D'LENMAWI BUNG 12-NA
Ziaktu-Venpuii
Doctor-in a sawi dan chuan a hriatna a neih let lehna chance hi a tlem hle niin a sawi a,anih kei hi kumkhuain min theihnghilh dawn tihna em ni?Khang kan hun hlu tak kan lo hman liam ve tak zawng zawng te kha an tham ral mai ang maw?A hriatrengnaah chuan ka cham pha ve tawh lo em ni?Ni e,chhanna pakhat a awm,a hriatrengna cham bang zingah chuan ka tel pha ve lo a ni.
Test result Feli ka hrilh chuan beidawng lo turin min fuih ve sauh sauh a,mahse beidawng lo thei ka ni lo,u Hriati nen an la innei emaw a ti tlat a,a hming a lam reng a,kei min theihnghilh laiin a nupui hlui erawh a theihnghilh ve thei lo a ni.
"Damdawi hi ei lawk rawh aw,"damdawi mum ken va va paha ka tih chuan,"Damdawi mum ka ei thei lo,"min rawn en zawkin a ti a,kha pawh a la theihnghilh chuang lo.
"Lo nghak lawk rawh aw,"tho nawlhin fianteah damdawi chu ka dah a,tui ka telh zui a,a ral hun chu ka nghak ran a,ani erawh a mit a chhing reng a,engtin nge a hriat rengna hi ka neih kir tir leh ang,chu chu ka rilru tibuai em em tu a ni.
Damdawi chu tuiah a ral ta maw tihah a lam chu ka pan a,"Kha le,hei hi ei rawh,"a sirah dingin a hmel chu ka en a, muangchang hian a rawn meng a,a ka a lo an rual chuan damdawi chu ka barh a,kalsan mai ka tum chu,"Hriati leh Kion hi an lo va kal lo ve,"a thil sawi chuan min ti na vawng vawng thei.
"U Hriati nen te chuan in inthen daih tawh alawm,"a mitah ka en kalh a, ngeiawm tak hian a nui a, chu chuan ka thin a ti na zawk thei.
"Tunge i nih ka hre lo, Hriati chu ka nupui alawm,"a ti leh a, ka nui ro hak, ka awih thei lo zawk...
"Min hre lo der nge i ti tak tak,u Rintluang,enteh,i theihnghilh ka ring bik miah lo asin,tinge tiang hian i awm?"ka rilru natna chu ka up beta thei thlawt lo.
"Enteh,i awm dan hi a mak daih zawk,tunge i nih pawh ka hre miah lo ania aw,"a ti zui leh a,ka inpet ruh vak a,sawi zawm tawh lo ila a tha zawk ang.
Tho nulhin bathroom-ah ka lut a, ka ipik lutuk vang chuan ka sam chu ka kek chiam a,ka dinhmunah hian ding ve ta ula engtin nge in tih ang le?Keichuan tih ngaihna ngang ka hre tawh lo,ka beidawng ngawih ngawih ti ila a sual lo ang.
Bathroom-ah chuan engtia rei nge ka awm ka hre lo, hmeichhia ka ni a, hmeichhiaah pawh awm nem tak leh tih nat awl tak mai ka ni a,mahse tiang em em hian ka rilru a nain ka la beidawng ngai lo.
Ka chhuah leh chuan phone a lo en a,be zui loin sofa-ah chuan puanin ka inzial hlΓ»n a, message-in Feli chu chanchin ka hrilh a,tunlai chu kan inbe nasa zualin chanchin kan inhrilh nasa a,kan inbe nasain eng eng emaw rel ve thin mah ila engmah kan rel kaw thei ngai lo,"Hriati hian chanchin a hria ang tih a hlauhawm,"tih chu ka chhiar nawn tluk tluk a,ni e,thil thleng mek hi u Hriati'n a hria anih chuan a rawn che zui ngei ang,chu thil chu keini tluka chiang an awm lo ang.
"Nia,a hriat daih tawh ka ring,tunah hian u Rintluanga'n phone a khawih a,an inbia ang,"tih chu ka thawn a,a rawn type rei khawp mai.
"A hria anih chuan a buaithlak viau ang,a hriat hmaa ka u hian a hriatna a neih leh loh mawlh a hlauhawm, naktukah hian keiman tiffin ka rawn pek theih cheu chuan chinfel kan tum dawn nia,a buaithlak zozai lutuk,kha zan khan lo kaltir lo tawp ila tha tur,lo beidawng lo la,ka lo kal dawn hi, Hriati chu ka duh tawh lo hrim hrim,bakah ka u tan chuan nangmah hi ka duh ber che,"a rawn ti a,a thu rawn thawn chuan ka hah a ti damin min ti thlamuang takzet.
