo hrim hrim.

"Tha e, engmah a ni lo,"ka aw chu,zawi tak a ni,"Anih chu,"a ti a,a hrilh hai aw chu ka hai lo nasa,"Kion a awm em?"boruak chu tih zangkhai ka tum a ni ber,"Aw awm e, hei a be duh che a,"a ti a,"Atê,"tih ri ka hre zui zat.

"Aw, Bawihte,eng nge i tih a?"

"Papa nen t.v. kan en a, Atê, engtikah nge i lo haw dawn?"chu zawhna chu chhan a van har tehreng em,"Ih, Bawihte,"a bak ka sawi thei lo,ka hnuk a ulh zel a,ka tawng leh chuan ka tap dawn tlatin ka hre tawh.

"Atê,"ka chhang ngam tawh lo call chu ka ti tawp a, ka tap chhuak ta zawih zawih,lo in tawng miah lo ila tha tur.Min phone tluk tluk a,ka chhang lo,ka chhang leh anih chuan ka insum thei dawn lo a ni.

Zan khua chuan ka muhil lo,ka mit ka chhin apiangin u Rintluanga-te pafa ka hmu zel a,ka beidawng hluah hluah,ka ngaihtuahna a insual buai a ni,kiansan chu duh mah ila ka in ngaihthah thei bik ang em?Chu zawhna chu rei ngial ka in zawh hnuah thu tlukna ka siam fel ta a ni,ni e,ka kiang mai aniang chu.

Ka thawh chhuah chuan actress-i pawh a lo tho chhuak ve tawh teh mial a,a bula ka va din rual chuan,"Thla khat vel awm thawven pahin ka nau te bulah chuan awm mai ta che,"a rawn ti a,a aw chu a ni leh ni lo angin a dam diai a, ka chhang mai lo.

"Eng nge i ngaihdan? Hetah chuan..."a ti leh a,an bula ka awm a duh lo nge min ngaihtuah ve hrim hrim tih ka ngaihtuah.

"Muanpui,"a rawn tih leh rual chuan ka harh zawk a,"Ka hre lo,"chu zawng chu ka chhanna neih awm chhun a ni.Ngaihtuahna mumal put har ka ti."Awmpui tur an mamawh lai tak a ni bawk sia,han hawi thawven pah a ni mai a,hlawh pawh a tha dawn a,"a tih chuan engmah sawi tur ka hre lo.

Ka chhan mai loh vang nge,"I duh loh chuan ka nawr lui lo che,"plate dah rik nghat pah chuan a ti a,'Ka nawr lui lo che' ti mahse a chet dan atang chuan kal turin min duh niin ka hria.'Aih' tih ka tum zet na chu ngaihtuahna thar ka nei ta tlat.Ni e,heta ka awm reng anih chuan theihnghilh theih miah lo sulhnu kha an rawn thar dawn tih ka chiang takzet.

"Thla engzat nge ngai a?"

Ka bulah a rawn tawlh hnai sat sat a,a hriat duh ka sawi ngei a ni,"Thla khat vel a ni mai,"a ti a,ka ngawi vang vang,"Ka pa'n a phal dawn em ni?"min rawn en zawk a,"I duh phawt chuan kan dil dawn alawm,"a ti a,ka pa'n a phal anih phawt chuan kal mai ka duh,thla khat chauh a ni dawn tho a,hawi thawven nan a tha dawn riaiin ka hria.

"Ka pa'n a phal anih phawt chuan a pawi ka ti lo,"ka ti a,a phur harh harh khawp mai,rawng a bawl turh turh a,puih a ngaih hran loh vangin Bz-i room-ah ka va lut a, bathroom atangin a lo chhuak ve chiah a,ka lo pui ve vat.

"Eng nge i an tawh?"ka zawhna vang chuan min en a,a mitmeng chu nidang ai chuan a danglam a nung sarh ni berin ka hria

"Ka tha tawh lutuk,ka lawm e,I duh chuan I kal thei tawh ang,"a ti a, mamawh a neih tak lohah chuan ka chhuahsan leh thuai bawk.

