D'LENMAWI BUNG 10-NA

D'LENMAWI BUNG 10-NA

Ziaktu-Venpuii 

U Rintluanga chu ka en zawk a,"I chhungte a mi?"ka lu ka bu zeuh a,"La rawh,"a tih chuan ka la a,"Bawihi, eng nge awmzia?"a rawn ti nghal pang mai.

"Pa,ih maw,nimin tlai atang tawhin ngeiawm deuh deuh khan min tawngkhum a,ka nu chungchang te a sawi a, chuan kut te min thlak a,zanin khan ka room-a ka awm laiin an pawisa ru ah min puh a, an fapa khan a bike siam tir nan a lo hmang a,an hriat tawh hnu pawh khan nu Thani khan min la kek a,"ka ti a,u Rintluanga a rawn hawi vat.

"Anih chu, Rintluanga a lo kal a maw?"a rawn ti leh chuar chuar a,"Aw,"a bak han sawi chuan tur ka hre tawh lo.

"I nu Thani chuan I nu a rawn bia a,'Min beng' a ti che a,I beng a mi?"

"Aw,ka thinrim lutuk a,ka insum hman tawh lo a,"ka hnuk a ulh lek lek a,ka thaw leh hak thin,"An thiam emaw thiam lo emaw aia upa chu zah tur asin,lo haw phawt la,"a ti dam dap a,kan ngawih dun vang vang hnuah,"I nu pawh hei a lungawi chiah lo a,"a ti a,ka rin dan chiah a ni.

"Imm,nia,ka lo haw phawt ang nga,"ti a dah mai ka tum chu,"Ka lo be ve lawk,"u Rintluanga'n a rawn tih tak si vangin ka pa chu,"U Rintluanga'n a be duh che,"tih leh u Rintluanga phone pek ka rual a,a lo ban vat.

"Aw,pa Siam, Bawihpuii hi kan in lama hruai haw ka lo rilruk deuh a,eng nge i ngaih dan?Bawiha hian a ngai ve tho bawk sia,"a ti a,ka pa tawng erawh ka hre thei lo.

"Kha lam kha chu ngaihtuah buai duh suh u,neih ka tum leh tawh lo,in phal anih phei chuan neih ka duh a,"min rawn en zawkin a ti a,keipawh ka hamhaih lutuk.

"Ni e,duh leh zanin chu kan inah awm se,naktuk zing lamah ka hna kal pahin ka rawn dah mai ang nga,"a ti leh a,an in be fel thei aniang an dah zui a,ka phone min rawn pek chuan,"Engtin nge thil thleng zawng zawng kha i hriat a?"ka lo ti a,tawi tea min nuihin,"Dinhlua'n min rawn bia alawm,"a tia ka hamhaih viau laiin Dinhlua chungah chuan ka lawm takzet.

"Muhil rawh kan la tlan rei dawn ania,"a ti a,thu awih tak chuan ka mit ka chhing a,ka kut chu a hum ran a,min rawn en leh zeuh zeuh thin tih chu ka hmai za mer mer chuan a ti chiang hle a ni.

Ka lo muhil a,u Rintluanga'n min koh tak vang chuan ka harh zawk a,a lam ka hawi rual chuan,"Kan thleng tawh a mi?"ka ti a,"Aizawl kan lut dawn a, Bawihtea hi Feli-te bulah a awm a,hruai kawi lawk ang aw,"a ti dam diai a,"Aw le,"min chhang zui loin ka kut a humna chu a hmer nghet salh a,a hmuh loh lamah chuan khi nasa tak ka ni.

U Rintluanga phone chu a rawn ri a,a phone a en rual chuan a ner nawk a,ka va thlek chuan min rawn enin,"Hriati nu,"a ti bul hmuk a,a laka ka thil sawi kha ka ngaihtuah zui rauh rauh,nuam lo ka tih viau laiin kan inhnem leh rih a,ka awm dan chu khawlh kham tak a ni.

"La ta che,"a ipte-a dah leh mai a tum vang chuan ka ti a,min hnial zet nain ka nawr luih tak tkatah chuan a phone chu lak chhuah a tum leh a,a lo tawp hman vang chuan a che lai a tawp leh ruai ruai,tawng tuma a ang zuai chu a phone rawn ri leh chuan a pawt chat a,"Hello,"a lak rual chuan a ti a,a aw chu a nelawm fahran lo khawp mai.

"Ngaihtuah viau si te chu eng vangin nge in thlah fal,"a ti a,lehlama mi tawng chu ka hre thei lo,"Ka pi ka zah viau na chein I fanu hi beiseina siam ka duh lo, tin lo hria la neih leh ka tum tawh lo, Bawihpuii i lo tih dan zawng zawng pawh ka hre vek tawh tih hre rawh,kei leh I fanu inkar tawp chhan chu I fanu a ni tih theihnghilh suh,kan nun ngaiah kan let tawh lo ang,"a ti nghet charh a,ka tih ngaihna hre lo chuan ka en tlawk tlawk ringawt.

"Ka ngai pawimawh lo,vawi tam tak ka en liam a,ka hmangaih vangin ka dawh a,tunah chuan ka thei tawh bik lo,dawhtheih chin ka nei,chuan thil pakhat,ka mumal nunah hian rawn in rawlh tawh suh u,tin Bawihpuii leh Kion lakah pawh,"a ti a,a dah zui daih.

