D'LENMAWI BUNG 4-NA

D'LENMAWI BUNG 4-NA

Ziaktu-Venpuii 

"In sawi laklawh viau na chu Bawihpui, thingpui i lo lum hman lawk em?"a rawn ti a,"Imm,hei ka lum mek"

"Aw le,"tiin a kalsan leh nghal daih.

Thingpui chu siam rawk rawkin ka va pe a,"Bawihpui,"u Rintluanga'n a rawn tih leh chuan ka en vat a,a hmel chu hmuh a nuam chiah lo,"I khua a sik a mi?"tih leh a pang deh ka rual a,a lo lum hiam mai.

"Damdawi ei rawh aw,"ka tih chuan a lu a lo bu nghat a,ti khan lo awm lawk rawh,"tih leh inchung lama tlan chhoh ka rual a,Kion a mutthilh vang chuan thawm dim thei ang berin damdawi chu ka la a, inhnuaiah ka tlan thlak pui leh nghal dawr dawr.

Chokaah ka luhpui rawk rawk a,rawt dipin tui nen ka chawhpawlh leh tê tê hnu chuan ka va pek ka tum deuh a,mahse hetia va pek tawng chu a zah ka hlauh vangin u Rintluanga chu ka au a,a lo hrethiam nge ni a rawn phei rang ngang mai.

"Kha le,"tih leh damdawi chu pek ka rual a,a ei hnu chuan,"I duh chuan han mu hahdam daih la,an ni chu ka lo buaipui thei mai ang,"ka ti a,a lu thingin,"Ka tha alawm,kha damdawi ka ei tawh kha,"a ti thum dut a,a tuar hi a chhel ka ti dawn nge a inti pau khauh ka ti zawk dawn ni.

"Phei ila,"a rawn tih chuan,"Lo va inkawm rawh u, rawngbawl hma fridge saw hruk ka duh a,"min en zeuhin"Che vak vak duh suh,"a ti sup,ka nuih heu ringawt.

Min sawm hnu pawha ka phei duh loh vang chuan amahin a phei a, keipawh fridge lam chu panin ka hawng a,a chhunga thil awm te chu la chhuakin ka hru fai a,ka hruk lai mekin tar ki ringi chu chokaah rawn lutin ,"Kan haw dawn a,min lo thlah rawh,"a rawn ti var a,î hê loin ka tho a,an haw tur chu u Rintluanga nen chuan kawngkhar thleng kan thlah a,an kal liam rual chuan kawngka chu kharin choka lamah ka lut leh daih,u Rintluanga erawh a room lam a pan tain ka hria.

Fridge chu ka hruk zawm a, ka hruk zawh chuan rawngbawl a lo hun leh der tawh vangin ka inbawl tan a,a hma lutuk tawh loh vangin ka hmanhmawh ang reng khawp mai.

"Atê,"Kion-a aw ri ka hriat rual chuan nui sakin ka inher a,a tih dan ngaitein chair-ah chuan a thu leh a,"I mutui em?"a bianga fawh sak zeuh paha tiin a lam chu ka en reng,min chhang loin a lu a bu a,a ham bai bai bawk.

"I mut a la chhuak a mi?"nui chunga ka tih chuan,"Aih chhuak lo,"a ti a,a la ham bai bai tho.

"Atê"

"Immm"

"Damdawi ina in awm lai khan Mama-in min lo hruai a tum a"

"A bulah I kal duh em ni?"a lu a thing a,a luah chuan ka chul sak zeuh,min rawn en kiau pahin,"A hma kha chuan Mama bulah khan ka awm chak thin a,mahse tunah chuan ka chak tawh lo"

"Ngati maw?"ka tih chuan,"Nangma bula awm ka duh zawk,"a tia nih chu,he naupang hi chu aw...

Thut hnaihin a biangah ka khuap a,ka fawp bawk,"Tinge min ngainat em em a?" ka zawt lo thei lo a ni.

"Ka hre lo,"tih paha min kuah a rual a, kuah letin,"Bawihte,"tih zawng ka sawi a,a bak ka sawi thei lo,he naupang hian dam chhan tur tha tak min pe a,chu dam chhan min pek chu amah bawk hi a ni.

"Atê,ka ril a tam e..."a rawn tih chuan ka nui hak a,"Immm,eng nge i ei ang?"ka kuahna thlah dul pahin ka en ran,min nuih sen sen mai.

"Chhang,"a ti a,u Rintluanga'n ei tur a dahna cabinet chu kan hawng rak rak,chhang chu entirin,"Eng ber hi nge i ei duh?"ka ti leh a,a chhang duh a kawh rual chuan lak thlak sakin thei tui nen ka pe a,rawng ka bawl zawm thung.

"Atê, homework kan nei a,zanah min lo tihpui,"chhang thial tulh tulh pah chuan a ti a,a biang a puar kerh bawk si a,a inhmeh reuh lutuk.

"Bawihte,miss Bz-i kha a fel em?"ka tih chuan,"A hlauhawm thei lutuk,"a lo ti a,ka rin dan chiah a ni.

"Atê,Mama i nei em?"a rawn tih chuan ka thil tih lai ka chawl dawt a, ka nu ka hrechhuak rauh rauh.

"A thi tawh a,"tawi tea nuih pah chuan ka ti a,a hmelah chuan in thiam lo hmel ka hmu."Sorry,"a ti vei sep a,"A ho lutuk,nui chunga tiin a chalah ka fawh sak zeuh.

Rawng ka bawl zawh chuan Kion nen sitting room-ah kan thu a,T.V. kan en a,u Rintluanga erawh a la rawn dik dak thla lo hrim hrim.

Ka phone a rawn rik chuan ka en vat a, number hlang bawk a ni, ka ngaihtuahnaah Laldinhlua a rawn lang tak nain anih ka rin tawh chiah loh vangin ka la a,ka ring dik lo nghal pang.

"Muani,"a rawn ti leh sup,"Laldinhlu, eng nge ni fo a?Eng nge i hriat?"ka ti chang bawl a,"Min ngaidam hram rawh,"a ti leh anih chu hmmhh.

"I mumangah pawh a thleng lo vang,"tih leh off ka rual a,a rawn ti leh tluk tluk dawna ka hriat vangin min rawn phone-na number pawh chu ka block leh hmiah.

"Atê,"mitmeng ti daia min entu vang chuan inthiam lohnain ka khat,ka aw ki vin vang kha anih ngei ka ring bawk.