Hmun ka phiah laiin ka iptea ka phone ah a rawn ri a, phone screen-a hming lo lang chuan mumal takin min awm tir thei tawh lo,u Rintluanga,ka chhang lo a,ka phone chu ka en ka en ringawt,tunah chuan Kion pawh a tho tawh ngei ang nga,nizana thil thleng khan a ti hrilh hai viauin ka ring.

U Rintluanga chuan vawi khat mai ni lo vawi thum lai a rawn ti nawn a,ka la lo vek,zep loah chuan ka la chak mahse,eng nge kei tehlul hian ka sawi ang.

Chaw ei lai chuan actress-in ka pa bulah kan ruahmanna te chu a hrilh a,"I duh em ni?"min rawn en zawk a,kei ka lu ka lo bu nghat,"I duh te chuan I kal ang nga a nimai lawm,"a ti dam dap a,han chhan leh dan tur vak ka hriat loh vangin ka ngawi ran,"Naktuk hi sumo kal ni ania,I hreh em?"actress-in a ti a,ka hreh loh thuin ka chhang,an pahnih chuan eng eng emaw an sawi a,hna chungchang vel anih hmel.

Chaw eina ka tih fel laiin actress-in Bz-i chaw a lo va pe a, ka pa erawh inkhawm turin a insiam thung.Ka pa leh actress-i an inkhawm a,keiin insuk pahin Bz-i ka lo awmpui thung a,ka insuk a innuai chhungin ka bungraw thenkhat ka pack a,u Rintluanga-te bula ka kal dawna ka insiam zan te mitthlaah a rawn lang a,ka ngai takzet.

Ka nu leh pa an rawn haw tak vang chuan ka room atangin ka chhuak a, actress-i chuan chhang leh eng eng emaw hi a rawn khai a,an inthlak laiin thingpui ka lo lum sak a,an in fel hun ka nghah leh te te hnuah ka insuk ka buaipui leh a,nizan ka mu tha vak lo bawk a,ka mit chu a thip thum tawh.

"Muani,"actress-i min kohna ri ka hriat rual chuan inchung step atanga chhukin inchhungah ka lut zui a,ka mi hmuh te vang chuan ka ding chiang chat chat khawp mai.

"Atê,"min rawn banin a ti zui a,ka lo pawm vat,ka darah a hmai a rawn phun a, ka nghawngah a kut a suih bet ran a,u Rintluanga chu a mitah tak ka en a,a hmelah chuan engmah ka hmu thei lo,a plain vek ka ti mai.

"In inkhawm em?"u Rintluanga en paha ka tih chuan,"Chawhma chu khawm e, Feli-te inah chaw kan ei dawn a,kan lo kawi zawk,"a lo ti sup a,a bulah chuan ka va thu thla a,Kion chu ka la kuah bet ran a,actress-in thingpui a lo siam nghal sawk sawk.

"Ka call i la thei si lo va,nizan lah khan,"a ti a, Kion-an,"Nizan khan Atê I tap a mi?"a tia a fing mah mah deuh chu a ni e,"Tap lo ve,"ka ti a,sawi tawh lo hram se ka ti.

"I aw kha a mak tiak tuak lutuk a...kan lo hlauthawng deuh a,tukin thlengin phone i la thei tawh si lo a,kan lo kal tawp,"a thingpui in khalh pahin u Rintluanga'n a lo ti a,"Ka buai lutuk a,a zia lo tak tak,"ka ti ta ringawt.

"I unaunu chu eng nge a an tawh a?"

"A tha tawh lutuk,a la rawn tho chhuak peih meuh lo va,a room-ah a awm chawt a ni ber"

"A van zia lo ve aw.... inthlahrung suh aw,an mamawh che anih phei chuan I duh chen chen i awm dawn nia,min rawn ngaihtuah lo la,"a thil sawi vang chuan ka inthlahrung takzet,kei lah chuan naktukah kalsan ka tum chu a ni vei tak sia,chu pawh kir leh thiang a tawhin ka ring lo.

"U Rintluang"

"Immm"

"Ka kal hnuin u Hriati a rawn lang leh em?"

