D'LENMAWI BUNG 7-NA

D'LENMAWI BUNG 7-NA

Ziaktu-Venpuii 

Ka parda zarin a hliah theih loh chin atanga ni zung lo lutin ka hmai a rawn chhun chuan ham bai baiin ka tho a,sana ka en chuan dar 6 a lo pel fel diam tawh,ka bula mi erawh la mutui tak a ni,a thaw sak sak a,a ang pam bawk.

Inhnuaia chhuk ta mai lo chuan ka hmai te chu ka phih a,ka sam bawk mial mial chungin inhnuaiah ka chhuk thla zui bawk.

Nizan lama chawhmeh ka siam hnem deuh vangin chawhmeh pawh siam belh loin a thing ka chhuang lum a,an la rawn thawh loh takah chuan tiin tual chu ka phiat fai a,kawt zawl a zau tha si a,phiah chhung chu rei duh tak a ni.

Inchhunga ka luh leh chuan,"Bawihpui,"tih ri ka hre zui zat a,ka leh hawi chuan u Rintluanga hmel ka hmu nghal mai bawk.

"Tual ka phiat a,"tih leh tui in ka rual a,"Atê,"chokaa rawn luh ve pahin Kion chuan a rawn ti a,a mit a nuai chat chat a,a sam chu a phir seng sung mai.

Kion lo biak ka tum lai mekin ka ipte-a ka phone ah chu a rawn ri a,kan en nak chuan ka pa a ni,hmani deuha min rawn biak bak kha kan la inbe leh lo hrim hrim.

"Hello,"ka lak rual chuan ka ti a,ka pa aw ngei maiin,"Bawihi,"a tih ri ka hre zui zat.

"Imm,"ka be chak hran lo va ka aw pawh a nelawm teh chiam lo,tih nelawm lah ka tum hek lo.

"Bawihi,thla thar lamah chuan lo let tawh mai ta che,in lamah kan buai lutuk a,"a ti a, ka meng rum tha khawp mai.

"Bz-i pawh a awm ve reng a ni lawm ni,"ka ti a,ka lawm lo aw ka chu thup buai ka tum lo nasa.

"Hna thawk a ni sia,"a ti leh a, ka nuhrawn tih tir bak anih ka ring ta hauh lo,"Keipawn hna te chu ka thawk tho a, bakah pa maw lo let leh hi thih hrehin ka hreh tawh,"ka ti ta tawp a,thu dik a ni bawk.

"Bawihi, chutiang ringawt te chu,"a tih leh lai mekin,"Kan chawm char char a,chhungkaw tana chhawr ve dawn a chhawr theih ngai reng reng loh mai,"ti tu chu amah ka nuhrawn ngei a ni.

Ka kalsan deuh vangin Kion-te pafa thawm ka hre lo a,ka pa nena kan inbiakna hi hre lo se ka ti bawk.

"Engzat nge i hlawh reng reng a?"a rawn ti leh a,"Thla khatah sing khat,"ka ti a,tu emaw tê têin a hre chak leh tawh anih ka ring.

"Pa lawk,ka buai,"tih leh dah ka rual a,ka ipikna tih ziaawm tumin thawk ka la ham ham a, chokaah ka lut leh thuai bawk.

Ka va luh lai chuan u Rintluanga'n chaw ei a rawt a, ka siam zui bawk,chaw ei kham chuan an chhuak zui a,an chhuah fel hnua kawngkhar kalh mai ka tum chu tu emaw hian min nem lut deuh rawk rawk a,a hmel ka en chuan hrilh a hai duh hle.

U Hriati chuan thinrim mitsen rûm chuan min melh khui khui a,eng nge maw a rawn tih leh dawn ni ti a ka ngaihtuah lai mekin,"Eng vangin nge nimina ka lo kal thu Rintluanga bulah i lo sawi?"a rawn ti a ka chhang lo.

"Nang hmeichhia,ka hrilh ang che,nang hi chu a infiamna hmanrua mai mai alawm i nih,ka hrilh tawp ang che,kei min duh leh min hmangaih ang hian tumah a hmangaih ve ngai lo aw,"a ti leh a,ka thin a rim ve leh ta phat.

"Dawt hi sawi kual reng lo teh, nizanah pawh a duh loh zia che a sawi vek tawh,"ka ti a,a nui ro hak,"Nang mi pa thlem thluk ching,"a tih chuan,"Mi pa ka thlem lai ka hre lo,Dinhlua ka thlem lo a,u Rintluanga lah ka thlem hek lo, mî pa lah a ni hek lo, nupui ni khua lo tak a pasal fanau te aia ruihhlo thlang duh mi a neih vang a ni,"ka ti ve ta sak sak a,ka insum peih bik tawh lo.

"Nang hi,"ti a min rawn ben a tum chu a kut ka lo ben thlak sak hmiah a,a meng ling tha khawp mai.

"Tiang em em hian engtin nge i zah theih loh mai le..."a ti vei tlawk tlawk a,ka nui hak,"I zah theih lohna power min kai tawh a,"ka ti chu a haw ngang mai.

"Nang hi!" a ti a,a khur dar dar,a thinrim vang anih ka ring inherin a chhuak nal nal a,kei erawh nichin lawka ka tawngkhum dan vang khan hreawm ti leh hnuhnawhin ka ding vang vang.

Chhunah Kimi a lo leng a,thil thleng ka hrilh chuan a thin a lo rim nasa mai a,u Rintluanga nena kan chung chang ka sawi erawh chuan a sa pa tal chiam a,a nuam ti lutuk chu ka nuih liam ta ringawt.

Kion hruai ka ngaih vangin Kimi nen chuan kan chhuak rual leh a,a dawr lama a let leh hmain Kion chu min va lam pui leh thlap.

Haw lamah chuan ka tum loh lutukin u Hriati ka hmu a,chawhma lama thil thleng ka hrechhuak lo thei lo,Kion nena ka kaihna chu a en zawk a,kei chu min rawn enin thin zet hian min en zui a,ka awm a nuam fahran lo.

"Kion,Bawihte,"kan lam a rawn pan hlawk hlawk vang chuan Kion chu ka hnungah a biru rawk rawk a,a chet dan vanga ka ding khawng reng chu u Hriati chuan min nam sawk a,ka inring lo bawl nen ka lo kat nawk mai.

