D'LENMAWI BUNG 13-NA

D'LENMAWI BUNG 13-NA

Ziaktu-Venpuii 

Waiter a kalsan ta maw tihah,"Ka rinhlelh vang khan nizan khan an inah ka va kal a,min hmuh hma khan nutei khan patea bulah,'Ruahmanna a kal tluang chho tan dawn, Rintluanga ber kan thuhnuai tawh a,' a tia min hmuh rual khan sawi zui tawh loin thil dang an sawi daih a,"a ti a,ka ngaihtuahna a buai ta bak mai,'Engtin nge u Rintluanga chu an thu hnuaiah an dah ang?' tih chu ka inzawt a,chhanna erawh ka nei hauh si lo.

"Min hrilh vangin ka lawm e aw,chuan thinglanga ka awm chungchang u Rintluanga I lo hrilh vang pawh khan ka lawm lutuk,"ka ti sep a,a lo nui suk.

"Ka thil tih vang khan ka chan hlen dawn che tih chu ka hre na meuh mai,mahse eng nge tih theih dang ka neih chuan,i nat hian ka na thin si a,chan hlen dawn che mah ila i hlimna anih phawt chuan tih hreh ka nei miah lo ania aw,"ka kutah chuan a hum vang vang a,ka hmui ka pet ngar ngar.

"Tap suh le,thudik hriat tum zawk ang, Rintluanga hi i bula a lo let leh a ngai ania,"tih leh ka mittui ka biangah luang chu a kut chuan a nuai a,nelawm tak hian min nuih zui bawk.

"Ka lawm lutuk ania aw,"a mitah enin tawi tein ka nuih a,"Lawmthu sawi a ngai reng reng lo,hlim deuhin awm la,a tawk a nimai,"a ti a,ka mittui chu hru sawk sawkin,"Eng nge i han awmna chanchin chu?"kan boruak thlak tumin ka ti a,a lo hrethiam aniang,"A nuam a ni mai,a khaw boruak hi a nuam ve reuh a,"a ti ve a,a coffee chu a in zeuh bawk.

Damdawiin kawt thleng min thlahin a tlan liam zui a,kei erawhin u Rintluanga cabin lam ka pan thung, ka va luh chuan u Hriati a lo la awm ve reng a, Feli'n ka thawmhnaw min lo ken sak diam tawh vangin harsatna em em a awm lo.

"Damdawiin a awm chhung chu ka riahpui dawn,"u Hriati'n a lo ti ve khar khar a,Feli'n,"I ek sek anih mai chu,a nupui pawn I ni tawh lo,i lo ngaihsak ve chiam kha a ngai lo,makin lawka a nupui tur a awm ve reng,a riahpui thei,"a lo ti hluk hluk a,'I ek sek' a tih chu kil khatah ka lo nuih dir pui tlawk tlawk thung.

"Nuihzatthlak a awm em?"u Hriati chuan min melh no teh chiam lo,"Ve vak vak a che,saw saw lamah sawn kawngkhar a awm aw,out out out,"Feli'n a ti leh a,ka lo nui phuh thawt a hlau lo mai sia e...

U Hriati chuan u Rintluanga lam chu a hawi a,ani erawh a lo muhil daih a,Feli chu ngam hek lo le, kawngkhar lam a pan nal nal a,Kion lah chuan,"Anih aw anu ek sek,"a lo ti ve khauh a,Feli nen chuan kan lo nuih hak.

U Hriati chu a chhuak rau nghawng nghawng a,Feli chuan,"Hi five!"tih leh a kut chu a rawn dah chhuak a,nui hakin,"Hi five!"ka ti ve a,kan awm dan chu a naupang chhia ang reng.

Dinhlua chungchang chu Feli ka la hrilh duh rih lo a,chhan tha tak a awmin ka ring a,Feli lah a thinrim tawh chuan a ri buan buan tawh thin mai si a,hrilh lohah ka tlak ta tawp.