Ka zawhna chu a beisei lawk lo tih hriat takin a thingpui in chu a hak thawt a,a khuh zui barh barh,"Awii! tihpalh lutuk,"a hnungah chuan kan han in chum leh ang lâwp lâwp a.A ziaawm deuh hnu chuan min rawn enin,"Lang miah lo, ngati nge?"ka lo zawt ta kher chu ka inchhir rum rum.

"Eng mah ni lo e,ka zawt mai mai che,"ka nui lui a,nui sukun,"Hlauthawng suh,"a ti sup a,tawi tea nuihin dawhkana chhang leh thingpui chu lain Kion chu ka in pui a,ka ngai ngawt ang,ka let leh hunah chuan min haw hle tawhin ka ring.Mahse ti lo thei lo dinhmunah ka ding a,mi pakhat nunna chu ka kutah a awm bawk.

"Kan in zo chiah na chu Feli khan 'Lo phei hma ru' a ti sia,kan va phei phawt ang aw,"a ti a,a ding zui zat,"Imm...ka lo thlah ang cheu,"tih leh din ve ka rual a,inchhung atangin kan inzui chhuak a,an tlan chhuah dawn chuan u Rintluanga chuan min hui zeuh a,ka kal hnaih chuan ka chalah a rawn fawp a,"Kan lo nghak ang che,"a ti a,tawi tea min nuihin an tlan chhuak zui a,an tlan chhuak ka thlir liam hnu chuan ka tho hak a,ti hian hei hi kan pahnih thawnthu tawpna a ni mai awm si a,tawp mai atan chuan uiawm awm ka ti a ni.

In chhunga ka luh rualin actress-in,"I laka a rilru put hmang eng nge ni?"a rawn ti a,"Kan inngaizawng a,mahse, kan tawp ang,"ka ti sep a,chek tlat tlat chung hian min en a,chuta a thu rawn sawi vang chuan mak ka ti takzet.

"I va han a tak,in inngaizawng anih te chuan kalsan a ngai kher hleinem,ka chunga tla chu ni se ka duh tak tak anih chuan tuna i thil tih letling thawk hi ka ti ang,"a ti a, ngaihtuahna a ti thui khawp mai,mahse keimah chiah in ngaihtuah theih ka ni lo,tu emaw nunnain a tuar thei miau a ni.

"Mahni chauh inngaihtuah thei dawn ila chuan kal pawh ka duh miah lo a, mahse keimah vanga tu emaw nunnain a tuar kha ka duh lo,"min rawn en zawkin,"I in thlak danglam ve tawh maw tia,"a ti bul bul a,ka danglam vakna ka hre miah lo.

"Eng nge kan siam dawn?"kan topic thlak tum ranin ka ti a,a fing bawka a hrethiam khawm mai,"Chaw chhum ila a bak chu a thing a rin theih mai ang, Bz-i ka va buaipui ang nge,"a ti a,kan inbiak dan chu inpawh leh in nel tak te pawh kan ang alawm.

Dar 3 velah chaw ka chhum a,ka pa erawh an committee vangin a rawn haw tlai khawp a,zan inkhawm an duh bawk nen,a lo thlen meuh chuan chaw ei a hun viau tawh.

Chaw ei ka siam sawk sawk a,ka pa a inkhawm a,actress-i erawh zan lam hi chu a support bik teh chiam lo,thleng ka sil lai mekin ka phone a rawn ri a,number hlang ani a,ka nghah vang vang hnuah ka la a,"Muani a ni em?"an rawn ti tawng a,tu nge maw ni.

"Aw ni e,tu nge ni?"

"Hriati nu ka nia,"ka thaw hak min rawn be chhen lo mahse pawi ka ti miah lo,"Eng nge ni ta?"ka kut hruk pahin ka ti a, thutkhawmna pindan lam ka pan zui bawk.

"Eng lo ania, vawiin khan Rintluanga-te pafa an rawn kal em ni?"atia engtin nge maw a lo hriat chawng chawng ni.Ka chhan loh vang nge,"Hriati'n a lo hria a,a kut a lo zai a,hei tunah damdawi inah kan awm mek a,i ngaihdan I lo siam fel tawh em?"ka thaw hak.