"Lo kal teh,"ti a pawm mai a tum chu Kion chuan,"Ka duh lo,"a lo ti a,ka lo dinna lamah chuan a rawn tlan phei a, ka lo pawm vat.

"Kion, keimah Mama ka nih hi,"a fapa en chung chuan a ti a,Kion erawhin ka darah a hmai a phum san hmiah thung.

"Ka fapa kha rawn la rawh,"tih leh Kion chu rawn ban a tum a,a kut chu ka vai thlak sak pawp a,a thinrim hmel chu rapthlak zawk tak a ni.

"Zawngi,ka fapa hi engtin nge i lo tih a?"a ti a,ka mit ka lo chuar tap a,ka thin chu rim hle mahse ka insum hram hram a ni.

"Rawn la rawh,"ti a min chhuh a tum chu ka nem ta pawp a,a hmel chu rup rapthlak tawh tak a ni.

"Ka fapa chungah hian eng thil nge i tih?"a rawn tih chuan ka chhang lo va,ka melh no tawh bik lo khawp mai.

"Ka fapa leh ka pasal ka lak atangin i hel tir a,"a nui ro hak chu lu thin khumin,"Hel lo thei loin i siam miau alawm,"ka ti chu a inhum ruh leh nasa tawh khawp mai.

"I tluang dawn lo tih lo hre tawh,ka pasal chu ka nei let thei tawh lo pawh a ni thei mahse ka fapa kha chu ka bulah a awm dawn tih lo hre tawh, nuhrawn a hrawn lo ang che,"a ti leh a,"Engtin nge i tih vak ang nga?"ka aw ki chu ngeiawm tak a ni.

"Court pawh ka thleng mai ang,ka hrilh ang che,I bul aiin Kion pawh hian nuam a ti ang,"in rin tawk hmel fe hian a ti a,ka nui hak.

"Tunah pawh a duh loh khawp hi maw..."amah nuih sâng chunga ka tih chuan a ha chang a thial ri bap bap a,ka ti duh hle niin ka hria.

"Atê,kal tawh ang,"Kion-an a tih rual chuan u Hriati pawh ngaihsak tawh loin Kion chu ka kalpui a,kan inbe lo ve ve a,ka pawmna ka tih ngheh sauh sauh laiin anin ka nghawngah a lo kuah ve tai bawk.

In kan thleng a,ka mut chhuak lutuk chu ka meng lui thei lo reng reng ka mit a rit lûk a,mutthluk bawrh bawrh mai ka nap a ni.

"Atê,ka mut a chhuak,"chhuat nawhna ka dah fel lai mekin Kion chuan a rawn ti a,sana ka en chuan tlai lam dar 1 chauh a ni.

"Keipawh ka mut a chhuak a, kawngka ka va kalh lawk ang aw,"ka ti a,a lo nui var var.

Tho nawhin kawngka chu ka va kalh a,sofa lian berah chuan Kion nen kan mu a,ka muhil har lo khawp mai.

Kawngkhar insawi dat dat riah chuan chiang lo ruaiin ka harh a,tho tuih tuih a ka va hawng chuan u Rintluanga ka hmu a,min ti ham haih ang reng.

"In mu em ni?"a ti dam dap a,"Imm,kan mut a chhuak lutuk a,"ka lo ti a,tunah dar 2 pawh a la ri lo va,ka rin ai daihin a rawn haw hma.

"I va lo haw hma ve,"ka lo tih chuan,"Vawiinah Hriati nen in inhmu em ni?"sofa-a thut thlak pahin a ti a,a mitmeng dam dap chuan min lo en ran bawk.

"Aw,hmu e,ngati nge?"ka lo ti a,'Eng thil nge maw thleng leh ta ang le...'ka tih rilruk rauh rauh laiin,"Kion hi a bula awm tir turin min rawn dil a."a ti a,"Eng nga a ti tak tak em? Vawiin chuan court thlen a hreh loh thu te a sawi a,"ka ti a,a fapa-in a duh lohzia hre reng chungin engtin nge maw a bula awm luih tir a tum theih ni.

"Imm,a buaithlak khawp mai,"a ti chhuak halh a,a lu a dawm pah vang vang a,a rilru a hah hmel hle bawk.

"Kion duhthlanna hi a pawimawh ber tho a,a thlang ngei bawk dawn che a,chuvang chuan lungngai lutuk duh suh,"ka ti a,tawi te hian min nuih a,a rilru hah hmel chu hmuh hreawm tak a ni.

"Ka han inthlak lawk ang aw,"thawh hluai pahin a ti a, chhang loin ka lu ka bu a, inchungah a chho nghal mai.

Kion muhil hmel chu ka thlir a,u Hriati hi ka dem takzet...a pasal fanau te hi naute lem ang maiin a en ni ta berin ka hria,a duh hun hunah a hlamchhiah a,a chang leh hmangaih ber awm ang hrimin neih let leh teh a tum a,a awm dan hi a huatthlalaawm ka ti.

U Rintluanga chu a lo la chhuk mai lo, thingpui han pek thaa ka rin vangin thingpui ka lum a, rawngbawl pawh a lo hun leh kuarh tawh.

Ka thingpui lum a so hnu chuan ka siam a,chhang nen chuan ka ken chhoh sak a,a room zawn ka thlen chuan phone a hmang thawm ka hriaa ka ngaithla vang vang.

Tu nge a biak ka hre lo a, mahse a thinrim hmel khawp mai,"Ka nei tawh dawn lo che,"tih vel a ni nawk a,an dah hun chu kawngka bulah ka nghak ren rawn a,a dah ka rin tawh hnu chuan kawngka chu ka kik a, min rawn chhawn hmain ka hawng zui bawk.

A wardrobe nghengin a lo ding a,"U Rintluang, hei thingpui,"dawhkana dahin kal mai ka tum a,min koh vanga ka ding dat chu ka hnung atangin min rawn kuah a,ka thin phu chu a tlirin a tlir leh dawt dawt tawh.

Ka kawngah nghet lutuk a vuanin ka darah a lu a nghat a,ipik zetin a thaw chhuak halh.