"Sorry Bawihte,"ka ti a,a putea a ni leh nghal,a nuam miah lo.

"Miin an tibuai che a mi?"a rawn ti reuh a,"Imm mi pakhat sual deuhin min ti buai a,"ka ti a,a buk nghat nghat hunah,"Papa hrilh la"

"Ngati maw?"ka tih chuan,"Papa'n a vaw hrep ang nga,"a ti leh a,ka nui ta ringawt.

Ngawi rengin T.V. a en zawm a,kei erawhin ka phone ka en thung Kimi message a lo awm a,"Laldinhlua'n a nupui a hruai haw leh,"tih ka hmuh rual chuan ka thaw huai huai theiin ka hria.

"A that hlauh chu vawiina Kion ka lam tur te kha min lo tibuai leh a,"ka ti a,an in hruai leh chuan a zia hlauh e.

"A ni maw? Engtin?"a rawn ti leh chuan u Rintluanga ka hrilh ang chiahin Kimi pawh chu ka hrilh a,"A zak lo e....oiii a zak lo e..."tih chu sawm chuang a tlar thla dul mai.

"Number hlang pahnih atangin a rawn call a,ka block ve ve,"tih ka thawn chuan a rawn voice a,ka ngaithlak chuan nuih te pawh a za lek lek.

"A va han zak lo pir per tak,I hmelchhe per pur anih mai chu va ti rawh,"a rawn ti a, ka nui tet tet ringawt.

Kan inbiak lai chuan,"Bawihpui,"tih ri ka hria a, ka hawi chhuah chuan u Rintluanga hmel ka hmu zui zat.

"Chaw lo ei mai ru aw,ka ei peih lo,"tiin ka chhan hma hma chuan a chho leh daih a,a nuam lo viau em maw ni aw....

"Bawihte lo thu lawk rawh aw,"tih leh thawh ka rual a,u Rintluanga room lamah chuan ka tlan chho hlawk hlawk,ka thlen meuh chuan ka thaw hlawi hlawi thei.

"U Rintluang,"a room kawngkhar ben dat dat pah chuan ka ti a,a rawn hawn rual chuan,"I nuam lo em ni?"a hmui hnuai liah zeuh pahin,"Ka nuamsam chiah lo a,lo zuk ei mai ru,"a ti a,a hmel lah chu ka hmu tha riau leh nghal!

Ka lu chu thing nawkin a pang ka deh chuan a lo lum hiam a,"Damdawi,"ka tih rual chuan,"Ka ei tawh,"a ti a,"Aw,anih chuan lo mu hahdam rawh aw,"tih leh inhnuaia chhuksan ka rual zui.

Inhnuaiah chuan tlan thlain Kion chu ka ko a, sitting room atanga a lo chhuak chu lo pawmin,"Papa-in chaw a ei peih si lo va,kan pahnihin ei mai ang aw,"choka lamah ka pawm lut zui a.

"Papa chu a dam lo a mi?"a hmel ka en chuan ka chhanna a beisei tih hriat tak hian min lo en a,"Dam e,a ei peih chiah lo aniang,"ka ti a,a thlamuang hmel chu hmuh nuam tak a ni.

"Chaw ei ang aw,"chair-a nghah thlak paha tiin chaw ei chu ka siam zui a,bowl-a suah kawi suah kawi ai chuan tiin ka thlengah chuan ka suak a,Kion chu bawnghnute ka thlit sak a,a ril a lo tam deuh nge ni a ei hnem ve reuh khawp mai.

Chaw kan ei kham fel hnu chuan a homework ka tihpui a,a kutziak lah chu a felfai vei thlarh reuh a,a rilru pawh a chak tha khawp mai.

"I mut a chhuak tawh em?"dar 9 a rik tawh vang chuan ka ti a,u Rintluanga chu a thawm eih pawh kan hre zui lo,a muhil tui viau anih ka ring.

"Aih,chhuak lo,"a lo ti,tlaia a mut vang kha anih ka ring,"Lo kal rawh,ka lo pawm ang che,"a ban lo phar chhuah chu lo banin ka mal chungah chuan ka pawm a,nghet zetin ka kuah bawk.

Inkuah chung chuan kan lo muhil a ni ngei ang,ka men rual chuan u Rintluanga'n,"In muthlu em ni?"a ti thum dut a,ka nui tawi tak ringawt.

"Dar engzat nge a?"ka tih chuan a fapa muhil thlir dauh dauh pahin,"Zing dar 1 a pel tawh,"a lo ti a,"Aw haw...ka han mutpui ang nge,"Kion pawm pah chuan kal mai ka tum a,"Ka lo mutpui mai dawn a mi?"a tih vang chuan ka ding leh rih,lu thingin,"Kan mutpui ang nge,i khua a la sik em?"amah en chunga ka tih chuan,"Sik tawh lo ve,"a ti sup a,ka awih loh vang chuan a pang chu ka han dek vut a,a lo daih diai chuan ka thaw suai suai thei.

"Ka tha,min ngaihtuah duh suh,"a mitmeng dam dap mawi em em mai chuan min en a,chhang zui lovin inchung lamah ka chhoh san daih,ka room chhungah chuan pawm lutin khumah ka mut a, ka mu thla ve nghal zat,ka mut chu a chhuak ngang aniang,ka muhil leh har lem lo.

Ka muhil ka harh chuan ka mutna bul chu ka en hmasa ber,Kion chu a lo la muhil a,mut hi chu a duh ve thaw khatin ka hria.

Sana ka en chuan zing dar 6 a lo pel hret a,khum atanga chhukin inhnuaiah ka chhuk thla a,choka ka luh ruala ka thil hmuh vang chuan ka phu zawk thei.

Dawhkanah bawk chungin u Rintluanga chu a lo muhil tui nasa mai a,tukin lama a tho kha a room-ah a let chho leh lo em maw ni.

Thawm dim thei ang ber chuan ka hnaih hret hret a,a muhil hmel chu tha leh zual tak a ni,a mithmul chu a dum buk chhap a,a mit khur chuan thuk lam a pawl thung.A hnar ngul lah a sangin a nalh em em a,a hmui lah duhthusam,a biangah hmul a to siar siar bawk.

Ka lu chu thing nawkin rawng bawl ka tan a,lehhawi loh ka tum pawn a har talh mai,ka lehhawi leh nge nge thin.

"I va tho hma thin ve?"tih riah chuan ka chawhmeh vil lai chu ka leh hawi zawk,a lo zi mar talh talh a,"Hma lo ve, tukin khan i mu tlang daih a ni maw?"min chhang lo chuan a nui a,a nui hmel chuan engkim a sawi thung.