"Ka kiang ang,"tih zawng ka sawi a,"I fel hle mai,ka dinhmunah hian ding la i ti ve tho ang,ka lawm lutuk aw,nang chu i hmel pawh a chhe lo va, Rintluanga aia tha I hmu em em ang,"a ti a,ka nui ro hak.

"I dinhmunah chuan ding ila tiang hian ka ti miah lo ang,tiang thleng lo tur hian ka fate a tir atangin tha takin ka enkawl zawk ang,"a tawp lam chu a tah aw hle bawk.Ka tah khum thei tak ngial dawn a ka hriat vangin min chhanna pawh nghak tawh loin ka off a,ka mittui a rawn lum thla pap a,a na ka ti.

Eng hi nge maw ka tih sual bik thin le...ka hlimna apiang hi min laksak nimaiin ka hria.'Vanduai' he thumal hi ka tana an duan chhuah ni maiin hria.

Ka phone a rawn rik chuan ka ngaihtuahna atangin ka harh chhuak zawk a,ka en nak chuan Tlankimi a ni,in bun ruah ka mamawh lai taka a rawn call vang chuan ka la vat a,nidang ang thoin a rawn thawveng leh khawp mai.

"Tunlai chu ka buai lutuk a,naktukah Kion hruai pahin lo kawi la,"a rawn ti sawk sawk a,tho hakin,"An bulah ka awm tawh dawn lo,"ka aw chu a ri chê chê ringawt.

"Maw?Ngati nge?Eng vangin"zawhna min zawt mawlh mawlh,thil awmzia ka hrilh chuan a rawn sa tha khawp a,kal chilh te a tum thul,kan inkhap thei lo lek lek.

"Thingtlangah chuan awm kher a ngai em ni?"

"Rilru lak pen nan a tha alawm"

"Kal miah lo zawk rawh,I kal chuan an lakah i tlawm dawn tihna ania,let leh rawh,run luih rawh,"a rawn ti hmuar hmuar a,tuna u Hriati dinhmun ka hrilh chuan a rilru a rawn buai ve khawp a,"Rintluanga kha hrilh tawp rawh,"te a ti leh tut tut thin a,chu chu thil tih chi loh tak leh ka tih miah loh tur niin ka hria.

"Ti nge maw an chhungkua hian buaina an siam reng mai che le...i tleirawl laiin Laldinhlua ania,a dawtah an nupa chuan tunah Hriati,"a ti a,a nui ro deuh hak a,han chhan vak dan pawh ka hre lo.

"I pa te chuan engtin maw an tih a?"

"Ka pa chuan ka thu tlukna min zah sak a, actress-i hi chuan ka duh tak tak anih chuan let leh turin min ti a,"ka tih rual rualin,"A sawi dik chiah,enteh,midang mitmei i ven a,an ngaih dan tur che i ven thawn chhung chu i hlim thei ngai lo ang,khawvel ania,mihring tawh phawt chuan mahni hma kan sial vek,midang ngaihtuah lo a i hma i sial ve a tul tawh,mahni hlim nana midang tih nat kher tur tihna erawh a ni lo a,mahse loh theih loh hi a awm ve,an mitmei I zah em em te khan eng nga tan mah an ti miah lo ang che,i hlim kha an hlau zawk,chuvang chuan mahni hma sial takin let leh la ka duh,"a ti dap dap a,sawi tur reng ka hre tawh lo.

"Ka thusawi chu i hria em?"

"Aw,aw hria e"

"Let leh rawh,Hriati pawh chuan a ti Ngam dawn tak tak lo,let la, Rintluanga hnenah chuan engkim hrilh la,anin chin fel dan a hre mai ang,"a ti a,a harsa a ni.

"Ka theih ka ring lo,min hrethiam teh Kim,"ka mittui a tling pur a, Bz-i room atanga actress-i a rawn chhuah rual chuan ka room-ah ka lut a,t.v. a en ka rin vang a ni pakhat.