"U Rintluang"

"Immm"

"I tha em?"

"Ka hre lo,"ka thaw chhuak hak a,anin amah hmachhawn zawngin min kuai her a,ka biangah dawmin a pathlawi freestyle power hmang chuan ka hmuiah a fawp a,min kuah leh vawng vawng.

Rei ngial chutia kan awm hnu chuan,"U Rintluang, rawngbawl a hun tawh,ka zuk chhuk tawh ang,"tih leh tak chhuah ka rual a,"Aw le,"a ti a,a bula awm vak chi pawh ka ni lo ka thin hian phut dan mumal a hre thin lo tlat.

Room atang chuan ka chhuak a, inhnuaiah chhukin Kion-a mutna ka va en a,a lo la mutui khawp mai.A samah dim tea chulin a biangah ka fawh sak a, choka lamah rawngbawl turin ka lut zui bawk.

Dal chu sil turin ka la chhuak a,ka sil chhungin tel ka chhuang a,ka kan hlanin alu ka vel a, keimah te chuan ka buai ve khawp mai.

Alu ka chan laiin Kion a rawn harh a,a sam chu a thur bum a,a meng phak tha em em mai leh nghal a ka lo nuih ringawt.

"Bawihte, ei tur i duh em?"ka bula chair pawh chhuah sak pahin ka ti a,a biang a dawm a,"Aw,duh e,"a ti a,a awm dan chu a inhmeh em em leh nghal a,a biangah ka piai sak a,ding hluaiin thei tui leh chhang ka la a,a bulah ka chhawp sak a,a ei mai loh vang chuan ka thlek deuh a,a lo bu lawp lawp a,a muthlu chu niin a va hahthlak thin tak.

'Ka mut that tir ang nge ka kaitho ang' ka tih rilruk lai mekin a bu leh lawp a,a harh chiang aniang a rawn dak chhuak a,"E..."a ti heu mai.

"I mut a la chhuak a mi Bawihte?"a sam thur zet chul sah paha ka tih chuan a lu a thing a,"Chhuak tawh lo,"a ti ve tak nain a mitmeng atang hian a mut a chhuak tih a hai theih loh.

"I duh chuan I mu,"ka sawi lai mekin kawngkhar a rawn in theh hawng rawk a,choka atanga ka va dah chhuah chuan u Hriati rawn pen lut hlawk hlawk ka hmu a, Kion chu ka pawm nawlh.

"Lalrintluang,mi tenawm pa,"a aw chu ring tha tak a ni,choka atanga kan chhuak min hmuh chuan thip zet hian min rawn en a, ka lo ip chawih theiin ka hria.

A hnungah chuan mipa pathum leh hmeichhia pahnih an rawn lut a,"Lalrintluang,rawn chhuk ta che,"u Hriati bawk a ni,u Rintluanga room kawngkhar a rawn in hawng a,u Rintluanga a rawn lang thuai bawk.

U Hriati ka va en chuan a lo inkuangkuah vei thân a,u Rintluanga lo chhuk chu ngeiawm deuh hian a lo melh kar a, u Rintluanga pawh a lawm hmel teh chiam lo.

"Eng nge in rawn tih?"step hmawr a rawn thlen chuan a ti a,a inhum ruh nasa hle bawk.

"Ka fapa ka rawn la dawn,"u Hriati chuan hawi sang larhin a ti a midang erawh an la ngawi reng.

"Chhuak rawh u"

"Ka fapa tel lo chuan ka chhuak lo ang"

"Engtin pawn awm la i hruai lo ang,"u Rintluanga bawk a ni,u Hriati tawng tur chiah chu a hnunga mipa pakhat chuan,"Bawihi bula a awm i phal loh chuan in pahnih hian inhruai leh mai ru,Bawihi pawn a thil chin tha lo a sim vek tawh hi,"a ti a,ka lo tawt up up thei.

U Rintluanga a nui ro hak a,"Teuh lo,"chu thu chauh lo chu sawi tur a hre lo em maw ni,keichu ka ngaih a ngam tawh lo reng reng.

"Eng nge maw bultan that pawh chu i hlauh viau..."nichina lo tawng bawk kha a ni.

"Pa,bultan that theih lohna tur chhan lian tak a din ve reng hi,"u Hriati chuan a ti a,an vai chuan min en thap ni berin ka hria.

U Rintluanga chuan ka kutah q rawn vuan a,"Nupui hual ka nei tawh,"a ti hmiah mai.Ka en chho hê hâw a,min en loin kan hmaa ding te chu thip zet hian a en ran a,midang mitmenga mak tihna chu hai theih a ni lo.

"Nupui neih i tum a maw?"u Hriati tih lohah an vaia zawhna a ni,"Tum tehreng e,"ka bula mi chuan ka kut vawn ngheh sauh sauh pahin a ti a,awm dan tur ka hre lo lutuk chu thawk ka la sek sek.

"Ka fapa hi nuhrawn hrawn turin ka phal lo,ka bulah awm rawh se,"u Hriati bawk chuan a ti leh.

"Hruai thei turin dikna chanvo i nei lo,tin Kion hian a duh a thlang thei bawk,court kal loin a chinfel theih a,in duh talh anih pawhin court-ah kan ching fel ang,"u Rintluanga'n a ti dap dap a,an ngawi thiap tawh.

U Hriati chuan thinrim zetin a sam a kek bawrh bawrh a,a au vei tuar tuar bawk.

"Kha nu kha kalsan la ka nun ka siam tha ang nga,lo let leh ka duh Rintluang, khawngaih takin min ngaidam rawh,ka fapa bul leh i bul tluka thlakhlelh ka nei lo,"tih te a ri nawk a,chu lo pawh chu tam tak a ni a sawi ni.

"Kha thu kha i insiam that hun ka nghah lai khan lo hrechhuak tur i nia, tunah chuan i tlai tawh,"u Rintluanga chu ka en a,min rawn en zawkin ka darah a beng thak a,an lam chu hawi lehin,"Min chhuahsan tawh rawh u,tin thubuai chu in duh duh danin kan kalpui ang, sawi tlana chin fel emaw court-ah,"a ti a,kan hmaa ding te an in melh kual hruk hruk tawh.