"Junior-a a la mu a mi?"a hawi kual vut hnua a tih chuan,"Aw,thingpui I duh em?"ka lo tih zawm zat,"Duh rih lo mai,"a aw a then kharh hnuah,"Vawiin chu ka va hruai ang,"a ti a,"I la dam that loh kha!"ka vun deuh,min rawn en zawkin,"Hriati leh Laldinhlua hi an rapthlak si a,niminah pawh a lo kal a ni lawm ni?"a ti a,"Aw Laldinhlua zawk a lo kal a"

A mitmeng mipa mitmeng ka hmuh tawha zawnga mawi ka tih em em mai chuan miin rawn en lehin,"Ka rin loh vang che a ni miah lo ania aw,ka ring lutuk che a,mahse ka hlauthawng thin,"a ti a,ka hrethiam lutuk.

"Ka hrethiam alawm,nangmah chauha kal ai chuan duh leh kan pahnihin va hruai ila,"a mitmeng chu ka en rei tha Ngam chiah lo,a pawi ti lo aniang a lu a bu ta nghat a,ka hah a lo dam ve sawng sawng thei.

"Papa, Atê,"Kion-a aw ri kan hriat rual chuan choka luhna lam chu kan hawi rual zawt a,mit nuai chat chat chungin Kion a rawn lut a,a ham vei bai bai.

"I mutui em?"a pa'n a tih chuan,"Tui lutuk,"ti a chhangin a nui heu reuh bawk si a nuihpui loh theih pawh a ni lo.

"Vawiin chu Atê-i nen kan thlah ang che aw,"a fapa biangah fawh sak zeuh pahin a ti a,Kion a phur ngang mai,a rak chul a,a zuang tawr tawr bawk.

Chaw chu hma takah kan ei a,Kion chu ka siam a,a phur hmel chu hmuh nuam tak a ni.

Ka siam zawh hnu chuan inhnuaiah kan chhuk a,u Rintluanga'n pawnah min lo nghak tawh, kawngkhar chu kalhin u Rintluanga min lo nghahna lam chu kan pan a.

Car-ah chuan lutin,kawng tluan chuan Kion-a thusawi kan ngaithla a tih theih.A classmate-te chungchang leh thil dang pawh,A...!a tam mai.

School kan thlen chuan gate bul thleng u Rintluanga nen chuan kan thlah a,phur deuh chuan a kal ve terh terh reuh a,vawi engzat nge a rawn leh hawi ni, hriat sen vek pawh a ni lo,vawi tam tak a rawn leh hawi miau a ni.

"Let nghal mai ang aw,"u Rintluanga'n a rawn tih takah chuan ka inher a, motor-a a luh rual chuan ka zui lut ve thuai bawk.

Inbe lo chuan kan tlan zel a,inkawt kan thlen chuan ka chhuk vat,garage lamah a tlan phei thung,keiin ka bag ka dap rak rak a, chahbi lah chu ka dap fuh thei mai lo.

Rei ngial ka dap hnu chuan ka dap fuh ve thei hram e, kawngkhar chu hawngin ka lut zui a,rei vak loah u Rintluanga a rawn lut ve bawk.

"Naktuk atang hian hna ka zawm tawh mai dawn a mawn le?"banga thlalak ka hruk mawlh mawlh lai chuan ka bula rawn din pahin a ti a,phawk fe hian ka lo en thung, duh aiin a in dim lo deuh chu a ni.

"A chi êm dawn a mi?"ka tih lai mekin kawngkhar an rawn kik a,ka pawnchhe ken dah sawk sawkin kawngkhar chu ka va hawng a, hmeichhe pathum hi an lo ding a,a laia hmeichhia chu hmuh tawhna nei tlatin ka inhria mahse ka hmuh tawhna ka hrechhuak zo lo reng reng.

"Eng nge ni ta?"ka tih veleh a laia mi chuan,"Lalmuanpuii a awm em?"a ti a,keimah ka ni chiang lutuk, mahse eng vanga min rawn hmuh tum nge an nih.

"Aw ni e, keimah hi ka nia,eng nge ni ta?"an pathum chuan an in melh ralh ralh a, chutah a laia mi chuan ka samah min rawn tham tawk a,ka hrilh hai lutuk chu chet nachang ka hre lo reng reng.

"Zawngi engtin nge ka pasal te i lo lem kual ngam zawk a,"a au tuar tuar mai,ka hre ta chiah Laldinhlua nupui kha.

"Min thlah rawh,"ka tih lah chuan min tham nghet sauh sauh a,a thiante lah chuan,"Sarah hnuk hrep rawh,kha tiang mi zak thei lo kha chuan a chhe ber chiah a phu,"an lo ti ve sek a,ka chhip a kehna chu a tinghet sauh sauh.

"Bawihpui,eng nge thleng a?"u Rintluanga kan lamah a rawn phei a, Sarah-i chu a nawr san rawk rawk a,Sarah-in,"U Rintluang inah i awm a law?"a ti haw a,chhang loin u Rintluanga chuan min kai tho a,min din hliah zui zat bawk.

"Eng buaina nge in rawn siam hi?"u Rintluanga aw chu a chang tha viau mai.

"E,eng lo u Rintluang,i awmpuinu hian Dinhlua a rawn zar buai thin a,"a tih chuan ka ham haih lutuk chu tawng chhuah nachang ka hre lo reng reng.

"Dawt anih chu,"u Rintluanga'n a ti bung nghut,"Dawt a ni lo u Rintluang, Dinhlua pawn a sawi vek alawm henu zawk hian a zar buai thin,"a ti sak sak a, ka hmui ka pet fan fan.

"Bawihpui,"dam diaia u Rintluanga'n a tih chuan ka thaw hak,"Ka be lo,ka zar buai ngai lo,amah zawkin alawm min tibuai,"thinrimna vanga ka aw khur chu ka hre chiang hle bawk.

"Daw reng reng suh Zawngi,ka pasalin a sawi vek tih hre rawh,"a ti leh a,a thianten,"Dinhlua'n a sawi vek alawm,"an lo ti rual a, Laldinhlua mai mai chuh.

"Ka tibuai ngai lo aw,amah zawkin anih kha min tibuai char char anih kha,eng atan mah ka ti lo I pasal kha,"ka aw ki chu a vin ve ta viau mai.

