D'LENMAWI BUNG 6-NA

D'LENMAWI BUNG 6-NA

Ziaktu-Venpuii

A kal liam hnu chuan ka thil tih ngai ka tih zawm a,ka thin chu a la phu mumal thei meuh lo chu a ni.

Dar 5 velah rawngbawl ka zo a,hmun phiata chhuat ka nawh leh tê tê hnuah ka intifai a,Kion erawh a pa nen Feli-te zin tur an thlah thung.

Ka pa'n min rawn be zui lo va,an chanchin engmah ka hre zui lo,biak hmasak lah ka tum bau lo, thingtlanga min tirh liam an tum khan ka thin a ti rim a,ka inphah hniam thei thlawt lo a ni.

Ka phone a rawn rik chuan ka en vat a, caller id ka en chuan Kimi a ni, nimin piaha kan inbiak bak kan la inbe leh miah lo.

Ka la vat a,"Muani,"ka tawng hma hma chuan a rawn ti nghal tawng,"Eng nge?"bang bo fe a ka tih chuan,"Ka hre bik chuang lo,"a rawn ti hem mai.

"Engtikah nge i bungraw chah chu a lo thlen ang?"ka tih chuan a rawn phur khawp a,kar thar lamah a bungraw chah a lo thleng dawn anih hmel.

"A lo thlen hunah min rem fel pui rawh aw,"a ti leh zat a,ka hman hram chuan puih ve pawh thain ka hria,"U Rintluanga ka lo dil chhin dawn nia,"tiin ka chhang a,phal hram se ka ti.

Kawta motor ding thawm ka hriat chuan,"Dah phawt ang,"tih leh off ka rual zui a, inhnuaiah ka chhukin kawngkhara Kion rawn lut ka hmu zui zat.

"Atê,"ka lama rawn tlan phei pahin a ti a,lo pawmin,"Nini chu i va thlah maw?A nuam em?"tiin ka lo be sawk sawk,a lu chu a bu nghauh nghauh a,a ham bai bai bawk.

"Atê,naktukah leng leh ila,"a tih lai mekin u Rintluanga a rawn lut ve a, ka lo ding chu min kal pelin inchungah a chho a,thil thar a ni hran lo.

"Atê,t.v. en ila,"Kion-an a rawn tih takah chuan sitting room lamah ka phei pui a,t.v. chu on sakin a en a,a hmuhnawm ngang aniang a tawng tawh eih lo.

U Rintluanga chu a rawn chhuk leh mai ka rin laiin a rawn chhuk har khawp mai,chaw ei a hun tawh hnu pawh chuan a la rawn chhuk lo.

"Atê,ka ril a tam,"Kion-an a rawn tih takah chuan ka awm dan chu ka siam tha vat a, inchung chhohna step lam chu ka lo en nasa deuh a ni.

"Papa a lo la chhuk si lo va,"ka tih chuan a pum dawmin,"Ka pumah hian sazu an in um kual char char tawh,"a lo ti leh reuh a,nuih hakin ka ding a,"Ka han ko ang nge,"tih leh inchunga chhoh ka rual a,ka che rang lutuk chu ka awih lo zawk.

U Rintluanga room zawn ka thlen chuan a room kawngka chu ka kik karh karh a,"Lo lut rawh,"chhunglam atanga a rawn tih chuan ka dak lut dêk dêk a, u Rintluanga chu laptop nen a lo in chhawp hnawk nasa khawp mai.

"U Rintluang, Kion-a ril a tam tawh a,"tim dai chuan ka lo ti a,min rawn en zawkin,"Lo zu siam rawh,ka lo chhuk ang,"tih zawng a sawi, ka chhuk leh nghal nal nal phur ang a va ni leh si lo ve....eng nge maw ka beisei ni.

Kion chu koin chokaah ka luhpui a,chaw ei ka siam lai chuan min lo pui ve reuh a,ka chawhmeh suah sa chu dawhkanah a lo chhawp ve zel.

"Papa, Atê-i ka lo pui a,"Kion-an a tih chuan ka leh hawi zawk a u Rintluanga chu choka luhnaah a lo ding ran mai.

"I va fel ve,"u Rintluanga chuan a lo ti sup a,ka chawhmeh suah dawhkana chhawp pah chuan ka thu thla a,dan ngaitein u Rintluanga nen chuan kan ngawi dun leh ran tawh,a awm dan hi en liam ka tum pawn ka thei lo reng reng.

En liam ka tum poh leh a hma aiin ka ngaimawh zual ni berin ka hria,tul teah lo min be ngai lo va,chu a bul tha hle thin. 

"Junior-a a mutthilh hunah ka room-ah lo kal lawk rawh aw,sawi fel tur kan nei,"u Rintluanga chuan tiin choka atangin a chhuak a,eng nge maw sawi fel tur kan neih ni.

Dar 9 velah Kion a muhil a,ka room-ah ka mut a,keiin u Rintluanga room lam ka pan leh thung.

A room zawn ka thlen chuan thawk la leh tê têin kawngkhar chu ka kik a,vawi li nga dâwn ka kik hnu pawha min rawn chhawn loh vang chuan kawngka chu ka hawng a,a dawhkan bawha lo muhil mipa ka hmu zui zat.

A dawhkanah chuan lehkha a in chap hnawk nuai a,kal hnaiin a bulah chuan ka ding a,a muhil hmel chu ka en dauh dauh.