Chutah nichina mipa lo tawng khan u Hriati chhuata a thu sawp chu a dara zuk khawih sakin,"Bawihte, engtia awm nge i duh?"a ti dam thluam a,a pa anih ka ring.

"Ka fanu hi i pawm leh mai thei lo a mi?"a pa bawk a ni."Min hrethiam ru,ka neihsaah hian ka lungawi,"min rawn en zawkin a ti a,ka rilru chhia in ti maithei mahse ka awm chu nuam tak a ni.

"Rintluang,i lo mak e...ka fanu lakah hian engtin nge maw hetiang hi i tih theih le?Ka fanu aiin ani hi i la thlang zui ania(h),"a ti a,a thusawi dan atang chuan min ngaihnep zia a lang thei.

"I fanuin ka chunga a tih hmasak kha ngaihtuah rawh.Nia,i fanu aiin Bawihpuii hi ka thlang,a chhan chu maw ani chuan a hrin loh fa pawh duat leh hmangaih takin a enkawl a, chutiang bawkin keipawh mahse,huh!...

I fanu hi chuan a pasal fanau te aiin ruihhlo a thlang zawk a,duh takin a thlang a,a thil thlanah te chuan lawm ve em em tawh rawh se,"a ti a,ka kut a humna chu a ti nghet sauh sauh bawk.

A pa bawk chuan,"A thil tih suala a inchhir vang reng chuan alawm ngaihdam a dil che,"a ti leh a,a beng atangin mei alh a lu chhuak ang tih hlauhawm khawpin a hmai a sen tawn tawn mai.

"Min hrethiam ula,ani hi ka nei tawh,midang ka mamawh lo,"ka darah a rawn kuah a,kan hmaa mite chuan u Rintluanga chu an en tlawk tlawk a,u Hriati pawh a rawn ding chhuak tuih tuih.

"Bawihte,ka bulah lo awm rawh aw,"Kion rawn en pahin a ti a,a rawn kal hnai bawk.

"Aih,ka duh lo,"min kuahna tih ngheh sauh sauh chungin a lo ti thung.

"Lo kal rawh,"rawn phih mai a tum chu u Rintluanga a lo tawng vang chuan a tawp chat.

"A duh lo anih kha,haw rawh u"

"Ka fapa tel lo hian kan haw lo ang,"a sawi lai meka a hnunga mipa pakhat lo tawng leh rual chuan a hawi rang ngang mai.

"Naupang duhthlanna a ni Hriati,eng ang pawn court-ah khing mah la naupang kha kum tling a ni tawh a,duh a thlang thei,"a rawn ti charh charh a, u Hriati chu lawm loh hmel tak a ni.

"Ka fapa ania,ka bulah alawm a awm duh tiraw Bawihte?"Kion chu rawn ban leh mai a tum a,Kion chu a rawn tap ta mai a,kei tak pawn chu ka hamhaih ang reng khawp mai.

"Bawihte,"a hnungah ka chul sak a,"Mama bulah ka awm duh lo, Atê-i bulah ka awm duh"a tah dan vang chuan u Hriati pawh a tawp chat,Kion erawh a tap uar sauh sauh emaw tih mai tur a ni.

"I kal dawn hleinem Junior,"dam dapa a pan a lo tih chuan a lo insut hlawp hlawp a,ka khawngaih lutuk.

"Kion kan bulah awm la i nuamsa zawk ang,hetah chuan nuhrawn fing phakar leh sual tak i nei lo ang tih a hriat loh,"u Hriati pa chuan min rawn en kar chungin a ti a,ka sawi thiam lo ka thin hi a na vawng vawng.

"I tupa ngeiin a hringtu a nu ngei aiin a thlang tih kha i lo hre ve lo em ni?"u Rintluanga aw chu chang tha tak a ni,u Hriati pa pawh a ngawi hmak tawh.

Minute 10 dawn chu a tua mah kan inbe lo a,ka inhnial hek lo,kan ngawi thap a,Kion insut leh hraih thin tih loh chu thawm dang hriat tur a awm lo.

"Chhuak tawh mai ta che u,"u Rintluanga chuan a rawn ti ta a,an in en hrak hrak a,an chhuak pheuh pheuh,u Hriati te pafa erawh an la ding a,eng nge maw an beisei ni,an hruai tur berin an bula kal a duh lo a,an kalpui te ngei pawhin an sawi a,chuti chung chuan hetiang hian an la awm ania....an nasa ka ti mai ka sawi thiam lo.

"Chhuak tura ka tih zingah khan in tel aw,"minute hnih hnu velah u Rintluanga'n a ti leh a,an chhuak lo Ngam ta bik lo aniang nge,an inzui chhuak hnek hnek a, an kal liam chu ka enzui ta reng,pafa in thurual tak an nih hmel a,a tha zawngin in thurual se chuan pafa awhawm tak an ni ang tih lam daih ka lo ngaihtuah.

"Chhuan i nei em?"u Rintluanga'n a rawn tih takah chuan ka ngaihtuahna atanga harhin ka dal kan ka hre chhuak a,khai leh! Kion pawm chung chuan chokaah ka tlan lut a,ka dal kan chu a tui a lo kang vek a,thir bel lah chu a lo khu luih luih a,a va han zia lo tak.

"Bawihpui,"ka zawhah a rawn ding a,gas chu ka off a,"Ka lo theihnghilh daih a,"ka aw chu zawi tha tak a ni.Tawi tê hian min nuih a,"A pawi lo,"a ti ve tak nain ka inthlahrunna a kian phah eih lo.

Dar 10 a pel awrh tihah phone call ka dawng a,ka mu tawh nghe nghe,ka pa hnen atangin a ni a,ka phur teh chiam lo khawp mai, ka la ta tho a,tawng pawh ka tawng hmain,"Bawihi,hei Bz-i hi scooty-in a accident palh hlauh mai a,kan buai si a, naktukah i lo haw mai thei ang em?"a rawn ti a,min thawng khawp mai.

"A na viau em?Tunah eng nge a an?"ka ti a, hetiang anih chuan haw lohna chi niin ka hre lo.