"Daw reng reng suh,"tih paha min rawn ban mai a tum chu u Rintluanga'n a lo dang vat a,"A sawi tawh, chhuak rawh u,"a ti fak,an inen hrak hrak a,an chhuak nghal nal nal.

"I tha em?"ka dara dawm chung chuan a ti a,zep loah chuan ka tha lo,tlawm ka inti in ka zak hle bawk.

Chhang ta lo chuan inchungah ka tlan chho a, ka room kawngkhar chu kalh ka kalh rawk rawk, ka biangah mittui a luang zung zung a,a na ka ti tiang em em tuar tur hian eng chu nge maw ka tih sual bik em em le.

"Bawihpui,"ka room pawn atanga a rawn tih rual chuan ka mittui ka hru hul sawk sawk a,"Aw,ka lo chhuak tep,"ka aw chu a thâm tha khawp mai,"Lo chhuah kher pawh a ngai chuang lo hun thawl i mamawh anih kha,tap bawrh bawrh rawh,"a ti a,a kalsan thawmin a zui bawk.

Ka phone a rawn rik chuan ka en vat a,Kimi a nih vangin ka la a, engmah pawh ka sawi hmain,"Lo chhuk teh,"a rawn ti a,a lo kal em maw ni.

Call leh ka tum lai takin ka room kawngkhar an rawn kik karh karh a,"Bawihpui,i thiannu a lo kal a,lo chhuk lawk la,"a rawn ti dam diai a,chhuah lohna chi pawh niin ka hre tawh lo.

Kawngkhar chu muangchangin ka hawng a,u Rintluanga nen kan in hmachhawn ran mai,a mitmeng chu ka chhiar thiam lo.

Inhnuaiah chuan kan inzui thlaa sitting room-a kan luh chuan Kimi a lo thu vang tawh,"Eng nge i lo tih?"ka ti tawl,min rawn hnaihin,"Thu la kan sawi dawn nia,"a ti a,a bula ka thut thlak rual chuan ka lamah a rawn tawlh hnai sat sat.

"Sarah-i te an lo kal a mi?"nghal pang chuan, engtin nge maw a lo hriat leh hman ni.

"Aw,"ka lu ka bu paha,"Dinhlua a thinrim lutuk a,a hnawt chhuak a,a then nghal hmak alawm,"ka hamhaih zawk,a mak ka ti lutuk chu engmah sawina chang pawh ka hre lo.

Sarah-i te lo kal atangin dar kar tlem chiah a la liam a,tunah tiang thil hi a thleng leh a,thil hi a thleng rang mah mah deuh chu a ni.

"Aman dawtin a nupui bulah khan ka chung chang sawi lo se chuan kan buai miah lo ni mai tur,"ka ha chang ka thial ri bap bap,"Eng nge awmzia? Dinhlua-te kha chuan,'Tha takin Muani pawh thlah ka tum a,Sarah-i pawh ka hruai let a,thu kha a vai vir a vai vir a,hnathawka ka chhuak kha an thian hoin an lo va kal a,"a rawn ti sia a ti a,"Engtin nge an lo kal tih chu a hriat?"ka lo ti let daih thung.

"Hlimi'n a sawi anih ka ring,"ka thaw hak,"Tu nge Hlimin chu?"

"Aw...Sarah-i hi,engtin nge an rawn tih che a?"ka sama chul pah chuan a ti a,"Min rawn kek a,chuan,"ka sawi zawm thei lo,ka biangah mittui a rawn luang a,ka lo khawngaih ve na zawng zawng pawh kha an bo nghal vek.

"A pawi emai,"tih leh min kuah a rual a,ka hnungah a beng thak thak bawk,"Engmah I sawi lo em ni?"a tih chuan,"Tlem chiah ka sawi hman,in sawifiah vak ngaihna pawh ka hre lo,"tiin ka chhang a,thu dik a ni.

Ka ham haih lutuk vang khan sawi mai tur ka hre lo va, ka thiam tih chiah a ni ka hriat ni.

"Kan va an khum ve mai dawn em ni?"a rawn ti a,a uang emaw ti a a hmel ka en chuan a lo thutak khawp mai.

"A ngai lo, chutianga kan tih ten an mahni ang lek kan ni dawn asin,"tiin ka chhang thung,ni e,duh ngat ila zawng chhuah chhalna tur chu a tam, mahse an tih ang khan kan tih ve kher a ngai lo.

"Engtin emaw chuan ka ti awm tho e....zak lo leh lutuk mai,"a la ti khat khar,ka hnungah a chul heuh heuh a,a thlamuanthlak hle bawk.

"Bawihpui"u Rintluanga'n a rawn tih chuan ka thu tha vat, sitting room-ah a rawn lang nghal zat.

"Junior-a ka va lam lawk ang aw,"a ti a,Kion hruai a lo hun dawn tawh tih ka hrechhuak zawk.

"Nangmah chauh te chuan a chi nang,ti hian lo awm la keiman ka va lam ang,"ti a thawh mai ka tum chu,"A ngai lo ti khan lo awm rawh,"tih leh tlan chhuah a rual zui daih,'dêk' han tih hmanna eih pawh a awm lo.

"An lo kal laiin a awm lo a mi?"

"Tu maw?U Rintluanga kha maw?"bang bo fe a ka tih chuan,"Aw, Dinhlua nupui te an lo kal lai chuan a awm em?"a ti leh a,"Aw,awm e,min chhan alawm,"a lo bu nghauh nghauh.

"A nupui hlui te nen khan an inchhung tiraw?"

"Immm"

"Anih chuan an inhre sa ang a,"a ti leh a,"Hre sa e,a inthlahrunawm duh lutuk,"ka ti a,ka la zak ram ram thei,"An zak lo êm a ni,"a ti ngawih ngawih,a thle vei nguai bawk.

"I hmaiah te an ham che a mi?"min thlek kual vut vut chung chuan a ti a,"Ngati nge?"ka lo ti hê hâw,min lo ham hman pawh a ni maithei.

"An nasa emai...ka lawm miah lo,ka haw ang nga ka kal chilh tak tak dawn,"a ti hmarh hmarh a,"A ngai lo,"pawh ka tibuai peih tawh lo,a kal dawn tho tho tih chu a chiang reng.

"Thingpui kan lum lawk ang aw,"tih leh thawh ka rual a,ka lu lei chu a na ut ut thei,ka tih ngaihna hre lo chuan ka dawm leh ringawt thin.