"Eng ngati nge a?"ka lo tih chuan a rawn hawi vat a,"Eng lo,"a ti ban charh a,a car khalh lai chu a ding a,keiin chhanna beiseiin ka lo en ran thung.

"Hriati ania, bathroom-ah a awm a,a chhuak duh lo a ni awm e"

"Chuan..."

"Kal turin min ti a,"a ti leh a,"I kal dawn lo a mi?"ka tih chuan min rawn en vut a,a lu a thing ka hmuh chuan keimahah in thiam lohna a rawn awm a,nuam ka ti miah lo.

"Va kal rawh,keichu kan inah min dah la,a rilru a lian si a,thil tha lo a tih te pawh a hlauhawm alawm,"ka lo tih chuan a lu a thing nar nar a,"Va kal rawh,keimah vang te a ni em?"ka ti a,"Ni lo e,ka hmu peih lo,"a ti liam puat a, hawi san mai a tum chu a biangah ka dawm a,a mitah tak ka en bawk.

"Dawt sawi suh,i rilru a nuam bik lo tih ka hria,u Rintluang, khawngaih takin keimah vang chuan tiang hian awm duh suh,"ka ti a,a thaw hak ringawt.

"Nangmah vang chu ni lo e,hmuh hmuh hi ka peih lo,beiseina siam leh ka hlau,"a ti nghet charh a,tih ngaihna ka hre tawh lo.

Ka kut dah thlaa ka hawi san tak vang chuan a inthiam lo deuh aniang,"Kal kher chu i duh a mi?"a rawn ti a,a lam hawiin,"Kal rawh,a nunna pawn a tuar phah thei,"ka lo ti a,"Kan pahnihin kan kal dawn nia,"a tia chi loh lutuk chu loh lutuk.

"A tih chi nang,keimah vangin tiang hian a awm a,kei ka rawn in lan veleh zel ten a na thar mai mai ang,"ka lo ti a,a lu a thing nawk nawk mai.

"Ka kal I duh anih chuan lo kal ve rawh, keimahah beisei awm a awm tawh lo tih hi hre law law zawk rawh se,"a ti a,ka hnial tang tang pawn a sawt lo khawp a,a tawpah phei chuan hreh deuh chungin aw ka pawh ve ta rawih kha a nia,rilru a nuam duh lo khawp a,u Rintluanga'n Feli chanchin a hrilh lai te chuan ka lo in hum ruh leh chuan thin a,awmzia a nei thui lo khawp mai.

"Khawiah nge an ka awm, damdawi inah nge an mahni inah?"

"An inah,"a lo ti a, ka in hum ruh leh chiam thin a,ka kut pawh ka hum thlan dap tawh.

"Huphurh lutuk duh suh i bulah ka awm dawn alawm,tu man engtin mah an ti tawh lo ang che,"car a din rual chuan a ti dap dap a,a thusawi chuan thla a ti muang hliah hliah mai, tawi tein ka nuih a,"Kal ang le,"ka biangah a fawp zeuh a,car atanga a chhuah rual chuan ka chhuak ve thuai bawk.

Ka bul chêtah a rawn ding a,ka kut thlasik khaw vawtin a hmeh vawh var chu a kut phah lian leh lum tak chuan a rawn hum a,hum letin kan hmaa in lian tak ding run chu ka en a,a kut ka hum ngheh telh telh vang vang chuan a hrethiam tih hriat takin ka darah a rawn vuan zui a,in lam chu min panpui pah bawk.

Door bell chu a hmet a,a hmeh hun a chang emaw tih mai tur khawpa rangin u Hriati nu chuan nui sangin a rawn hawng a, u Rintluanga bula ka ding a hmuh rual chuan chawp leh chilhin a nui hmel a bo zui hmak.

Kan in kaihna a hmuh leh lek phei chuan a puak pawp ang tih hlauhawm tak a ni,"Rintluang,lo lut rawh,"a ti a, ka tawi hrat hrat vang chuan u Rintluanga chu rawn hawi zawkin,"Lut ang le,"dam thluam hian a ti a,u Hriati nu hmel chuan luh min ti hreh zo a ni ber.

Muang changin u Rintluanga chu ka zui lut a,"Khawiah nge a awm?"u Rintluanga aw ki chuan lungawi lo aw ki a pawl mah ang.

"Inchung lamah,min lo zui ru,"min rawn nek deuh sawk a, u Rintluanga a phun hluk a,u Hriati nu chu a rawn hawi zawk a, engmah sawi loin a pen zui hmawk hmawk a,a nuam lo duh khawp mai.

Room pakhatah hian a lut a,kan zui luh rual chuan u Hriati pa leh mipa pakhat hian kawngka chu hawn an lo tum a,kan lut min hmuh rual chuan u Hriati pa chu a rawn pen hnai a,u Rintluanga chu a rawn beng thawr a,ka lo te that.

"Nangmah ni vanga ka fanu tawrhna saw I hmu em?Mihring in ni em?"a ti tuar tuar a, ka in thiam lo ngawih ngawih tawh.

"Nang pawh, hmeichhia i nia,i hmeichhepui natna pawh I hmu thei lo a maw,I va han zahpui awm ve,mi tana buaina thlen tur hian em ni i nu leh pate'n an chawi len che?"a ti a,u Rintluanga a lo rum nghut a,u Hriati pa chu rum deuh hian a en a,tawng leh a tum chiah chu u Rintluanga'n a lo tawng khalh a.