"I thu thu le,mahse i thu tluknaah khan inchhir miah suh,fim takin in ngaihtuah la,i inchhir miah lohna tur kawng zawh rawh,"a ti a,mi chhungkaw tahna leh ti na tu nih chu ka thei ang em?Ni lo,ka thei lo,ka hlim theih nan tu emaw nunna chu ka pawisa lo ang maw,ni lo,ni lul lo e,"Ka thu tlukna ka sawh san lo,ka kal ang,"ka hmui ka pet ngawt ngawt a,tah chhuah vak vak mai ka duh.

"Aw le,ka nawr lo che aw, i inchhir ka hlauh vang ania,min ngaidam rawh,"a ti a,ka belh tura a awm hi vannei ka in ti takzet.

"Imm,ka lawm lutuk e"

"Muani,min lo be ziah rawh aw,chuan lo haw vat la,Christmas barzar turin ka lo nghak che nga,kan pahnihin kan bazar dawn nia,"a ti leh a,kan college kal lai chung chang te chu a sawi ta zawk a,chu chuan ngaihtuahna a la peng ve ta deuh.

Dar kar hnih dawn kan inbiak hnuah kan inbiakna kan ti tawp a,ka phone khuma ka dah thlak rualin actress-i ka room-ah a rawn lut a,"Naktukah zing dar 6-ah in chhuak dawn a,i insiam tawh em?"a rawn ti a,"Aw,"min en zawkin a chhuak leh ta daih a,tho chhuakin ka room kawngkhar chu ka kalh zui a,khumah bawk thlawpin ka tap ta zawih zawih.

Rem ve ngai lo tur tih rem tum phet,thleng thei ngai lo tur thlen tir tum phet,beisei bo beisei luih phet,a tawpa a chhanna erawh rem lo tih bawk a ni.

Ni e,he thu hi kan pahnih inkar sawi fiahna tha ber a ni.

In tawng lo tawp tur kan lo in tawng a,ka hmangaih thiang miah lo ka lo hmangaih a,ka dai loh tur daiin ka huang chin ka pel nasa hle bawk.

Ka phone a rawn ri leh a,u Rintluanga a ni,a tawp nan tak vawi khat biak chu ka duh.Insiam thain ka aw ka thian leh kharh kharh a.

"Hello"

"Atê"

"Bawihte nangmah e law?Inah in haw tawh em?"ka ti sawk sawk a,"Aw,haw tawh,ka mu tawh dawn a,Muttui min ti la,"ka nui hak.

"Aw le Bawihte,Muttui le,tui deuhin muhil siai siai rawh le,"chu thu ka sawi zawh rual rualin,"I mu dawn tawh em?"u Rintluanga'n a rawn ti a.

"Aw,hei ka mu mai mai, nangni?"

"Junior-a mut a chhuak a,hei ka mutpui a,hna khawih tur tlem ka la nei a,"a ti a,eng eng emaw kan sawi a,kan inbe rei khawp a,ani leh ni lo angin sawi tur a rawn hre fu a,ka biak hnuhnun ber tur tih hria awm ang hrimin ani min biak rei ni,naktuk zan tun ang hunah chuan ka biak a rem tawh dawn lo bawk.

Kan inbiak zawh hnu chuan thoin ka thawmhnaw ka la dah luh loh ho chu ka bag-ah ka khung leh a,ka in khung fel hnu chuan chhuatah thingthiin ka tawngtai a,a awmpuina dil mai loh chu dil tur leh han chham tur dang ka hre lo.

Darkar 2 vel chu ka muhil vein ka ring,dar 6 chhuah anih vangin dar 5 velah chuan ka in peih fel diam tawh, actress-in pawisa min pe ve ngei a,a nau number chu min pe nghal bawk.

"I thlen dawn hnaiah i phone ang nga,an pa u fapain a lo nghak ang che,"tiin kawt thleng min thlah a,sumo stand thleng ka pa'n min thlah a,dar 6 chhuah an ti nain kan kim tawh vangin dar 5 leh a chanve velah kan chhuak a, tukverh bulah ka thu a,kan tam lem lo,kan hnungah chuan mipa pakhat a thu a,a mu a ni mah ang chu,ka sirah chuan hmeichhia a thu a,kan hmaah nutling pahnih an thu bawk a,driver-te nen chuan an titi a,keini chu min rawn ngaihven teh chiam lo.