An kal hunah u Rintluanga chu tha taka zawh ka tum a,mahse an la kal hmel mai rih lo,Feli a tawng tui laklawh tlat.

U Rintluanga muhil a rawn harh thleng pawh chuan an la awm a,kal tawh mahse pawi ka ti lo ka zawt chiang chak zek zek tawh,a rei a reiah,"Kan va haw rih phawt ang nge,"a ti a,inkan hun a zo dawn ruai tawh.

An kal tur chu corridor thleng ka va thlah a,ka let leh lam te chu ka hmanhmawh lutuk a,ka inchhuih leh ang nawk nawk a,a buaithlak thin teh e.

Kawngkhar bulah chuan dingin ka sawi dan tur te chu ka'n practice leh a,thaw halhin ka lut a,khumah chuan thu chungin a mit a lo chhing a,a sirah ka va thu thla ve nghal zat.

Ka thawm a hriat tak vang nge muangchang hian a rawn meng a,ka lo en reng vang chuan a mitko san ukin min en a,ka insum hle hle thei tawh lo.

"I hriatna i hlauh tak tak lo tiraw?"ka ti tawl a,mak ti hmel emaw hmuh ka inbeisei laiin a awm dan ngai chuan a awm reng,"U Rintluang,ka hria alawm,nang hian lem i chang a ni tiraw?"a mitah ka en a,min chhang hauh lo.

"Min chhang teh le,nang hian i hriatna hi i hlauh tak tak lo tiraw?"ka ti leh a,a lu chu thingin,"Enteh ngaihtuahna mak pui pui hi pu lo teh,"a ti a,ka nui hak.

"Dinhlua'n min hrilh vek tawh,u Rintluang,nang hian i hriatna i hlauh lo,a chhan chu eng pawh ni se kei chuan tha tawk tak anih ka ring,mahse ka lakah chuan zep suh aw, khawngaih takin, enteh min hre lo der tawh suh,a hreawm ka ti,"a kutah ka vuan a,min en vang vang a, minute nga dawn chutia kan awm hnu chuan a kut chu a la sawn a,"Duh tawk teh,"tih leh mut that a rual a,min hnung chhawn zui hmiah.

Ka thut ngai chuan ka thu reng a,a la inpuang khawp ang,ka beidawng dawn reng reng lo a chhan ka chhui chhuak bawk ang.

Ka phone rawn ri chu ka la a,Dinhlua anih vang chuan rang deuhin ka la,"Aw,Dinhlu,"bathroom lam pan ka rual a,"Muani,eng nge in chanchin?"a rawn ti a,zep nei lo chuan ka hrilh fai vek a,tih ngaihna vak a hre bik lo.

"A inpuang duh lo anih pawhin patea hi zaninah ka lo hruai tui ang nga,dawp ka lo tum ang aw,"a ti zui a,ka tan hian a van in pe zo tak em aw...

"Dinhlu,I fel ka ti lutuk,i chungah pawh ka lawm,mahse i chhungte'n an hria anih chuan kumkhuaw in hmelmakna pawh a thlen thei ania aw,"ka ti sep sep a,a rawn nui ri suk.

"Muani,i laka ka thil tih sual lakah chuan ka thil tih ve hi chu nep te a ni,natna ka lo pek tawh che let tam taka hlimna pek che hi ka mawhphurhna a ni,lo lungngai suh,"a ti zui a,a thlamuanthlak thin teh e.

"Imm...anih fimkhur takin aw,keiin u Rintluanga hi zawh chian ka lo tum ve chhin dawn nia,"tiin kan inbiakna kan ti tawp a, bathroom atanga ka chhuah chuan a lo thu chhuak ve chiah a,chiang deuh hian min lo en a,ka en duh lo lui hmak.

"Khawnge ka damdawi hi?"

"I sir a kha,"a bula dawhkan chu ka kawk zeuh a,damdawi mum a ei thei lo tih hre reng mah ila ka ngaihthah lui hmiah dawn.Hetia ka tih chhan chu ka awm dan vang hian hreawm ti se,inpuang se ka tih vanga hetia ti hi ka ni.