Hmeltha uchuak tak tia sawi tur ni si lo hian a tha ka ti mai ka sawi thiam lo,a awm dan engkim hian min lêm em em vek ti ila a sual hran lo ang.

A rawn chet tak tual tualah chuan harh zawkin ko tur ang deuh chuan ka awm a,min hmu thut chu a phu deuh zawkin ka hria.

"Eng nge i sawi duh a?"a mita chiang kil kela en chung chuan ka ti a,ka zawhna chhang lo chuan a thutna atangin a tho a,eng nge maw ni.

Envelope hi min rawn pein,"Hei hi i tun thla hlawh ania,engtin nge i la thawh zawm rih dawn nge Laldinhlua i zui ve nghal dawn?"a tih chuan ka bang bo hle ringawt.

"Eng nga?"ka aw chu a ring khawp mai,ka mak tih lutuk vang a ni pakhat,ni e Laldinhlua ruala kal turah min lo ngai chu ania,huh!

"I ti awm ang lo emai aw..."ka ti khar khar a,ka melh rum lek lekin ka hria,min rawn en zawkin,"Bul in tan tha dawn a ni lawm ni?"a ti leh a,nui luiin ka lu ka thing a,"Dawn lo,dawn lo lutuk,"ka ti mawlh mawlh,a hmel chu ka chhiar thiam miah lo.

"Anih kan bulah hian i la awm thei dawn em?"a ti leh a,"Min la mamawh te chuan thawk duh e,"ka ti leh,"Mamawh tehreng mai,"a lo tih vang chuan ka en zawk a,min en loin a lehkhabu remna chu a en a,"Ka lehkhabu ho saw min lo remsak lawk thei ang em?"a tih zawm zat.

"Thei tehreng mai,"tih leh kal ka rual a,ka envelope ken lai chu ka ipte-ah dah lutin lehkhabu chu ka rem tha a, pawnchhia in chhawpin lehkhabu te chu ka hru a,a bal em em lo nain hruk hrim hrim thaa ka hriat vanga hru ka ni.

"U Rintluang"ka tih chuan,"Imm,"a lo ti vat a,ka rilrua zawhna awm chu zawh ka chak a, mahse ka zak bawk si,"Sawi la,"a rawn tih leh vang chuan insum thei ta loin,"Cindy nen hian inneih in tum em?"ka ti ta a,a rawn nui chhuak hawk.

"Teh nang,eng vangin nge chutiang zawhna te min zawh a,"ka lam rawn hawi paha a tih chuan chhan mai ngaihna ka hre der lo.

"In inngaizawng lo a mi?"ka ti leh ta ringawt a,sawi tur ka hre lo ka zawh chhan kha min zawt bawk sia,ka zawh chhan lah sawi chi zia zang a ni lo.

"Ngaizawng nang"a nui leh hawk,"Ngaizawng miah lo maw?"ka zawhna vang bawk chuan a nui leh,a la nui mawi em em zui a,min rawn en lehin,"Ngaizawng miah nang,"a ti a,ka awm a nawm huai huai thei.

"Anih,"ka tih leh vang chuan ka lam bawk chu a rawn hawi a, lehkhabu hruk mual mual pah chuan,"U Hriati hi neih leh i tum em?"ka ti leh a,a inngaihtuah vang vang.

"Ka hre lo le,"rei ngial a inngaihtuah hnu chuan a rawn ti a,ka awm chu a nuam lo nghal rawih rawih thei zahthlak zawk hian!

Ka tawng zui ta lo va, lehkhabu chu ka rem pawp pawp a,a fel thawkhata ka hriat hnu chuan,"Ka zo,"a bula va din pahim ka ti a,min rawn en zawk.

"I mut a chhuak tawh viau em?"a sana en zeuh paha a tih chuan,"Chhuak lo,"ka ti a,thudik a ni,ka mut chu a chhuak miah lo.

"Anih ro ro chuan khawngaih takin ka bedsheet saw min lo thlak sak lawk thei ang em?"a ti leh a,zanin hi eng nge maw a hriat ni.

"Aw le,thei e, khawnge bedsheet chu i dah a?"amah en chunga ka tih chuan cabinet chu a kawk zeuh a, cabinet lam chu ka pan vat.

Cabinet chu hawngin bedsheet pakhat chu ka la a,a bedsheet phah lai chu pawt hlimin balbawmah ka vawm lut a, bedsheet chu ka phah a,a dang ka bilh laiin ka bilh sa chu a lo in pawt lip leh zel a,ka tih fuh theih mai loh vang chuan ka thinrim tun tawh.

"U Rintluang,i khum hi a hrang a mi a?"ka tih chuan a rawn hawi vut a,"Hrang a?"a tih chuan bu nghatin,"A in pawt lip zel ania,"ka ti a,"I ti fuh thei na nge?"tih leh min rawn puih a rual a,min pui ka tia min pui pawh a ni lo min puih hma ai aiin a buaithlak zawk.

Ka bilh luh mar sa chu a lo pawt chhuak zel a, ka thinrim lutuk chu ka insum thei tawh thlawt lo,"Vanlalurintluang,"ka ti that a,a rawn hawi phawk tha khawp mai.

Ka harh zawk,"Tihpalh lutuk,ih u Rintluang,ka bilh luh sa hi i lo pawt chhuak zel a,"ka ti sep a, ka koh dan lah kha.

"E,aw, sorry,"a tia,a lai ka phah mar than tawh te chu a lo ti chuar leh a,oii ti hi chuan kan phah chatuan lo ang.