Ka bag atanga earphone la chhuakin hla ka ngaithla a,auto play-a ka dah vangin a in play apiang chu ka ngaithla a,kan tlanna chu khaw pawn a ni a, thing leh mau a awm fer fur a,ka hla play chu ka ṭahpui lek lek ṭhin.

Kan chuanna sumo a din rual chuan ka hawi chhuak a,khaw pawna thingpui dawr pakhat kawtah hian kan lo ding a,"Thil ei lawk ang u,"driver-in a tih chuan kan chhuk dial a,steam momo plate khat leh thingpui ka in a,ka ei fel chuan ka eina man te pein kal kawnga eitur theite um leh acid tih vel ka lei a,dar 7 a pel zawt chauh.

Sumo-ah ka lut a,ka phone ka phawrh a,ka pa chu biain kan chawlh mek thu ka hrilh a,ka biak zawh rual chuan ka phone chu a rawn ri leh a,ka tawt up up mai,u Rintluanga.

Ka ring ral tir hnuah pawh vawi li lai a rawn call leh a,ka phone chu ka silent hmiah,ka hah hlui thei.

Ka chuanpui te an rawn let kim hnu chuan kan tlan chhuak leh a,a ngai te tein hla chu ka ngaithla leh a,min vel lek lek hial mai.

Ka phone screen-a notification rawn lang chu ka en a,u Rintluanga hnen atang bawkin a ni,"Bawihpui,"tih te hi a ni a, ka hmui chu petin ka mit ka chhing sawk a,kan thawnthu chu a tawp tawh.

Ka lei taksa a ral hunah chuan lung loh tui ka dawn ang a,hawi lo par tawnin hlim takin khawvel piah lam ramah in tawng lehin thlah leh tawh ngai lo turin i kut ka vuan tawh ang.

Ka phone rawn ri chu ka en a, actress-i nau a ni,ka pick vat a,"Muani a ni em,"a rawn ti a,a aw chu actress-i nen a in ang viauin ka hria.

"Aw ni e"

"Khawi lai nge in lo thleng tawh?"

Driver chu ka en zawk a,"Khawi lai nge kan thlen tawh?"a hming ka hriat loh vangin ka mawl biak ta tawp,"Khaw chhung kan thleng tawh,"an rawn tih chuan,"Khaw chhung kan lo lut tawh,"ka ti a,"Imm, driver bulah khan 'Venglaiah Biaki dawr kawtah' ti la, Johan-an a rawn hruai ang che,"a ti a,"Aw le,"tiin ka off a,"Khawiah nge i chhuk dawn?"driver chuan a lo ti ve chiah.

"Venglai nu Biaki dawr kawtah"

Sumo a din rual chuan,"Kan thleng aw,hei hi nu Biaki dawr chu,"driver-in a tih chuan ka chhuk sawk sawk a,ka bag chu lain driver chu chuan man ka pe a, dawr kawtah chuan ka ding ran tawh.

"Nangmah hi a mi?"ka bula bike a rawn din rual chuan ka hawi chhuak vat a,mipa a ni a,kei ai chuan a naupang deuhin ka ring,"Nu Thiangi'n a rawn tir che a mi?"a mita en chunga ka tih chuan min chhang loin a bu nghut a, a ngen hmel ka ti.

"Lo Chuang vat ta che,"a rawn ti hluk a,ka phu zuk thei,a bike hnung chu a dang ang reng si a,ka chuang hreh lutuk.Min tur tak sekah chuan hreh deuhin ka lawn a,a rem lo lutuk a,ka inherh dawnin ka hria,thla chu muang lo tak a ni.

Bike a din rual chuan,"Kan thleng,"a ti nghut a,ka chhuk nghal sawk sawk,in chu a senno niin chhawng khat a ni a, concrete a ni bawk,a kawtah chuan pangpar an vul chûk a,"Nu,"ka bul a miin a tih rual chuan inchhung atangin hmeichhe pakhat hi a rawn chhuak a,kei chu min kal pelin a bula mipa ding chu a en a,"Kan chhuak dawn,"a ti a,"Vengchhakah kal a ngai,"a nu'n a tih chuan,"Johan-a a awm a ni lawm lo han kal tir ve tawh mai rawh,"tih leh tlan chhuah a rual zui a,a nu chu a phun hluk.