Min melh rulh rulhna chu haider luiin ka phone chu ka bih ngar a,Kimi'n chanchin min lo zawt a,"Mate, enteh tiang hriatna hlauh hi chu flim-ah ka hmu thin,a tukkhumah khan chhu chawrh la,a hriatna a rawn kir ve mai lo maw,"a rawn tia,ka nui chhuak hawk.

Ka hawi chhuah chuan u Rintluanga chuan chik deuh hian min lo en a,ka nui tawp riai riai...."Khawiah nge fiante?"a rawn tih leh chuan tho tharhin damdawi chu ka lak sak a,"Lo thu rawh,"ti lehin a damdawi tur chu ka buaipui a,ka siam zawh chuan barh mai ka tum a,min en reng vang chuan ka tawp riai riai.

"Ang ta che,"ka tih chuan a mit la sanin a ang a,ka barh pawp a,a inring lo aniang chu...a phuh lo chauh.

"Inbual ka duh,"a tih chuan ka en zawk a,"Naktukah i inbual dawn nia,a vawt tunah a ngai rih lo,"fian dah fel pah chuan ka ti a, engmah a sawi zui tawh lo.

"I lu tuamna kha a dik lo anih kha,"a lu tuamna a khawih zeuh a,"Lo nghak rawh,"tih leh tui lum ka rual a,a lu an thuina kha sil nghal thain ka hria.

Tui lumah chuan chi alin puan var ka la a,a thut dan chu siam rem tir lehin a lu tuamna bandage chu ka phelh a,tha tak chuan a lo dawh ve mai.

Puan chu tuiah chuan thlakin ka sawr fu a,a lu chu dim te te hian ka dep a, doctor-in hnawih tura min tih damdawi chu hmet chhuakin ka hnawih a,a na deuh nge ni a 'Aiah' leh that thin a,ka din viau emaw ka tia,a buaithlak thin teh e.

A lu chu ka tuam sak leh a,"Ka zo,"ka tih rual chuan muangchangin a thu tha hrut hrut a,a che vel chu hmuhnawm thlir tak hian ka lo thlir thung.

Ka lam a rawn hawi a,ka lo en reng vang chu nge, mithmul chuar tap chung hian min en a,ka ner sawk a,a inpuang har tawh ka ti ang reng, a inthup theih dan em em te hi a rapthlak zawk.

"U Rintluang,"ka lam a rawn hawi rual chuan,"Hmangaih i nei ve tawh ngai em?"

"Nei tehreng mai"

"Anih i hmangaih em em chu i theihnghilh theih i ring em?"

"Ngah nge ka theihnghilh ang"

"Anih chuan min lo hmangaih ngai miah lo tihna ani maw...tunah min theihnghilh bawk sia,"tawi tein ka nuih lui a,ani erawhin ka mitah chiang takin min en thung.

"Mahse,I dem awm Chuang miah loh, hmangaih tlak hi ka ni lo ve bawk a,"ka ti leh a,ka thusawi chuan hna a thawk em tih hriat tumin a aia chiang leh zualin ka en bawk.

A mitah chuan eng nge maw a lang a,mahse ka chhiar thiam lo,ka en chik poh leh ka bo thui telh telh ni berin ka hre tawh.

Ka tho nulh a,ka thil lak khawm ho chu ka dah fel leh sawk sawk a, khatiang ka sawi tawh hnu kha chuan a inpuan mai ka ring tawh ania,mahse a sak talh mai,tih dan tur dang ka dap leh ngei ngei a ngai.

Khumah chuan inngaihtuah muk hmel deuh hian a thu a,keiin thu chungin ka lo en reng a,eng tak chu ngaihtuah ang maw.