Thingpui a so chuan ka siam a,ka va ken phei lai chuan a phone a lo bih a,ka thawm a hriat chuan a rawn hawi chhuak vat,"Thenawm nu chu a che nasa viau anih hmel,"a rawn ti a, zawhna mitmenga ka en chuan,"Ka nauin min rawn hrilh a,hei,"tih leh a phone rawn lek chhuah a rual a,ka lo bih hnai ve vat.

Message-ah chuan,"U, Hlimi chu a che na bian bian lutuk,a room a ri bur bur mai,an tukverh glass te a vawm keh a,u Dinhlua hming a lam a,a au tuar tuar mai,"tih a ni.

"A va rapthlak,"a bula thut pah chuan ka ti a, ka chek zui tlat tlat bawk.

"A thinrim chuan a che buan buan zel an tia,keichuan ka lo awih lo a, hnathawka ka awm daih vang khan,engmah ka hre lo a,he lama ka awm lahin ka pu te inah ka tap chawt zel bawk sia,ka lo hre ve miah lo va,tunah rih hi chuan nimina ka lo khawngaih te kha ka inchhir ngawih ngawih,"a ti a,ka en chuan a lo thinrim hmel ngang mai.

"A pawi ka ti emai ani ber kher I lo tawng hi chu,"tih leh min rawn kuah a rual a,hnem a ngai zawk lek lek mai a,tih ngaihna vak ka hre lo.

"Thingpui hi in phawt ang le,"tiin ka insiam rem a,a insiam tha ve mai.

Thingpui kan in zo a, no ka sil lai mekin Kion-te pafa an rawn thleng ve chiah,Kion chuan min rawn pan ding leh nghal chat.

"Atê,ka mut a chhuak e...."a rawn ti nuah nuah,mut hi chu a duh ve chiang alawm,"Ka thlak che ang nga,i muhil daih dawn nia,"a sama chul sak pah chuan ka ti a, choka atangin kan inzui chhuak bawk.

"Kim,lo thu lawk rawh aw,Kion hi ka han thlak lawk ang,"tih leh inchung step-a chhoh ka rual a,Kion chuan ka kut a hum ran mai.

Ka room-ah luhpuiin ka thlak a,"Muhil phawt la,i harh hunah i in tifai mai dawn nia,"tiin a lu chu ka tuai zeuh,a lo pawm khawp aniang chu khumah a mu nghal thak.

"Ti khan lo mu la,ka thiannu kha a awm sia ka zuk chhuk ang aw,"inthlahrung ang reng tak chuan ka ti leh,"Aw le,"a mit chhin duar duar pahin a ti a,a biangah fawp zeuhin inhnuaiah chuan ka chhuk san thung.

Sitting room lam ka pan lai chuan choka atangin u Rintluanga a rawn chhuak a,"A mu a mi?"no a keng a,a lem khalh.

"Aw," sitting room lama phei mai ka tum chu,"Lehkhabu ka han chhiar ang nge,"a tih vang chuan ka leh hawi leh rih.

Ani erawh step-ah a lo chho tawh thung, sitting room lama ka phei chuan Kimi phone hmang ri ka hre zat a,tu nge a biak ni a thinrim hmel khawp mai.

"Ka lungawipui lo khawp mai,helai leh zela luh khung tur hian dikna a nei bik lo,Muani hian duh ngat se chuan amah hi hruai tela chhuah chhal ka duh a,aman a duh miau si lo va,keichu ka haw veleh ka kal tho ang,"a ti hmuar hmuar, lehlam chhanna erawh ka hre lo.

"Nangmah hi buaina bulpui chu i nia,tha te tein awm la chuan i nupui pawn kha tiang khan a ti lo ang,rawn kal chilha dawt hmanga a rawn puh leh kut a rawn thlak kha chu a thiam loh hul hual a ni thung,"a ti fak, Laldinhlua a bia anih ka ring.

"Ni ang chu hei a hmaiah te an ham alawm,"a ti a,a mi biak chu ka hre chiang ta viau mai.

Ka kal hnaih vat a,"Bia bia duh suh,"ka ti hluk,min rawn en zawkin,"Bul tan that kha chu sawi lo zawk teh,"a ti zui a,bul tan that a la ti cheu chuan ka lung a ti awi lo zual ngang mai.

"Be tawh suh,"tih leh phone chu ban ka rual a,min lo pek chuan ka off hmak,inbe lo hian awm ila ka dam zawkin ka ring.

"I tha em?"Kimi'n a rawn tih chuan ka en vat a,"Tha e,"nui chunga tiin a bulah chuan ka thu thla ve zat,min thlek vang vang hnuah,"Ka lakah chuan zep suh,"tih zawng a sawi,ka in up reng duh ta bik lo.

Ka tap,ni e ka tap,ka thinah min hnawh tawt up up a,ka insum thei thlawt lo a ni.

"A pawi emai,"tiin ka hnungah chuan a chul a,ka nat chang leh harsatna ka neih changa ka belh thin leh min hnemtu chu amah hi a ni a,ka mi rin ber a ni bawk.

"A pawi reng reng lo aw,tap rawh,tap la i thawl hawk mai ang,a eng lam zawngin thlir hram hram rawh,"a ti sep sep a,a darah min kuah bei thlâm a,ka tahna vang chuan a kawr pawh a huh hluam tawh.

Ka in lak hran hnu chuan ka sam chu a chul mam thuak thuak a,a mita en chung chuan,"Mipa lem ching min ti a,"ka ti tuau,a meng ling tha khawp mai.

"Miin an sawi dan che kha ngai pawimawh duh suh,I nihna a ni lo tih chu nangmah hmangaihtu che hian kan hre chiang,"chu a thusawi tlem tê chuan min hnem takzet.

"Ka lawm e aw"

"Thian kan nia ka tih tur alawm,"min nuih sen sen bawk.

"I lo awm lo ang tih hi ka hlau"

"A ni daih ang,"a ti a,a nui kar kar a, keipawh ka vang bik lo.

Eng eng emaw kan sawi leh luam hnuah a haw a,ka zia huai mai.

Dar 2 a lo ri tawh a, rawngbawl nana a la hma deuh vang chuan insuk ka rilruk deuh, Kion-a thawmhnaw leh ka thawmhnaw chu ka room atangin ka la chhuak a,u Rintluanga'n thawmhnaw suk tur a neih ka rin vangin a room lam chu ka pan leh,a room kawngkhar chu ka kik a,min lo chhawn har lo.