Ka puan kar atang chuan ka dak chhuak a,a phone chu dahin a mu tha sawt sawt a,ka lam chu a rawn en vung vung a,ka en ve reng tih erawh a hriat ka ring lo.
Minute hnih dawn chutia ka lam a hawi hnu chuan a inher riai riai a,ka lam chu a rawn ngaihsak zui tawh lo a,kei erawhin ka puan chu hlimin a tukkhum chu ka en reng a,tunah sawn a la muhil bikin ka ring lo va,a che sek reng miau a ni.
Tunah tak hian eng nge a ngaihtuahnaah awm ang,a ngaihtuahnaah chuan ka tel ve ang em? Second rei lo te tal pawh...ka beisei,mahse ka beiseina chu a chau rau hle thung si.
Naktukah Feli lo kal phawt se,ani a awm chuan tih dan dan a hriat ka ring a,chu chu ka innghahna a ni.
A lam hawi zawng chuan ka mut dan chu ka siam rem a,ka phone chu ka lu chungah dahin puan chuan ka in vur hlΓ»n a,ka mu rem ta maw tihah chuan ani pawh a rawn inher a,ka rin ang ngeiin a la muhil bik lo.
Kan in en reng a,tawngkaa ka hrilh loh tam tak chu ka mitmeng chuan ka hrilh nimaiin ka hria,ka mitmeng hi a chhiar thiam ang em?A thiam lo ang tih mawlh ka hlau.
"A vawt viau em? Puan kha i sin belh duh chuan hei a chung ber hi lo la rawh,a lum lutuk,"a ti a,a thusawi chuan keimahah danglam a siam a,beiseina chau rau tak kha beiseina tharin a rawn thlak a tih theih ang chu.
"Vawt lo ve,ti khan sin rawh,"a mitah tak ka en a,a ngawih zui mai ka rin laiin,"A hreawm viau em?"a ti leh a,ka bangbo deuh,"Eng chu maw?"
"Damdawi ina min awmpui hi a hreawm em?A hreawm chuan sawi hreh lo la,Feli leh Hriati pawh an awm a,an chhawk thei ang che,"a ti a,ka nui ro hak,a zat vang erawh a ni lo chiang khawp mai.
"Damdawi in emaw khawi hmunah pawh awm la,i kianga ka awm dawn phawt chuan khawi hmun mah hreawm a awm lo,mahse maw, hreawm ta ber zawk chu,tunge ka nih I hre miah lo hi a ni,mahse ka beidawng dawn lo,i hriatna I neih let leh nan ka theih tawp ka chhuah ang,"tiin ka chhang a,engmah a sawi zui tawh lo.
A muhil zui a ni ngei ang,a muhil thaw sak sak riin a zui a,kei erawh zan dang ang bawkin ngaihtuahna ka kawm melh melh a,ka meng rei khawp mai,ka mutthilh ve meuh chuan khua chu a var thet thet tawh.
Ka harh leh chuan u Rintluanga mutna lam ka en vat a,a lo ruak hiai mai, bathroom lama thawm ka hriat tak vang chuan bathroom lamah a awm anih ka ring.
Ka puan sin kan en nak chuan puan pakhat hi ka lo sin belh a,rin dan ka nei thiam nghal mai,ni e,min la ngaihtuah ve a ni,tlem tal pawhin.
Bathroom atanga rawn pen chhuak thawm ka hriat rual chuan khi vur vur chungin a lam ka hawi a, ka hmelhmai awm dan a hmuh chuan a phawk tha khawp a,kei erawh ka khi vur vur mai.
"Hmuh tha I hmu bik a mi?"a ti zui reng a,hmuh tha ber ka hmu zawk ti ila a sual lo ang,amah hi ka hmuh tha ber chu ania,tunah hei ka hmaah a din kuk hi.
"Hmu chiang e maw le,"ka khi vur vur a,khum lam chu a pan a,"Vawiinah Feli a lo kal dawn aw,"ka thil sawi vang chuan ka lam chu a rawn hawi zawk a,"Hriati pawh hi bia ila a tha ang,Feli nen chuan inbuai awm sia, Hriati hian min awmpui se a tha ang,"a ti daih a,chu chuan ka mood a thlak hlawk thei.
Chhang zui loin ka puan sin chu ka thlep fel zung zung a, bathroom-ah ka luhsan zui nal nal,'Feli a lo kal tep a, engkim a rawn chingfel ang' tiin ka inhnem tawp tawh.