A ngaihtuahnaah sawn ka awm ve ang em?Rei lo te tal pawh ka tan a rilru saw a seng ve ang em?Ka beisei,ni e,chhan tha tak zawng a awm ngei ang,a sawi duh lo anih pawhin ka zawng chhuak ngei bawk ang.

Kawngkhar rawn in hawngin doctor a rawn lut a, a hnungah nurse-in a rawn zui lut bawk a,u Rintluanga lam an pan zui a,ka lo ding hnai ve vat.

"Rin ai daihin I tha sawt anih hi,naktuk hi in en thla leh ila,naktip lamah chuan in chhuah theih tawh mai ka ring,"doctor chuan a ti dap dap a,a vanneihthlak ang reng,taka ngaihtuahna thar ka nei ta tlat,u Rintluanga hian a hriatna a hlauh lo tih nem nghehna dang kan nei thei,chu pawh he doctor hmang hian.

Nurse nen chuan an inzui chhuak leh a,an chhuah hnu chuan cabin chhung chu a reh hian a reh tlawk tlawk a,muk lutuk hian a inngaihtuah reng a,han biak hmasak chu ka duh rih lo a,kar nana hman ka tumna zel a ni,zep loah chuan biak reng a,a kut vuana a bula awm reng chu ka chak a,mahse...thu dik ka hre duh anih chuan ka insum ve tang tang roh a ngai,hetia a awm chuan phena a thil thup tlat hi ka hriat ngei ngei a ngai.

Damdawiin chaw kan la a,Feli tana lo dah kha an pa a zin bawk nen a buaithlak ve zel a,chu ai chuan kan ei a tlem tho a,a rei tawh lo bawk nen damdawiin chaw ei mai chu kan rawt thlu ta a ni.

Chaw ei lai te chuan min en leh zawk zawk thin tih ka hria a,ka en duh lo lui ngar ngar thung,ka ngaihven a phut ni hmiang a khuh kharh kharh loh leh damdawiin awm a hne tawh thu ngawt chu a sawi a,a awm dan vang chuan ka thil tih a thawk tih hrethiamin ka ngaih a tha sauh sauh a,nuam ka ti veng veng bawk,ti hian a ngaihtuahna hi buai se, inpuang se kan pahnihin ching fel dun ila ka tih vanga hetianga awm hi ka ni.

"Tih danglamna i chang a mi?"a rawn ti ta nge nge a,en zawkin,"Nangpawn tih danglamna i chang ve tho aztu pawh kan danglam thei alawm,"kiai suk chungin ka ti a,a ngaih tha lo hmel chuan ka ngaih dan chu a nem nghet sauh sauh bawk.

"Tu te pawh hian danglam chhan kan nei vek alawm,mitin hi kan hun tawh a zir hian kan danglam thei a...chhan tha tak vang te,kan hmangaihte hlimna tur kan duh vang tein kan inthlak danglam thin,"a ti ve leh a,ka tlawm duh bik lo.

"Kan hmangaihte hriat loha thil kan tiha,kan thil tih vanga an nat si chuan an tan thil tha kan ti a ni thei dawn em ni?Chu ai chuan hyaisen tak leh engkim huama engkim in hrilh tawh hi tha ka ti daih zawk,"ka ti ve thung a,a mit chu a chuar leh nang a,zawi zawiin a pawm chho tan e....

"Khawnge chaw ei khama ka ei tur damdawi kha?"a rawn ti ta daih a,a damdawi ei tur chu ka lo pe ve vat a,a mum a hmuh chuan a ner nawng a,nui sakin,"Khawi lo la rawh ka lo ti ang,"tih leh chhuh ka rual a,min hnial lo chiang khawp mai.

A damdawi chu tih tui sakin ka barh leh thlap a,eng anga damdawi mum te pawh tih tui sak vek a ngai a, han ngaihtuah chian chuan ka nuih a ti za leh tlat thin a,mahse a dem awm hran lo,mi zawng zawng hian hlauh zawng leh theih loh zawng kan nei vek a,a tha mai zel e.