"Kan hmu peih bik zawk zawk lo che u,min rawn biak vang chauha rawn kal kan ni,chuan hei hi hria la, vawng bawk rawh, Bawihpuii hi i duh a i tawng khum mai mai tur a ni lo,chuan... nichina i thu sawi zawng zawng kha kan sawi tur ni awm zawk tak niin ka hria,in chhungkua hian kan chhungkaw nunah lo in rawlh tawh suh u,tuna chinah chuan min rawn tibuai tawh lo ula,in fanu hi in lo control bawk dawn nia,"min kuah kal a rual zui a,pawn lam min panpui pawk pawk bawk.

Pawn kan chhuah rual chuan engmah sawi loin min kuah vawng vawng a,a banah chuan ka bek nghatin ka mit ka chhing a,a kawngah chuan kuah letin a hnungah ka ben sak thak thak a, engtia tih tur ber nge ka hre miau lo a tin ni.

"U Rintluang,I tha em?"

"Imm...tha tehreng e"

A in la hrang a,ka biangah a kut khing khat chuan a dawm ta ran a,ka en reng lai chuan a rawn kun hniam a, ka hmuiah a fawp a,ka ding khawng awt reng ringawt.

A in lak hran leh rual chuan lungawi hliah hliah hmel hian min han en zui a,nuam ve duh tak a ni.

"Kal tawh ila,Kion pawh lam kan la ngaih kha,"ka tih chuan,"Ni tak,aw,kal ang le,"a ti a,car chhungah chuan lutin Feli-te in lam kan pan zui a,kawng tluan chuan an naupan lai chanchin a sawi a,ka nuih pui leh hak thin.

"Kan thleng e,va hruai ang hmiang,a phur khawp ang,engmah ka hrilh duh lem lo va,"a rawn tih chuan,"A la na viau em?"ka ti zuai raih a,"Aw,i kal bo tih kha chu a hre lo va,mahse biak theih loha i awm khan kan ngaih i ti tha lo a,in inah ka kal a,i tlan chhuah daih thu chiah kha an sawi a,chuan Laldinhlua kha a tangkai ta em em a,"a ti a,tawi tein ka lo nuih a.

Nimin mai kha chuan tiang a thlen rin ngaihna pawh hi ka nei lo kha ania,tunah chuan a danglam tawh khawp mai,kan nuna kan lo thu loh zia hi chu aw....thil hi a in lum let kual tawp tawp tih hi mihring nun ka hrilhfiah thiam dan ber a ni....

"Chhuk ila,"a rawn tih leh takah chuan kawngkhar chu ka hawng a, ka chhuah ruala rawn chhuak lehin varanda kan pan zui a,Kion hmel hmuh hlan mawlh a ni ka nghakhlelh ni.

Door bell chu a hmeh hmain keimah zawkin ka lo hmeh khalh a,an rawn hawng mai lo,"Ka hmet nawn leh dawn,"a lam hawi chunga ka tih chuan a lu a lo bu nghat a, hmeh leh ka tum lai takin Feli'n a rawn hawng a,keini pahnih lo ding min hmuh rual chuan a nui var var.

"Kan lo nghak char char cheu alawm, bengchheng rih su,Kion engmah ka la hrilh lo ania, surprise ang u,a lawm dawn emai,"a ti zung zung a,"Engtin?"ka lo ti var a, sitting room lam ni awm taka a tawng ri lung lung pawh hre chiang tawh tak ka ni.

"Ti khan lo awm la,a pa chiah hi lo lut se,nang hetah lo awm la,a pa hian car-ah thli theihnghilh nei angin in sawi se,ka u hian a tur ang nga,kawngkaah hian i lo ding dawn nia,"a ti zung zung a,u Rintluanga nen chuan in zui lutin kawngkhar chu an khar zui bawk.

Inchhung lama an tawng chu ka ngaithla ran a,an nursery rhymes play a ring tha bawk si a,ka hre thei mai lo,"Khawiah maw i dah?"Kion-an a tih rual chuan ka awm dan siam remin ka lo ding tha sawk sawk a, kawngkhar a rawn in hawng a,Kion ngei mai chu a rawn chhuak a,a rawn hawi chhuakin min hmuh chuan a pen lai a chawl dat a,nui sen sen chung hian,"Atê,"a ti a,ka kawngah a rawn kuah bet chawih a,a lu-ah ka lo chul sak a,a tap lek lek.

"Papa,Nini, Atê-i a lo kal ania,"a ti a,a au lung lung a,ka lam rawn hawi lehin,"Papa nen lo buai che kan tum a,i la thei lo a,I lo haw tawh dawn a mi?"beiseinaa khat mitmenga min en chung hian a ti a,chhan dan tur ka hrethiam chiah lo.

Chhan tuma ka ka ka an zuau zuau lai chuan,"Junior, Atê-i hi i Mama ni turin i duh em?"u Rintluanga'n kan lama rawn pen phei pahin a ti a,a bul lawkah Feli a rawn kal ve bawk si a,ka lo ip chawih thei.

"Eh!"ka hamhaih lutuk sawi tur hre bawk si lo chuan ka ti ringawt a,"Nia,ti ve rup ru,"Feli'n a rawn ti a,ka awih thei lo,u Rintluanga hian a lo sawi vek tawh zawk em maw ni.