"U Rintluang,min pui a,a lawmawm lutuk rualin,a ngai tawh lo,i hna lo va chhunzawm tawh rawh,"ka ti ta ringawt a,a lu thak lo pui hiah nuah nuah pahin a kalsan vei hna hna.

Rei ngial beih tak têa ka beih hnu chuan ka phah ve thei hram,"U Rintluang,ka phah zo a,tih tur dang a la awm em?"khum atanga chhuk pah chuan ka ti a,a lu lo thingin,"I duh chuan va mu tawh rawh,"a lo ti var a,"Aw le,"tih leh chhuah ka rual zui a,ka room-ah ka lut zui bawk.

Ka ipte-a ka envelope khung chu la chhuakin ka bag-ah ka dah a,Kion bulah chuan ka inthawlh sat sat,ka kuah nghal vawng vawng.

Ka muhil har lo,ka zun chhuakin min kaitho a,zun loh ka tum deuh uai uai nain a chhuah tak em vang chuan ka tho leh ta nge nge.

Ka zun zawha sana ka en chuan zing lam dar 2 chauh a la ri a,ham bai baiin Kion bulah bawk chuan ka mu leh a,ka muhil thei ta mai lo,ka lukham hnuaia ka phone dah chu la chhuakin ka en kual a.

Ka dah leh hnu pawh chuan ka muhil thei lo reng reng,ka harh tulh tulhin ka hria,ka lu lah chu a rit deuh lûk a,a hai muai muai bawk.

Ka thaw thlengin a sa a,vawtin min man a,ka mu lum thei ta reng reng lo,puan thuah tur chu ka zawng ruai a,ka hmu hauh lo.

Vawt tuar reng ai chuan u Rintluanga kaih thawh mai ka duh,ka room atang chuan ka chhuak a,khur hlawk hlawkin u Rintluanga room bulah chuan ka ding a,a kawngkhar chu a benin ka beng.

Kawngkhar a rawn in hawng a,u Rintluanga hmel ka hmu nghal zat a,a hmel chu a phak tha khawp mai.

Min hmuh chuan a phawk ve deuh,"U Rintluang,puan thuah belh tur a awm em?A vawt ka ti lutuk a,"ka ti khur dar dar a,a rawn meng chiang khawp mai.

"I khua a sik em ni?"tih leh ka pang rawn deh a rual a,a kut chu a la let leh rang viau bawk.

"I pang a sa lutuk,khawi maw lo kal teh,"tih leh a room-a min kaih luh a rual a,a che vel chu khur bauh bauh chungin ka lo en ran ringawt.

"Kha hei hi ei rawh le,"tih pahin damdawi mum leh tui min rawn pe a,ka lo ban ve vat.

Damdawi chu ka ei a,"Kha hei hi va thuah rawh,"tih leh puan pathum min rawn pek a rual a,"A tam lutuk,a ngai lo,"ka tih chuan,"Va mu tawh rawh,buaina i neih chuan min lo au leh mai rawh aw,"ka sama rawn chul pahin a ti a,bu nghatin a room atang chuan ka chhuak leh nghal nal nal.

Ka mut leh hnu chuan ka in vur hlûn a, puan pali lai ka thuah hnu pawh chuan ka mu lum har viau a ni.

Ka muhil ka harh leh chuan zinglam dar 6 a lo ri thuak tawh a,ka lu a rit lûk a,ka luak a chhuak em em leh nghal a,ka uak ve ngial a engmah chhuak tur a awm thei lo.

Rawng ka bawl lai te chuan ka luhai chu ka invuan ding lui hram hram a ni ber,"Bawihpui,"u Rintluanga'n a rawn tih chuan a lam ka hawi vat, ka lo awm dan vang chuan min rawn hnaih rang khawp mai.

"Ti nge rawng te i lo bawl a?"min rawn dawm paha a tih chuan ka ngawi reng,a taksa rin chhan chuan ka ding a,"Bawihpui,"ka darah a rawn vuan a,"Engtin nge i awm?"a tih pawh chuan ka chhang thei lo.

"Lo kal teh,"min kaih kuahin a ti a,inchung lamah min chhohpui a tum a,ka lu hai lutuk mawlh mai chu hreawm tak a ni,min pawm nawlhin ka room lam chu min panpui a,kei erawh a nghawngah in vuanin ka mit ka chhing riai riai,ka lu hian min kher ngut ngut.

Ka room-a kan luh lai chuan Kion pawh a lo tho chhuak ve mêk a,"Papa ngati nge Atê-i hi?"a rawn ti a,"A dam sam lo va,"a pa chuan tiin min mut a,ka bulah a rawn thu thla a,ka chal leh ka sam vela ka thlan huh dap chu a kutin a lo hru a,kei erawhin ka mit ka chhing thung.

Ka luak chhuak a reh thei lo va,ka lu lah chu a tir lam ai mahin a na a,ka mit chhing chung chuan ka hmui chu ka pet fan fan a,ka mittui ka beka lum thla pap chu ka hai lo,ka awm dan chu hreawm tih hian a sawi fiah zo berin ka ring.

"Bawihpui,thil tlem ei la,damdawi i ei leh ang nga,"u Rintluanga'n a tih pawh chuan ka chhang lo.

"Junior, Atê-i hi lo awmpui lawk rawh aw,"u Rintluanga chuan tiin ka kut a vawnna pawh chu a thlah a,ka kut lehlam chu kut te tak tê hian a lo chelh zui bawk.