"A accident tak kha chu nimin piah kha a nia,vawiin khan kan chhuak a, Bz-i a che thei bawk si lo a,i nu hian a buaipui mai a ngaih hmel a,inchhung khur enkawl tur kan awm lo riau a,kei lah hnathawka chhuah ka ngai ve leh zel bawk si a,rei pawh a ngai hran lo ang,i awmna te kha lo rawn la,"a ti tak nain haw ngei ngei tura min duhzia a aw atang chuan ka hre thei,ngen ngâwl aw ki a ni tlat miau a ni.

"Ka lo rawn chhin dawn nia, Bz-i chu engtin nge a chetsual theih a?"a thaw hak ri ka hre zui a,a ngawih rauh rauh hnuah,"Car nen an insu alawm maw le,thla hmasa hlawh lah a tang a,ama hlawh ve lah a lo hmang zo vek si a,I nu nau te pawisa kan puk ringawt alawm,"a ti a,ka khawngaih reuh lutuk.

"In harsa viau em ni?"ka aw chu a zawi tha khawp mai,"Harsa viau hran lo e...hlawh a la luh loh vang mai mai ania,"a ti a,ka awih lo,"I account-ah I nei lo em ni?"ka ti leh hram a,kan misuali hian a lo khawh ral sak leh vek tawh anih ka ring.

"I nuin a lo hmang then daih a,"a ti a, ka rin dan tawk vel a ni,"Eng nga tan nge a hman êm êm thin a?"ka lawm miah lo,hah takin ka pa'n a thawk a,a ni'n awm hmunah a lo khawh ral huau huau a,a va han in an loh theih tak.

"I nu chu I hriat kha,"a ti zuai raih a,a aw dam lutuk te chuan ka thin a ti rim tun thei.

"I hau ve em em lo em ni?"

"Hau ve e,thil pawimawh deuhah a hmang dawn emaw ka tia,"chhuan lam a va han tling lo thin tak,"Pa ka lo dil ang nga,u Rintluanga'n a phal tak leh naktukah a rang lamin rawn phei ka lo tum ang,duh tawk phawt ang,"ka ti a,ka biak zel chuan ka rilru a ipik zual mai mai dawnin ka hria.

"Aw le,"a rawn tih rual chuan thaw hakin ka off-a u Rintluanga a la mutthilh ka rin loh vangin ka thaw a,ka pa chu ka khawngaih na meuh mai,mahse a dam mah mah deuh chu a ni.

"U Rintluang,"a room kawngkhar ka hawn rual chuan ka ti a,ka rin ang ngeiin a lo la muhil lo,a ngai te tein lehkhabu nen a lo inchhawp leh rap tawh.

"U Rintluang,thil hrilh lawk tur che ka nei a"

"Sawi rawh le"

"Eng lo ania,ka unaunu hi a accident-a,ka nu hian a buaipui chawt a ngaih hmel sia,ka pa lah hna a thawh a ngai si a,inah che tur an awm si lo va,kar khat chhung vel ka awmpui min phalsak thei ang em?"ka ti a,ka sawi tum dan pawn ka sawi lo.

"A van zia lo ve,a na viau em"

"A zia tawh a,mahse a che thei lo a"

"Naktukah chaw ei kham veleh Junior-a nen kan va thlah dawn che nia,"ka mitah tak min en a,min melh zam tum ni awm takin min en bawk.

Tawng mai na chang pawh hre lo va ka en reng lai chuan rawn tho chhuakin ka chhipah a rawn tawk zeuh a,a mita ka en reng lai chuan,"I va ngaihawm dawn ve,"dam dapin a ti a,ka hawi san rang khawp mai.

Ka hmuiah rawn fawp leh zeuhin,"Muttui le,"a nui suk a,ka chhuak nghal nal nal, ka thin phu a mumal leh tawh lo,a buaithlak thin mang nge.

Ka room-a ka let leh hnu chuan ka bungraw thenkhat ka bag-ah ka khung a, tul hle lo se chuan ka haw lo chiang kher ang,mahsela hetiang teh nuai an nih tawh laia haw duh loh chu thil tih awm ang lo tak a ni.

Thil dang vang ngawr ngawr chuan ka hreh pawh a ni lo,u Rintluanga-te pafa kalsan hi ka hreh a ni,zep loah chuan kan in ai pawhin he in hi ka thlahlel a ni,a len zawk vang emaw ni loin a chhunga chengte vang hian ka thlahlel a,let tawh lo tur ang maia ka inngaihna chuan min mawlh tet tet reng a,ka muhil thei lo reng reng,ka harh tulh tulh zawkin ka hria.

Ka mit ka chhing vang vang a,dar 3 dawnah chuan ka muhil ve thei ta hram a,ka harh leh chuan dar 7 a lo la ri lo deuh a,Kion school kal a ngai lo bawk a, hmanhmawh lutuk kha a ngaiin ka hre lem lo.

Ka khum piaha ka bag ka hmuh chuan ka thaw chhuak halh a,ka peih lo telh telhin ka hria.

Thawh ka tum lai mekin Kion a rawn harh a,ka bag a hmuh chuan,"Kan zin dawn a mi?"a lo ti a,lu thingin,"Kan inah ka awm rih lawk a ngai dawn a,"ka ti a, a hrethiam lo khawp mai.

"Kan bulah I awm char char dawn kha,"a ti tuau a, han chhan dan tur ka hre lo,a mittui a bianga luang chu ka hruk sak a,theih se chuan hruai tel ve daih ka chak.

"Ka lo kal leh vat dawn alawm,"ka ti a,min kuahin,"Kal kher a ngai a mi?"a ti leh a,a sama lh chul sakin,"A pawimawh lutuk a,ka papa-in min lo bia a,min ngai tawh a,ka lo kal leh vat dawn alawm,"ka ti a,a hriatthiam mai ka rin tawh laiin,"Keipawn ka ngai dawn che alawm,"a ti leh a,ka hreh telh telh.

"Ka lo kal leh vat dawn alawm,ka lo kal leh hunah chuan ka awm char char thei tawh dawn a,"tawi tein ka nuih a,a mittui chu a kut te tak tê chuan a hru a,"Lo kal leh ngei ngei rawh aw,"a ti ve thei ta hram.

"Kal dawn chiang rapthlak,le,tho tawh ang aw,papa nen min va thlah dawn sia,"kan boruak chu tih zangkhai ka tum a ni ber.