"U Rintluang"

"Aw"a lehkhabu chhiar lai khup thak pah chuan ka lam a rawn hawi a,"Thawmhnaw bal i nei em?Ka insu dawn a,"ka tih chuan a tho vut a,balbawm a en anih hmel.

A rawn let leh chuan thawmhnaw tlem a rawn keng a,laa kal mai ka tum chu min au ding leh rih.

"Eng nge ni ta?"zawhna mitmenga en pah chuan ka ti he a,"Lo thu teh,"tih leh a room-a min kaih luh a rual a,ka en heu ringawt.

A khumah chuan min thut thlak tir a,eng nge maw a tih dawn le...

Ka hmaa a rawn thingthit rual chuan phawk deuhin ka lo en a, damdawi bawm ni awm tak hi a keng bawk.

"U Rintluang,"ka tih chuan min rawn en zawk a,engmah a sawi lo,a thil ken chu hmet chhuakin ka hmaiah a rawn hnawih a,duh ai chuan kan inhnaih deuh chu a ni,ka thin a su leh dup dup tawh.

"A na viau em?"a aw chu a dam dap a,q mitmeng pa taka min en chuan ka zam chhe der lu ka thing a, dim te te hian damdawi chu a hnawih a,keiin a hmel chu chiang takin ka lo en thung,mipa hmeltha tak a ni,a zunah chuan hmeichhia zawng zawng an uai vek ang tih tur khawpin a hmel a tha a,a tawng duah lo va,mahse chu chuan a ti pa hliah hliah thung.

Het! eng nge maw ka hriat ni,"Ka zo e,"a rawn tih takah chuan ka harh zawk a,"Ka,ka lawm lutuk aw,"ka ti bah nawk nawk a,a tlanin ka tlan chhuak a ni ber.

Room atanga ka chhuah rual chuan ka thin ka dawm vang vang a,a room chhungah khan ka kham khawp boruak ka hmu lo emaw tih mai turin boruak chu ka hip âm a,ka awm dan chu ka hrethiam teh nuai lo.

Thawmhnaw bal chu inhnuai bathroom-ah ka chawi thla a, machine-ah ka nuai tirin,a nuai hlan chuan hmun ka phiat a,a nuai zawh chuan tleuhin ka spin leh a,chaw ka chhuang leh a, gas chu sim-in inchungah ka insuk chu ka han zar a.

Ka zar zawh rual chuan inhnuaiah ka tlan thla leh a,chokaa Kion lo hawi kual ruai ka hmu chuan,"Bawihte,"ka ti vat a,a rawn leh hawi rang ngang mai.

"Atê, khawiah nge I kal a?"nel awm taka min nuih chung hian a ti sep,"Inchungah insuk ka zar lawk a,"a lu a chul pah chuan ka ti a,min hnaih leh sat sat tawh.

"Rawng hi ka bawl zo ang a,i inbual dawn nia aw,"a lu a lo bu nghat nghat a,zawhna min zawt a,ka chhang ve zel bawk.

"Atê,i phone a ri,"sitting room lam atanga a rawn tih rual chuan ka kal hnaih vat,ka phone chu a lo eng zak zak mai.

Phone screen-a hming lo lang ka hmuh rual chuan ka la vat a,ka pa a ni.

"Hello"

"E,Bawihte damdawi inah in la awm em ni?"a rawn ti a,"Awm tawh lo ve,kan chhuak tawh alawm,"a thawk ham ham hnuah,"Lo haw daih la,"a rawn ti leh a,min ngai ve viau em maw ni ka tih rauh rauh laiin,"I nu nau te hian thla khat vel awmpui tur an duh a,duh leh tah te chuan,"a tih laiin ka lo pawt chat a,"Hetah ka awm ang,"tih leh dah ka rual a,ka lawm miah lo.

A duh leh Bz-i pawh awm mai rawh se,ka lo buai ve na chhan tur a awm lo.

Ka thinrim hmel ka lo ti lang deuh nge ni,"Atê,"mak tihna mitmeng chuan a rawn ti a,ka harh chhuak zawk thei.

"Aw Bawihte,"nuih luih chung chuan ka ti a,engmah sawi lo chuan dawhkana thil awm chu a keng kual a,a samah chuan ka va chul sak ta ringawt.

Chokaah lut lehin rawng chu ka bawl zawm a, ka pa chuan vawi eng emaw zat min rawn phone a,ka la tawh lo chiang khawp mai,an unau zia a hrechiang a,chutia a ti mai chu ka lawm lo a ni.

Rawng bawl ka zo a,Kion chu ka tifai bawk,ka thlak lai mekin u Rintluanga a rawn chhuk a,ka hmuh rual chuan ka thin a phu rang lutuk,ka en tha ngam miah lo te chu thil dik a ni miah lo.

"Boy,i inbual a mi?"a fapa rawn en chung chuan a ti thum dut a,keichu ka thin hi a tlanin a tlan kual tawhin ka hria.

"Bawihpui,"a rawn tih chuan ka phu chiang ngang mai,"Aw haw...."a ti nuah nuah a,ka awm a nuam hauh lo.

"Rawng i bawl zo tawn em?"mawi fahran hian min han luih leh ta nghal a,a sam lah chu a hnawm chap a,a....ka dik miah lo,ka ngaihtuana a luah hneh lutuk,"Aw,zo tawh e,"ka en tha ngam tawh lo hrim hrim.

"Junior-a hi inthlak zo se,ei mai ila,"a tih chuan sana ka en zawk, dar 6 a lo pel zawt a,"Aw le,"tih zawnga chhangin Kion chu ka thlak zawm sawk sawk, ka thlak zawh chuan chokaah pheiin chaw ei ka siam a,an pafain min lo pui bawk.

Chaw ei lai chuan min be zeuh zeuh a,min biak chang chuan ka thin phu chu a mumal thei meuh lo,tawng pawh ka tawng tha thei lo,ka khawr vek.

Chaw ei kham atangin sitting room-ah an pafain games an khel a,mut san daih chi niin ka hre bawk si lo,va phei dawn lahin eng emaw hian min mawlh a,ka awm dan chu sawifiah thiam theih loh khawpin a hreawm.

Kion lah chuan min rawn au leh dût dût thin a,u Rintluanga hrim hrim pawh zanin taka a thu ve kur chu ka ngei ang reng.

Chhuanlam fahrah te te siamin chokaah chuan ka awm reng a,dawhkan te chu vawi engzat nge ka hruk nawn pawh ka hre zozai tawh lo.