Kion chuan ka samah a chul a,ka biangah chuan rawn fawpin,"Dam vat vat rawh, Atê,ka lo tawngtai ang aw,"a rawn ti reuh a,thaw hakin ka lu chu thei leh thei loin ka bu a,chumi rual chuan ka chhipah a kut a rawn nghat a,a tawngtai zui bawk.

A tawngtai zawh chuan ka kut chu a kut khing hnaihin a vuan leh a,engmah a sawi lo,ka lu na lah chu tawrh a har telh telh mai.

"Bawihpui,"tih ri ka hriat rual chuan ka mutna khum tlang chu a rawn hniam suai suai a,"Bawihpui,lo thu lawk rawh le,"tih leh dim te tea min tun thawh a rual a,zawi muangin ka mit chu ka meng riai riai.

Ka ka chu muangchangin ka ang a,ka kaah soup a rawn lut nghal zat a,a tui leh tui loh pawh ka hre thei lo ka ka a da luap a, ka mit erawh rei ka meng thei hauh lo.

Fian ka kaa a lo luh hnu chuan duh tawk mai ka tum a,a lo phal hauh,"Hei chiah,"a ti zel a,ka ei zo vekin ka ring.

Ka hmui chu rawmawlin a rawn hru a,ka mit chu ka chhing a,"Hei ei leh rawh le,"a tih chuan ka mit ka meng a,damdawi chu ka kaah a rawn dah leh hmiah a,tui min tulh bawk.

Ka inthlahrung takzet,an awmpui zawk ka ni a,min buaipui hian nuam ka ti lo, thawh mai ka tum chu,"Khawnge i kal dawn?"a rawn ti a,"Rawngbawl ka ngai alawm,"ka lu nat vanga ka mit khap sak sak chunga ka tih chuan,"Ngaihtuah buai duh suh ka cousin ka ko tawh,"a ti a, ka inthlahrung zual deuh deuh bawk.

"A ngai hleinem damdawi ka ei tawh alawm,ka zia mai ang,"tih leh din ka rual a,ka lu a rawn hai nghal chhawk mai.

"Luhlul lutuk thin,"tih leh min pawm nawlh a,chet nachang pawh ka hre lo,hamhaih lutuka amah ka en chuan khumah min nghat thla a,"Mu mai mai rawh, Kion hi school kal se kan va in entir dawn nia,"puan min rawn sin tirin a ti a,ka chhang lo.

"Bawihpui,"u Rintluanga'n a rawn tih leh takah chuan ka en zawk a,engmah a sawi leh chuang miah lo.

Ka mit chu ka chhing leh ta vang vang phawt,ka sira awm hian min mawlh tet tetin ka hria,"Khawi lai nge na?"a rawn tih chuan ka mit chu ka meng leh a,"Engmah na ka nei lo,in entir kher pawh a ngai lo,ka tha leh vat mai ang,"ka tih chuan,"Ngai e,"a lo ti nghut mai.

"Na i neih chuan sawi hreh suh, inthlahrung dûka awm kha a ngai reng reng lo,"a ti leh charh charh a,ka chhang tawh lo.

Chaw ei kham chuan u Rintluanga'n damdawi inah min kalpui a,a thianpa damdawi in anih hmel, doctor chuan tlang hri leng anih thu leh midang pawn an lak nat viau thin thu a lo sawi luam a,thlasik boruakin a ken tel anih mai hmel e.

Kan haw leh hnu chuan u Rintluanga cousin kha inah a lo awm a, inchhung vel chu a lo ti fel a,ani intuakna a lo mamawh lai tak a ni a,u Rintluanga chuan ka dam loh chhunga inhlawh turin a lo sawm a ni,ka inthlahrung khawp mai,a nuam miah lo alawm inchhung tihfel leh Kion enkawl chu ka hna a ni a,keia dam loh vang mai mai a tiang kan thleng hi nuam ti a hlim viauna chi a ni lo.

U Rintluanga'n Kion-a awmna a zawh chuan a mut thuin a lo chhang vat a,keichu min lo nuih sang a,tawi tein ka nuih let ve bawk.

Ka luhai a la reh loh vangin u Rintluanga chuan inchung lamah min hruai chho leh a,zing lam aia ka harh fim tawh vang nge dam lo e ti lo chuan amah bawk chuan ngaihtuahna a luah teh tawh,a huhang na zet vang chuan thawk a tawi duh thin map map khawp mai.

Ka room chhunga kan luh chuan khumah dim têin min mut a,a mitah chuan chiang takin ka en bawk.

A ni telin he mipa Lalpathlawia lakah hian ka tuiral a ni,a mitmeng ka en chang apiang hian ka tuiral ta thin anih hi,ka pha lo va ka hai hek lo.

Anih ani hian a hria ang em a laka ka rilru put hmang pangngai lo zet hi a hria ang em,ka bul hnaia a awm chang apianga ka danglam thin dan te,a laka thik thu ka pe chhe ve ngawt te hi a hria ang em a hria ang tih mawlh ka hlau.

'Min en chhung chu ka mit ka la san bik lo vang,' ti ni awm ang hrimin a mit chu ka lak atangin a la san bik lo.

Ka mit ka laksan takah chuan ka sam chu ka bekah rawn zep thain,"Muhil rawh le,i dam vat vat a ngai ania,i dam veleh thil te te ka hrilh ang che,"a tih chuan chiang deuhin ka en a,"Eng maw?"ka lo tih chuan,"Dam phawt la,"nui suk chungin a ti a,a va han tha per pur tak.