Pawm nawlhin inhnuai lamah ka chhuk thlakpui a, chokaa ka thil hmuh vang chuan ka phu zawk thei,u Rintluanga'n rawng a lo bawl chu niin.

"U Rintluang,khawi eng nge i lo tih a?"ka ti sawk sawk a,a fian ken lai chu laksak ka tum a,a phal thak lo,"Khawi ka lo ti ang."

"A ngai lo,I insiam tawh a ni,lo han insiam zawk rawh"

"Zo tawh e,nizan khan ka insiam tawh alawm,khawi lo la rawh,"ka ti a,a lu a lo thing nasa mai a,min ti inthlahrung telh telh.

"Khawi ka lo ti ang"

"A ngai lo,a har hleinem,"teh talh chuan,"A nuam lo,khawi lo va thu rawh, ka lo ti ang,"tih leh a fian ken chu phihsak ka rual a,a lo tang bik tawh em lo ve.

Kal sanin Kion bulah a va thu a,Kion lah chuan ka awm lo tur chu a pa bulah hahipin a lo sawi a,a peih loh thu mawlh chu a sawi a,kei deuh hian a nia hreh ni.

"Bawihpui"

Thleng ka sil lai mekin u Rintluanga'n a rawn ti a,ka en chuan a kutah hian pawisa a lo keng a,ka en heu mai.

"Kha heihi la la,tam tham a ni lo va,damdawi leh eng eng emaw mamawh leinan I hmang dawn nia,"dam thuam hian a ti a,ka meng phar tha khawp mai.

"A ngai lo,ka nei alawm,"tiin ka hnar a,mahse min ti lui nasa khawp a,ka hnar lui ve tang tang thung.

"I ti ho emai,"a ti leh thin a,ka lak duh tak tlat loh vang chuan a beidawng ve tawh anih ka ring.

"Ka bag vel ka han la thla ang nge,"a insiam peih at tawh vang chuan ka ti a,aw tih nan a lu a bu nghat a, rang fahranin inchungah ka tlan chho bawk.

Ka room chhunga ka luh chuan chu min hnungchhawn zawngin khumah a lo thu a,lukham a kuah tai a,tukverh lam a thlir bawk.A darah ka va khawih a,a lo phu zawk nia,"I va phu nasa ve, tihpalh lutuk,"a samah ka chul a,a rawn hawi chhuak mitmeng chu a sen ram a,a tap anih ka ring.

"I tap a mi?"amah hmachhawn zawngin chhuatah ka thu a,"Aih,"a ti ve ngei a,mahse a tap tih hai theih a ni lo.

"Ti nge i tah a?"

Min chhang loin a bianga a mittui chu a hru tawk a,"Keimah vang a ni em Bawihte?"

"Kal kher a ngai a mi?"a aw chu a hnawk tuak a,a insut hraih a,kal min ti hreh zual takzet a ni.

"Ka lo kal leh vat dawn alawm,ka lo kal leh hunah chuan ka kalsan tawh miah lo ang che,"nuih luih ngial ka tum a sak tak a ni.

"I tiam em?"a kut humin ka hmai zawmah a rawn lek kang vut a,ka kut chu hum vein a kut chu ka sik tir zeuh a,a lo insut leh hraih.

"Kion kha a awm em?"rawn luh pahin u Rintluanga'n a ti a,kan lo awm dan vang chuan a pen lai chu a ding chawt a,a hrethiam tih a mitmeng atangin a hriat theih bawk.

"Junior"

Ka thutna bulah chuan a rawn thu hniam a,a fapa hmel ngui lup chu a en vang vang a,Kion erawhin a kut a sik neuh neuh a,a kut ngawt chu a en a,kal leh loh mai ka duh rum rum tawh.

"Junior, Atê-i hi a lo let leh vat dawn alawm,rei lo te a kal ang nga,a lo awm char char tawh dawn alawm,"u Rintluanga'n a ti a,Kion ka en chuan a mittui a rawn luang leh a, hnem dan tur tak nial pawh ka hre tawh lo,hnem a hnekin ka hnuk te chu a ti ulh tun a, Bz-i lo chetsual kher kher chu ka ti vawng vawng mai.

"I lo kal leh tak tak ang tiraw?I rei ang em?"a rawn ti ve ta nge nge a,ka lo chhang rang khawp mai."Rei dawn nang,ka lo kal leh ngei ngei dawn alawm,ka tiam tawh che kha,"ka ti a,a hmui chu a pet a,tah a insum ve ngei anih ka ring.

"Aw le,kal tawh ila,"u Rintluanga chu tho vutin ka bag a la a,a chhuak nghal daih, keipawn Kion chu pawm nawlhin ka zui chhuak a, motor-a kan chuan lai te chuan ni danga tawng bawrh bawrh thin kha a lei li an hleh sak ta emaw tih mai tur a ni,biak pawn a rul tawk chauhin min chhang a,ka awm a nuam lo,ka kuah leh ringawt thin a,awmzia phei chu a awm lo khawp mai.

In kan thleng a,a la hma tho bawk nen thingpui in turin ka sawm a,min zui lut ve mai bawk.

Vawiin chu a hna kal chhungin Feli-te bulah a dah ang a,naktuk leh a tuk leh erawh hna kal a ngai lo va,Thawhtan atangin Brenda-in a lo awmpui thin dawn a,ka inthlahrung takzet.

"Ehe!...Bawihi,in lo thleng a ni maw,hei hi em ni Rintluang chu?"ka nuhrawn chuan a lo ti harh harh a,ka thawh dawn khan a hming te chu a hre vek tawh alawm.

Ka bungrua te chu ka room-ah te a va dah a,a piangthar te anih loh chuan a actress hna a thawk leh zuai anih ka ring."Muani,e...hei hi maw i thawhna chu?"ka pa a ni ve thung.

"Aw,ni e,u Rintluang,hei ka pa anih hi,"tiin ka inhmelhriat tir a,u Rintluanga'n a kut a lo phar ve vat,an inchibai hnu chuan,"Hei hi Kion anih hi,"ka pa en chungin ka ti a,Kion erawh a zak deuh nge ni a lo biru chawih chawih a,ka pa lawm zawng tak anih hmel e.