Sitting room lama ka phone dah a rik chuan ka va kal thuai a, Kimi a ni, ka la rualin,"Hello,"ka ti hluai,"Muanpui,"leh lama aw ri ka hriat rual chuan chhun lama thil thleng mitthlaah a rawn lang uar uar a,Kimi nen an inhmu em maw ni le.

"Khaw nge Kimi?"chokaa luh leh pah chuan ka ti a,a rawn thaw hawk a,kei ka lo in hum ruh ngawt ngawt thung.

"Muani, khawngaih takin Rintluanga in kawtah khan min lo hmu thei ang em?"a tia nih chu,"Eng vangin?"ka aw chu ka tum ang aiin a nem.

"A tawp nan inhmu lawk ang,tun bak chu ka tibuai leh tawh lo ang che,"a ti leh a,"Thil tha lo tih te kha i lo tum ang nge aw,"ka ti kha kha a,'A tawp nan,'a tih vang khan ka awm a nuam lo a ni.

"Ti dawn lo ve, khawngaih takin,"a ti leh a, ka heh chu na zetin ka seh vak,hmuh ka duh em tih ka chiang lo.

"Khawngaih takin,tun chiah hi,"a ti leh a, keipawn a tawp nana hmuh chu ka pawi ti lo.

"Lo kal rawh,"ka ti ta nge nge a,a thaw huai ri ka hre zui bawk.

Dawr kal chhuanlamin in atang chuan ka chhuak a,u Rintluanga-te in piah thim lai deuhah chuan ka lo nghak ran,lung chu ka chhir ka chhir a,ka nghak rei lo,kar loah a lo thleng ve mai.

A car atang chuan a rawn chhuk a,ka hmuh hmasak ber ni ang chiah khan a la hmeltha,sulhnu an rawn thar nawn awn awn bawk.

A rawn hnai zel a,hun tam liam tawh mahse nimin lawka thil thleng ang maiin ka la chhui let thei.

Ka hmaah chuan a rawn ding a,nel awm zeta min nuihin ka samah a chul a,"Tha takin lo in enkawl rawh aw,"a ti teh daih,"Khawiah nge kal i tum?"a mita en kal chung chuan ka ti a,nui chungin,"Thinglang lamah,"tih zawngin min chhang a, ka duh khawp lo khawp mai.

"Eng tikah nge i kal dawn a?"

"Naktuk zingah ka chhuak ang,"a ti leh a,min rawn enin,"Ka ngai ngawt ang che,"a ti zui a chhan ngaihna ka hre lo.

"I laka ka thil tih tawh zozai kha ngaihdam tlak pawh a ni lo tih ka hria mahse, khawngaih takin min ngaidam hram dawn nia,bul tan that pui ah ka sawm tawh dawn lo che a,bul tan that pui tlak pawh ka ni hek lo,mahse ka thian tal I la ni duh ang em?"a ti leh a,ka chhang lo.

"Muani,"ka dara rawn vawn pah chuan a ti leh.

"Immm"

"Ka thian I ni duh ang em?"a ti leh a,"Aw,"tiin ka lo chhang,ka lung a chhe lek lek a,ka sawi thiam lo ka awm dan hi.

Ka inrin hma chuan a lamah min pawt hnai a,min kuah vawng vawng,ka che chang thei meuh lo,ka tah a chhuak tun reng.

Min kuahna a thlah hnu chuan,"Natna thlen fo thin che mah ila min theihnghilh suh aw,"a nui lek lek a,tawi tein ka nui a,mahse a za lo a ni,a za thlawt lo.

"Va lut tawh rawh le,nun nuam tak nei la,pasal fanau tha tak i nei dawn nia,"a ban bula ben sak thek thek chung chuan,"Hlim takin i awm dawn nia,in thiam lo duh tawh suh,ka ngaidam che,"ka ti hap,"Ka lawm e,"min nuih chunga tiin kal mai ka tum chu a thil rawn sawi vang chuan ka nui hak.

"Min lo unblock tawh teh,"a ti a, nuiin,"Aw le ka lo ti nghal ang,"tiin inchhung lam ka pan thuai bawk.

Ka thaw a veng huai theiin ka hria, inchhung ka luh hma chuan ka chhuanlam siam ka hre chhuak zawk a, dawrah ka kal leh rih.

Eng eng emaw ka lei nual a, inchhung a ka lut chu min lo en thap,u Rintluanga'n in leng a nei anih hmel.

"Atê,"Kion chu ka bulah a rawn ding vat a,ka kutah min kai bawk."I rei lutuk a,"a lo ti nuah nuah,ka nuih tawi tak tak tawh.

Mipa 3 leh hmeichhia 1 hi an lo thu a,mipa zinga pakhat chu a assistant kha niin ka hria.

Chokaah chuan lutin thingpui ka lum thuai a,dar zat ka en chuan dar 8 a lo ri chiah, phon phawrhin Dinhlua number chu ka unblock bawk.

Thingpui vil pah chuan Kimi nen kan in text a,thil awmzia min zawh chuan ka hrilh vek,"A tha zawk ti khan thian angin awm ula engkim in hrilh tawn ula inngaihzawn leh ai chuan a tha zawk,a nupui a bawraw si,karah fa an awm tawh bawk nen,"a rawn ti a,a sawi dik ka ti khawp mai.

Thingpui a so a ka siam leh hnu chuan ka va chhawp a, hmeichhia chuan min lo en chik khawp mai,ka en chiang a,a hmeltha ngang mai.

A vun a nung sarh a,a sam chu a sen kir chiat a,mipa duhthusam ang thlap hmeichhia hi a ni deuh tawp mai.

Ka pek zawh chuan chokaah bawk ka let leh a,Kion ka bulah a thu bawk.Phone a en a,a en tui khawp mai.

"A va hmuhnawm awm ve,"a bianga rawn piai pahin hmeichhia khan a ti a,Kion chu a men ta pur pur, hrilh a hai duh viau mai.

"Thingpui kan in zo tawh, va seng vat rawh,"a ti khar khar a,a thu lo ve chiang e...a zahzel tih hriat reng reng.

Ka chet mai loh vang chuan,"Zawngi,"tih leh sitting room lama phei a rual a, minute khat a liam awrh tihah no chu ka va en a,an lo la in mek chauh,daw heh leh lutuk mai,zahzel a nei thing ropui si.

Let leh ta lo chuan min hmuh phak lohna chinah ka ding a,an in zawh ka chang a ni ber.An in zawh rual chuan ka va seng zung zung a,sam sen-i nen chuan kan inmelh no lo viau.