Kei chu min rawn enin,"Lo lut rawh,tih tur a tam teh ania,"a ti a,ka ding chu min ngaihsak zui loin inchhungah a lut zui hmak.

Inchhung ka luh rual chuan,"Lo kal rawh,hei hi i room tur,"min rawn en zawkin a ti a,ka zui ve dat dat.

Ka room tura a tih chu room lian lem lo tak a ni a,"Tu tu nge cheng cheu a?"min rawn en zawk,ka sawi tur hriat loh lutuk vang a ni pakhat.

"Kan nupa leh kan fapa Lucas chuan kan pa u fapa Johan-a,"ka lu ka lo bu nghat a,han sawi tur vak ka hre tawh lo.

"Ka pa te kan be lawk aw,"min melh rulh duh chauh a,ka hmui ka pet ka pet ringawt tawh."In dah fel la,min rawn pui rawh,"ti bung nghutin room atangin a chhuak zui a,u Rintluanga-te bula ka awm dawn tum nen kha chuan a in per san lutuk tlat.

Ka phone phawrhin ka pa number chu ka dial a, a rawn lak rual chuan,"Pa,aw hei ka thleng tawh aw,"ka ti zung zung a,"Anih chu,in tluang a maw?"a aw a thian kharh mai.

"Aw tluang a nimai e,pa chanchin kan inhrilh zel dawn nia,nu Thiangi hi kan pui lawk ang nge,"ka ti sawk sawk a,min chhanna pawh ngai chang leh ta lo chuan room atangin ka chhuak zui zat.

"Nu Thiang,eng nge ka lo tih pui ang che,"ka tih chuan antam thahnem zet hi dawhkanah a rawn chhawp a,"Lo thian rawh,thenawmah kal ka ngai, mamawh I neih chuan bathroom-ah sawn Johan-a a awm kha,"a sawi lai mekin bathroom atang chuan mipa pakhat hi a rawn chhuak a,boxer nen tlawng a awm a,a nghawng a a towel bah lai chuan a lu huh chu a hru thuak thuak a,min rawn en zawkin a room lam ni awm takah a lut zui nal nal.

"Ka va kal lawk,Johan hei Muani hi lo pui lawk rawh,"tih leh kal chhuah a rual a,dawhkana antam chu ka en a,chemte ka zawng a,ka hmuh mai vang chuan ban vatin ka thian zui a, ka then lai mekin ka bulah Johan-a kha a rawn ding a,"Puih i ngai a mi?"a rawn ti a,chhan pawh ka chhan hmain chem te a ban zui a,"A ngai lo,"ka ti ve nain a beng a chhu ngawng lui hmiah nia.

"Tu nge i hming?"

"Lalmuanpuii,nang?"

"Johan Lawmsangzuala"

Kan ngawi leh rauh rauh hnuah,"Nutei u fanu maw i nih a?"ka en zawk a,"Aw,"tih zawng ka sawi,"Engtia rei nge i awm theih ang,"chem te chu a dah tha zui mial mial.

Kei pawhin antam sil chung chuan thla khat vel ka awm tur thuin ka chhang a,"Eng nge tih leh tur?"tiin zawhna mitmengin ka en zui a,"Ka hre miah lo,nutei'n eng nge a sawi?"

"Antam thian tur hian min tia,a bak engmah a sawi lo"

"Rawngbawl nan a la hma a,then lawkah a ti anih dawn chu,thil dang tih a ngai tawh lo ang,thutthlengah thuin t.v.a en a,kei erawhin hmun ka phiat thung.

Ka phiah lai mekin ka kekawr ipte-a ka phone ah chu a rawn ri a,ka en chuan ka thaw hak,u Rintluanga bawk a ni,phone chu silent-in ka ak tha zui a,biak chu ka chak na meuh mai,mahse a tawp tawh a ni.