"Bz-i chu eng nge a an a?"ka pa chu ka zawt a,"A muhil rih a,"ka zawh loh zawkin ka room hlui atanga rawn chhuah pahin a rawn ti a,em em chuan mark lo score that a tum tih chu a hai theih tawh loh reng reng.

"U Rintluang,Bawihte,lo thu lawk ru, thingpui ka va lum lawk ang,"ti a kal mai ka tum chu kan actress-i chuan,"Keiman ka lo lum ang,"tih leh choka lama kal a rual a,a ti lutuk mah mah deuh chu a ni.

"Kan chhungkua kan buai ve si a,kar khat vel chu min lo hriatthiam lawk a ngaih hmel riau a,kan inthlahrung viau nain min lo hrethiam lawk mai teh u,"ka pa'n a ti dap dap a,u Rintluanga'n,"Buai chang te chu kan nei ve thei alawm,"a lo ti mai a,thil dang sawiin ka pa nen chuan an titi tui khawp a,min tin san meuh chuan dar 9 a pel duai tawh a,a tlai duai dawn anih hmel.

U Rintluanga-te department lam hi chu an tul thin khawp a, Inrinni pawh hi an awl hman ngai meuh lo va,an chau ve duh thin khawpin ka ring.

Ka pa chuan gate thlengin a va thlah a,an kal liam hnu rei lo teah ka pa a rawn lut a,u Rintluanga chuan,'A hlawh ka pek theihnghilh' a lo ti a,ka hamhaih khawp a,mahse zinga pawisa min pek a tum lai kha ka hrechhuak zawk a a va han zia lo mai mai tak,zana va biak pahin ka zawt chiang tawh mai aniang chu.

Kan actress-i pawn min tir kual leh tan a,a mu awr awr a,ka pa erawh room lamah hna a thawk thung a,ka han che ta chu tih tur a tam khawp a,insuk tur lah chu a so soin ka ti mai, fridge lah chu a han bal khawp a,ka kal hmaa ka thei lei te chu a lo tawih pheng phung a,uak tuar tuar chungin ka ti fai lui a, harsa talh talh tak a ni.

Ka awm lo chu an lo khawsa hnawk khawp a,an zing chaw eina lah chu sil lohin a lo la awm a,heng te em em chu lo sil ve tur ania,ka awm loh kha a thlahlel em em a,ka awm lo ta cheng a, rapthlak khawpin an che chu ania huh! sawi ngaihna pawh ka hre lo ve.

Thleng ka sil a, hmun phiah,chhuat nawh, furniture hruk fai,insuk ka zo vek a, rawngbawl a la ngai cheu,kan actress-i lah chu room-ah a tawm chawt a, rawngbawl peih miah si lo hian a duh tui tui hi a la ni zui a,sawisel loha bar pawh hi a nei lo.

Dar 3 velah rawng ka bawl leh a,chawhmeh siam tur pawh an lo nei mang lo a,a awm awm chu ka siam ta ringawt a,a duh leh phun mai mai teh se,min mamawh tu chu an mahni hi an ni ve tlat,ka tlawm peih tawh mai mai lo,a duh leh phun se aman a bawl ziah tawh ang nga a nimai.

Sual min ti pawh ni ula ka dem hran lo cheu mahse mihring ve tho ka ni a,duat leh hmangaihna dawn ka thlahlel ve tho a,sal ang maia chhawr tur lah ka ni bik hek lo.

"Eng nge i siam a? Bz-in buhhawp lo a ei thei lo a,I bawl zawhah buhhawp lo siam rawh,"chokaa rawn luh pahin a ti a,huh!

"Eng nge i tih dawn?"

"Ngatan nge i tih?"

"I fanu ania,a eitur siam te chu i mawhphurhna alawm,ka lo buai vena chhan tur a awm lo,"ka ti fiah fak a,a rawn leh hawi zawk a,a hmel atang chuan ka chhanna chu a beisei miah lo tih a hriat.

"Engtin maw I tih a?"a rawn ti a,ka ngawi hmiah ka siam tawh dawn lo,a tlai tawh a,khua a vawt tawh a,tlai taka inbual chi pawh a ni tawh lo.

"Siam rawh ka tih chuan siam mai rawh,ka thusawi chu zawm la i tan a tha a nimai," a rawn ti leh a,ka nui ro hak.

"Midang mamawhtu sawi awm leh awm loh te hi a awm tih hre ve thin teh,vanneihthlak takin min mamawh tu chu nangmah hi I ni tlat,kei ni loin,"ka ti sak a,a ngawi chiang teh e.

"Ka inbual dawn,I duh leh I fanu riltama a awm i hlau ta viau anih chuan nangmah ngeiin I lo siam dawn nia,"ti lehin ka kal pel a,"Nasa lutuk,"a tih ri chu ka hre pha reng tak nain ka beng ka chhuk ngawng lui hmiah thung.

Ka room-ah ka lut a,ka inbual sawk sawk a, November thla anih tawh vangin boruak a a vawt vur tawh a,tun kum phei chu kum dang zawng aiin a vawt emaw tih mai tur a ni.

Ka inbual zo bathroom atanga ka chhuah rual chuan ka dressing table-a ka phone dah chu a rawn eng zak zak a,call ka dawng anih hmel.

Ka kal hnaih thuai a, phone screen-a hming rawn lang ka hmuh rual chuan nichina thil thleng hre chang lo lekin ka nui var var,u Rintluanga phone call ka dawng miau a ni.

"Aw Hello"

"Atê,"tih ri ka hre zui a,ka ngai vawng vawng mai,"Bawihte,chaw i ei tawh em?"ka lu hruk mawlh mawlh pahin ka ti a,ka phur hreh hawrh khawp mai.

"La ei lo,nmi ei tawh em?"a lo ti let var a,"La ei lo, ka inbual zo chiah a."

"Engtikah nge i lo haw dawn?"

"Ka lo haw thei tep tawh Bawihte, min lo nghak hram hram rawh aw,in miss Bz-i hi a dam veleh ka lo haw dawn ania,"ka ti a,"Aw, Atê, Papa'n a be ve duh che,"a rawn ti leh a,a lo ngaithla ve reng em maw ni.