"Mama turin maw?"Kion chuan a lo ti a, ka en chuan a rawn hawi chho a,"Aw,Mama atan I duh em?"a pa'n a lo ti leh a,"Ka Mama i ni duh a mi?"a lo ti let daih thung a,a hmai zawnah chuan ka kun hniam a,a bianga fawh sakin,"I duh chuan keichuan ka duh a, mahse, Bawihte i duh loh chuan sawi hreh suh aw,"a biangah ka chul a, ka kut chu lo manin ka biangah a rawn dawm let ve ran a,ka biangah rawn dawm vein,"Mama,"ka hmui sirah chuan a rawn fawp a, ka lo nuih var var.

"Le!le!le! Muani lo lut ula,thingpui te in ang u,"Feli'n a rawn ti a,harh zawkin Kion chu ka pawm kang a,inchhungah kan in zui lut a, sitting room lam an pan vang chuan ka zui ve a, sitting room-ah chuan Feli pasal leh a fate pahnih an lo awm a,kan va lut chu min lo be ve sawk sawk a,u Rintluanga nen chuan an titi a ni mah.

Feli choka lama a kal chu ka zui ve thuai a,chokaa kan luh rual rualin,"U Hriati-te khan eng nge an lo tih a?Ka u hmai saw a sen vek a,"a ti a,u Hriati pain a benna kha anih ka ring.

"A nu khan min lo bia a,ka va kal tel ve kha an lawm lo lutuk a,a pa khan u Rintluanga kha a beng a,"inthlahrung ang reng deuha ka tih chuan a chek tlat tlat a,"An va han sual tak,enteh u Hriati nu leh pa ten engtin emaw an lo ti leh che anih chuan min hrilh hreh miah suh aw,ka thin an ti rim tlat,i awm ti nuam lo rauh rauh tur thil an sawi pawn bengkhawn duh miah suh,min hrilh zel dawn nia,i rilru a tha sia I lo nem ringawt ang nge,ka u hi chuan a nei tawh dawn lo bur tih hria la bakah keipawn ka duhpui tawh lo hrim hrim, a rang thei ang berin innei ula,"a ti a, min rawn enin nelawm fahran hian min han nuih zui a,a nelawm tih piah lam a ni.

"Ka lo lan hmain tiang hian u Hriati hi a awm tawh ngai em?"min rawn en zawkin,"Tehreng tehreng an duat khaw lo tawh a,ka u hi an rawn zuam chhungkua bawk sia maw a buaithlak thei lutuk an rawn vo nasa thei bawk sia, ka u pawh khan a ngaidam ngun lutuk mahse a sim thei chuang lo,a duh hun hunah a riak chhuak a,ka u a zin lai pawn Kion-a mutthilh lai te khan a lo chhuah san thin a,"a ti leh a,Kion chu ka khawngaih takzet,amah chauh leh nghalin naupang tê leh nghal mahni chauha awm turin engtin nge a hringtunu leh nghalin a riah chhuah san theih zawk ni.

"Ka hmuh dan dik tak ka sawi ang aw,"ka lo bu zeuh a,thingpui thlit pahin,"Zep loah chuan u Hriati ai chuan Kion hi i hmangaih daih zawk,tin Kion pawh hian a let tam takin a nu aiin a pawh zawk che a,a hmangaih zawk bawk chein ka hria,"a ti a,nui chungin,"Eng anga ni khua lo pawh ni se fate tan chuan nu hi an pawimawh em a,a ni thei lo ang,Kion hrim hrim hi chuan min ngainaa,"ka tih lai mekin a lu a rawn thing a,zawhna mitmenga ka lo en chuan,"Ka bulah a sawi alawm,"a ti a,"Tuin maw?"ka lo ti let ve zat.

"Kion hian,'Mama ai chuan Atê-i ka duh zawk' atia lawm,"a lo ti a,he naupangin he ti taka min ngaina leh min en hrang lo mai hian min ti hlim thin takzet.

"Ka zo e,"a rawn tih leh takah chuan thingpui chu kan keng phei a,Feli fate chu sofa-ah chuan an lo muhil tui tawh mai a,Kion pawh a pa'n a lo pawm a,a lo muhil tui tawh nasa mai,a thlamuan hmel hliah hliahin ka hria.

Feli-te in atang pawh chuan kan haw har khawp mai,eng eng emaw kan sawi luam a,Feli chu a thinrim a reh thei meuh lo,a rawn ri leh hlut thin a,a unaupa an lo ben vang chuan a lawm lo hle a ni.

In kan thlen meuh chuan dar 12 a ri dawn ruai tawh a,khaw muang tawh loin ka room hluiah chuan Kion chu ka luhpui a, kawngkhar vel chu u Rintluanga'n,"Ka lo en fel mai ang,lo han mu rawh u,"a tih teh tlat vangin a tih turah ka dah deuh tawp.

Ka mut hma chuan Pathian hnenah ka tawngtai a,ka mut thlak rual chuan Kion chu a rawn tawlh hnai sawt sawt a,ka lo kuah vat,tunah chuan hlauh leh hreh tur chuang ka neiin ka hre tawh lo,ka bulah an pafain an awm a,ka duh tawk viau tawh a ni.

Ka muhil ka harh leh chuan khua a lo eng ut tawh a, inhnuaiah chhukin rawng ka zuk bawl rawk rawk a,a hma tawh tlat lo miau a ni,an pafaa an tlai te pawh a hlauhawm tunah dar 9 a hnai thuak tawh, nizan khan kan mu tlai si a,kei tak pawn thawh ka lo hai let tawp a ni.