"Ka mut a chhuak tawh e...."chokaa ka luh rualin Kion chuan a lo ti nuah nuah,"No hi ka sil zo ang a kan mu dawn nia,"ham bai baiin a phone ken chu a en zawm leh a,a khap fan tha tawh khawp mai.

No ka sil zawh chuan Kion chu ka pawmin sitting room-a u Rintluanga thu chu hmui phunin kan mut tur thu ka hrilh leh rih,a lu a lo buk tak nghatah chuan a hrethiam anih ka ring ve hmiah.

Room kan luh rual chuan khumah ka nghat a,a phone ken chu u Rintluanga phone niin ka hria,ka tih mut hnuah ka chhuk thla leh mai aniang chu.

"Thawnthu min lo hrilh,"ka bula rawn tawlh hnaih sat sat pahin a ti a,ka kawngah a kuah tai a,"Eng nge niang awh..."ka ngaihtuah vang vang hnuah Cinderella thawnthu chu ka sawi a,ka sawi zawh chuan a mit a chhing duar duar a,a chala fawp zeuhin inhnuaiah chuan ka chhuk thlaksan leh.

Kawngkhara u Rintluanga a rawn luh chuan a phone chu ka lo lek kang vah a,"E,"tih leh lak a rual a,"Ka mu dawn aw,"ka tih chuan a lu a bu leh nghat a, step-ah chuan ka chho leh thuai bawk.

Dar 9 a pel tawh a, room-a ka luh rual chuan ka phone a lo ri ve chiah,khumah chuan ka thu thla a,ka phone ka en chuan Kimi a ni.

"Imm,"ka lak rual chuan ka ti a,"Bawihpui,"nui kur kur chungin a rawn tia ka awih thei lo henu hi.

"I zak em,"ka ti khar khar,"Bawihpuii,"a ti a a nui uar uar leh nghal chi loh lutuk.

"I lo ti leak out vel ang nge,"a nui uar sauh sauh leh nghal a,min hnaih deuh se chuan a ri chawrh tawh ang.

"Chaw ei kham khan ka va kal a,"a rawn ti a,ka lo hre chang leh tawh lo hrim hrim.

"I kal duh anih chu"

"Enteh,ka va chhuah chhal nasa lutuk ringawt,a pa te pawh khan chhan ngaihna an hre lo,F.I.R theh luhah te ka vo a,nangman i duh phawt chuan kan theh luh theih thuten ka vo a,a meng tal nasa lutuk,chuan an fapa kha a lo dam lo va,"a tih zawm a,"Aw haw..i va vo nasa mah mah ve,"ka tia,henu ka tawng hi chu ka vannei ve ngawt mai.

"An fapa chu eng na nge a?"

"Ka hre lo,a cher rik riak lutuk a,ka nute bula ka zawh khan a dam lo an tia,"a ti a,a titi zui barh barh.

"Bawihpui,"a titi kar lak chuan a ti a,tum loh lutukin u Rintluanga ka mitthla zel leh nghal a,zia lo sik sawi kual vel tak a ni.

"Muhil tawh rawh,"dar 11 velah chuan a ti a,ham bai bai chungin ka mangtha a,call kan ti tawp zui bawk.

Kion bulah chuan tawlh hnai sawt sawtin ka kuah tha a,ka mit ka chhing zui a,ka muhil har lo viau mai.

Ka room kawngkhar kik riah ka harh a,ka thawh kan chuan a reh leh lawi a,ka beng chhe ri emaw ti a mut leh mai ka tum chu ka room pawn atangin,"Bawihpui,"a rawn ti thum dût a,ka harh chiang ta khawp mai.

"Awih,"tih leh thawh ka rual a,tunah zing dar 5 a lo ri tawh a,eng nge maw awmzia le.Kawngka chu ka hawng a,ka hmuh dan vang chuan ka phu zawk theiin ka hria.

"U Rintluang,"sawi mai tur ka hriat loh vang chuan ka ti a, coat suit nen a in duang zaih a,ka mit ka nuai ta ringawt.

"Emergency,zin lawk kan ngai a,"a ti a,"Khawiah maw?"zawhna mitmenga en kal chung chuan ka ti a,"Thenzawlah,zanin kan riak ang a,naktuk zanah kan lo let leh ang,"a ti a,"Immm,"tih zawngin ka chhang.

"Lo chhuk lawk la, kawngka khu lo khalh la,"a ti a,a kal tak vang chuan a hnungah ka zui a,a trolley bag chu a khai bawk.

A chhuah dawn chuan rawn inherin,"Junior-a te an chawl dawn a...i mu leh dawn nia,"a ti a, kawngkaa a chhuak chu tha taka thlahin kawngkhar chu ka kalh zui a, Thenzawl te chu a hnaih tehlul nen chaw ei khamah te pawh an chhuak ve thei reng a,a la dam kawr si a,ka ngaihtuah khawp mai.

Mut ka kham chiah loh vang chuan inchungah ka chho leh a,ka han mu leh a,ka muhil leh har lo.

Ka bula mu a chet tual tual rual chuan ka harh a,sana ka en chuan dar 8 a lo hnai tawh khawp mai, Kion a tlai ngei ngei ang.

Ka tho sawk sawk a,chu loh lutuk ka bula mi pawh chu chiang deuh hian a lo harh a,thawh ka hai chiang lutuk ka lo muhil nghet deuh a ni.

"Atê,"a rawn ti a,"Bawihte,thawh kan hai alawm,"ka nui tawi tak tak a,"School kan chawl tho alawm,"a rawn ti a,ni tak maw,huiha hai hawt lutuk hi chu aw....

"I theihnghilh a ni maw,"nui ver ver chungin a ti a,"Papa a zin a,"ka lo ti daih thung.

"Khawiah nge a zin a?"a ti a,"Thenzawlah zingah khan an kal a,naktuk zanah an lo haw leh nghal ang,"ka ti a,a hmel chu a ngui ve lup reuh a,a hmaa thil thleng kha a hre ve vek bawk nen a hlauthawng anih ka ring.

"Rawng zu bawl ang hmiang,"a ngawih tak vung vung vang chuan ka ti a,a rawn hawi chhuah chuan ka lo nuih var var a,a hmel chu hmuh a nuam ve ta deuh.

Inhnuaiah kan inpawm thla a,chaw chhum thawkin chawhmeh thing kan chhuang lum a,dar 8 leh a chanve velah chuan kan ei fel leh der tawh.