Ka hmai ka phih zawh chuan ka chhuak leh nghal a,sana ka en chuan ka rin ai daihin a lo tlai tawh,dar 8 a lo pel ti tih tawh.
Inkan hunah chuan Feli leh Kion an rawn kal a, Kion-a hmel a hmuh chuan u Rintluanga pawh a hlim hmel khawp mai,"Eng nge a an?"Feli chuan min rawn kheuh zeuhin a ti sar sar a,ka lu ka thing ringawt.
Kion nen chuan sofa-a kan thu a,phone en chung hian eng eng emaw a sawi siam siam a,u Rintluanga-te pahnih in thut chilh chauh chuan ngaihtuahna a luah thung.
"Tunge saw saw?"u Rintluanga'n a ti sar sar a, thawm ring fal a awm loh vang chuan ka hrechiang khawp a,ka beng chu ngun leh zualin ka chhi bawk.
"E le...i nupui tur maw le,engtin nge maw Hriati theihnghilh chuang hauh si lo va ani ber i theihnghilh theih hi ka hrethiam lo,"Nupui tur a?"
"Aw,nupui tur,tun thla ni 10 hi in inneih hun tura an ruat ania,dam vat vat la,inbuatsaihna hi kal zawm ang u,"Feli'n a ti hnawk hmawk.
"Nupui ka la nei reng alawm,bakah tunge anih leh eng ang mi nge anih tih pawh ka hriat loh hi ka nei dawn lo,"a tih ri chuan min deng dawt dawt a,ka beisei lawk sa mah ni se ka beng ngeiin a hriat takah chuan ka na a ni.
"Hriati-te chuan in pafa aiin ruihhlo a thlang zawk a,Muani hi i tan a tha ber duh tu ania,in pafa hawisan tu chu i la thlang lui fan fan a maw,I fapa ngei pawn a hringtunu aia a thlan zawk chu Muani tho hi,u engtin nge i theihnghilh theih a?..."a aw ah chuan a beidawng vein ka hria.
Chutia kan awm thap lai chuan kawngkhar a rawn in hawng a, u Hriati a rawn pen lut a,hlauh ang ngeiin a thleng anih hmel e.
"Rintluang,"tiin a rawn kuah chung chung a,"Eng nge i rawn tih?"Feli aw ki chu a sang tha khawp a,u Hriati erawhin ngaihsak zui loin u Rintluanga ngawt chu a buaipui a,kil khat atangin ka lo en reng ringawt.
"Zanin chu ka riahpui ang che,"u Hriati a tih rual chuan Feli ka va en zawk a,min rawn en ve chiah,"Lungngai suh,"tih melha min melhin a hawi san a,u Hriati chu rum theih tawp hian a en zui bawk.
"A ngai lo,Muani a awm a,a awmpui leh thei,bakah i hriat kha,ni 10 mai khi an inneih hun ani tawh a,hun thawl te pawh an mamawh ang,"a ti ram hmak a,u Rintluanga chuan mitmeiin Feli chu a lo khap ve thuai a,Feli erawh a ngawi thei meuh lo.
"Ka u hetianga a awm hi i lawm zawk ngawt lo maw?Nge ni a remchanga hman i lo tum sa hrim hrim,ka hrilh ang che,i beisei leh i rin ang khan engmah kan thlen tir lo vang,I duh I thlang a,i duhthlanna chu i hlimpui bawk tur a ni,kan mamawh lo che,bakah ka u tan hian i tha hlawl lo,"a ti zui chiam a,u Rintluanga chu mitmeng pha dai hian u Hriati chuan a en a,tenawm hian..
"Feli,a tawk,Muanpui zanin chu i lo chawl hahdam dawn nia,Hriati hian zanin min riahpui rawh se,"u Rintluanga thil sawi meuh chuan min ti na takzet.
Ngawi rengin ka thu a,ka bula Bawihtea thu pawh chu ka ngaihven tha thei meuh lo,"Muani,lo kal rawh,u,i hriatna i neih let hunah chuan khatiang rilru I pu kha i inchhir khawp ang,Muan,kan pa zin chhung chu ka u inah hian kan risk ho dawn nia,"ti hmawk hmawkin Kion chu a pawm a,a kut rawn phar chhuah chu ka lo vuan vat.
Ni e,u Rintluanga'n kha tianga a tih hnu kha chuan hnial thei ka ni tawh lo,ka tah loh nan ka in hum ruh ngar ngar a,ka insum nasa lutuk a, ka thawk thlengin a sak talh thei nia maw le.