Inchungah ka tlan chho a,u Rintluanga room pawh chu kik buai tawh loin ka tlan lut thawr a,a lo la muttui khawp mai.

"U Rintluang,"ka sawi nawk nawk a,a rawn thut chhuah rualin,"Dar 9 a ri dawn ania,hna kal i ngai lo a mi?"ka lo ti a,a in ngaihtuah vang vang hnuah,"Vawiin chu sawrkar chawlh a ni lo a mi?"a rawn ti a,a room banga calendar ka va en nak chuan a lo sen kalh a,sawrkar chawlh ngei a ni.

"Awii! ka lo hre reng reng lo,a van zia lo e...kha i muhil tui lai ka la sawi tho zui che a,"ka ti lawi rût a,a nuam lo tih piah lam a ni.

"A pawi lo,thawh a hun tawh hrim hrim alawm,"rawn thut chhuah pahin a ti a, ka nui dang sâwp sâwpin ka ring tlat.

"Tihpalh lutuk,"tih leh kal chhuah ka rual a, ka inthlahrung ngawih ngawih,a zia loh dan kha zia lo na mai a ni lo tlat a ni,keimah vangin thui tak car a khalh a la ngai zui a,mut a mamawh dawn tehlul nen kei lahin a thlarau thlengin ka sawi chhuah sak lo chauh chu a ni vei tak sia....

Inhnuaiah chhukin inchhung ka ti fai a,banga frame te chu hru faiin t.v. stand leh dawhkan te chu ka hru a,chokaa luh ka tum leh lai mekin u Rintluanga-te pafa pawh inchung atangin an rawn in pawm thla a,"Ka ril a tam,"Bawihtea'n a rawn ti thla nuah nuah a,a lu chu a thur leh bum tawh a,a la phak tha bawk aniang a meng ban charh a,"Chaw kan ei mai dawn a mi?"rawn ti tiha u Rintluanga ka en chuan nui suk chung hian a lo bu nghut a,hmuh nuam tak zawng a ni.

Chokaah chuan kan inzui lut a,an pafa chuan an theih ang angin min lo pui ve a,kan ri le lu mai a,hlimawm tih piah lam a ni,"Kan thlah rual chein I pa chu sawi pui ila a tha ang a..."dawhkan kila chaw kan ei laiin u Rintluanga'n a ti a,ka thil ei lai ka hak thawt a,taka hei hi sawi that kan ngai.

"U Rintluang,ka hnarnaah che ngai lo la,ka lamah phei chuan engmah harsatna ka nei lo a,mahse in pafa hian in inchhir ka hlau a,in mit ka tlun loh pawh ka hlau a,chu mai bakah kei chu ti mai hi ka ni a,sum leh pai ka nei lo a, hmelah lah midang anga chhuan tur lah ka nei hek lo,in ngaihtuah tha la ka duh,"ka tih chuan min rawn en zawk a,Kion erawh a kham tawh vangin sitting room lamah a awm thung.

"Inchhir lo ang,Bawihpui hei hi hria la ka duh, Hriati kha chu tiang mai kha a ni a, mihring ve tho ka nih vangin ka fapa min hmangaih pui thei tu tur leh Kion pawhin a pawh em em ka hmu anih chuan neih ngei pawh ka tum nghet hmiah a,mahse nang chuan ka lo zawn thin ang chu i khum zak ti ila ka sawi sual lo ang,a hringtunu ngei ai pawha a hmangaih zawk I ni miau a,nangpawn i hmangaih a,keipawn in pahnih hian ka hmangaih che u,i nihnaah ka buai lo,kei chuan tiang tawp pawh hian neih che ka hnial lo ania,ka nawr che anih chuan min hrethiam rawh,"a ti dap dap a,a mitah tak ka lo en ran thung.

Chutah rawn sawi zawm lehin,"Hun I mamawh anih chuan ka nghak ang che, mahse nghah thlawn che ka tum miah lo ania,"a nui pah suk a, ka thaw huai huaiin ka hria,a chhan leh a vang erawh he mihring ka hmaa mipa hmangaihna leh hriatthiamna ngah lutuk vang hi a ni.

"Min nawr lo ania,min nei duh anih phawt chuan hnialna eih ka nei lo ania,ka pa chu be chhin reng reng la,"ka ti ve ta a,a phur hmel chu hmuh nuam tak a ni.

Chaw ei kham chuan khaw muang tawh loin kan in lama phei turin kan in buatsaih a, ka let leh mai ka rin tawh chiah loh vangin ka thawmhnaw ka haw dawna wardrobe-a ka dah thenkhat chu ka khung belh a,dar 10 pelh hnuah kan chhuak ve thei chauh.

Motor-a kan chuan laiin Kion chuan an school chungchang a sawi mual mual a,kg I chauh a la nih vangin 2nd Term emax an nei lo va,1st leh promotion a ni deuh tawp mai.

"Kan thleng e,"u Rintluanga'n a tih takah chuan Kion pawm chungin car atang chuan ka chhuak a,anin kan hnungah ka bungrua nen min zui thung a,an reh khawp mai.

Kawngkhar in khar chu ka kik karh karh a,rei loah actress-in min lo hmu a,a unaunu kut ka thlak vang ni hmiang min melh no zawk zawk lo,"Lo lut ru,"tih leh in her a rual a,a aw ka chu bung tha tak a ni.