"Ti hian lo mu la, nakinah ka lo kal leh ang,"tih leh room atanga chhuah chu a rual a,a kal tak hnu chuan ka mit ka chhing vang vang.

Ka lo muhil a ni ngei ang,ka harh leh chuan ka zia deuh a, mahse ka luak chu a chhuak ta viau mai,chhuak na mai loin a chhuak ti ila ka sawi sual tamin ka ring lo.

Bathroom-ah chuan tlan lutin ka va luak a,ka chau vek thei,ka uakna vang chu nge ka lu lah chu a na leh nghal ut ut a,thawk leh khatah vawt lah chuan min tham a,ka khur cher cher.

"Bawihpui,i awm em?"u Rintluanga aw ka hriat rual chuan pangngai taka lan tumin ka chhuak a,min hmuh rual chuan,"I tha em?"a lo ti a,nui luiin,"Tha e,"ka lo ti mai thung.

"Thil ei chak i nei em?"a tih leh chuan,"Nei lo ve,"ka khum lam pan chuan ka ti a,tunah rih hi chuan eitur hming ringawt pawn ka luak a ti chhuak.

"Hei ei lawk rawh,i chau lutuk ang,"tih leh rasgulla min rawn barh a rual a,a thlum bawk si a,ka uak that a,min rawn en rang ang reng khawp mai.

Lem luih ngial ka tum a a har talh mai,uak leh tuarin bathroom-ah ka tlan lut leh dawr dawr a,ka va uak that that a,ka pum a thip thum a,ka hrawk lah chu a na thum bawk.

"Tihpalh lutuk,"ka hnungah a rawn chul a,ka uak nasa lutuk a,ka pum a na leh vek tawh, ka dam lo ve fo a, tiang em em a hreawm erawh ka vawi khat tawhna a ni.

"Lo kal teh,"tih leh bathroom atanga min hruai chhuah a rual a,ka chau lutuk a,a tih ang ang chuan ka awm a ni ber.

"Khumah hian thu la eng emaw tal ei rawh I pum a ruak dawn lutuk,"a ti a,"Engmah ka,"ka sawi zawh hma hmain,"Tunah hi chuan ka thu ber rih,chuvang chuan ti khan lo awm la,eitur ka rawn la ang,"tih leh room atanga chhuah a rual a,min ngaihtuah a ka lawm rual rualin min ti lui lo se ka ti engmah ka ei peih lo.

Rei a rial lo,cake leh thei tui hi min rawn pe a,ka phur lo khawp mai,ka ei lai chuan min vil rûn a,cake chu a awm dan tak ngial pawh ka hre thei lo,ka uakna vang chu nge ni ka ka a tui lo khawp mai.

"Ka puar tawh,"lêp khat ka ei zawh takah chuan ka ti a,"A dang kha,"a lo ti leh a ka tah khum nghek dawn em maw ni ka ti rum rum tawh,"Ka ka a tui zan lo va,"ka tih takah chuan a phal ve ta hram a,ka thaw huai huai thei.

Sana ka en chuan tlai dar 4 chauh a lo la ri a,ka na chhawkna eiin min chhawk bawk a a lum ka ti tan khawp mai.

Chaw an ei laiin tui lumin thei leh thei loin ka lo intifai a,ka inbual zawh meuh chuan ka khur beuh beuh.

"Atê,"ka room kawngkhar chu a rawn in hawng a,khuma ka thu chu ka pangah a rawn dek ve ngei a,ka lo nuih var var.

"A sa em?"ka lo tih chuan lu thingin,"Chaw ei la,"a rawn ti a ka nuih tawi tak,thil ei lam hi chu sawi vak lo se ka ti.

Ngaihtuah lai mek mekin u Rintluanga chuan eitur a rawn chawi lut ta deuh deuh va, ka lo nur nang min hmuh chuan pa lutuk hian a kiai sak a,keiin mit tla lo lekin ka lo en thung.

"Tlem chiah,"ka bula rawn thut pahin a ti a,ti hian 'tlem chiah' a tia nga a vaia min ei zawh tir a tum leh vek ringawt ang chu.

"Kha le,"tih leh ei tur ho chu min barh a rual a,tlai lam ai chuan ka pawh a tui ve ta deuh a,mahse a chuti teh lua lo khawp mai.

A chanve vel ka ei hnu chuan,"Ka puar,"ka ti a,bowl chu dahin doctor-in damdawi min chawh ho chu a rawn la a,ei tur a sawi ang ang chu ka lo ei mai zel bawk.

An pafa chuan ka bulah an tap deuh chawt a chuvang chu nge ni! ka awm lah chu an nuam mai mai khawp a, zahthlak lulai lutuk mai.

Dar 10 velah chuan ka mut a chhuak leh tan a,chhuna ka mut hnem tehlul nen ka damdawi ei vang anih ka ring.

"U Rintluang,ih ka muhil mai dawn,"ka tih chuan a lu bu zeuhin a phone a bih a,ka bula Kion-a muhil chu kuahin ka mit chu ka chhing zui bawk.

Pangngai takin zan hun ka hman ka inbeisei tehlul nen dar 2 velah chuan ka khua a sik leh ta hluah mai,ka tho chhuak tuih tuih a,ka thaw thlengin a lo sa leh huam tawh.