Ka thawmhnaw chu ka bag-ah ka khung sawk sawk a,kan pathum chuan kan inzui chhuak nal nal a, corridor kan thlen chuan Feli nen chuan kan thaw dun kawk kawk a,a thinrim hmel khawp a,keipawh ka thinrim takzet.
"Beidawng lo ang aw,zanin chu tiang khan awm se naktukah kan la chhuak ang nga,a hriatna a neih let leh theih nan kan theih tawp kan chhuah ang,"a ti rum al a, ka lu ka bu ringawt.
Taxi kan la a, Feli-te inah an nufa thawmhnaw la kawiin a fate pawh a nute in atangin kan va hruai a,kei hi ka nu leh pa pawh engmah ka lo la hrilh lo reng reng,an phal chiahin ka ring lo.
"Feli,ka nu leh pa engmah ka hrilh lo,"u Rintluanga in kan thlen hnu chuan ka ti a,"I phone lo la la,ka lo bia ang,"a ti a,han biak tir em chu ka ti ve deuh.
Ka phone chu la chhuak ta thoin keimah zawkin ka pa chu ka call a,chanchin chu engmah hmaih nei loin ka hrilh fai vek a,ka rin loh leh beisei loh deuhin a lo phal hlauh a,ka thla a ti muang huai mai.
Ka biak zawh rual chuan,"A phal em?"a lo ti var a,"Imm phal e,mahse Fel,keichu u Hriati hi a rapthlak si a,thil tha lo pui pui a thlen ka hlau,"ka ti a,ni e,tunah pawh khatiang kha kan ni tawh a,a ai nasa pawh an inhuam viauin ka ring.
"Rilru ti hah duh suh,a hriatrengna atangin bo mah la,a thinlungah i bo chuang lo ang, mihring rilru atang hi chuan min hmangaihtute hi kan thliar thiam lo thin a,mahse kan thinlung chuan dik takin a lo thliar fel diam thin,tu emaw thinlung atanga chhuak hmangaihna chu tu emaw thinlung bawkin a lo dawng sawng thiam thin,tu te pawh hian kan thinlung thu hi zawm ila,nunah hian kan ti sual tam lo nge nge ang,"a ti a,a sawi chu dik ka ti viau mai.
Feli nen chuan inchhungah tih tur tul awm ang ang chu kan ti dun a,titi dang kan han sawi dawn thin a,kan vei ngang aniang chu kan sawi hleithei meuh lo,u Hriati te ah bawk kan tawp leh thin.
Dar 6 velah chaw kan ei a, Kion-te pawn vawiin atangin Christmas vacation an nei a,an chawl hma ka ti ang reng,sawrkar calendar-ah chuan ni 15 bawr hi a ni thin a,anni erawh ni 10 pawh anih hmain an chawl thung.
Midang an mut reh vek tawh hnuah pawh keichu ka la meng kar a,ni e, ngaihtuahnaah thil dang a leng miau lo a,tunah hian eng nge an tih ang tih mawlh mai chuan min kap run reng a,ka hlauthawng a,ka beidawng a,ka mangang bawk.
Phone ka la chhuak a,Dinhlua message lo awm chu ka open thuai a,"Hrilh tur che ka nei,a pawimawh teh ania,"tih chu dar 7 bawra min rawn thawn a ni.
"Eng nge ni ta?"u Hriati ruahmanna hriat a nei anih ka ring deuh,a fel ve riau na chu a chhungte ngawih ngawih ai pawha ka thatna a ngai pawimawh hi a ni.
A rawn seen rang khawp a,a rawn type rei lo,"Naktukah kan inhmu dawn nia,kan inhmuh thinnaah khan,i hriat ngei ngei a ngai,"a rawn ti leh a,eng thil emaw hriat chu a nei chiang alawm.
"Tunah a sawi theih loh em ni?"ka hre chak tawh lutuk ringawt,ka hriat ngei ngei ngai anih chuan u Hriati-te chanchin bak anih ka ring lo.
"A thui lutuk,hmai chhanah kan sawi dawn nia,mu phawt la,naktukah dar 10-ah a ngaiah kan inhmu ang,"a ti a,a hnua ka thil thawn leh pawh chu a enzui tawh lo reng reng.
Helh kam nei runa mut chu hreawm tak a ni,ka in let tawn sek a,ka bula Bawihtea mu chu ka en leh ringawt thin a, ka ipik lutuk chu Pathian hnena in kawltir tumin ka tawngtai a,ka han tawngtai zo chu thil rit tak nena kal thin a phur an laksak tak ang ruakin ka in chan a,ka zang vek miau a ni.
Ka ngaihtuahna te chuan min kian san ruai ruai a,ka mit ka chhing a,ka ri hriatna an chawl duk a,eng helh nei lo ang ka muhil ta siai siai a.