"Lut ila,"u Rintluanga en chunga ka tih chuan ka kal hun ngaichang tih hriat takin min lo en a,keipawh lut zuiin ka pa ka zawng a,thingpui in chugin a ma sofa bikah chuan lehkhabu a lo chhuak a, lehkhabu chhiar hi nuam a ti bawk a,a hun awl apiangah hi chuan a chhiar ngei ngei ti ila a dik ang.

"Pa"

A rawn hawi chhuakin min hmuh chuan a rawn ding vut a,min thlek kual dan dan hnuah,"Engtin nge Thani chuan a lo tih che Bawihte?Sawi teh,"a ti leh a,a mitmeng dam dap kara natna chu ka hmuh hmaih lo,"Engtin mah ti lo ve,"a rilru hah taka siam ka duh lo.

"Rintluang,lo thu ru,"u Rintluanga-te a hmuh rual chuan a ti sawk sawk a,a lehkhabu chhiar lai pawh chu chhiar zawm tawh loin a thutna sir a dawhkanah chuan a tarmit nen a dah thla a,a ep chiah sofa-ah chuan kan pathumin kan thu a,Kion ka pawm a,u Rintluanga erawh ka bul setah a thu thung.

"Pa, Bz-i chu tunah eng nge a dinhmun?"u Rintluanga'n min rawn kheuh zeuh takah chuan kalsan a ngai tih hrethiam in ka ti a,"A room-ah a awm,thil pawh tlem tlemin a ei ve thei zel e,ani pawh lehkhabu chhiar a atchilh deuh nge ni, lehkhabu a in chhawp nghek nghek reng mai a,"a lo ti a,tho nawlhin,"Bawihte,a pa leh a pu hi lo inkawm se,keini chu miss Bz-i bulah kal lawk ang aw,"tiin Kion chu ka thlem a, naupang fel tawp khawk a ni bawk a,a lo phur viau mai.

U Rintluanga chu en zawkin,"Ka va en lawk,lo inkawm ru,"te chu ka'n ti ve sa sawi a, a lo buk tak nghatah chuan Kion nen chuan Bz-i room lam kan pan a,u Rintluanga'n aw a thian kharh kharh tih pawh chu ka la hre thei.

Ngaih ven zui loin Bz-i room kawngkhar chu ka kik karh karh a,"Lo lut rawh,"zangkhai tak hian a rawn ti a,a tha sawt viau anih ka ring,ka awm lo rei lo viau na chu hma a lo sawn viauin ka hria.

Kawngkhar chu herh hawngin ka lut a,ka pen lut zui a,khumah chuan inbual zo tih hriat takin a lo thu mu a,a sam a huh hliam a, lehkhabu a lo inchhawp bawk a,nuih sangin,"I lo tha maw?"zangkhai thei ang ber tura ka hriat chuan ka ti a,min lo nuih let nia,a tiha mawi lo a ni.

"Tha e,lo lut ru,Kion a mi kha kha?"a lo ti ve var a,nula hmel chhia a ni lo bawk a,hmuh a nuamin a nui hmel hmuh chu engti zawng emaw hian a hahdam thlak riauin ka hria.

"Aw,ni e,"a khum sirah chuan ka thu thla a,a lehkhabu chhiar lai chu a dah a,min rawn enin,"Nutei bula awm chu a nuam vak na nge?"a lo ti ve mial a, tawi tein ka nui a,ka chhanna chu a hrechiang khawp ang le.

"A ri buan buan zel tawh thin a,"a rawn ti leh a,tih danglamna a chang emaw ka ti hial tawh,a danglam êm a ni.

"Nia,ka pa'n a hrilh che a mi?"

"Aw,mahse ka pa'n a lo biak hma che khan nutei zawk khan ka nu a rawn bia a,"a ti a,ni tak maw,"A thinrim viau a mi?"a mitah tak ka en ran tawh.

"Ka nu maw?"

"Aw"

"Rim lutuk lo ve, ka pa nen kan lo beng dai hman a,"a tih hnuah,'Sawi tawh rih lo ang,' tih melh tak hian min rawn melh a,ka nau pawm lai a en takah chuan ka hrechhuak veleh chiah.

Dar kar chanve dawn kan awm hnu chuan kawngkhar an rawn kik a,lut tura ka lo chhawn rualin u Rintluanga a rawn lut a,"Haw a hun tawhin ka hria,"ka bulah rawn dingin ka darah a kut a rawn nghat a,a hmel ka han en chuan engmah ka chhiar thiam lo.

"A la hma viau lo a mi?La awm rih ula,"ka lo ti a, lu thingin,"Kan va haw phawt zawk ang,kha i tha maw?"Bz-i en chungin a tih zawm zat a, Bz-i pawn tha takin a lo chhang ve mai.

Haw a tih tak tet tetah chuan kan inzui chhuak a,pawn kan chhuah rualin,"Engtin nge a tih?"ka ti tawng a,"Eng?"a lo ti daih a,a hre lo der zawk em maw ni.

"Aw....ka pa chuan engtin nge a lo tih?"ka phi ruai tawhin ka hria,"E...kha kha maw,aw,"a ti leh a,"Eng aw?"min chhan dan ber kher vang chu nge ka dawh thei thlawt lo.

"A phal anih chu, naktuk zanah palai ka rawn tir ang,"a ti a,"A va hma ve,"ka meng phawk tha khawp ang,a kiai suk a,"Hma lo hma lo,"a ti a,Kion chu pawmin a motor-ah a luhpui thên a, a chim awm a chhuah ve khang lang em maw ni.