Ka mutna sir chhuata ka thil hmuh vang chuan ka phu zawk thei, u Rintluanga chu ka sir chhuatah chuan a lo muthlu a,ka hamhaih ang reng.

Damdawi chu ei tê têin chhuata a mu chu ka sawi a, chiang lo ruai chuan a rawn harh a,min rawn enin,"Ka lo muhil e law?"a ti a,tawi tein ka lo nuih thung.

"Nga ti nge I lo thawh a?"a tih chuan,"Ka pang a kham a,"tiin dawt ka sawi a,nur fea min enin ka pang a rawn dek a,a kut a lak let rual chuan a lawm lo hmel ka hmu chiang hle.

"Sawi tha mai ta che,"ti a damdawi lak mai a tum chu dangin,"Ka ei tawh,"ka ti a,a lungawi lo hmel hian min ti inthlahrung a ni.

"Va mu rawh,"a ti a,khum sirah chuan pangngai takin a thu leh a,"I la mu dawn lo a mi?"ka tih chuan min chhang loin a thu tha sauh sauh a,a phone a bih leh ngur tawh.

Ka mut dan siam remin amah chu ka hnung chhawn a,a vawt ka ti lutuk chu ka tawm hlun a, ka puan sin chu ka pawt tha ka pawt tha a ka tlun ti tih leh der tawh.

Ka puan sin a rawn vur belh chuan ka leh hawi zawk a,"Ka lawm e,"tiin ka hnung chhawn leh nghal daih,ka mu khawr tha tawh khawp mai.

Ka phone riah chuan ka harh zawk a, ka en nak chuan ka meng phar tha khawp mai.

Ka phone-a hming lang vang ni loin dar zat vang zawk chu a ni,dar 9,dar 9 a lo ri tawh,ka mak tih lutuk chhungin call chu a tawp hman a,a rawn ti nawn leh a,ka lo la vat.

"Hello,"ka tih rualin,"I va han la thei lo em em ve Bawihpui,"Laltlankimi zet hi chu aw.

"Laltlankim,ngawi mai mai rawh khati khan min ko tawh reng reng suh,"ka ti khar khar a a rawn khek nasa tuar tuar khawp mai.

"Tak tak a, tunlai I van reh ve,"a rawn tih chuan,"Nia,hei nimin atang khan tlang hri leng ka la ve a,min rawn call khan ka harh ve chiah,"ka tih chuan,"Aw....a...a van zia lo ve,tunah eng nge i an?"a rawn ti a,ka that thua chhangin rei vak lo kan inbiak leh hnuah call kan ti tawp a,khuma phone ka dah rual chuan a rawn ri leh zat.

Ka en chuan u Rintluanga a ni,phur fe mai chuan ka la a, engmah pawh ka sawi hmain,"Bawihpui, tukin lam eng nge i an?"zang khai fe mai hian a rawn ti a,ka then thaw,"Ka zia tawh lutuk,"ka tih chuan,a ngawi zui vang vang.

"Imm,a that chu lo dam vat vat rawh,"a tih chuan thil ka hrechhuak zawk.

"U Rintluang"ka tih chuan,"Sawi la,"a lo ti thuai,"Eng nge min hrilh i tum kha?"inthlahrung ru chung chung chuan ka ti a,a nuih huk rual chuan ka sawi hma kha ka ngai rum rum.

"I dam veleh aw,"a nui ri ka hre zui leh zat a,"Ka dam tawh reng,"ka lo tih chuan,"Hmai chhanah le,"a ti a,chuti na na na chu ka zawt tawh lo chiang ang.

"Immm,"tih zawng sawiin ka ngawi leh vang vang a,ka tih ngaihna hre tawh lo chuan call chu ka off ta tawp.

Phone chu side table -ah dahin khum chu ka ti fel a,nimin lam ai chuan ka zia sawt khawm mai.

Bathroom-ah lutin ka in phih fai a, inhnuaia ka chhuk chuan u Rintluanga cousin khan chhuat a lo nawt a,ka inthlahrung lutuk tih ngaihna hre si lo chuan nawhpui ka tum ta ringawt a,min lo hnial nasa khawp mai.

A nawh zawh chuan sitting room-ah kan pahnihin kan thu a,a titi ve barh barh a,a nelawmin a fel khawp mai.

A hming ka zawh chuan,'Brenda Lalhruaitluangi' anih thu a sawi a, college a kal lo va,kei aiin kum hnihin a naupang zawk bawk.

Ka chungchang min zawh ve chuan tlem a zawng ka hrilh a,kim chang lutuk chuan ka sawi duh lo,ka chanchin chu sawi nuam zawk zawk a ni lo a tin ni.

Ka harh ve sawt khawp a,a ruk tak chuan hun chu kal muang ka ti u Rintluanga lo haw tawh se ka ti hle bawk.

Kion-te ban a hun dawn chuan Brenda-i pawh a insiam a,a kal chhungin Kion a lo haw huna a ril tam ka rin vangin a cake ngainat em em chocolate cake ka siam sak a,an lo thleng har lo khawp mai.

Ka cake lo siam ka pek chuan a hlim khawp a,a hlim hmel chu hmuh nuam tak zawng a ni.

Dar 1 a ri a, chutiang bawkin dar 2,dar 3,dar 4, tunah dar 5 a ti tawh,ni dang zawng aiin u Rintluanga lah chu a rawn haw har leh ta nghal a,sana ka en sek a,ka thaw leh hluai ringawt thin.