"Hello,"lehlama miin thum duta a rawn tih chuan ka hmui ka seh zeuh a,"Aw,"tih zawng ka sawi a,a bulah hi chuan han sawi tur hi ka hre vak thin lo.

"I awm lo a,a reh khawp mai,"a ngawih vang vang hnuah,"I ngaihawm khawp mai,ka hnathawk haw min lo chhawn tur pawh i awm rih si lo va,"a rawn ti ril ruih a,ka zep lo, keipawn ka ngai takzet.

"Kar khat chhung chu min lo hrethiam hram ula, kar khat liamin buai zualpui hi han reh deuh se,ka lo let leh vat ang,"ka ti tak nain kei tak pawhin kar khat pawh chu ka hreh a ni.

"I unaunu chu eng nge a an tawh a?"a rawn tih chuan thil ka hrechhuak zawk,ka nileng buai a ta langin Bz-i ka hmu reng reng lo tih ka hrechhuak a,a va han hawih hai loh thin han ti ngawt dawn ila ka thlen phat atangin ka buai a,ka inthiam chawp leh hnu hnawh.

"Bawihpui"

"Aw,a tha sawt lutuk,ka pa'n a tia"

A rawn nui ri suk a,"Min ngai anih kha," a rawn tia ka biang te chu a sa hat hat a,min hmu lo mahse ka zak ru chem chem a,a thusawi kha dawt ni miau hek lo le.

"Chaw in la ei dawn lo a mi?"ka ti ta zawk a, kha tiang sawipui zel chi pawh ka ni lo, mahni tein ka zak leh chem chem dawn a,thil tih chi pawh ni nghal lo chuan ka ngai ve tho a,tum loh lutukin ka in puang fai leuh ang tih a hlauhawm tlat.

"Ei tep tawh ang, Junior-a hian a la ei peih rih chiah lo a,nangni zawk?"

Chhan ka tum lai mekin ka room kawngkhar an rawn kik a,ka chhawn leh rih,ka pa'n,"Chaw ei ang u hmiang,"a rawn ti a,ka chhuah tur thua chhangin a kalsan thawmin a zui bawk.

"U Rintluang,chaw ei turin min rawn ko a,ka va ei phawt ang aw"

"Aw le,chaw ei tui le"

"Imm nangni pawh"ka dah zui a,ka towel chu bang tha te tein ka chhuak a,kan actress-i chuan tum vuau chungin chaw ei a lo siam a,thleng te chu a dah tau sawk sawk a,hei hi ania a buaithlakna em em nutling pui si hi chaw ei siampui loh dek dek chuan kar khat te a titau thin chutiang khawpa ngeiawm chu a nia,ka pa hi chuan a rilru leh vangah a puh a,kei erawhin sual vang hrim hrimah ka ngai hmiah tawh.

Kan pathum te chuan chaw kan kil a,ka pa a titi mawlh mawlh laiin kan chhungkaw actress-i erawh chawhmeh a suak tau nghawng nghawng a,a suak bo thul,a hahthlak mang nge.

"I awmna te kha an fel kha,ti khan an pafa chauh kha a mi?"ka pa'n a ti a,"Imm...an pafa te khan an nia,an fel lutuk,min duat bawk a,"ka ti ve zat a,an pafa chuan ka fak luam a,ka nuhrawn erawh a lo ner sak.

"Mi ina i awm duh ro ro te chuan ka nau te pawh an awm reng a,an mitha si a,a nuam ve zawk ang,"kan actress-i a ni,"Eng anga mi tha pawh ni se thla an tih muan loh sa chuan a nuam chuang lo ang,"ka lo ti ve hmiah a,a rawn hawi chhuak mitmeng chu rum eltiang tak a ni.

"Aw haw...Thiangi-te chuan an la hmu lo em ni?"ka pa a ni."La hmu nang"deuh hmuk hmuk thin hian aw...tha takin a zawt a,tha taka chhan ve mai hi a harsa lo maw le,ka laka a thinrim hrik thlak nan ka pa a hmang chu ania,huiham ha!

"Bz-i chaw I pe tawh em?"ka pa bawk a ni,a lungawi lo tih a hria a,a lungawi hma a be leh deuh deuh dawn anih hmel.

Kan actress-i pawh ni danga a ei rei thin nen ka pa ai pawn a tho hmasa a, Bz-i buhhawp tur lain room-ah a lut nal nal a,ka ngaihsak zui lem lo.

"I u I hmu tawh em?"

"La hmu nang,ka buai lutuk a ka la hmu reng reng lo"

"Chaw ei khamah va lut ve ta che,"chhang loin lu ka bu a,a kham zui nghal bawk.

Chaw eina ka ti fel a, actress-i pawh a lo chhuak leh rih ta miah lo a,keipawh chuan thleng te chu sil sawk sawkin Bz-i room-ah ka va lut ve a, actress-in buhhawp a lo barh a,a lu an tuam var luk a,a kut vei lam leh a ke vei lam pawh tiamin.

Ka va lut chu tawi te hian min lo nuih a,ka awih thei lo zawk,thil mak tak zawng a ni, Bz-in min nuih ania.

"Eng nge i an tawh a?"a bulah ka thu thla a,a kaa buhhawp a lem leh te te hnuah,"Ka tha tawh lutuk,"a lo ti a,tawi te hian a nui pah bawk.

"Kha le ei leh rawh le,"actress-i chuan buhhawp chu a barh leh a,rei fe chu an bulah ka awm a,room atanga ka chhuah rualin kawngkhar a rawn ri ve zat a,ka pan thuai bawk.

Kawngkhar ka hawn chuan mipa pathum leh hmeichhe pahnih hi an lo ding a,min lo nuih sang hlawm a,ka bangbo ang reng.

"Bz-i te in a ni em?Kan lo kan dawn a,"an rawn tih takah chuan harh zawkin,"Ni e,lo lut rawh u,"tih leh luhna tur ken ka rual zui a,an rawn inzui lut khap khap a, actress-i leh ka pa ka ai thuai bawk.

Ka pa te kawm tura dahin room-ah ka luh san zui a,khumah muin phone ka en kual a, u Rintluanga phone call ka chang a ni ber ang chu.