"U Rin,"min lo pawt chatin,"Naktuk zan,kan innei thei tep,"a tia a tlan chhuak daih a,min ti hrilh hai letling zawk.

Muang changin inchhungah ka lut a, actress-i leh ka pa chu sitting room-a thu chung hian an lo titi a,an sawi mûk hmel khawp mai.

Kal pelh mai ka tum chu ka pa'n min lo ko ding a,"Lo thu lawk teh,thil sawi ho lawk ang u,"a lo ti charh charh a,u Rintluanga nena an thil sawi kha anih ka ring deuh a,ka ring sual lo chiang hle bawk.

"Kha, Rintluanga nen khan in lo inzui a ni maw?"ka mitah tak a en a, en rei duh loin ka hawi san a,"Immm,"ka ti ringawt a,a tawi tha tek tawk khawp mai.

"Palai rawn tirh kha a duh a, nangpawh i naupang chhe zawk zawk tawh lo a,i nu nen lah kan dampui reng dawn lo che a, Rintluanga lah mipa sual a ni lo a, innghahna tlak mipa ania,I thu hmu lo chuan a tih ka lo ring lo ringawt a,"a ti leh a,ka lo bu nghat.

"I nu te nen kan pathum a kan ngaihtuah hnuin naktuk zan hian rawn tir mai se kan lo ti deuh a,"a ti leh dap dap a,ka hriat hnu mah ni se ka awih thei lo lek lek, actress-i lah chuan ka rin loh lutuk mai a rawn phuh chhuak a,engkim hi mumang a ang ka ti a,mang maia man atan erawh ka phal hauh lo thung.

"A naupang zawk te i nia, keima lam pawh kan lo rawn ve ang nga,mi anga tha pui pui leh tam tham tak tih tur nei lo mah ila i mualpho bik lo ang,kan tang khawm dawn nia,"a lo ti veleh a,ka lawm lutuk a awm ngaihna pawh ka hre meuh lo,ka tap pur ringawt.

"Ka room-ah kan kal lawk,"ka insum thei dawn lo tak ngiala ka hriat vang chuan ka ti a,min chhanna pawh ngai chang zui loin ka room lamah chuan a tlanin ka tlan a,ka luh meuh chuan insum thei loin ka tap ta zawih zawih.

Ni e,vawi tam ka rilru nat vangin ka lo tap tawh thin a, tuna ka tan chhan erawh a dan a dang ta zar mai,hlimna avanga ka tah hi ka ring ngai lo a,mahse tunah hian ka hlim lutuk vangin ka tap mek a ni.

Ka phone a rawn rik takah chuan inhru hul sawk sawkin ka kekawr ipte-a ka phone dah chu ka la chhuak a, Tlankimi phone call a lo ni.

Ka lak rual rualin,"Eng nge in chanchin?"a rawn ti a,thil thleng mek ka hrilh meuh chuan a rawn phur khawp a,a rawn phi chul a,kan nui kan nui ringawt.

"Awii! keichu ka phur emai,Lalmuan, pasal neih khalh che ka tum asin le,"a rawn ti nuah nuah a,em em thin hian aw....

"Em em a che Laltlankim,"ka lo ti ve kha kha a,a rawn nui vei kur kur a,"I senior ve tawh ang reng siah ka kian mai ang che,"a ti leh a,a phawk a chhuak leh tlat tawh, henu tak hi chu(h)!

"Enteh Muani,kan hlim viau na chu Hriati te lam khan eng emaw an rawn tih leh ka ring tlat,an chet dan ka ngaihtuah ka ngaihtuah hian chuti maia an tawp mai ka ring lo,"thu tak zawk hian a rawn ti ta a,ni e ka lo ngaihtuah leh miah lo a, chuti mai chuan an duh tawk hauh lo ang le.

"Nia tiraw,ka lo ngaihtuah tawh miah lo a,an la hlauhawm chauh maithei a ni,"ka ti ve a,ka ngaihtuah chiang a,ni e phat rual lohin ka hlauthawng a ni,an rapthlak si a,a tu a te tan pawh hian an hlauhawm tawh.

"Muan,mahse i rilru kha ti hah duh suh, Rintluanga a awm alawm,"a tih ri chu ka bengah a ri nawn tluk tluk a,kan inbiakna kan tih tawp hnu pawh chuan ngaih tha deuhin ka awm phah hialin ka hria.

U Rintluanga sawi ang ngeiin a tuk zan chuan palai hmel ka hmu ve ta a,thut ve kur kha mawi hek lo,ka nu'n Bz-i nen room-ah min awm tir a,kan awm hle hle thei lo,kan phi sek a,Kimi nen lah kan in text tawp thei lo.

"An rel zawh tawh i ring em?"Bz-i nen chuan kan in zawt tawn sek a, kawngkharah chuan vawi engzat nge kan beng kan dawh tawh pawh ka hre seng lo.

Kan beng kan dawh leh rualin kawngkhar chu a rawn in hawng a,ka nu a rawn lang zui a,kan lo awm dan a hmuh chuan a ham haih hmel khawp mai.

"An haw tawh a,tha tak chuan kan lo chhawn a,kar thar lamah an rawn leng leh ang,"a ti a,han dawn sawn vak dan pawh ka hre lo.

Mut pahin u Rintluanga nen kan inbia a,ani leh ni lo angin a rawn uang khawp a,eng nge maw a hriat ni...