Dar 6 a ri thuak tihah door bell chu a rawn ri a, Brenda-i a intihfai vangin rang lutukin kawngka chu ka va hawng a,amah ngei mai chu ka hmaah tunah hian a ding mek a ni.

Mawi zet hian min nuih a, ka lai lutuk chu ka hawi san a,rawn luh pahin,"Vawiin lam eng nge kan lo an a?"tiin min zawt a,"Ka tha tawh lutuk,"ka lo tih chuan nelawm zet hian min nuih leh a,ka mit ka la san leh thei tawh lo.

Kion a rawn au tak lang langah chuan ka mit chu la sanin u Rintluanga chu ka kalsan nal nal a Kion bula ka thut rualin Brenda-i pawh chu a room atangin a rawn chhuak a,kan titi bawrh bawrh.

Inchung atanga u Rintluanga a rawn chhuk hnu chuan chaw ei kan siam a,an phal lo chung chu ka che lui a, chaw pawh tlem chu ka ei ve.

Thleng erawh Brenda-in ka sil a phal ta lo a,aman a sil lai chuan sitting room lama u Rintluanga-te pafa lo thu chu ka pan a,ka va thut rualin,"Atê, homework min lo tihpui,"Kion chuan a lo ti a,nuih var varin,"Lo kal la, inchungah han ti ang,"tih leh a pa kut atanga lak ka rual zui zat.

A homework kan tih zawh chuan ka muttir a,tlaia a mut loh vang chuan a ngui lup a,chu vanga mut hma tir pawh ka ni.

Dar 8 a rik chuan a mutui tawh khawp mai,kei erawh ka room balcony-ah chuan ka chhuak a,thil ka hrechhuak zawk.

U Rintluanga thil min hrilh tur kha,inhera kal mai ka tum chu taksa lian leh nghet tlut mai ka sut rual chuan rang fahranin ka hawi chho a,kan in en leh ta ran mai.

"U Rintluang,"ka sawi tur hre lo lutuk chuan ka ti ringawt a,a nuih suk ruala hawisan mai ka tum chu ka khabeah a rawn vuan a,amah en turin min kuai her bawk.

"Thil te te chu i hre chak vak tawh lo em ni?"a mitmeng ti zim sunin a ti a,lu thingin,"Rawn zawh che ka lo tum chiah a,"ka tih chuan ka sam chhawl leng chu ka bengah a rawn zep tha a,ka heh ka seh zeuh.

Ka thaw a sa pup pup a,engtin emaw hian ka awm.

Ka biangah a kut khing khatin a dawm a,lehlamin ka khabeah a dawm thung,"I laka ka rilru put hmang ang bawk hi i pu a ni tiraw?"a ti a,eng rilru put hmang nge a sawi hi.

"Maw?u Rintluang,eng?"ka sawi zo hman lo,ka hmuiah chuan dim fe mai hian a rawn fawp a,ka mur er erin ka hria,ka chhang let lo va ka hnar hek lo,ka dawh mawl tawp a,a duh tawk a ngah hnu chuan ka chal chu a chalin a rawn nawr si a,"Ka duh lutuk che Bawihpui,"a aw leh a thil sawi vang chuan ka â riaiin ka hria,ka awm erawh nuam tak a ni.

Ka kun tlat vang chuan min kuai dak a,ka mitah chiang takin min en a,ka khurin ka hria.

"I laka ka rilru put hmang ang hi nangpawn I pu a ni tiraw?"ka khabe a kutzingpuia tuai hauh hauh pahin a ti a, tawng kain ka chhang thei lo,ka lu ka buk khum rual chuan thaw huai hmel pua min enin a awmah min kuah ngh,ka hlim ru veng veng mai,mahse thil pakhatah ka chiang lo.

"U Rintluang"

"Immm"

"I laka ka rilru chu i hre vek tho ang a,mahse tunah hian eng nge kan dinhmun hi?"ka huaisenna neih zawng zawng sawm khawmin ka ti a,a mita en tumin ka dak chho vah bawk.

"Ka tan chuan mi satliah I ni lo a, hmeichhe dang ka en ang mai maiin ka en lo bawk che,ka hmangaih che em ka hre lo va,ka hriat chhun erawh kei hian ka thinlung zawng zawngin ka duh che tih hi a ni,"a ti a,ka mitah tak min en bawk.

"Anih ti hian kan inngaizawng tihna em ni?"ka zawhna vang chuan a nui suk a,ka chala fawp zeuhin,"A chiang viau tawh lo em ni?"a ti leh a,anih chuan ani nen hian kan inngaizawng tihna ka ring thei lo a,ka awih lo phal hek lo.

Dar 11 velah chuan a room-ah min phei san a keipawh khi vur vur chungin zan hun chu ka hmang a,ka hmui te chu ka khawih leh ringawt thin a,nuam mai mai tak a ni.

Mahse le a tuk zing atangin kaw tha loin min chhu zui ala,zing kar atangin ka khum leh bathroom chu ka kar tawn zak zak a, vawi engzat nge ka tlan tawh pawh ka hre lo,a tawpah phei chuan ka mu zawi nguai tawh.

Doctor khan a sawi tak a,tuna tlang hri leng hian lu na,luak chhuak,lu hai leh kaw tha lo a ken tel tur thu kha min hrilh tawh tak alawm.