"AtΓͺ,"chu ri chu ka hriat hmasak ber a ni,ka mit chu ka meng siar siar a,ka ham zui bai bai,"Good morning AtΓͺ,"a lo ti var a,a hmui chu fawh sak zeuhin ,"Morning Bawihte,tho ang le,"tih leh pawm thawh ka rual a,kan mutna chuarte chu pawt mar lehin kan rizai sin ka thlep a, inhnuaiah kan in pawm thla zui bawk.
Feli-te nufa chu an lo tho diam tawh a,nizan ka meng rei deuh a,ka inthiam lo takzet.
"Lo thu rawh,thingpui ka lo siam ang che,"hmel hlim sarh hian a lo ti a,dawhkan kil chuan ka thu thla a,naupang ho erawh sitting room lamah an infiam thung.
"Vawiin chu damdawi inah kal ang aw,Hriati kan chhuah tur dawn nia,"thingpui no min rawn pek pahin ka bulah a rawn thu thla zui a,Dinhlua chungchang erawh ka la hrilh duh rih lo.
"Aw,mahse damdawi ina in awm chhungin khawiah emaw kalna tur ka nei lawk dawn a,"ka ti a,ka kalna tur min zawh ka hlauh em em laiin min zawt lo hlauh a,a vanneihthlak ang reng.
"Anih chuan hei rawngbawl ka peih tawh a,naupang ho saw kan siam ang nga,Kion nen thlah pahin damdawi inah kan kal ang nga,nang I kalna turah kal hmasa la,i lo let leh lamah i lo kir ve mai ang nga,"a ti zui zat zat a,a tha viauin ka ring.
"Nia aw le,"ti a chhangin ani pawh a fate siam turin a tho chhuak zui a,kei erawh thingpui in chungin phone ka khawih a,Dinhlua message ka chang a ni mah ang chu,mahse chaw kan ei kham hnu thleng pawh chuan a message reng reng ka la dawng lo.
Kan ruahman ang chuan Dinhlua nena tunhmaa kan inhmuhna thin lam chu ka pan a,a thil sawi tur mawlh chuan min mawlh a,cafe ka thlen pawh chuan a lo la awm lo, dar 10:00 a.m. a inhmuh in tiam kha tunah dar 9:30a.m. a pel awrh a,ka thleng hma ve bawk a ni.
Rei ka nghak lem lo, dawr chhungah chuan a rawn pen lut zan zan a,min rawn hmuh rual chuan min rawn pan chat a,ka hmaah a rawn thu thla zui bawk.
"Eng nge i sawi duh chu?"ka hre chak tawh lutuk chu ka in thunun thei ngang lo,waiter chu hui zeuhin thil a chah mial mial a, waiter a kal leh hnu chuan min rawn en a,a aw a thian kharh kharh a,keiin zawhna mitmengin ka lo en ran tawh thung.
"Ka thil hrilh tur che hi ngun takin ngaithla la,ka hrilh zawhah che chuan hma i la dawn nia,"a ti a,ka beng chu ka chhi ran tawh.
"Hmaniah i nuhrawn leh u Hriati nu inbe lai ka hmu a,"a ti a,ka rin loh lam daih a nih vang chuan han sawi mai tur ka hre lo,"In thurualna an nei tlatin ka ring,"a ti leh a,"Engtikin maw?"a inngaihtuah vang vang hnuah,"Rintluanga chetsual hma ni hnih vel a la awm tihah khan,chawlh ka lak vangin he lamah ka hna thawhna atangin ka rawn chhuk a, thingpui dawr pakhatah hian an lo inhmu a,ka ngaih an ti tha chiah lo,"a ti leh a,ka nu chuan eng nge maw a tih ang le...
"I hmu sual a ni lo maw?"
"Keipawn a tir kha chuan ka hmu sual anih ka ring a,mahse ka motor kha ka park a, ka va en chiang a,an mahni ngei an ni alawm,"a ti a,ka ngaihtuahna a buai map mai,ka nu'n engmah a sawi lo va,eng nge an pahnih chuan an tih dun ang.
"Eng nge an tih ang le?"
"Ka hre lo le,enteh ka rin dan chuan maw Rintluanga hian a hriatna a hlauh ka ring miah lo,"a ti zui leh a,min tibuai telh telh mai.
"Hriat i nei em ni?Sawi chiang la,min tibuai telh telh ania,"ka lo tih chuan thu thain tawng tumin a ka a ang zuau a,kan thil chah a rawn thlen tak vang chuan a ngawi leh rih.