"Kion a muhil tawh em?"

"A zanlai tawh"

"Kan intawn dan hi mak i ti ve ngai em?"

"Ti tehreng mai,ka hmuh hmasak ber ni che kha chuan Junior-a kha i lo pawm kha ania,"a nui ri suk a, keipawh chuti tho.

"Amak e....tunah tiang hi kan ni ta mai sia"

"Ni e,taka ka zawt ang che ka tia Christmas hmaa inneih hi eng nge i ngaihdan?"a ti leh a,ka phu zawk thei,"Kha te chu chhungten an rel thin lo a mi?"ka lo ti thuai a,"Pa Biaka hi ka hrilh thei dawn a,inneih vat vat ka duh,"a ti zui a, han duh dan vak ka nei lo, ka neih tur hi u Rintluanga anih chhung chu ka inpeih at reng.

"In tih dan dan a ni mai,"ka ti a, an thu tlukna siam apiang kha kei chuan ka pawm em em vek,"Anih chuan ka lo sawi dawn nia,hei a tlai tawh riau mai,muhil tawh rawh."

"Aw,le nangpawh mu tawh rawh"

"Tui deuhin I mu dawn"

"Nangpawh,muttui le,"kan inbiakna kan ti tawp zui a,ka mut dan chu siam remin ka phone chu ka lukham hnuaiah ka rawlh lut a,ka muhil zui nghal chu a ni der.

Ka phone ri-ah ka harh a,meng nang hlei lo chuan,"Hello,"phak deuh hian ka ti a,"I tho tawh em?"a aia phak mah hian u Rintluanga'n a rawn ti a,a la tho bik lo anih ka hmel e.

"La tho nang,nang I la mu a mi?"

"Aw,nizanah Junior-a khua a sik leh hluah a,kan meng rei deuh a,"a rawn ti leh a,a ham ri zui bai bai,"A van zia lo e,tunah a la mu a mi?"

"Dar 3 vel khan kan mu ve chauh a,a lam a lam che a, a nat ber lai pawn ka bul aiin i kiangah a hahdam zawk anih hmel,"a rawn ti a,a thusawi chuan engtin emaw riau hian min ti danglam a,ka awm a nuam veng veng mai.

"Anih chu,min lo call mai lo anih chu,"ka lo ti let a,a nui ri suk ri ka hre zui a,min ti bang bo ang reng.

"Kan inneih hunah hian ka bang bik leu ang nge aw,"a tia,awii! ka thu tak tehlul nen,"I va hahthlak tak, school pawh a kal thei lo ang a?"

"Nia...kal rih lo mai rawh se,"pangngai deuh zawkin a rawn ti a,"Hna I kal daih awm sia...tunge lo awm ang?"ka ti a,ka ngaihtuah takzet.

"Brenda-i koh ka lo rilruk deuh a,"a lo ti var a,ka bulah awm thei se ka ti,"I hna kal pahin lo thlah la,ka lo awmpui mai ang nga,keipawn ka ngai ve tho a,"ka ti a, Brenda-i tih buai leh thin ai chuan ka bulah awm se ka ti deuh a ni.

"A inthlahrunawm awm emai,vawiin na na na chu Brenda-i bulah lo awm se,"ka lo pawt chat a,"Nangpawn,'A lam a lam che' i tia ka bula awm tura ka tihin min hnial leh bawk sia,ka bula awm tir i phal lo a ni maw..."lungawi lo derin ka ti a,a rawn pha nasa khawp mai.

"Phal te chu phal tehreng e,ka duh danah phei chuan i bulah awm reng thei se ka tia,mahse nangmah ringawt ngaihtuah theih I ni lo a,i chhungte pawh an zahawm alawm,innei kan la ni si lo a,kan rawn tih buai che kha a la rem lutuk lo alawm,nang chu i fel kha,i hrethiam tiraw?"a tia awii! hepa hi... naupang thlemin min thlem nia.

"Hmm.... naupang chhia ka nih loh hi aw,lo dah la...ka chhungte pawn a hrethiam tho ang,"ka ti a,min hnial nasa viau nain ka ngen nasat lutuk vang nge hreh deuhin aw min pawh ta ringawt.

Kan inbiakna kan tih tawp hnu chuan ka tho chhuak a,ka nu a lo tho ve mial a,min hmuh rual chuan thingpui min lo siam vat a,ka ni hman chu a nuam hle dawn anih hi.

"Nu,"a rawn hawi zawk a,zawhna mitmengin min en bawk,"Nizanah Kion-a khua a sik a,u Rintluanga nen khan kan inbia a,ani hna kal a ngai bawk sia,Kion kha awm a ngai sia,a cousin chu a awm tho a,mahse nizana a khua a sik lai pawn min lam reng u Rintluanga'n a tia chhuna heta lo awm zawk a rem em?"ka ti a.

"Rem e,keini tan pawh in pawhna ve zel a ni mai a,lo awm rawh se, puitling thuai awm ai chuan naupang te hi awm ve se a tha ang, bakah kha Kion kha chu a hmel a tha a,a nung chang te kha a tha riau a,"tiin a fak zui luam a, ngaihthlak chu nuam ve tak a ni.

"Ka pa a walk a mi?"

"Aw,a lo let leh tep tawh ang,"a tih lai mekin Bz-i pawh a rawn tho chhuak ve a,ka nu nen kan lo chiau au thuai a,a lo tho chhuak peih chu thil lawmawm tak a ni.