Kar khat tha zên zâwn ka nawm loh hnu chuan keipawn zia lam ka pan a,ka zia deuh takah chuan Brenda-i pawn min let san a,u Rintluanga nena kan inkar pawhin that lam a pan zel,min ngaihsak em em a,ka hringnun hun puma ka tem ve ngaia ka rin loh hlimna tam tak min tem tir bawk.

Ni khat chu u Rintluanga leh Kion-a an chhuah tawh hnuin u Hriati a rawn lang hlawl a,Kion-te pafa lah an awm dawn lo tih a hre rengin ka ring bawk si a,eng nge maw a rawn tih dawn ni.

Ka lo ding chu a kut kuangkuah âtin min en ran a,a mitmeng chu a thip tha rem rawm khawp a,ka kim ki chawih chawih thei hial a ni.

"Lo thu rawh,"ka aw chu a zawi tha sep sup khawp mai,a hmui pet sawi zeuhin ka hnaih ber sofa-ah chuan a thu thla a,a bawp a khaw kherh thân a,han biak lum lam vak ngaihna ka hre der lo.

"I zah theih loh thu hi an sawi ka lo hre fo a, a lo dik hle a ni maw,"a ner vei sak sak reng a ka awm lah chu a nuam thei miah lo a,a chhan ka hre hauh lo.

"Eng nge awmzia?"ka lo ti chu a run hmel na ngiang mai,"Hmeli,ka pawi i khawih a,tunah hre lo ang hmakin i awm a maw?"a nui ro hak a,a zat vanga nui erawh a ni lo tih hai theih a ni lo.

"Maw?U Hriat,i eng pawi nge ka khawih a?"ka mak tih lutuk vang chuan ka ti leh a,a rawn ding chhuak hluai a,"Zawngi,"tih leh a bag dap a rual a,a che vel chu bang bo fêin ka lo en thung.

"Hei hi sawi fiah rawh,"a ti leh chher chher a,a phone-a thlalak ka hmu chu ka hrethiam ta chauh, thlalakah chuan kei leh u Rintluanga,Kion-te nena kan thlalak hi a ni a,u Rintluanga chuan a dp-a a hman vangin a hmu anih ka ring.

"U Hriat,"ka ti dek dek chu,"Ngawi rawh nang mi lak tlak loh lutuk nu,ka nau i lo chhai kha chu ka hrethiam thei mai che a,tunah ka pasal i chhai leh hi chu mak ka ti thlawt che,zahna te hi i nei lo ka ti,"a ti leh a,ka thin a rim viau nain ka tawng thei lo reng reng.

A thutna atanga rawn tho tharhin,"Tunah a kawp mai mai che tih hria la,ka hnenah a rawn kir leh tho bawk ang,nang ang hmeichhia hi chu a nawm chenna tur chauh i ni,"a ti a,a kal uk tawh chu rawn hnai lehin,"Lo thlir ang hmiang,i hnen atang hian ka lakah a rawn kir leh vat ang,"a ti a,a chhuak nal nal.

A thu sawi chuan min mawlh tet tet a,ka awm a nuam lo,min kalsan mai hlauhna in ka khat a,ni e,a fa nu a ni a,u Hriati nen chuan khai khin rual kan ni lo,kei aiin a let tam takin a tha zawk bawk.

Ni lengin ka awm a nuam lo va,Kion ka va hruai hnu pawn ka tawng tui tam meuh lo zawng a ni.

Dar 5 velah u Rintluanga a rawn thleng a,a hmel ka hmuh hian u Hriati thil sawi kha ka hrechhuak zawk a,ka ipik tun reng mai.

Ka hmel hmaiah chuan ka lo ti lang deuh a ni ngei ang, Kion-a mut tawh hnu chuan ka room-ah a rawn lut a,ka bulah chuan rawn thu thlain ka biang a tawk zeuh a,a mitah ka en kar thung.

"Sawi teh le,"a hi a,ka sam chu a chul thuak thuak a,"Ih,u Rintluang,min duh tak tak em?"ka zawhna vang chuan a bang bo deuhin ka hria.

"Min duh tak tak em?"ka lo tih leh chuan,"Duh tehreng mai, ngati nge?"a ti a,ka zep tit tet peih tawh lo.

"U Hriati a lo kal a,a bula i let leh thuai tur thu a sawi a,"ka tih chuan a rum nghutin ka mal chunga ka kut dah chu a rawn hum a, lungngai suh tih melhin min melh ni berin ka hria.

Ka thawk hluai takah chuan,"Lo kal teh,"tih leh min kuah a rual a,a darah ka bei a,anin duat takin ka samah a lo chul bawk.

Tawng chhuak hmasaah rawn tangin,"Midang thusawi vangin i rilru tibuai duh suh nang aia duh ka nei lo a,nang tluka duh erawh pakhat ka nei a,chu chu Kion hi a ni,ka kalsan ngai hek lo ang che,i dinna ngaiah i ding reng dawn anih chuan keimah vang chuan i rilru ti hah suh, thlamuang takin awm rawh,"a ti a,min kuahna chu thlahin ka hmuiah a rawn fawp a,a zei em em leh nghal a, Pathlawi Freestyle anih ka ring.

Min thlah hnu chuan ka chalah fawp lehin,"Mu tawh rawh le,"a tih chuan,"Muttui le,"ti a mut ka tum chu min rawn pan lehin,"Ka sawi tawh kha,i rilru ti hah suh Bawihpui,"a ti a,ka bianga piai zeuhin ka room atang chuan a chhuak zui bawk.